Koya Bible
ଆରାମ୍ 28
ଇସ୍ହାକ୍ ଯାକୁବ୍ତିଙ୍କ୍ ଲାବାନ୍ତା ରତ୍ତଣ୍ଡ୍
ଇସ୍ହାକ୍ ଯାକୁବ୍ତିଙ୍କ୍ କାର୍ଙ୍ଗି ଆଶିର୍ବାଦ୍ ମାଡ଼୍ତଣ୍ଡ୍ ନୁ ଇ ଆଦେଶ୍ ଇସ୍ ଅଂକିଙ୍କ୍ କେତ୍ତଣ୍ଡ୍, ନିମେ କିଣାନ୍ ଦେଶ୍ତେ ବେନ୍ଆୟି ପିକ୍ତିଙ୍କ୍ ପେଣ୍ଡୁଲ୍ ଆୟ୍ମା। ତେଦା, ପଦ୍ଦନ୍ ଅରାମ୍ତେ ତାମ୍ ୟାୟନ୍ ତଡ଼୍ ବତୂୟେଲ୍ତେ ଲୋତ୍ତାଗ୍ ଆଞ୍ଜ୍ ଆଗେ ନି ମାମାନ୍ ଲାବାନ୍ତେ ବେନ୍ଆୟି ପିକ୍ତିଙ୍କ୍ ପେଣ୍ଡୁଲ୍ ଆୟିମ୍। ସର୍ବଶକ୍ତିମାନ୍ ପରମେଶ୍ୱର୍ ଆଶିର୍ବାଦ୍ ମାଡ଼ି ନିକିଙ୍କ୍ ନାର୍ଗେ ୱେରେ ୱେରେ ନାରୁଡ଼୍ସମାଜ୍ ମାଡ଼ାନ୍ ମାଇଦିଙ୍କ୍ ମାଡ଼େତ୍ କାୟାନ୍ ଲେକାମ୍ ନାର୍ଗେ ପିଲୁଡ଼୍ ମାଡ଼ିଣ୍ଡ୍। ମେଣ୍ଡେ ଅବ୍ରାହାମ୍ତେ ପର ମାଡ଼୍ତେ ଆଶିର୍ବାଦ୍ ନିୟାଗ୍ ନୁ ନି ପିଲୁଡ଼୍ତାଗ୍ ପୁରା ମାଡ଼ିଣ୍ଡ୍; ଆସୁଟ୍ ପରମେଶ୍ୱର୍ ନିୟାଦ୍ ମାନ୍ଦାନ୍ ପଡ଼୍ୟ୍ ଇ ବେନ୍ ଦେଶ୍ ଅବ୍ରାହାମ୍ତିଙ୍କ୍ ଇସ୍ମିନ୍ଦେଣ୍ଡ୍, ଆ ଦେଶ୍ତାଗ୍ ନିୟାଦ୍ ଅଦିକାର୍ ଆୟି। ତାନ୍ପେର୍କେ ଇସ୍ହାକ୍ ଯାକୁବ୍ତିଙ୍କ୍ ରୟ୍ସିତ୍ତାଙ୍କ୍, ଅଣ୍ଡ୍ ପଦ୍ଦନ୍ ଅରାମ୍ତେ ଅରାମୀୟ ବତୂୟେଲ୍ତେ ମାର୍ ଲାବାନ୍ତେ, ଇତ୍କେ, ଯାକୁବ୍ ନୁ ଏଷୌନ୍ ୟାୟ୍ ରିବିକାନ୍ ତାମୁନ୍ତେ ଗାରେ ଆତ୍ତଣ୍ଡ୍ ।
ଏଷୌନାଦ୍ ମେଣ୍ଡନ୍ଦାମ୍ ପେଣ୍ଡୁଲ୍ ମାଡ଼୍ତଣ୍ଡ୍
ତାନ୍ପେର୍କେ ଇସ୍ହାକ୍ ଯାକୁବ୍ତିଙ୍କ୍ ଆଶିର୍ବାଦ୍ ମାଡ଼ି ପେଣ୍ଡୁଲ୍ତେ ମାଇଦିଙ୍କ୍ ପଦ୍ଦନ୍ ଅରାମ୍ତା ରୟ୍ସିତ୍ତଡ଼୍, ମେଣ୍ଡେ ଆଶିର୍ବାଦ୍ ମାଡ଼ାନ୍ ସମୟ୍ତେ ଏଷୌଙ୍କ୍ ଆଦେଶ୍ ଇସ୍ କେତ୍ତଣ୍ଡ୍, ନିମେ କିଣାନ୍ ଦେଶ୍ତେ ବେନ୍ଆୟି ପିକ୍ତିଙ୍କ୍ ପେଣ୍ଡୁଲ୍ ମାଡ଼୍ମା। ମେଣ୍ଡେ ଯାକୁବ୍ ତାମ୍ ୟାୟବାବାନ୍ ଆଦେଶ୍ ମାନେମ୍ ଆସ୍ ପଦ୍ଦନ୍ ଅରାମ୍ତା