Koya Bible
ଆରାମ୍ 11
ବାବିଲ୍ ମେଡ଼୍
ମୁନେଙ୍କ୍ ଇ ସାରେ ପୃତିବିତାଗ୍ ଅଣ୍ଡୟ ଗଟ୍ତେ ନୁ ଅଣ୍ଡୟ୍ ରକମ୍ କେତାନାଦ୍ ମାତ୍ତା । ମେଣ୍ଡେ ଗଟନାତେ ପେର୍କେ ନାରୁଡ଼୍ ପୂର୍ବ ଦିଗ୍ତା ଉଡ ଉଡ ଶିନିୟର୍ତେ ଦେଶ୍ତାଗ୍ ଅଣ୍ଡୟ୍ ପଡ଼ିୟେ ପାହେମ୍ଆସ୍ ଆଗେ ମାତ୍ତଡ଼୍। ଅନନ୍ତର ଅଡ଼୍ ନିଜେ ନିଜେ କେତ୍ତଡ଼୍, ୱାଡ଼ାଟ୍, ମାନାଡ଼୍ ଇଟା ମାଡ଼ି ଲେକେତ୍ ପୋଡ଼୍ସିକା । ଆସୁଟ୍ ଇଟା ଅଡ଼୍ କାଲ୍କିନ୍ ଲେକାମ୍ ନୁ 1ମାଣ୍ଡୁଲ୍ ନିୟ୍ ଅଡ଼୍ ଚୁନାମ୍ତେ ଲେକାମ୍ ଆତ୍ତା । ମେଣ୍ଡେ ଅଡ଼୍ କେତ୍ତଡ଼୍, ୱାଡ଼ାଟ୍ ମାନାଡ଼୍ ମାନ୍ ମାଇଦିଙ୍କ୍ ଅଣ୍ଡୟ୍ ନଗର୍ ନୁ ମାବ୍ତାଗ୍ ମୟାନାଦ୍ ଅଣ୍ଡୟ୍ ଡେଙ୍ଗିଲାଦ୍ ମେଡ଼୍ ତିଆର୍ ମାଡ଼ିକା; ଆସୁଟ୍ ମାନାଦ୍ ପେଦେର୍ ବେଡ଼ିୟାଦ୍ ଆଦ୍ତେ, ମେଣ୍ଡେ ମାନାଡ଼୍ ସାରେ ପୃତିବିତାଗ୍ ଚିନ୍ବିନ୍ ଆୟ୍ୱାଡ଼୍।
ନାରୁଡ଼୍ମାର୍କିଡ଼୍ ବେନ ନଗର୍ ନୁ ମେଡ଼୍ ତିଆର୍ ମାଡ଼ମାତ୍ତଡ଼୍, ଆଦିଙ୍କ୍ ଉଡ଼ାଙ୍କ୍ ସଦାପ୍ରବୁ ଡିଗି ୱାତ୍ତଣ୍ଡ୍। ମେଣ୍ଡେ ସଦାପ୍ରବୁ କେତ୍ତଣ୍ଡ୍, ଉଡ଼ାଟ୍, ଇ ନାରୁଡ଼୍ ସାରେ ଅଣ୍ଡୟ୍ ନୁ ଇଡ଼ାଦ୍ ଗଟ୍ତେ ଆନ୍ତେ ଅଣ୍ଡୟ୍, ମେଣ୍ଡେ ଇଞ୍ଜ୍ ଇଡ଼୍ ଇ ପାଡ଼୍ୟିତାଗ୍ କାୟ୍ଲି ମିନ୍ଦେଡ଼୍; ଆଗାକଞ୍ଚ୍ ବାତା ବାତା ମାଡ଼ାନଙ୍କ୍ ଇଚ୍ଛା ମାଡ଼୍ତଡ଼୍, ଆଗାଙ୍କ୍ ପାଡ଼ିୟ୍ ମାଡ଼ାଙ୍କ୍ ୱିଡ଼୍ସ୍ତଡ଼୍। ଆଦିନ୍ମାଇଦିଙ୍କ୍ ଅଡ଼୍ ବେଦ୍ପୁଟୁଙ୍କ୍ ନିଜର୍ ନିଜର୍ ଗଟ୍ତେ ବୁଜେମ୍ ଆଦ୍ପାର୍ୱଡ଼୍, ଆଦିନ୍ମାଇଦିଙ୍କ୍ ୱାଡ଼ାଟ୍, ମାମେ ଡିଗି ଆଞ୍ଜ୍ ଆ ଜାଗାତାଗ୍ ଅଡ଼୍ ବାଷାତିଙ୍କ୍ ୱେରେ ୱେରେ ଜନ୍ମ ମାଡ଼ିକା। ଆଦ୍ଲେକାମ୍ ସଦାପ୍ରବୁ ଆ ପଡ଼ିୟେତାଗାଙ୍କ୍ ଅଡ଼୍କିଙ୍କ୍ ପୃତିବୀତେ ସାରେ ପାକା ବିରାବାରା ମାଡ଼୍ତଣ୍ଡ୍; ଆଦିଙ୍କ୍ ଅଡ଼୍ ନଗର୍ ତିଆର୍ ମାଡ଼ାନଙ୍କ୍ ପାର୍ୱଡ଼୍। ଆଦିନ୍ ମାଇଦିଙ୍କ୍ ଆ ନାର୍ଦେ ପେଦେର୍ ବାବିଲ୍ ଆତ୍ତେ; ବାତେଙ୍କ୍ଇତ୍କେ ସଦାପ୍ରବୁ ଆ ଜାଗାତାଗ୍ ସାରେ ପୃତିବୀତେ ବାଷାକିଙ୍କ୍ ଅଲ୍ଗା ମାଡ଼୍ତଣ୍ଡ୍, ମେଣ୍ଡେ ଆ ପଡ଼ିୟେତାଗାଙ୍କ୍ ଅଡ଼୍କିଙ୍କ୍ ସାରେ ପୃତିବୀତେ ବିରାବାରା ମାଡ଼୍ତଣ୍ଡ୍।
ଶେମନ୍ତେ ପିଲୁଡ଼୍
(୧ ବଂଶାବଲି ୧:୨୪-୨୭)
ଶେମନ୍ତେ ପିଲୁଡ଼୍ ଇଦ୍। ଏର୍ ମୁହୁଃତାନାଦ୍ ରେଣ୍ଡ୍ ୱାଡ଼୍ସେତେ ପେର୍କେ ଶେମ ଶହେ ବର୍ଷ ବୟସ୍ତେ ଅର୍ଫକ୍ଷଦତିଙ୍କ୍ ଜନ୍ମ ମାଡ଼୍ତଣ୍ଡ୍। ଅର୍ଫକ୍ଷଦ ଜନ୍ମ ଆତ୍ପେର୍କେ ଶେମ ପାଞ୍ଚଶହ ବର୍ଷ ବାଦ୍କି ମେଣ୍ଡେ ପିଲା ଜନ୍ମ ମାଡ଼୍ତଣ୍ଡ୍।
ମେଣ୍ଡେ ଅର୍ଫକ୍ଷଦ ତିରିଶ୍ ଏଇଙ୍ଗ୍ ବର୍ଷ ବୟସ୍ତେ ଶେଲହତିଙ୍କ୍ ଜନ୍ମ ମାଡ଼୍ତଣ୍ଡ୍। ଶେଲହତେ ଜନ୍ମତେ ପେର୍କେ ଅର୍ଫକ୍ଷଦ ଚାରିଶହ ମୁଣ୍ଡ୍ ବର୍ଷ ବାଦ୍କି ମେଣ୍ଡେ ମାର୍ମାୟାସ୍କ୍ ଜନ୍ମ ମାଡ଼୍ତଣ୍ଡ୍।
