Koya Bible
ଯିଶାଇୟ 13
ବାବିଲ୍ତେ ଦଣ୍ଡ
ବାବିଲ୍ ବିଷୟ୍ତେ ଗଟ୍, ଆମୋସ୍ତେ ମାର୍ ଯିଶାଇୟ ଇଦ୍ ଦର୍ଶନ୍ ପାହେମ୍ ଆତ୍ତଣ୍ଡ୍। ମିଡ଼୍ ମାଡ଼ାକ୍ ଇଲ୍ୱାଗ୍ ମେଟେତ୍ ପରୁ ପତ୍କା ତେମୁଟ୍, ନାରୁଡ଼୍ ପାକେ ଲେଙ୍ଗ୍ ତେମୁଟ୍, କାଇ ଉଃମୁଟ୍, ଅଡ଼୍ ଶାସନ୍ ମାଡ଼ାନଡ଼୍ ନଗର୍ ଆର୍ଇସ୍ ନେଙ୍ଗିଡ଼୍। ମାମେ ମା ପବିତ୍ର ନାରୁଡ଼୍କିଙ୍କ୍ କେସ୍ମିନ୍ଦେମ୍, ଅଁ, ମାମେ ମାୟାଦ୍ କପାମ୍ ସାରେ ମା ବୀରନଡ଼୍କିଙ୍କ୍, ଇତ୍କେ, ମା ନିଜାମ୍ ୱେଡ଼୍କେ ମାଡ଼ାନକିଙ୍କ୍ କାର୍ଙ୍ଗିମିନ୍ଦେମ୍। ମେଟେକିନ୍ପରୁ ବେଡ଼ିୟେମାନ୍ଦେତେ ନ୍ୟାୟ ନାରୁଡ଼୍ ମୁନେତେ ଲେଙ୍ଗ୍ ଆଦୁତ୍ ! ଅଣ୍ଡୟ୍ତାଗ୍ ଆତ୍ତେ ଗୋଷ୍ଟିତଡ଼୍ ରାଜ୍ୟତ୍ମୁନେ ଗାଟି ଲେଙ୍ଗ୍ ଆଦୁତ୍ ! ସାରେତିଙ୍କ୍ ବେଡ଼ିୟେ ସଦାପ୍ରବୁ ଯୁଦ୍ଦ୍ତାଗ୍ ସେନାନଡ଼୍କ୍ ତାତୁତଣ୍ଡ୍। ଅଡ଼୍ ସଦାପ୍ରବୁ ନୁ କପାମ୍ତେ ସାରେ ଅସ୍ତ୍ରସାରେ ସାରା ଦେଶ୍ତାଗାଙ୍କ୍ ପେସ୍ପାନ୍ ସେଙ୍ଗେ ଜେକେ ଦେଶ୍ତାଗାଙ୍କ୍ ମାବ୍ମୟଲ୍ ବୂମ୍ତାଗାଙ୍କ୍ ୱାସମିନ୍ଦେଣ୍ଡ୍। ମିଡ଼୍ ଦୁକାମ୍ ମାଡ଼ାଟ୍; ବାତେଙ୍କ୍ଇତ୍କେ ସଦାପ୍ରବୁନ୍ ଦିନାମ୍ ଗାର୍ରେଏୱୁତେ; ସାରେଶକ୍ତିମାନ୍ ପାକେଙ୍କ୍ ମିରାନାଦ୍ ନ୍ୟାୟ ଆଦ୍ ୱାଦ୍ତେ। ଆଦିଙ୍କ୍ ସାରେ କାଇକ୍ ସାତ୍ୱାମ୍ ଇଲ୍ୱେ ଆଦ୍ତେ ନୁ ସାରେ ନାରୁଡ଼୍ ହୃଦୟ ୱେର୍ଦେ କାଡ଼୍ଙ୍ଗି ଆଦ୍ତେ; ମେଣ୍ଡେ, ଅଡ଼୍ ୱେର୍ଦିତଡ଼୍; ତିଆପଲ୍ ନୁ ନଦାନାଦ୍ ଅଡ଼୍କିଂଙ୍କ୍ ୱାଦ୍ତେ; ଅଡ଼୍ ପିଲେ ଜନମ୍ ମାଡ଼ାନ୍ ନାଟାଡ଼୍ ଲେକାମ୍ ନପିନ୍ଲେକାମ୍ ଆଦ୍ତେ; ଅଡ଼୍ ନିଜେ ନିଜେତ୍ ବିଷୟତେ ବାକ୍ୱା ଆଦ୍ତଡ଼୍; ଅଡ଼୍ ମକମ୍ କିସ୍ ତାଡ଼୍ମ୍ ଲେକାମ୍ ଆଦ୍ତେ। ଉଡ଼େ, ଦେଶ୍ ଦ୍ୱଂସ ମାଡ଼ାନଙ୍କ୍ ନୁ ଆଦିନାଗାଙ୍କ୍ ପାପିନଡ଼୍କ୍ ନଷ୍ଟ ମାଡ଼ାନଙ୍କ୍ ସଦାପ୍ରବୁନ୍ ଦିନାମ୍ ବୟଙ୍କର୍; କପାମ୍ ନୁ ଗାଟିକପାମ୍ ଆସ୍ ୱାସମିନ୍ଦେଣ୍ଡ୍। ବାତେଙ୍କ୍ଇତ୍କେ ମାବ୍ ମୟଲ୍ ଉକାକ୍ ନୁ ବେଡ଼ିୟେ ଉକାକ୍ ୱେସ୍ ଆୟ; ପଡ଼୍ଦ୍ ପେୟିତାନ୍ ସମୟ୍ତେ ଇକାଡ଼୍ ଆଦ୍ତେ ନୁ ନେଲ୍ଞ୍ଜ୍ ତାନାଦ୍ ୱେସ୍ ଇୱ। ମେଣ୍ଡେ, ମାମେ ଜଗତ୍ତିଙ୍କ୍ ଦୁଷ୍ଟତା ସେଙ୍ଗେ ନୁ ଦୁଷ୍ଟନଡ଼୍କିଙ୍କ୍ ଅଡ଼୍ ଅଦର୍ମ ସେଙ୍ଗେ ଶାସ୍ତି ଇଦ୍ତାନ୍ ନୁ ମାମେ ଅହଙ୍କାରିନଡ଼୍ ଗର୍ବ ତତିତଡ଼୍ ନୁ ବୟଙ୍କର୍ ନାରୁନ୍ ଗର୍ବ ଉଃସିଦ୍ତାନ୍। ମାମେ ଲେକେତ୍ ସୁନା ଅପେକ୍ଷା ପୃତିବିତିଙ୍କ୍ ନୁ ଓଫିର୍ତେ ଉଦ୍ଦାର୍ ସୁନା ଅପେକ୍ଷା ନାରୁଡ଼୍କିଙ୍କ୍ କମ୍ ମାଡ଼ିତେ। ଇଦ୍ରକମ୍ ମାମେ ମାବ୍ମୟଲ୍ତିଙ୍କ୍ ୱାଡ଼୍ସ୍କିକାଡ଼୍, ମେଣ୍ଡେ ସାରେତିଙ୍କ୍ ବେଡ଼ିୟ୍ ସଦାପ୍ରବୁନ୍ କପାମ୍ତେ ନୁ ତାନ୍ ଗାଟିକପାମ୍ତେ ଦିନାମ୍ତେ ପୃତିବୀ ୱାଡ଼୍କି ଆସ୍ ପଡ଼ିୟେ ଆଦ୍ତେ। ତାନ୍ପେର୍କେ ଇଦ୍ଲେକାମ୍ ଗଟେମ୍ ଆଦ୍ତେ ଯେ, ଦେବ୍ତିତ୍ତେ କଡ଼୍ମାୱୁ ଲେକାମ୍ ନୁ ମାଇତେ ମେକା ଲେକାମ୍ ନାରୁଡ଼୍ ସାରେତଡ଼୍ ନିଜେ ନିଜେ ନାର୍ଦା ମାଲ୍ତଡ଼୍ ନୁ ସାରେତଡ଼୍ ନିଜେ ନିଜେତେ ଦେଶ୍ ପାକେ ମିରିତଡ଼୍। ବେନେଆଇ ନାରୁଣ୍ଡ୍ କାବୁର୍ ଦର୍କିତ୍, ଆଦିଙ୍କ୍ କାଡ଼ିନ୍ତଡ଼୍ ରେଃତିତଡ଼୍ ନୁ ବେନେଆଇ ନାରୁଙ୍କ୍ ପଇଦ୍ତଡ଼୍, ଅଣ୍ଡ୍ କଡ଼୍ଗତଡ଼୍ ଦଣ୍ଡ ଆଦ୍ତଣ୍ଡ୍। ଆୱିନ୍ ପିଲାକିଙ୍କ୍ ମିକା ଆୱିନ୍ କଣ୍ଡେତ୍ମୁନେଙ୍କେ ଆୱୁକିତଡ଼୍; ଅଡ଼୍ ଲୋକିଙ୍କ୍ ଲିକୀ ଆଦ୍ତା ନୁ ଅଡ଼୍ ମୁତେକିଙ୍କ୍ ନଷ୍ଟ ମାଡ଼ିତଡ଼୍। ଉଡ଼େ, ମାମେ ଅଡ଼୍ ସାରେପାକେ ମାଦୀୟନଡ଼୍କିଙ୍କ୍ ତେଃତିତଡ଼୍, ଅଡ଼୍ ରୂପାତିଙ୍କ୍ ଉଡ଼ଡ଼୍ ନୁ ସୁନାତେ ଅଡ଼୍ ଶାନ୍ତି ଆୟଡ଼୍। ଅଡ଼୍ ୱିଲ୍କ୍ ପେକଡ଼୍କିଙ୍କ୍ ଆୱୁକିତଡ଼୍ ନୁ ଅଡ଼୍ ଡଙ୍କେତେ ପିଲେତ୍ ପରୁ ବାତେ ଦୟା ମାଡ଼ଡ଼୍, ଲେୟଡ଼୍କ୍ ପରୁ ଅଡ଼୍ ଦୟା ନଜର୍ ତୱଡ଼୍। ମେଣ୍ଡେ, ରାଜ୍ୟତେସାରେ ଗୌରବ୍ ଲେକାମ୍ ନୁ କଲ୍ଦୀୟନଡ଼୍ ସୁନ୍ଦର୍ତେ ରାଜ୍ୟ ମାତ୍ତା ବାବିଲ୍, ଆଦ୍ ପରମେଶ୍ୱର୍ତଡ଼୍ ତେଦିମାନ୍ଦାନ୍ ସଦୋମ୍ ନୁ ହମୋରାତେ ଲେକାମ୍ ଆଦ୍ତେ। ଆଦ୍ ବେସୁଙ୍କ୍ବା ମାନ୍ଦାନ୍ ପଡ଼ିୟେ ଆୟ, ମାନେଇ ମାନେଇତେ ପିଲୁଡ଼୍ତେ ବେନ ଆଗେ ମାନଡ଼୍; ଆରବୀୟ ନାରୁଡ଼୍ ଆଗେ ଗୁଡ଼ୁସା ମାଡ଼ଡ଼୍, କି ମେକା ନିଜେ ନିଜେ ଗୁଡ଼ୁସାନାଗ୍ ଉଞ୍ଜ। ମାତର୍ ମେଟେତେ ପଶୁକି ଆଦ୍ ପଡ଼ିୟେତାଗ୍ ଉଞ୍ଜିତା ନୁ ଅଡ଼୍ ଲକ୍ କିଡ଼୍କମାନ୍ଦାନ୍ ଜିୱାକିନେ ନିଣ୍ଡିତା; ଉଟ୍ପିଟେ ଆଗେ ବାସେ ମାଡ଼ିତା ନୁ ମେକା ଆଗେ ହେନ୍ଦିତା। ମେଣ୍ଡେ, ଗଣ୍ଡ୍ରାସ୍କ୍ ଆୱିନ୍ ପାଡ଼୍କିନାଗ୍ ନୁ କଇଲା କି ଆୱିନ୍ ମାନ୍ଆତ୍ତେ ପଡ଼ିୟାନାଗ୍ କେୟିତା; ଆୱିନ୍ କାଲାମ୍ ଗାରେ ହେଉତ୍ତେ ନୁ ଦିନାକ୍ସାରେ ନାର୍ଗେ ଆୟ।
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.