Biblica® Open Sorani Kurdish Book of Life
یەکەم کۆرنسۆس 14
دوان به‌ووشه‌ی خودا
با خۆشه‌ویستی ئامانجتان بێ، ئاره‌زووی به‌هره ڕۆحیه‌كان بكه‌ن، به‌تایبه‌تی دوان به ووشه‌ی خودا، ئه‌وه‌ی به‌زمانه ڕۆحیه‌كان بدوێ، قسه له‌گه‌ڵ خه‌ڵك ناكات، به‌ڵكو له‌گه‌ڵ خودا، كه‌س لێی تێناگات، چونكه ئه‌وه‌ی ئه‌و به‌هۆی ڕۆحی پیرۆز ده‌یڵێ نهێنییه. به‌ڵام ئه‌وه‌ی به‌ووشه‌ی خودا ده‌دوێ، ئه‌وه بۆ بنیادنانو هاندانو دڵنه‌واییه. ئه‌وه‌ی به‌زمانه ڕۆحیه‌كان ده‌دوێ، ئه‌وا خۆی بنیاد ده‌نێ، به‌ڵام ئه‌وه‌ی به‌ووشه‌ی خودا ده‌دوێ، ئه‌وا كۆمه‌ڵه‌ی باوه‌ڕداران بنیاد ده‌نێ. من حه‌ز ده‌كه‌م هه‌مووتان به‌زمانه ڕۆحیه‌كان بدوێن. به‌ڵام باشتره به‌هره‌ی دوان به‌ووشه‌ی خوداتان هه‌بێ، چونكه ئه‌وه‌ی به‌ووشه‌ی خودا ده‌دوێ مه‌زنتره له‌وه‌ی به‌زمانه ڕۆحیه‌كان ده‌دوێ، ته‌نها گه‌ر یه‌كێك بتوانێ ڕوونیبكاتهوه، ئه‌مه‌ش ببێته هۆی بنیادنانی كۆمه‌ڵه‌ی باوه‌ڕداران. ئه‌ی برایان، ئێستا وابزانن من هاتووم بۆ لاتانو به‌زمانه ڕۆحیه‌كان له‌گه‌ڵتان ده‌دوێم، لێره چ سوود لهمن وه‌رده‌گرن، گه‌ر بینینو زانیاریو دوان به‌ووشه‌ی خوداو فێركردنی تیادا نه‌بێ؟ ته‌نانه‌ت ئامێرێكی مۆسیقای بێ‌ڕۆح، بۆ نموونه شمشاڵو ساز، گه‌ر ده‌نگی جیاوازیان نه‌بێ، چۆن گوێگر بزانێ كامه‌یان ده‌نگی شمشاڵه‌و كامه‌یان ده‌نگی سازه؟ گه‌ر بێتو كه‌ڕه‌نای شه‌ڕ ده‌نگه‌كه‌ی ئاشكرا نه‌بێ، كێ خۆی ئاماده ده‌كات بۆ شه‌ڕ؟ ئێوه‌ش هه‌روه‌ها گه‌ر بێتو به زمانی ڕۆحی بدوێنو كه‌س لێتان تێنه‌گات، ئیتر چۆن خه‌ڵكی بزانێ چی ده‌ڵێن؟ ئایا وه‌ك ئه‌وه نییه له‌گه‌ڵ هه‌وا بدوێن؟ له‌جیهان ئه‌وه‌نده زمان هه‌یه لهژماردن نایه‌ن، به‌ڵام هیچیان بێ‌واتا نییه. گه‌ر بێتو من له‌واتای زمانێك تێ‌نه‌گه‌م، ئه‌وا ده‌بێته بێگانه‌و ئه‌و كه‌سه‌ی به‌و زمانه‌ش ده‌دوێ، هه‌روه‌ها منیش ده‌بمه بێگانه بۆ ئه‌و كه‌سه. كه‌واته ئێوه‌ش، گه‌ر به‌په‌رۆش بن بۆ به‌هره‌ی ڕۆحی، زیاتر هه‌وڵی بۆ بده‌ن له‌پێناوی گه‌شه‌كردنی كۆمه‌ڵه‌ی باوهڕدارانو په‌ره‌سه‌ندنی.
