Koya Bible
ଯିଶାଇୟ 14
ବନ୍ଦିନଡ଼ାଗାଙ୍କ୍ ମାଲ୍ତେନଡ଼୍
ବାତେଙ୍କ୍ଇତ୍କେ ସଦାପ୍ରବୁ ଯାକୁବତେ ପର ଦୟାମାଡ଼ିତଣ୍ଡ୍, ମେଣ୍ଡେ ଇସ୍ରାଏଲ୍ତିଙ୍କ୍ ମେଣ୍ଡନ୍ଦାମ୍ ହେଞ୍ଜିତଣ୍ଡ୍ ନୁ ଅଡ଼୍କିଂଙ୍କ୍ ଅଡ଼୍ ଦେଶ୍ତାଗ୍ ରଃସିଦ୍ତଣ୍ଡ୍, ଆସୁଙ୍କ୍ ବିଦେଶି ନାରୁଡ଼୍ ଅଡ଼୍ ସାଙ୍ଗ୍ କାଇଲିତଡ଼୍, ଅଡ଼୍ ଯାକୁବତେ ପିଲୁଡ଼୍ ପର ଇଚ୍ଛା ଆଦ୍ତଡ଼୍। ମେଣ୍ଡେ, ୱେରେ ୱେରେ ନାଟେତ୍ ନାରୁଡ଼୍ ଅଡ଼୍କିଂଙ୍କ୍ ଅସ୍ ତାମ୍ ନିଜର୍ ଜାଗ୍ତାଗ୍ ଏୱୁସିଦ୍ତଡ଼୍; ମେଣ୍ଡେ, ଇସ୍ରାଏଲ୍ ପିଲୁଡ଼୍ ସଦାପ୍ରବୁନ୍ ଦେଶ୍ତାଗ୍ ଅଡ଼୍କିଂଙ୍କ୍ ଦାସଦାସି ଲେକାମ୍ ଅଦିକାର୍ ମାଡ଼ିତଣ୍ଡ୍; ମେଣ୍ଡେ ଅଡ଼୍କିଂଙ୍କ୍ ବେନଡ଼୍ ବନ୍ଦି ଆସ୍ମାତ୍ତଡ଼୍, ଅଡ଼୍କିଂଙ୍କ୍ ବନ୍ଦି ମାଡ଼ି ଅଦ୍ତଡ଼୍ ନୁ ଅଡ଼୍ ନିଜର୍ ଦୁଷ୍ଟନଡ଼୍ ପର ଶାସନ ମାଡ଼ିତଡ଼୍।
ଇସ୍ରାଏଲ୍ ବାବିଲ୍ ରାଜା ପର ବିରୁଦ୍ଦ୍ ଆଦ୍ତଡ଼୍
ମେଣ୍ଡେ, ବେନ୍ ଦିନାମ୍ ସଦାପ୍ରବୁ ମିକିଙ୍କ୍ ମି ଦୁଃକାମ୍ ନୁ ତିପାଲ୍ତେ ନୁ ବେନ୍ ବିଶ୍ୱାସ୍ତେ ଦାସ୍ ନିକିଙ୍କ୍ ଦାସ୍ୟପାଡ଼ିୟ୍ ମାଡ଼ାନ୍ ଆତ୍ତା, ମେଣ୍ଡେ ରମାନଙ୍କ୍ ଇଦ୍ତଣ୍ଡ୍, ଆଦ୍ ଦିନାମ୍ ନିମେ ବାବିଲ୍ ରାଜ ବିରୁଦ୍ଦ୍ତେ ଇଦ୍ ୱେଷଡ଼୍ତେ ଗଟ୍ଅସ୍ କେତିତଣ୍ଡ୍, ଇତ୍କେ, ଦୁଷ୍ଟଡ଼୍ ବେଲା ନଷ୍ଟ ଆସ୍ମିନ୍ଦେ ! ସୁନାତେ ନଗର୍ ବେଲା ଶେଷ ଆସ୍ମିନ୍ଦେ ! ବେନ କପାମ୍ତେ ୱେରେ ୱେରେ ଗୋଷ୍ଟିତିଙ୍କ୍ ସାରେ ଦିନାମ୍ ରେଃତ୍ତଡ଼୍ ନୁ ୱେରେ ୱେରେ ଦେଶତେ ନାରୁଡ଼୍କିଙ୍କ୍ ସଦାପ୍ରବୁ କପାମ୍ତେ ଶାସନ୍ ମାଡ଼ି ସାରେ ଦିନାମ୍ତେ ଲେକାମ୍ ତାଡ଼ନା ମାଡ଼୍ତଡ଼୍, ସଦାପ୍ରବୁ ଆଦ୍ ଦୁଷ୍ଟନଡ଼୍ ତିପାଲ୍ତେ ଡୁଡ୍ତିଙ୍କ୍ ନୁ ଶାସନ୍ ମାଡ଼ାନଡ଼୍କିଙ୍କ୍ କପାମ୍ତିଙ୍କ୍ ଉଃସ୍ ମିନ୍ଦେଣ୍ଡ୍। ସାରା ପୃତିବି ଶାନ୍ତି ନୁ ସୁସ୍ଥଆସ୍ ମିନ୍ଦେ; ଅଡ଼୍ ୱେଡ଼୍କେତେ ପାଟା ପାର ମିନ୍ଦେଡ଼୍। ହଁ, ଦେୟାକ୍କଞ୍ଜ୍ ନୁ ଲିବାନୋନ୍ତେ ଏରସ୍ ମାଡ଼ାକ୍ ସାରେ ନି ବିଷୟତେ ସାର୍ଦାମାଡ଼ି କେତୁତଣ୍ଡ୍, ମିଡ଼୍ ବୁମ୍ଦାଗ୍ ନଷ୍ଟ ଆଦାନାଗ୍ ବେନମିକା ନାଡ଼୍କାନଣ୍ଡ୍ ମା ପାକେ ୱାଡ଼ଡ଼୍।
ମିଡ଼୍ ୱାଦାନ୍ ସମୟତେ ମି ସାଙ୍ଗେ କାଇଲାନ୍ ମାଇଦିଙ୍କ୍ ପାତାଲ୍ତେ ମଦଲ୍ ୱାଦୁତଡ଼୍; ଆଦ୍ ନି ମାଇଦିଙ୍କ୍ ଡଲ୍ତନଡ଼୍କିଙ୍କ୍, ପୃତିବିତେ ବେଡ଼ିୟଡ଼୍କିଙ୍କ୍ ହିଁ କେପ୍ସିତ୍; ଗୋଷ୍ଟିତଡ଼୍ ସାରେ ରାଜାନଡ଼୍ ଅଡ଼୍ ସିଂହାସନ୍ତାଗାଙ୍କ୍ ତେସ୍ମିନ୍ଦେ।
ଅଡ଼୍ ସାରେତଡ଼୍ ଉତ୍ତର୍ଇସ୍ ନିକିଙ୍କ୍ କେତିତଡ଼୍, ମିଡ଼୍ ମିକା ବାତ୍ତେ ମା ଲେକାମ୍ ଦୁର୍ବଲ ଆତ୍ତିଡ଼୍ ? ମିଡ଼୍ ବାତ୍ତେ ମା ସମାନ୍ ଆତ୍ତିଡ଼୍ କି ? ମିୟାଦ୍ ସୁନ୍ଦର୍ ନୁ ନି ନେବଲ୍ତେ ଲେଙ୍ଗ୍ ପାତାଲ୍ତାଗ୍ ହେଉନା କେଞ୍ଜ୍ସ୍ପି ମିନ୍ଦେଡ଼୍; ପୁଡ଼ିକ୍ ମି କେତ୍ତେ ମଦଲ୍ ମଦଲ୍ ସାରେ ଏକାମ୍ ନୁ ହେଡ଼୍ପୁଡ଼ିକ୍ ମିକିଙ୍କ୍ ମୁସି ଆସ୍ମିନ୍ଦେ। ହୋ ଲୁସିପର୍ ନାର୍କୁକ୍ ପେଇତାନ୍ ୱିଇଉକାକ୍, ୱେଇସିନ୍ ମାର୍ ନିମ୍ ବେଲାନ୍ ସ୍ୱର୍ଗକଞ୍ଜ୍ ରାଲ୍ତି ଗୋଷ୍ଟିତେ ନଡ଼୍କିଙ୍କ୍ ନିମ୍ ଯେ ମଦଲ୍ ମାଡ଼ିମିନ୍ଦେନି, ନିମ୍ ବେଲା ପୃତିବିକଞ୍ଜ୍ ନେଲ୍ ହେଃସିଆତ୍ତିନ୍। ମେଣ୍ଡେ, ନିମ୍ ମନେ ମନେ କେସ୍ମାତ୍ତି, ମାମେ ସ୍ୱର୍ଗତା ଆଦ୍ତାନ୍, ମାମେ ପରମେଶ୍ୱର୍ତେ ଉକାକିନ୍ ପର ନିଜର୍ ସିଂହାସନ୍ତେ ଡେଙ୍ଗ୍ ମାଡ଼ିତାନ୍; ମାମେ ଉତ୍ତର୍ଦିଗ୍ତେ ଉସ୍କବୁମ୍ଦାଗ୍ ପବିତ୍ର1 ମେଟେତାଗ୍ କାଇଲିକାଡ଼୍; ମାମେ ମାବ୍କଞ୍ଜ୍ ଡେଙ୍ଗ୍ ପଡ଼ିୟେତାଗାଙ୍କ୍ ପରୁ ତେଦିତାନ୍; ନାନେ ସାରେ ଶକ୍ତିତନ୍ ଲେକାମ୍ ଆଦ୍ତାନ୍। ମାତର୍ ନିମେ ପାତାଲ୍ତିଙ୍କ୍ ଶେଷ ଗୁଇନ୍ଦେତାଗ୍ ଉସ୍କ ବୁମ୍ତାଗ୍ ଏସିତ୍ତଡ଼୍।
ବେନଡ଼୍ ମିକିଙ୍କ୍ ଉଡ଼ିତଡ଼୍, ଅଡ଼୍ ମେଣ୍ଡନ୍ ଲେକାମ୍ ଉଡ଼ିତଡ଼୍ ନି ବିଷୟ ଏର୍କେମାଡ଼ି କେତିତଡ଼୍, ଅଣ୍ଡ୍ ପୃତିବିକିଙ୍କ୍ ଉଡ଼୍ରା ମାଡ଼୍ତଣ୍ଡ୍, ଯେ ରାଜ୍ୟତ୍ମୁନେ ୱାଡ଼୍ସ୍କ୍ତଣ୍ଡ୍; ବେନ ଜଗତ୍ତିଙ୍କ୍ ମେଟେତ୍ ଲେକାମ୍ ମାଡ଼୍ତଣ୍ଡ୍ ନୁ ଆଦିନ୍ ନଗର୍ତେ ମୁନେ ଦଂସ ମାଡ଼୍ତଣ୍ଡ୍ ; ବେନ ନିଜର୍ ବନ୍ଦିନାରୁଡ଼୍କ୍ ଅଡ଼୍ ଲନ୍ ଆଦାନଙ୍କ୍ ୱିଡ଼୍ସଣ୍ଡ୍, ଅଣ୍ଡ୍ କି ଇଦ୍ ମାନେଇ ?
ଗୋଷ୍ଟିସାରେତଡ଼୍ ରାଜାଲଡ଼୍, ଅଡ଼୍ ସାରେ ହିଁ ମହିମାତେ ନିଜର୍ ନିଜର୍ ଲନ୍ତାଗ୍ ପାଟିମିନ୍ଦେଡ଼୍। ମାତର୍ ମିଡ଼୍ ପାସ୍କାନ୍ କମା ଲେକାମ୍, ଚୁର୍ ନାଡ଼୍କ୍ତେ ନୁ ଗୁଇନ୍ଦେତେ ନେଟାନ୍ନାଗ୍ ହେଃସ୍ତେ ଡଲ୍ତେ ନାରୁନ୍ ଲେକାମ୍ ଆସ୍, ନିଜର୍ କାବୁର୍ କଞ୍ଜ୍ ଯେକେ ହେସି ଆସ୍ମିନ୍ଦେଡ଼ି; ମିଡ଼୍ ଡ଼େକାନେ ୱିକି ଆୱୁକ୍ତେ ମଡ଼୍ ଲେକାମ୍ ଆସ୍ମିନ୍ଦେନି।
ମିଡ଼୍ ଅଡ଼୍ ତଡ଼୍ କବର୍ତାଗ୍ ଆଇମାଟ୍, ବାତେଙ୍କ୍ଇତ୍କେ ମିଡ଼୍ ନିଜର୍ ଦେଶ୍ ତିଙ୍କ୍ ଦଂସ ମାଡ଼ିମିନ୍ଦେଡ଼ି, ମିଡ଼୍ ନିଜର୍ ନାରୁଡ଼୍କିଙ୍କ୍ ଆୱୁକିମିନ୍ଦେଡ଼ି, ପିନ୍ଦ୍ଇଲ୍ୱାଦ୍ ପାଡ଼ିୟ୍ ମାଡ଼ାନଡ଼୍ ପିଲୁଡ଼୍ ପେଦେର୍ ତେର୍ୱେ କଲାମ୍ ଜାକ କେଞ୍ଜାନଙ୍କ୍ ଆୟ। ତାନ୍ୱାୱ ମାର୍କିଡ଼୍ ତେଦି ବେଲାକି ପୃତିବିତାଗ୍ ଅଦିକାର୍ ମାଡ଼୍ମାକିଡ଼୍ ନୁ ଜଗତ୍ତିଙ୍କ୍ ନାର୍ଦେ ନିଃମାକିଡ଼୍, ଆଦିନ୍ ମାଇଦିଙ୍ଗ୍ ମିଡ଼୍ ଅଡ଼ାଦ୍ ଆନିଦାଡ଼ିକ୍ ଅପରାଧ୍ ମାଇଦିଙ୍ଗ୍ ଅଡ଼୍ ମାଇଦିଙ୍ଗ୍ ଆୱୁକାନ୍ ପଡ଼ିୟେ ତିଆର୍ ମାଡ଼ାଟ୍।