ଆତ୍ତଣ୍ଡ୍, ଇଦ୍ ଉଡ଼ି ଏଷୌ ତାମ୍ ବାବାଲ୍ ଇସ୍ହାକ୍ କିଣାନ୍ ଦେଶ୍ତେ ପିକିନ୍ ପର ଅସନ୍ତୋଷ ମାନ୍ଦାନାଦ୍ ପୁଞ୍ଜ୍ ଆଦିନ୍ସେଙ୍ଗେ ଏଷୌନ୍ ମୁତେ ମାତ୍କେ ବା ଇଶ୍ମାଏଲ୍ତେ ଗାରେ ଆଞ୍ଜ୍ ଅବ୍ରାହାମ୍ତେ ନାତି ଇଶ୍ମାଏଲ୍ତେ ମାୟାଡ଼୍ ନବାୟୋତ୍ତେ ହେଲାଡ଼୍ ମହଲତ୍ ପେଦେର୍ତେ ପିକ୍ତିଙ୍କ୍ ପେଣ୍ଡୁଲ୍ ଆତ୍ତଣ୍ଡ୍ ।
ବୈତେଲ୍ତାଗ୍ ଯାକୁବନ୍ ସାପ୍ନେ
ଯାକୁବ୍ ବେର୍ଶେବାତାଗାଙ୍କ୍ ପେୟ୍ସ୍ ହାରଣ୍ ପାକା ଆତ୍ତଣ୍ଡ୍ । ମେଣ୍ଡେ ପଡ଼ଦ୍ ମୁଡ଼୍ନ୍ଦ୍ତାଙ୍କ୍ ଅଣ୍ଡ୍ ବେନ୍ ଆୟି ଅଣ୍ଡୟ୍ ପଡ଼୍ୟ୍ତାଗ୍ ଆଦ୍ ନାର୍କା ଆଗେ ମାତ୍ତଣ୍ଡ୍; ମେଣ୍ଡେ ଅଣ୍ଡ୍ ଆ ପଡ଼୍ୟ୍ତାଗ୍ ସୁଦୁରାଦ୍ କାଲ୍ବଦ୍ ଅସ୍ ତାଲେତ୍ ମଦଲ୍ ୱାଟି ଉଞ୍ଜାନ୍ ମାଇଦିଙ୍କ୍ ଆ ପଡ଼୍ୟ୍ତାଗ୍ ପାଟ୍ତଣ୍ଡ୍। ଆସୁଟ୍ ଅଣ୍ଡ୍ ସାପ୍ନା ତଡ଼୍ ପୃତିବିତାଗ୍ ତିଆର୍ ଆତ୍ତେ ଅଣ୍ଡୟ୍ ତାପା ଉଡ଼୍ତଣ୍ଡ୍, ତାନାଦ୍ ତାଲେ ମାବ୍ତାଗେ ଏୱ୍ତେ; ମେଣ୍ଡେ, ଉଡ଼ା, ଆଦିନାଲା ଇସ୍ ପରମେଶ୍ୱର୍ତେ ଦୂତ୍କ୍ ତାରାନାଦ୍ ନୁ ଡିଗାନାଦ୍ ମାଡ଼ୁତା। ମେଣ୍ଡେ ଉଡ଼ା, ସଦାପ୍ରବୁ କେ ପର ନିସ୍ କେତ୍ତଣ୍ଡ୍, ମାମ୍ମେ ସଦାପ୍ରବୁ ନି ମୁନେଙ୍କ୍ତେ ଆନିଦାଦିମ୍ ଅବ୍ରାହାମ୍ତେ ପରମେଶ୍ୱର୍ ନୁ ଇସ୍ହାକ୍ତେ ପରମେଶ୍ୱର୍ ତମ୍; ନିମେ ଇ ବେନ୍ ଦେଶ୍ତାଗ୍ ପାଟ ମିନ୍ଦେନି, ଆଦ୍ ମାମେ ନିକିଙ୍କ୍ ନୁ ନି ପିଲୁଡ଼୍ତିଙ୍କ୍ ଇଦ୍ତମ୍। ନିୟାଦ୍ ପିଲୁଡ଼୍ ପୃତିବିତେ ଦୁମ୍ନ୍ଦେ ଲେକାମ୍ ଆଦ୍ତା, ମେଣ୍ଡେ ନିମ୍ ପୂର୍ବ, ପଶ୍ଚିମ, ଉତ୍ତର୍ ନୁ ଦକ୍ଷିଣ, ନାଲୁ ପାକା ଲେୱୁଡ଼୍ ଆଦ୍ତା ମେଣ୍ଡେ ନିୟାଗାକଞ୍ଚ୍ ନୁ ନି ପିଲୁଡ଼୍କଞ୍ଚ୍ ପୃତିବିତେ ସାରେ ପିଲୁଡ଼୍ ଆଶିର୍ବାଦ୍ ପାଏମ୍ ଆଦ୍ତଡ଼୍ । ମେଣ୍ଡେ ଉଡ଼୍, ମାମେ ନି ତଡ଼୍ ମିନ୍ଦେମ୍, ମେଣ୍ଡେ ନିମେ ବେନ୍ ପଡ଼୍ୟ୍ତାଗ୍ ଆଦ୍ତି, ଆ ଆ ପଡ଼୍ୟ୍ତାଗ୍ ମାମେ ନିକିଙ୍କ୍ ଗେଲ୍ସ୍ପିତମ୍ ନୁ ମେଣ୍ଡନ୍ଦାମ୍ ନିକିଙ୍କ୍ ଇ ଦେଶ୍ତା ତାତିତମ୍; ଆଦ୍ ପୁରା ମାଡ଼୍ନା ଯାକ ମାମେ ମିକିଙ୍କ୍ ୱିଡ଼୍ସମ୍।
