Biblica® Open Sorani Kurdish Book of Life
یەکەم کۆرنسۆس 16
پارهكۆكردنهوه بۆ باوه‌رداران
به‌ڵام له‌باره‌ی كۆكردنه‌وه‌ی یارمه‌تی بۆ برا پیرۆزه‌كان، چۆن كۆمه‌ڵه باوه‌ڕداره‌كانی ناوچه‌ی غه‌ڵاتییه‌م ڕاسپاردووه، ئێوه‌ش ئاوا بكه‌ن. با هه‌ر یه‌كه‌تان له‌ڕۆژی یهكشهممه چه‌ند پارهی لهتوانادایه بیخاته لایه‌ك، تا ئه‌و ڕۆژه پاره كۆنه‌كرێته‌وه كه ده‌گه‌مه لاتان. جا كاتێ گه‌یشتمه لاتان، كێ بهباش ده‌زانن له‌ناو خۆتان ده‌یاننێرم به‌نامه‌وه تا ئه‌و یارمه‌تییه‌ی كۆتانكردۆتهوه بۆ قودس بیبه‌ن. ئه‌گه‌ر پێویست بوو، خۆم له‌گه‌ڵیان ده‌ڕۆم. كاتێ دێم بۆ لاتان تێ‌ده‌په‌رم بهناوچهی مه‌كدۆنیا، چونكه ده‌بێ به‌مه‌كدۆنیادا بڕۆم. له‌وانه‌یه ماوه‌یه‌ك لاتان بم، یاخود له‌وانه‌یه هه‌موو زستان لاتان بمێنمه‌وه، ئینجا ڕێگای سه‌فه‌رم بۆ ئاسان بكه‌ن بۆ هه‌ر شوێنێك كه ده‌مه‌وێ. چونكه ئه‌مجاره نامه‌وێ ته‌نها به‌سه‌ر پێی بتانبینم، به‌ڵكو هیوادارم گه‌ر خوداوه‌ند خواستی له‌سه‌ربێ ماوه‌یه‌كی زۆر لاتان بمێنمه‌وه. به‌ڵام هه‌تا ڕۆژی په‌نجاهه‌مین له ئه‌فه‌سۆس ده‌مێنمه‌وه، چونكه ده‌رگای پانو به‌رین بۆ ئیشی كاریگه‌ر كراوه‌ته‌وه بۆم، هه‌رچه‌نده زۆر دوژمنیشم هه‌یه.
گه‌ر تیمۆساوس بۆ لاتان هات، با به‌ئاسوده‌یی له‌ناوتان بێ، چونكه ئه‌ویش وه‌ك من كاری خوداوه‌ند ده‌كات. نامه‌وێ كه‌س بهسووكی سه‌یری بكات، به‌ڵكو له‌گه‌ڕانه‌وه‌دا یارمهتیبدهنو به‌ئاشتی به‌ڕێی بكه‌ن، چونكه منو برایان چاوه‌ڕێی ده‌كه‌ین، هه‌روه‌ها زۆر داوام لهئهپۆلۆسی برامان كرد هه‌تا له‌گه‌ڵ برایان بێو دیده‌نیتان بكات، به‌ڵام ئه‌و نه‌یویست ئێستا بۆ لاتان بێ، ئیتر كه‌ی بۆی ڕێكه‌وت ئه‌وسا بۆ لاتان دێت.
كۆتایی
ئێشكبگرن، جێگیربن لهباوهڕ، پیاوی ئازابن، به‌هێزبن. هه‌رچیه‌ك ده‌كه‌ن له خۆشه‌ویستیه‌وه بیكه‌ن. ئێوه ده‌زانن ماڵی ئیستیفانۆس پێشه‌به‌ره بوون له‌ئه‌خائیه، خۆیان ته‌رخان كردبوو بۆ خزمهتكردنی خوشكو برا پیرۆزه‌كان، داواتان لـێ‌ده‌كه‌م، ئه‌ی برایان، گوێڕایه‌ڵی ئه‌وان بن، له‌گـه‌ڵ هه‌مـوو ئه‌وانه‌ی له‌گه‌ڵیان ئیش ده‌كه‌ن. دڵشاد بووم به هاتنی ئیستیفانۆسو فهرتوناتوسو ئه‌خائیكۆس، چونكه شوێنی ئێوه‌یان گرته‌وه بۆم، ئه‌وان ڕۆحی منو ئێوه‌یان گه‌شانده‌وه، ئه‌و جۆره كه‌سانه ڕێزیان بۆ دابنێن.
كۆمه‌ڵه‌ی باوه‌ڕدارانی ئاسیا سڵاوتان لـێ‌ده‌كه‌ن، ئه‌كیلاو بریسكلا له‌گه‌ڵ ئه‌و كۆمه‌ڵه‌ی لهماڵهكهیان كۆده‌بنه‌وه به‌ناوی خوداوه‌ند به‌گه‌رمی سڵاوتان لـێ‌ده‌كه‌ن. هه‌موو برایان سڵاوتان لـێ‌ده‌كه‌ن، ئێوه‌ش بهماچی پاكو پیرۆز سڵاو له‌یه‌كتری بكه‌ن.
منم پۆڵس سڵاوی منتان لـێ‌بێ كه به ده‌ستی خۆم بۆتان ده‌نووسم. به‌ڵێ ئه‌و كه‌سه‌ی عیسای خوداوه‌ندی خۆشناوێ با نه‌فره‌تی لـێ‌بێ. (ماراناسا) [واتای: ئه‌ی خوداوه‌ند وه‌ره]. به‌ره‌كه‌تی عیسای مه‌سیحی خوداوه‌ندتان له‌گه‌ڵ بێت. به‌و خۆشه‌ویستیه‌تان ده‌سپێرم كه لهعیسای مه‌سیحه. ئامین.
Biblica® Open Sorani Kurdish Book of Life. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.