Koya Bible
ହିତୋପଦେଶ 4
ଜ୍ଞାନତେ ଲାବ୍
ହୋ ନା ମାର୍କିନଡ଼୍, ବାବାନ୍ କେତାନ୍ ଶିକ୍ଷା କେଞ୍ଜାଟ୍ ନୁ ସାୟେତ୍ ବିଚାର୍ତାଗ୍ ଜ୍ଞାନ ଇମୁଟ୍ । ବେଲାକି ନାନ୍ ମିକିଙ୍କ୍ ସାୟେତ୍ ଶିକ୍ଷା ଇଦୁତମ୍, ନା ଆଦେଶ୍ତିଙ୍କ୍ ୱିଡ଼୍ସ୍ମାଟ୍ । ନାନ୍ ନିଜର ବାବାନ୍ ମାର୍ ମାତ୍ତାନ୍, ମେଣ୍ଡେ, ୟାୟନ୍ କଣ୍ଢେତେ ସୁଦୁନନ୍ ନୁ ୱେରନ୍ ମାତର୍ ପ୍ରିୟ ମାତ୍ତାନ୍ । ବାବାଲ୍ ନାକିଙ୍କ୍ ଶିକ୍ଷା ଇସ୍ କେତ୍ତଣ୍ଡ, ମିଇ ମନତେ ନା ଗଟି ସାରେ ନେମୁଟ୍, ମେଣ୍ଡେ ନା ନିୟମ୍ ପାଲନ ମାଡ଼ାଟ୍ ଆସୁଙ୍କ୍ ମିଡ଼୍ ଗେଲ୍ସିତିଡ଼୍ । ଜ୍ଞାନ୍ ଲାବ୍ ମାଡ଼ାଟ୍, ସାୟେତ୍ ବିଷୟ୍ ଲାବ୍ ମାଡ଼ାଟ୍, ଆଦ୍ ବୁଲ୍ ଇଲେ; ମେଣ୍ଡେ, ନା ପାୟୁର୍ତେ ବାକ୍ୟକନ୍ ମାଲ୍ପ୍ମାଟ୍ । ଆଦ୍ଦିଙ୍କ୍ ୱିଡ଼୍ସ୍ମାଟ୍; ଆଗେ ଅଣ୍ଡ ମିକିଙ୍କ୍ ପାଲନ ମାଡ଼ିତଣ୍ଡ୍; ଅକିଙ୍କ୍ ପ୍ରେମ ମାଡ଼ାଟ୍, ଆଗାକନ୍ ଅଣ୍ଡ ମିକିଙ୍କ୍ ରକ୍ଷା ମାଡ଼ିତଣ୍ଡ୍ । ଜ୍ଞାନ୍ ସାରେତିଙ୍କ୍ ବେଡ଼ିୟ୍ ବିଷୟ, ଆଦିଙ୍କ୍ ଜ୍ଞାନ ଲାବ୍ ମାଡ଼ାଟ୍; ମେଣ୍ଡେ, ମିଡ଼୍ ସାରେ ଲାବ୍କଞ୍ଜ୍ ସାୟେତାଦ୍ ଲାବ୍ ମାଡ଼ାଟ୍ । ଅକିଙ୍କ୍ ତାଲେତାଗ୍ କେର୍ସ୍ପାଟ୍, ଆସୁଙ୍ଗ୍ ଅଣ୍ଡ ମିକିଙ୍କ୍ ଉନ୍ନତ ମାଡ଼ିତିଡ଼୍; ଅଙ୍କ୍ ଉର୍ଙ୍କେ, ଅଣ୍ଡ ମିକିଙ୍କ୍ ସମାନ୍ତେ ଅଦିକାରି ମାଡ଼ିତଣ୍ଡ୍ । ଅଣ୍ଡ ମିଇ ତାଲ୍ତାଗ୍ ଅନୁଗ୍ରହତାଦ୍ କେର୍ଦାନାଦ୍ ଇଦ୍ତଣ୍ଡ୍; ଅଣ୍ଡ ମିକିଙ୍କ୍ ସୁନ୍ଦର୍ତାଦ୍ ମୁକୁଟ୍ ଇଦ୍ତଣ୍ଡ୍ । ହୋ ନା ମାର୍, କେଞ୍ଜା, ନା ଗଟି ପୟିମ୍; ଆସୁଙ୍କ୍ ନିୟାଦ୍ ବାଦ୍କାନାଦ୍ ୱାଡ଼୍ସା ନାର୍ଗେ ଆଦ୍ତେ । ନାନେ ମିକିଙ୍କ୍ ଜ୍ଞାନ୍ ଆର୍ଦେ ଶିକ୍ଷା ଇସ୍ମିନ୍ଦେନ୍, ନାନ୍ ସାୟେତ୍ ଆର୍ଦାଗ୍ ମିକିଙ୍କ୍ ତାସମିନ୍ଦେନ୍ । ମିଡ଼୍ ଆଦାନ୍ ୱେଲେ ମିଇ ପାଦାମ୍ ତାକାନ୍ ଆସୁଙ୍କ୍ ଅସୁବିଦା ଆୟ; ମେଣ୍ଡେ, ମିରାନ୍ ୱେଲେ ମିଡ଼୍ ତାଲ୍ଗ୍ୱିଡ଼୍ । ସାୟେତ୍ ଶିକ୍ଷା