له‌به‌رئه‌وه پێویسته له‌سه‌ر ئه‌وه‌ی به‌زمانه ڕۆحیه‌كان ده‌دوێ، نوێژ بكات تا خودا هێزی ڕوونكردنه‌وه‌ی زمانه‌كانی بداتێ. چونكه گه‌ر من به‌زمانه ڕۆحیه‌كان نوێژم كرد، ته‌نها ڕۆحم نوێژ ده‌كات، به‌ڵام مێشكم هیچ به‌رووبوومی نابێت. كه‌واته چی بكه‌م؟ به‌ڕۆح نوێژ ده‌كه‌م، هه‌روه‌ها بهمێشكیش نوێژ ده‌كه‌م. به‌ڕۆح گۆرانی ده‌ڵێم، هه‌روه‌ها بهمێشكیش گۆرانی ده‌ڵێم. ئه‌گینا گه‌ر تۆ به‌ڕۆح ستایشی خودا بكه‌ی، چۆن ده‌بێ یه‌كێكی ده‌ره‌وه به‌سوپاس كردنه‌كه‌ت بڵێ (ئامین)؟ چونكه ئه‌و نازانێ تۆ ده‌ڵێی چی. له‌وانه‌یه سوپاس كردنه‌كه‌ت باش بێ، به‌ڵام ئه‌وه‌ی تر بنیادنانرێ. سوپاس بۆ خودا لهههمووتان زیاتر ده‌توانم به‌زمانه ڕۆحیه‌كان بدوێم، به‌ڵام له‌كۆمه‌ڵه‌ی باوه‌ڕداران به‌لامه‌وه باشتره پێنج ووشه بڵێم به‌مێشكمه‌وه كه خه‌ڵكی لێی فێر ببێ، له‌وه‌ی كه ده هه‌زار ووشه بڵێم بهزمانهكان كه‌س لێیتێ‌نه‌گات. ئه‌ی برایان، لهبیركردنهوهدا وه‌ك منداڵ مه‌بن، به‌ڵكو له‌ئاست خراپهكاریدا وه‌ك منداڵی ساوا بن. به‌ڵام لهبیركردنهوهدا وه‌ك یه‌كێكی گه‌وره‌و تێگه‌یشتوو بن. لهشهریعهت نووسراوه: [[خوداوه‌ند ده‌ڵێ، به‌زمانی بێگانهكانو به‌لێوی نامۆكان قسه له‌گه‌ڵ ئه‌م گه‌له ده‌كه‌م، له‌گه‌ڵ ئه‌مه‌ش گوێم لێ ناگرن.]] كه‌واته زمانه‌كان نیشانه نییه بۆ باوه‌ڕداران به‌ڵكو بۆ بێباوهڕان، به‌ڵام دوان به‌ووشه‌ی خودا بۆ باوه‌ڕدارانه نه‌ك بۆ بێباوهڕان. گه‌ر ئه‌ندامانی كۆمه‌ڵه‌ی باوه‌ڕداران هه‌موو به‌یه‌كه‌وه كۆبوونه‌وه، له‌وێ هه‌موویان به‌زمانه ڕۆحیه‌كان قسهیانكرد، ئینجا یه‌كێكی نه‌زان یاخود بێباوهڕ بێته ژووره‌وه، ئایا ناڵێ ئێوه هه‌مووتان شێتن؟ به‌ڵام به‌پێچه‌وانه‌ی ئه‌مه گه‌ر بێتو هه‌موو به‌ووشه‌ی خودا بدوێنو یه‌كێكی نه‌زان یاخود بێباوهڕ بێته ناوتان، هه‌موو سه‌رزه‌نشتی دهكهنو هه‌موو حوكمی به‌سه‌ر ده‌ده‌ن. ئه‌مه وای لێ‌ده‌كات نهێنی دڵی ئاشكرا بكات، ئه‌وسا ئه‌و كه‌سه كڕنووش ده‌باو خودا ده‌په‌رستێ، دانبهوهدا ده‌نێ خودا به‌ڕاستی لهنێوانتانه.
