Koya Bible
ଯିଶାଇୟ 15
ମୋୟାବ ପରୁ ବାବବାଣୀ
ମୋୟାବ ବିଷୟ୍ତେ ବବିଷ୍ୟତ୍ ବାଣୀ। ମୋୟାବତେ ଅର୍ ନୁ କୀର ନାର୍ଦେ ଅଣ୍ଡୟ ୱେରେ ଅରନଗର୍ ଅଣ୍ଡୟ୍ ନାର୍କାତେ ତେଦ୍ତେ ନୁ ଦଂସ ଆତ୍ତେ; ଅଣ୍ଡୟ୍ ନାର୍କେତେ ଲପେତ୍ ମୋୟାବ୍ତେ କୀର ନଗର୍ତେ ତେଦ୍ତେ ନୁ ଦଂସ ଆତ୍ତେ। ଅଣ୍ଡ୍ କେୟାନ୍ ସେଙ୍ଗେ ବୈତତ୍ତିଙ୍କ୍ ନୁ ଦୀବୋନ୍ତିଙ୍କ୍, ଡେଙ୍ଗ୍ଯାଗେତାଗ୍ ଆଞ୍ଜ୍ମିନ୍ଦେଡ଼୍; ନବୋ ନୁ ମେଦବାତେ ବିଷୟ୍ତେ ମୋୟାବ ଦୁଃକାମ୍ ମାଡ଼ୁତଣ୍ଡ୍; ଅଡ଼୍ ସାରେତଡ଼୍ ତାଲାଙ୍କ୍ କର୍ୟି ମିନ୍ଦେଡ଼୍, ସାରେତଡ଼୍ ଦାଢ଼ି କର୍ୟି ମିନ୍ଦେଡ଼୍। ଅଡ଼୍ ସାରେତଡ଼୍ ରଟିନାଗ୍ ନାରୁଡ଼୍ ବାସ୍ତା ଚକା କେର୍ସମିନ୍ଦେଡ଼ି; ନିଜେ ନିଜେ ଲୋତ୍ତେ ୱେସ୍ଚାର୍ସାମ୍ତେ ପରୁ ନୁ ଚକ ପଡ଼ିୟାନାଗ୍ ସାରେତଡ଼୍ ନାରୁଡ଼୍ ଗାଟି ଲେଙ୍ଗ୍ତେ କେୟ ମିନ୍ଦେଡ଼୍। ହିଷ୍ବୋନ ନୁ ଇଲୀୟାଲୀ କେୟ୍ୟ ମିନ୍ଦେଣ୍ଡ୍; ଅଡ଼୍ ଲେଙ୍ଗ୍ ଯହସ୍ ଯାକ କେଞ୍ଜାଙ୍କ୍ ଆସମିନ୍ଦେଣ୍ଡ୍; ଆଦିଙ୍କ୍ ମୋୟାବତେ ସୌନ୍ୟ ନାରୁଡ଼୍ ଦୁଃକାମ୍ ମାଡ଼ମିନ୍ଦେଡ଼୍; ଅନାଦ୍ ଜିୱେ ଅନାଗେ ୱାଡ଼୍କ ମିନ୍ଦେ। ମାୟାଦ୍ ହୃଦୟ୍ ମୋୟାବ ସେଙ୍ଗେ କେୟ୍ୟ ମିନ୍ଦେଡ଼୍; ତାନ୍ ମିଞ୍ଜିନେ ମିରାନାଦ୍ ସୋୟର୍ ଯାକ ଇଗ୍ଲତ୍ ଶଲୀଶୀୟାତା ମିର ମିନ୍ଦେଡ଼୍; ବାତେଙ୍କ୍ଇତ୍କେ ଅଡ଼୍ କେୟ୍ୟ କେୟ୍ୟ ଲୂହୀତ ମେରାମ୍ତେ ପରୁ ଆଞ୍ଜମିନ୍ଦେଡ଼୍; ହୋରୋନୟିମ ଆର୍ଦାଗ୍ ନଷ୍ଟତ୍ତେ ସେଙ୍ଗେ ଅଡ଼୍ ଦୁଃକାମ୍ ମାଡ଼ମିନ୍ଦେଡ଼୍। ବାତେଙ୍କ୍ଇତ୍କେ ନିମ୍ରୀନର୍ତେ ଏର୍ସାରେ ୱାସି ଆଦ୍ତେ; ଗାଡ଼୍ ୱାସିମିନ୍ଦେ, ପୁନେ ଗାଡ଼୍ତେ ଅବାବ୍ ଆସମିନ୍ଦେ, ଆକ୍କଲର୍ ବାତେ ବା ଇଲ୍ଲେ। ଆଦିଙ୍କ୍ ଅଡ଼୍ ଅଡ଼କ୍ ଦର୍କିମାନ୍ଦାନ୍ ଦନ୍ ନୁ ୱାଟିମାନ୍ଦାନ୍ ଜିନିଷ୍ସାରେ ବାଇଶୀ ପେଦେର୍ତେ ମାଡ଼େତ୍ ଗାରେ ଅଦ୍ତଡ଼୍। ବାତେଙ୍କ୍ଇତ୍କେ ମୋୟାବତେ ସାରେପାକେ କେୟାନାଦ୍ ଲେଙ୍ଗ୍ ଆସ୍ମିନ୍ଦେ; ଆଦିନ୍ ଦୁଃକାମ୍ ଇଗ୍ଲୟିମ୍ ଯାକ ନୁ ଆଦିନ୍ ଦୁଃକାମ୍ ବେରେଲୀମ୍ ଯାକ ହେଉସ୍ମିନ୍ଦେ। ବାତେଙ୍କ୍ଇତ୍କେ ଦୀମୋନର୍ ଏର୍ଲେକାମ୍ ନେତୁର୍ ଆସ୍ମିନ୍ଦେ; ମେଣ୍ଡେ, ମାମେ ଦିମୋନର ପରୁ ମେଣ୍ଡେ ଦୁଃକାମ୍ ନୁ ମୋୟାବର୍ ମିରାନ୍ ନାରୁଡ଼୍ ପରୁ ନୁ ଦେଶ୍ତେ ବେସ୍କ୍ତୁଡ଼୍ ପରୁ ୱେରଡ଼୍ ସିଂହଡୁୱ୍ ତାତିକାଡ଼୍।
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.