ଡ଼ୁଟାଙ୍କ୍ ପୟମୁଟ୍; ଅକିଙ୍କ୍ ୱିଡ଼ିସ୍ ମାଟ୍; ଅକିଙ୍କ୍ ନେମୁଟ୍; ବାତେଙ୍କ୍ଇତ୍କେ ଆଦ୍ ମିଇ ଜିୱୁନ୍ । କାରାପ୍ ନାରୁଡ଼୍ ଆର୍ଦାଗ୍ ନେଙ୍ଗ୍ମାଟ୍ ନୁ ଦୁଷ୍ଟ ନାରୁଡ଼୍ତଡ଼୍ ଆର୍ ତାକ୍ମାଟ୍ । ଆଦ୍ ୱିଡ଼୍ସାଟ୍, ଆଦିନ୍ ଗାରେ ଇସ୍ ଆନ୍ମାଟ୍; ଆଗେକନ୍ ୱେରେଆସ୍ ମାଲ୍ସ୍ ଆନ୍ନୁଟ୍ । ବେଲାକି ପିନ୍ଦ୍ୱେ କାମ୍ ମାଡ଼୍ୱକ୍ ଅଡ଼କ୍ ଉସ୍କାଡ଼୍ ୱାଡ଼, ମେଣ୍ଡେ ବେନଙ୍କ୍ ନଷ୍ଟ ମାଡ଼କଟ୍ମାତ୍କେ ଅଡ଼୍ ଉସ୍କାଡ଼୍ ୱିର୍ୟିତେ । ବାତେଙ୍କ୍ଇତ୍କେ ଅଡ଼୍ ଦୁଷ୍ଟନାରୁଡ଼୍ ଲେକାମ୍ କାଦି ତିନ୍ତଡ଼୍; ମେଣ୍ଡେ, ଇଂସାତେ ଅଙ୍ଗୁର୍କାଲ୍ ଉନ୍ତଡ଼୍ । ମାତର୍ ଦାର୍ମିକିନଡ଼୍ ଆର୍ ନାର୍କୁତେ ୱେସ୍ ଇନା, ବେନେ ମାଦ୍ନାମ୍ ଆୟିନା ମେଣ୍ଡେ ମେଣ୍ଡେ ୱେସ୍ ଆଦ୍ତେ । ମେଣ୍ଡେ, ଦୁଷ୍ଟନଡ଼୍ ଆର୍ ଇକାଡ଼୍ ଇନା; ଅଡ଼୍ ବେଗେବାଡ଼୍ ତାଲ୍ଗି ରାଲିତଡ଼୍, ଆଦ୍ ଅଡ଼୍ ପୁନ୍ନଡ଼୍ । ହୋ ନା ମାର୍, ନା ଗଟିନେ ମନଇମ୍; ନୁ ନା ବାକ୍ୟତାଗ୍ କେୱୁତାରା । ଆୱୁସାରେ ମିଇ କଣ୍ଡାନେ ଆନ୍ମାକି; ଆୱୁସାରେ ମିଇ ହୃଦୟତାଗ୍ ଯତ୍ନମାଡ଼ି ନେଃମୁଟ୍ । ବେଲାକି ଆଦ୍ ବେନଡ଼୍ ପାହେମ୍ ଆଦ୍ତଡ଼୍, ଅଡ଼୍ ପର ତାନ୍ ଜିୱୁନ୍ ନୁ ସାରେ ମେନ୍ଦୁଲ୍ ସାୟେ ଆଦ୍ତେ । ମିଇ ହୃଦୟତିଙ୍କ୍ ଅଦିକ୍ ଯତନ୍ତେ ନେମୁଟ୍; ବେଲାକି ଆଗାକନ୍ ଜିଉନ୍ତାଗାଙ୍କ୍ ସାୟେତ୍ ବିଷୟ୍ ପେୟିତିତ୍ । ମିଇୟାଗାକନ୍ କାରାପ୍ ମକମ୍ତାଗାଙ୍କ୍ ଜେକେ ମାଡ଼ାଟ୍ ନୁ ପେର୍ଲେ ଗଟିନାଗାଙ୍କ୍ ନାର୍ଗେ ଜେକେ ନେଃମୁଟ୍ । ମିଇ କଣ୍ଡା ମୁନେ ଉଡ଼ି ନୁ ମିଇ କଣ୍ଡାମିଣ୍ଡି ମିଇ ମୁନେ ତିନାଙ୍କ୍ ଉଡ଼ାଟ୍ । ମିଡ଼୍ ନିଜେତ୍ ପାଦାମ୍ ସାୟେ ତିନାଙ୍କ୍ ମାଡ଼େ ନୁ ମିଇ ସାରେ ଆର୍ ସାୟେତାୱୁ ଆୟି । ତିନ୍କାଇ କି ଡ଼େବ୍କାଇ ଆନ୍ମାଟ୍, ମେଣ୍ଡେ ମିଇ ପାଦାମ୍ କାରାପ୍ତାଗାଙ୍କ୍ ଦୁରାମ୍ ମାଡ଼େ ।
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.