كۆبوونه‌وه‌ی ڕێكوپێك
ئه‌ی برایان، كاتێ ئێوه كۆده‌بنه‌وه هه‌ریه‌كه‌تان شتێكی هه‌یه، یه‌كێك گۆرانی ڕۆحی، یاخود وانـه‌یــه‌كی فێركردن، یا بینین، یان دوان به‌زمانه ڕۆحیه‌كان، یان ڕوونكردنه‌وه‌ی زمانه‌كان. باهه‌موو شتێك بۆ بنیادنان بێ. با دووان یا سیان بهزمانهكان بدوێن یه‌ك له‌دوای یه‌ك، به‌ڵام هه‌ر یه‌كێك ڕوونیانبكاتهوه. به‌ڵام گه‌ر له‌وێ كه‌س نه‌بوو ڕوونی بكاته‌وه. ئه‌وسا ده‌بێ له‌كۆبوونه‌وه بێدهنگبنو له‌دڵی خۆتان بۆ خۆتانو بۆ خودا بدوێن. هه‌روه‌ها ئه‌وانه‌ی به‌ووشه‌ی خودا ده‌دوێن، ته‌نها ده‌توانن دووان یان سیانیان بدوێن، ئه‌وانی دیكه ده‌بێ قسه‌كانیان هه‌ڵسه‌نگێنن. گه‌ر هاتوو یه‌كێك لهدانیشتوان له‌لایه‌ن خوداوه بینینێكی بۆ ڕاگه‌یه‌نرا، پێویسته له‌سه‌ر ئه‌وه‌ی ده‌دوێ بێ‌ده‌نگ بێ، ئێوه هه‌موو ده‌توانن یه‌ك له‌دوای یه‌ك به‌ووشه‌ی خودا بدوێن، هه‌تا هه‌موو فێربنو هانبدرێن. ڕۆحی ئه‌وانه‌ی به‌ووشه‌ی خودا ده‌دوێن ملكه‌چن بۆیان، چونكه خودا، خودای ئاژاوه نییه، به‌ڵكو خودای ئاشتییه. هه‌روه‌ك له‌هه‌موو كۆمه‌ڵه‌كانی خوشكو برا پیرۆزه‌كان، ژنان بێ‌ده‌نگ ده‌بن له‌كاتی كۆبوونه‌وه‌دا، چونكه ئه‌وان نابێ قسه بكه‌ن پێویسته ملكه‌چ بن به‌و شێوه‌یه‌ی شه‌ریعه‌ت ده‌یڵێ. به‌ڵام گه‌ر ویستیان شتێك فێربن، با لهماڵهوه لهمێردهكانیان بپرسن. چونكه شوره‌ییه بۆ ژن له‌ناو كۆبوونه‌وه بدوێ. ئایا ووشه‌ی خودا له‌لای ئێوه‌وه هاتووه، یاخود ته‌نها بۆ لای ئێوه هاتووه؟ گه‌ر یه‌كێك خۆی به‌هه‌ڵگری ووشه‌ی خودا بزانێ یاخود بهڕۆحی دانا، بابزانێ ئه‌وه‌ی بۆتانی ده‌نووسم ڕاسپارده‌ی خوداوه‌نده. گه‌ر یه‌كێك ئه‌وه نه‌زانێ، با هه‌ر نه‌زانێ. كه‌واته ئه‌ی برایان، به‌دڵگه‌رمییه‌وه هه‌وڵ بده‌ن به‌ووشه‌ی خودا بدوێن، هه‌روه‌ها ڕێی دوان به‌زمانه ڕۆحیه‌كان له‌كه‌س مه‌گرن. به‌ڵام هه‌موو شتێك پێویسته دروستو ڕێكوپێك بێ.
Biblica® Open Sorani Kurdish Book of Life. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.