ଉସ୍କାଡ଼୍ ୱିର୍ୟିତାଙ୍କ୍, ଯାକୁବ୍ ତେଦି କେତ୍ତଣ୍ଡ୍, ନିଜାମ୍ ଇ ପାଡ଼୍ୟିତାଗ୍ ସଦାପ୍ରବୁ ମିନ୍ଦେଣ୍ଡ୍; ମାତ୍ର ନାନ୍ ଆଦ୍ ପୁନନ୍। ମେଣ୍ଡେ ଅଣ୍ଡ୍ ୱେର୍ସ୍ ମେଣ୍ଡେ କେତ୍ତଣ୍ଡ୍, ଇଦ୍ ବେସତାଦ୍ ୱେର୍ଦାନ୍ ପଡ଼୍ୟା। ଇଦ୍ ତ ନିଜାମ୍ ପରମେଶ୍ୱର୍ତେ ଲୋନ୍, ଇଦ୍ ତ ସ୍ୱର୍ଗତେ ଆର୍।
ଯାକୁବ୍ ନାର୍କକ୍ ତେଦି ବେନ୍ କାଲ୍ଦେ ପରୁ ତାଲେ ୱାଟି ମାତ୍ତଣ୍ଡ୍, ଆଦିଙ୍କ୍ ହସ୍ ଗୁଞ୍ଜେ ଲେକାମ୍ ତିଆର୍ ମାଡ଼ି ତାନ୍ ପର ନିୟ୍ ତସ୍ତଣ୍ଡ୍। ମେଣ୍ଡେ ଆ ପଡ଼୍ୟେତ୍ ପେଦେର୍ ବୈତେଲ୍ ପରମେଶ୍ୱର୍ତେ ଲୋନ୍ ୱାଟ୍ତଣ୍ଡ୍; ମାତ୍ରମ୍ ମୁନେଙ୍କ୍ ଆ ନଗର୍ତେ ପେଦେର୍ ଲୂସ୍ ମାତ୍ତେ। ମେଣ୍ଡେ ଯାକୁବ୍ ଶପତ୍ ମାଡ଼ି କେତ୍ତଣ୍ଡ୍, ବେସୁଟ୍ ପରମେଶ୍ୱର ନା ତଡ଼୍ ଆଦ୍ତଣ୍ଡ୍ ନୁ ନାକିଙ୍କ୍ ଇ ଆଦାନ୍ ଆର୍ଦାଗ୍ ରକ୍ଷା ମାଡ଼ିତଣ୍ଡ୍, ମେଣ୍ଡେ ତିନ୍ଦାନ୍ ମାଇଦିଙ୍କ୍ କାଦି ନୁ କେର୍ଦାନ୍ ମାଇଦିଙ୍କ୍ ଚକା ଇଦ୍ତଣ୍ଡ୍, ମେଣ୍ଡେ ବେସୁଙ୍କ୍ ନାନ୍ ଲେକେତ୍ ମାନ୍ଦେ ବାବାନ୍ ଲୋନ୍ ମେଣ୍ଡନ୍ଦାମ୍ ମାଲ୍ପି ତାତ୍କେ, ଆଲାଇତ୍କେ ସଦାପ୍ରବୁ ନା ପରମେଶ୍ୱର୍ ଆଦ୍ତଣ୍ଡ୍, ମେଣ୍ଡେ ନାନ୍ ଇ ବେନ୍ କାଲ୍ଦେ ଗୁଞ୍ଜେ ଲେକାମ୍ ତିଆର୍ ମାଡ଼ିମିନ୍ଦେଣ୍ଡ, ଆଦ୍ ପରମେଶ୍ୱର୍ତେ ଲୋନ୍ ଆଦ୍ତେ, ମେଣ୍ଡେ ନିମେ ନାକିଙ୍କ୍ ବାତ୍ ସାରେ ଇଦ୍ତିନ୍, ଆଗାଙ୍କ୍ ଦଶମାଂଶ ନାନ୍ ନିକିଙ୍କ୍ ନିଜାମ୍ ଇଦ୍ତାନ୍।
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.