ସଦାପ୍ରବୁନ୍ତଡ଼୍ ବାବିଲ୍ତିଙ୍କ୍ ନଷ୍ଟ
ମେଣ୍ଡେ, ସାରେକେ ବେଡ଼୍ୟନ୍ ସଦାପ୍ରବୁ କେତ୍ତଣ୍ଡ୍, ନାନ୍ ଅଡ଼୍ ବିରୁଦ୍ଧତେ ତେଦିତାନ୍, ସଦାପ୍ରବୁ କେତ୍ତଣ୍ଡ୍, ନାନ୍ ବାବିଲ୍ ପେଦେର୍ ନୁ ବାକି ମାନ୍ଦାନ୍, ମାର୍ ନୁ ନାତିଙ୍କ୍ , ନଷ୍ଟ ମାଡ଼ିତାନ୍ , ମେଣ୍ଡେ,ସାରେକେ ବେଡ଼୍ୟନ୍ ସଦାପ୍ରବୁ କେତ୍ତଣ୍ଡ୍, ନାନେ ଆଦ୍ ନାର୍ଦିଙ୍କ୍ ଜିଙ୍କ ପିଟେ ଅଦିକାର୍ ନୁ ଏର୍ ନାର୍ଗେ ମାଡ଼ିତାନ୍ ନୁ ମାମ୍ ସଂହାରଲେକାମ୍ କାସୁର୍ତଡ଼୍ ଅଂକିଙ୍କ୍ କାଇତିକାଡ଼୍।
ଅଶୂର୍ ପର ବାବବାଣୀ
ସାରେକେ ବେଡ଼୍ୟନ୍ ସଦାପ୍ରବୁ ସପତ୍ ମାଡ଼ି କେସମିନ୍ଦେଣ୍ଡ୍, ମାନାଡ଼୍ ବାତ୍ ଆଲ୍ସି ମିନ୍ଦେଡ଼୍, ନିଜାମ୍ ଆଦ୍ଲେକାମ୍ ଗଟେମ୍ ଆଦ୍ତା ନୁ ମାନାଡ଼୍ ବେଲା ମନ୍ତର୍ ମାଡ଼ିମିନ୍ଦେମ୍ ଆଦ୍ ଲେକାମ୍ ଆଦ୍ତା ; ମାନାଡ଼୍ ଜିର୍ ଦେଶ୍ତାଗ୍ ଅଶୂର୍ତିଙ୍କ୍ ଉଃତିକାଡ଼୍ ନୁ ନିଜର୍ ମେଟେତ୍ ପର ଅଂକିଙ୍କ୍ ଡେକେ ମଦଲ୍ ୱାଟିତମ୍ ; ଆସୁଙ୍କ୍ ନାରୁଡ଼୍କଞ୍ଜ୍ ଅନାଦ୍ ଜୁଆଡ଼୍ ନୁ ଅଡ଼୍ ଆଟ୍କଞ୍ଚ୍ ତାନ୍ୱା ମପ୍ ଦୁରାମ୍ ଆଦ୍ତା। ସାରେ ପୃତିବୀ ବିଷୟତେ ଇଦ୍ ମନ୍ତର୍ ଆସ୍ ମିନ୍ଦେ ନୁ ଇଦ୍ କାଇ ସାରେତଡ଼୍ ପିଲୁଡ଼୍ ପର ଏକାମ୍ ଆସ୍ ମିନ୍ଦେ। ବାତେଙ୍କ୍ଇତ୍କେ ସାରେକେ ବେଡ଼୍ୟନ୍ ସଦାପ୍ରବୁ ମନ୍ତର୍ ଆସ୍ ମିନ୍ଦେ, ମେଣ୍ଡେ ଆଦ୍ ବେନ ୱେରେ ମାଡ଼ିତଣ୍ଡ୍ ? ନୁ ଅନାଦ୍ କାଇ ଆସ୍ ଆସ୍ମିନ୍ଦେ , ମେଣ୍ଡେ ବେନ ଆଦ୍ ମାଲ୍ପିତଣ୍ଡ୍ ?
