Koya Bible
ଆରାମ୍ 6
ନାରୁଡ଼ାଦ୍ ଦୁଷ୍ଟତା
ଆଦେ ଲେକାମ୍ ବେସୁଙ୍କ୍ ପୃତିବିତାଗ୍ ନାରୁଡ଼ାଦ୍ ସଂଖ୍ୟା ନାର୍ଗେ ଆଦାଙ୍କ୍ ପସ୍ପ୍ତେ ନୁ ଅଡ଼୍କ୍ ନାର୍ଗେ ପିକି ଜନ୍ମ ଆତ୍ତା; ଆସୁଟ୍ ପରମେଶ୍ୱର୍ତେ ମାର୍କିଡ଼୍ ନାରୁଡ଼୍ ପିକିକିଙ୍କ୍ ମକମ୍ସୁନ୍ଦର ଉଡ଼ି, ଅଡ଼୍ ବେୱିଙ୍କ୍ ପସନ୍ଦ ମାଡ଼୍ତଡ଼୍, ଅଡ଼୍ ଆୱିନ୍ ଲୋପେଙ୍କ୍ ସାରେତାୱିଙ୍କ୍ ପେଣ୍ଡୁଲ୍ ଆଦାଙ୍କ୍ ପସ୍ପ୍ତଡ଼୍। ତାନ୍ପେର୍କେ ସଦାପ୍ରବୁ କେତ୍ତଣ୍ଡ୍, ମାୟାଦ୍ ଆତ୍ମା ନାରୁଙ୍କ୍ ସାରେଦାମ୍ ଚେତନା ମାଡ଼, ବାତେଙ୍କ୍ଇତ୍କେ ଅଡ଼୍ ବିପଦ୍ ଆର୍ଦେ ଆଦାନ୍ ଅଡ଼ାଦ୍ ଆୱୁଙ୍ଗ୍ ମାତ୍ର; ଆଦିନ୍ ମାଇଦିଙ୍କ୍ ଅଡ଼ାଦ୍ ସମୟ ଶହେ କୋଡ଼ିଏ ବର୍ଷ ଆଦ୍ତେ । ଆ ସମୟ୍ତେ ପୃତିବିତାଗ୍ ମହା ବିରଡ଼୍ ମାତ୍ତଡ଼୍; ମେଣ୍ଡେ ତାନ୍ପେର୍କେ ପରମେଶ୍ୱର୍ତେ ମାରିକିଡ଼୍ ନାରୁଡ଼୍ ମାୟାସ୍କିଙ୍କ୍ ତଡ଼୍ କାୟ୍ଲି କାୟ୍ଲି ମାତ୍ତାଙ୍କ୍, ଆୱିନାଗାଙ୍କ୍ ପିଲା ଜନ୍ମ ଆତ୍ତା; ଆୱ୍ଆନ୍ତେ ମୁନେତ୍ କାଲାତେ ନାର୍ଗେ ବିର ମାତ୍ତା।
ଅନନ୍ତର୍ ସଦାପ୍ରବୁ ଉଡ଼୍ତଣ୍ଡ୍ ଯେ, ପୃତିବିତାଗ୍ ନାରୁଡ଼ାଦ୍ ଦୁଷ୍ଟ ଗାଟି ବେଡ଼ିୟେ, ମେଣ୍ଡେ ଅନାଦ୍ ମାନ୍ନ୍ଦେ ଏର୍କେତେ ସାରେ ଆଲ୍ସାନାଦ୍ ନାର୍ଗେ ପିନ୍ଦ୍ୱାଦ୍। ଆଦିନ୍ ସେଙ୍ଗେ ସଦାପ୍ରବୁ ପୃତିବିତାଗ୍ ନାରୁଙ୍କ୍ ତିଆର୍ ମାଡ଼୍ତାଙ୍କ୍ ଏର୍କେ ମାଡ଼ି ମନ୍ତାଗ୍ ଦୁଃକ୍ ମାଡ଼୍ତଡ଼୍। ଆସୁଟ୍ ସଦାପ୍ରବୁ କେତ୍ତଣ୍ଡ୍, ମାମ୍ମେ ବୁମ୍ତାଗ୍ ମାଡ଼୍ତେ ନାରୁଙ୍କ୍, ମେଣ୍ଡେ ନାରୁଡ଼୍ ତଡ଼୍ ପଶୁ ନୁ ମେଟେତ୍ ଜିୱାକ୍ ନୁ ପାର୍ତାନ୍ ପିଟେକିଙ୍କ୍ ନଷ୍ଟ ମାଡ଼ିତାନ୍; ବାତେଙ୍କ୍ଇତ୍କେ ମାମ୍ମେ ଆୱିଙ୍କ୍ ତିଆର୍ ମାଡ଼୍ତାଙ୍କ୍ ମାନ୍ତାଗ୍ ଦୁଃକାମ୍ ଆସମିନ୍ଦେ। ମାତ୍ରମ ନୋହ ସଦାପ୍ରବୁନ୍ କଣ୍ଡେତେ ଅନୁଗ୍ରହ ପାହେମ୍ ଆତ୍ତଣ୍ଡ୍ ।
ନୋହତେ ୱେଷଡ଼୍
ନୋହନ୍ ପିଲୁଡ଼୍ ଇଦ୍। ନୋହ ନିଜର ଆ ସମୟତେ ନାରୁଡ଼୍ ଲୋପେ ଦାର୍ମିକ୍ ନୁ ସାୟେତ୍ ନାରୁଣ୍ଡ୍ ମାତ୍ତଣ୍ଡ୍; ନୋହ ପରମେଶ୍ୱରତେ ତଡ଼୍ ଆଦାୱାଦା ମାଡ଼୍ତଣ୍ଡ୍। ନୋହଙ୍କ୍ ମୁୱୁଡ଼୍ ମାର୍କ୍ ମାତ୍ତଡ଼୍ ଅଡ଼୍ପେଦେର୍, ଶେମ ନୁ ହାମ ନୁ ଯେପତ୍, ଇସ୍ମାତ୍ତଡ଼୍। ଆ ସମୟ୍ତେ ପୃତିବି ପରମେଶ୍ୱରତେ ମୁନେ କାରାପ୍ ଆସମିନ୍ଦେ; ଇତ୍କେ ପୃଥିବି ପାପତେ ବର୍ତ୍ତି ଆସ୍ ମାତ୍ତେ। ମେଣ୍ଡେ ପରମେଶ୍ୱର ପୃତିବିତାଗ୍ ଉଡ଼୍ତଣ୍ଡ୍ ଯେ, ଆଦ୍ କାରାପ୍ ଆସ୍ମିନ୍ଦେ; ଇତ୍କେ ପୃତିବିତେ ସାରେ ନାରୁଡ଼୍ କାରାପ୍ ଆସ୍ମିନ୍ଦେଡ଼୍।
ଆସୁଟ୍ ପରମେଶ୍ୱର ନୋହଙ୍କ୍ କେତ୍ତଣ୍ଡ୍, ମା ଗାରେ ସାରେ ନାରୁଡ଼୍ ଡଲାନାଦ୍ କାଲାମ୍ ହେଉତା; ଆଦିଙ୍କ୍ ଆୱିନ୍ ତଡ଼୍ ପୃତିବି ପାପତେ ନିଣ୍ଡି ମିନ୍ଦେ; ମେଣ୍ଡେ ଉଡ଼ା, ମାମ୍ମେ ପୃତିବୀ ତଡ଼୍ ଆୱିଙ୍କ୍ ନଷ୍ଟ ମାଡ଼ିତମ୍। ନିମେ ଦେବଦାରୁ ୱେର୍କ୍ତେ ଅଣ୍ଡୟ ଜାହାଜ ତିଆର୍ ମାଡ଼ା; ଆଦିନ୍ ଲୋପେ ୱେର୍ ୱେର୍ ବାକ୍ଡ଼ା ତିଆର୍ ମାଡ଼ି ଆଦିନ୍ ଲୋପେ ନୁ ବାୟ୍ଦେ ଦୁପାମ୍ ତଡ଼୍ ଉସା। ଆଦିଙ୍କ୍ ଇଦ୍ ଲେକାମ୍ ତିଆର୍ ମାଡ଼ିତି; ଲାଟି ତିନିଶହ କାୟ୍, ଗାଲ୍ ପଚାଶ୍ କାୟ୍, ପର ତିରିଶ୍ କାୟ୍ ଆଦ୍ତେ । ପରକଞ୍ଚ୍ ଅଣ୍ଡୟ୍ କାୟ୍ ୱିଡ଼୍ସି ଜରକା ମାଡ଼ିତିନ୍, ମେଣ୍ଡେ ଆଦିନ୍ ଗାରେ ଆର୍ର ନେଃତିତିନ୍; ମେଣ୍ଡେ ଆଗେତ୍ ଅଣ୍ଡୟ୍ ତାଲା, ରେଣ୍ଡ୍ ତାଲା ନୁ ମୁଣ୍ଡ୍ ତାଲା ମାଡ଼ିତିନ୍। ମେଣ୍ଡେ ମାବ୍ତେ ମଦଲ୍ ଜିୱୁ ମାନ୍ଦାନ୍ ବେସ୍କ୍ ଜନ୍ତୁ ମିନ୍ଦେ, ଆୱିଙ୍କ୍ ସାରେ ନଷ୍ଟ ମାଡ଼ାନ୍ ସେଙ୍ଗେ, ମାମ୍ମେ, ଉଡ଼ାଟ୍, ମାମ୍ମେ ପୃତିବୀ ପର ଏର୍ମୁଃତାନାଦିନ୍ ତଡ଼୍ ଦଂସ ମାଡ଼ିତମ୍, ଆସୁଟ୍ ପୃତିବିତେ ସାରେ ପ୍ରାଣି ଡଲିତା। ମାତ୍ରମ୍ ମାମ୍ମେ ନି ତ ମାୟାଦ୍ ନିୟମ୍ ମାଡ଼ିତମ୍; ଆସୁଟ୍ ନିମେ ନିଜର୍ ମାରିଡ଼୍କ୍ ନୁ ମୁତେଙ୍କ୍ ନୁ ମାର୍କିଡ଼୍ ମୁତେକିଙ୍କ୍ ତଡ଼୍ ପୟ୍ସ୍ ଜାହାଜ ତାଗ୍ ଅସିତିଡ଼୍। ମେଣ୍ଡେ ଜିଉନ୍ ଗେଲ୍ସ୍ପାନ୍ ସେଙ୍ଗେ ସାରେ ଲେକାତ୍ ଜନ୍ତୁ ୱେର ୱେର ଜଡ଼୍ ଜଡ଼୍ ଅସ୍ ଜାହାଜ ତାଗ୍ ଅସିତିନ୍। ସାରେ ପ୍ରକାର୍ତେ ପିଟେ ନୁ ସାରେ ପ୍ରକାର୍ତେ ଜିୱାକ୍ ନୁ ସାରେ ପ୍ରକାର୍ତେ ମେଟେତ୍ ଜନ୍ତୁ ସାରେ ଜାତି ଲେକାମ୍ ୱେର୍ର ୱେର୍ର ଜଡ଼୍ ଜିଉନ୍ ଗେଲ୍ସ୍ପାଙ୍କ୍ ନି ଗାରେ ୱାଦ୍ତା। ମେଣ୍ଡେ ନିମେ ନିକିଙ୍କ୍ ନୁ ତାମାଙ୍କ୍ ତିନ୍ଦାନ୍ ମାଇଦିଙ୍କ୍ ସାରେ ପ୍ରକାର୍ତେ କାଦି ତାସ୍ ନି ଗାରେ ନେଃତିତିନ୍। ଆସୁଟ୍ ନୋହ ଆଦେ ଲେକାମ୍ ମାଡ଼୍ତଣ୍ଡ୍; ପରମେଶ୍ୱର୍ତେ ଆଦେଶ୍ ଅନୁସାର୍ତେ ଅଣ୍ଡ୍ ସାରେ କାମ୍ ମାଡ଼୍ତଣ୍ଡ୍।
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.