Koya Bible
ହିତୋପଦେଶ 5
ବ୍ୟବିଚାର୍ ବିରୁଦ୍ଦତେ ଚେତନା
ହୋ ନା ମାର୍, ନା'ଜ୍ଞାନତେ ମନ୍ ଇମ୍; ନା'ବୁଦ୍ଦ୍ ପର ମିଇ କେୱୁତାରାଟ୍; ବେଲାନେ ମିଇ ଲେକେତ୍ ବିଶ୍ୱାସ୍ତେ ମାନ୍ଦାନଙ୍କ୍ ପାର୍ତିଡ଼୍ ନୁ ବେଲାନେ ମିଇ ପାୟୁର୍ ସାୟେତ୍ ଗଟି ପାଲନ ମାଡ଼୍ପାର୍ତେ । ବେଲାକି ବ୍ୟବିଚାର୍ ନାଟାଡ଼୍ତେ ପାୟୁର୍କନ୍ ବଟ୍କ୍ ବଟ୍କ୍ ଉର୍ୱେନିୟ୍ ପେୟିତିତ୍, ତାନ୍ ମକମ୍ କଞ୍ଜ୍ ନିୟ୍ଦାଗାଙ୍କ୍ ନିୟିମ୍ ଗଟି ପେୟିତିତା । ବାତେଙ୍କ୍ଇତ୍କେ ତାନ୍ ଶେଷ କାୟେ କାୟିତେ ମାଡ଼େତ୍ ରସ୍ ଇନା, ୱାୟେମାନ୍ଦାନ୍ କଡ଼୍ଗ ଇନା ସୁଜେ । ତାନ୍ ପାଦାମ୍ ଡଲାନ୍ ପାକେ ଡିଗିଆଦ୍ତେ; ତାନ୍ ପାଦାମ୍ ସିଦା ୱିସ୍କିନାଗ୍ ରାଲିତ୍; ଆଦିଙ୍କ୍ ଆଦ୍ ଜିଉନ୍ତେ ସାମାନ୍ ଆର୍ ପାହେମ୍ ଆୟ; ତାନ୍ ଆର୍ ସାରେ ସିଟ୍ପାଟ୍, ମେଣ୍ଡେ ଆଦ୍ ପୁଃନ । ଇଦିନ୍ ମାଇଦିଙ୍କ୍ ହୋ ନା ମାର୍କ୍, ନା'ଗଟି କେଞ୍ଜାଟ୍ ନୁ ନା କେତାନ୍ ବାକ୍ୟକଞ୍ଜ୍ ୱେରେ ଆୟିମାଟ୍ । ଆଦ୍ଲେକାତ୍ ନାଟାଡ଼୍କନ୍ ନିଜେତ୍ ଆର୍ ଜେକେ ନେଃମୁଟ୍ ନୁ ତାନ୍ ଲତ୍ତେ ଦୁୱାଡ଼୍ ଗାରେ ଆନ୍ମାଟ୍ । ଉମ୍ଭକି ମି ୱେରେତଡ଼୍ ନିଜେତ୍ ଇଜ୍ଜତ୍ ଅଦ୍ତଡ଼୍ ନୁ ତାନ୍ ମୁଦ୍ପାଲ୍ ମୁର୍କ ଆସ୍ମାତ୍କେ ନିକିଙ୍କ୍ ଆୱୁକେ ପାର୍ତଣ୍ଡ୍; ଉମ୍ଭକି ପୁନ୍ୱେ ନାରୁଡ଼୍କ୍ ନି ବପୁତେ ପୁରା ଆଦ୍ତଡ଼୍ ନୁ ମିଇ ତିପାଲ୍ତେ କାୟେ ବିଦେଶିନ୍ ଲତ୍ତାଗ୍ ନେଃତିତଡ଼୍; ମେଣ୍ଡେ ମି ଡଲାନ୍ ଅବସ୍ଥାତେ ବେସୁଙ୍କ୍ ନି ଆୱୁଙ୍ଗ୍ ନୁ ମେନ୍ଦୁଲ୍ ଦୁର୍ବଲ୍ ଆଦ୍ତେ, ଉମ୍ଭକି ମିଡ଼୍ ଦୁଃକ ଆଦ୍ତିଡ଼୍, ମେଣ୍ଡେ କେତିଡ଼୍, ନା ସାୟେତ୍ ଶିକ୍ଷା ବେଲାନେ ପାସ୍କ୍ତାନ୍; ମେଣ୍ଡେ, ନା ମନ୍ଦେ ଏର୍କେତିଙ୍କ୍ ବେଲାନେ ପାସ୍କ୍ତେ; ନାନ୍ ନିଜେତ୍ ମେସ୍ତେରିଡ଼୍ ଗଟି ମାନେମ୍ ଆୟିନ୍ ନୁ ବେନଡ଼୍ ନାକିଙ୍କ୍ ଶିକ୍ଷା ଇତ୍ତଡ଼୍, ଅଡ଼୍ ବାକ୍ୟ ପର ନିଜେତ୍ କେୱୁତାରନ୍, ନାନ୍ ସମାଜ ନୁ ମଣ୍ଡଲିକିନାଗ୍ ପୁରା ସାରେପ୍ରକାର ଦୁଃକାମ୍ତେ ରାଲ୍ତାନ୍ । ମିଡ଼୍ ନିଜେତ୍ ଏଡ଼୍ମେତାଗାଙ୍କ୍ ଏର୍ ଉନ୍ନୁଟ୍ ନୁ ନିଜେତ୍ ନୁୟିଦେକନ୍ ପେୟିତାନ୍ ଏର୍ ଉନ୍ନୁଟ୍ । ମିଇ ଇଡ଼୍ପାମ୍ ବାତେ ବାୟିଦେ ଇକେଆକେ ଏକାମ୍ ଆଦ୍ତେ ? ନୁ ରାଜଦାଣ୍ଡତାଗ୍ ବାତେ ଇଡ଼୍ପାମ୍ ଏର୍ ପଙ୍ଗିଆଦ୍ତେ ? ଆଦ୍ ମାତର୍ ମିଇୟାଦ୍ ଆୟି, ମି'ତଡ଼୍ ପୁନ୍ୱେ ନାରୁଡ଼ାଦ୍ ଆୟିମା କି । ମିଇ ପେୟିତାନ୍ ଇଡ଼୍ପାମ୍ଏର୍ ଦନ୍ୟ ଆୟି; ମେଣ୍ଡେ, ମି ନିଜେତ୍ ଲେୟ୍ ଲେକାମ୍ତେ ନାଟାଡ଼୍କନ୍ ୱେଡ଼୍କେ ମାଡ଼ାଟ୍ । ଆଦ୍ ପ୍ରେମତେ କଡ୍ମାୱୁ ନୁ ସୁନ୍ଦର୍ ମେଟେତ୍ ମେକେ ଇନା, ତାନାଦ୍ ବମାନାଗ୍ ସାରେଦାମ୍ ନିକିଙ୍କ୍ ସାର୍ଦେ ମାଡ଼ିତ୍; ମେଣ୍ଡେ, ତାନ୍ ପ୍ରେମତେ ମିଡ଼୍ ସାରେଦାମ୍ ମାୟି ମାନୁଟ୍ । ହୋ ନା ମାର୍, ୱେରେ ନାଟାଡ଼୍ତେ ପରୁ ମିଡ଼୍ ବାତିଙ୍କ୍ ମାୟି ମାନ୍ତତିଡ଼୍ ? ନୁ ୱେରେତଡ଼୍ ବର୍ତାଗ୍ ବାତ୍ତିଙ୍କ୍ ଉର୍ଙ୍ଗିତିଡ଼୍ ? ବେଲାକି ନାରୁଡ଼୍ ସାରେ ଆର୍ ସଦାପ୍ରବୁନ୍ କଣ୍ଡେତ୍ ମୁନେମିନ୍ତେ ନୁ ଅଣ୍ଡ୍ ଆଦିନ୍ ସାରେ ଆର୍ ସମାନ୍ ମାଡ଼ିଦ୍ତଣ୍ଡ୍ । ଦୁଷ୍ଟ ନାରୁଡ଼୍ ନିଜେତ୍ ଅପରାଦ୍ତେ ଆଦିଙ୍କ୍ ପୟିତିଡ଼୍, ଅଣ୍ଡ୍ ନିଜେତ୍ ପାପ୍ ଲେକାତ୍ ନଡ଼୍ତେ ତଃସ୍ ଆଦ୍ତିଡ଼୍ । ଅଣ୍ଡ ସାୟେତ୍ ଶିକ୍ଷା ଅବାବ୍ତେ ଡଲିତିଡ଼୍ ନୁ ନିଜେତ୍ ମୁର୍କ ବୁଦ୍ଦ୍ତେ ସେଙ୍ଗେ ମାୟିତଣ୍ଡ୍ ।
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.