ପଲେଷ୍ଟୀୟାନ୍ ପର ବାବବାଣୀ
ବେନ୍ ୱାଡ଼୍ସା ଆହସ୍ ରାଜାଲ୍ ଡଲ୍ତଣ୍ଡ୍ , ଆ ୱାର୍ସାତେ ଇଦ୍ ବାବବାଣୀ।
ହୋ ପଲିଷ୍ଟିୟ, ବେନ୍ ଦଣ୍ଡ୍ ମିକିଙ୍କ୍ ରେଃତିତଡ଼୍, ଆଦ୍ ଉର୍ଙ୍ଗିଆସ୍ ମିନ୍ଦେ ଇଞ୍ଜ ମିଡ଼୍ ସାରେତଡ଼୍ କୁସି ଆଇମାଟ୍; ବାତେଙ୍କ୍ ଇତ୍କେ ତାଡ଼ାମ୍ ମୁଲ୍କଞ୍ଜ୍ ୱିସାମ୍ତେତାଡ଼ାମ୍ ତିଆର୍ ଆଦ୍ତା ନୁ କିସ୍ ତାଗ୍ ପାର୍ତାନ୍ ତାଡ଼ାମ୍ ଅନାଦ୍ କାଇ ଆଦ୍ତା। ମେଣ୍ଡେ, ଦୁର୍ବଲ୍ ମୁନେତେ ଜନ୍ମ ଆତ୍ତେନନ୍ ମାର୍ ତିନ୍ତଣ୍ଡ୍ ନୁ ଇଲ୍ୱଲଡ଼୍ ଲେକେତ୍ ଉଞ୍ଜିତଡ଼୍ ; ମେଣ୍ଡେ, ମାନାଡ଼୍ ବୁମ୍ ମୁଃତାଙ୍କ୍ ମି ପଲେଷ୍ଟିୟ ମିଲେତିଙ୍କ୍ ନଷ୍ଟ ମାଡ଼ିତାନ୍ ନୁ ମିୟାଦ୍ ଦୁଡ଼଼େତ୍ ଦୁଡ଼଼େ କାରାପ୍ ଆଦ୍ତଡ଼୍।
ହୋ ନଗର୍ତେ ଆର୍, ଦୁଃକ ମାଡ଼ାଟ୍; ହୋ ନଗର୍, କେୟାଟ୍; ହୋ ପଲିଷ୍ଟିୟ, ମିୟାଦ୍ ସାରେ କାଡ଼୍ଙ୍ଗି ମିନ୍ଦେଡ଼୍; ବାତେଙ୍କ୍ ଇତ୍କେ ଉତ୍ତର୍ ଦିଗ୍କଞ୍ଜ୍ ଉମ୍ ୱାସମିନ୍ଦେ ନୁ ବେନ ନିଜର୍ ତିଆର୍ ଆତେ ସମୟତେ ଜେକେ ନିସ ଇଲେଡ଼ି।
ମେଣ୍ଡେ, ଇଦ୍ ନଗର୍ତେ ଦୂତକିଙ୍କ୍ ବାତେ ଉତ୍ତର୍ ଇଦାଙ୍କ୍ ଆଦ୍ତେ ? ଇଦ୍ ଯେ, ସଦାପ୍ରବୁ ସିୟୋନତେ ମୁଲେ ତିଆର୍ ମାଡ଼ି ମିନ୍ଦେଣ୍ଡ୍ ନୁ ଆଗାକଞ୍ଜ୍ ଅନାଦ୍ ଦୁଃକାମ୍ତେ ମାନ୍ଦାନ୍ ନାରୁଡ୍ ରମିତଡ଼୍।
Source notes (1)
- Footnote ସମାଗମ ମେଟେ ଇତ୍କେ: ବେନ୍ ଜାଗେତାଗ୍ ଦେବ ଦେବିକି ଅଣ୍ଡୟାଗେ କାଇଲ ମାନ୍ଦାନ୍ ପଡ଼ିୟେତିଙ୍କ୍ ସମାଗମ ମେଟେ ଇଞ୍ଜ କେତିତଡ଼୍,
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.