ମେଣ୍ଡେ ଶେଲହ ତିରିଶ ବର୍ଷ ବୟସ୍ତେ ଏବରତିଙ୍କ୍ ଜନ୍ମ ମାଡ଼୍ତଣ୍ଡ୍। ଏବରତେ ଜନ୍ମତ୍ ପେର୍କେ ଶେଲହ ଚାରିଶହ ମୁଣ୍ଡ୍ ବର୍ଷ ବାଦ୍କି ମେଣ୍ଡେ ମାର୍ମାୟାସ୍କ୍ ହେତ୍ତଣ୍ଡ୍।
ମେଣ୍ଡେ ଏବର ତିରିଶ୍ ନାଲୁ ବର୍ଷ ବୟସ୍ତେ ପେଲଗ୍ତିଙ୍କ୍ ଜନ୍ମ ମାଡ଼୍ତଣ୍ଡ୍। ପେଲଗ୍ତେ ଜନ୍ମତ୍ ପେର୍କେ ଏବର ଚାରିଶହ ତିରିଶ୍ ବର୍ଷ ବାଦ୍କି ମାର୍ମାୟାସ୍କ୍ ହେତ୍ତଣ୍ଡ୍।
ପେଲଗ୍ ତିରିଶ୍ ବର୍ଷ ବୟସ୍ତେ ରୀୟୂଙ୍କ୍ ଜନ୍ମ ମାତ୍ତଣ୍ଡ୍। ରୀୟୂନ୍ ଜନ୍ମତେ ପେର୍କେ ପେଲଗ୍ ଦୁଇଶହ ନଅ ବର୍ଷ ବାଦ୍କି ମେଣ୍ଡେ ମାର୍ମାୟାସ୍କ୍ ହେତ୍ତଣ୍ଡ୍।
ରୀୟୂ ତିରିଶ୍ ରେଣ୍ଡ୍ ବର୍ଷ ବୟସ୍ତେ ସରୁଗଙ୍କ୍ ଜନ୍ମ ମାଡ଼୍ତଣ୍ଡ୍। ସରୁଗତେ ଜନ୍ମତ୍ ପେର୍କେ ରୀୟୂ ଦୁଇଶହ ସାତ ବର୍ଷ ବାଦ୍କି ମେଣ୍ଡେ ମାର୍ମାୟାସ୍କ୍ ହେତ୍ତଣ୍ଡ୍।
ମେଣ୍ଡେ ସରୁଗ ତିରିଶ ବର୍ଷ ବୟସ୍ତେ ନାହୋରଙ୍କ୍ ଜନ୍ମ ମାଡ଼୍ତଣ୍ଡ୍। ନାହୋର୍ ଜନ୍ମତେ ପେର୍କେ ସରୁଗ ଦୁଇଶହ ବର୍ଷ ବାଦ୍କି ମେଣ୍ଡେ ମାର୍ମାୟାସ୍କ୍ ହେତ୍ତଣ୍ଡ୍।
ମେଣ୍ଡେ ନାହୋର୍ କୁଡ଼ିଏ ନଅ ବର୍ଷ ବୟସ୍ତେ ତେରହଙ୍କ୍ ଜନ୍ମ ମାଡ଼୍ତଣ୍ଡ୍। ତେରହନ୍ ଜନ୍ମତେ ପେର୍କେ ନାହୋର୍ତେ ଶହେ ଅଣିଶ୍ ବର୍ଷ ବାଦ୍କି ମେଣ୍ଡେ ମାର୍ମାୟାସ୍କ୍ ହେତ୍ତଣ୍ଡ୍।
ମେଣ୍ଡେ ତେରହଙ୍କ୍ ସତୁରି ବର୍ଷ ବୟସ୍ ଆତ୍ତେ ପେର୍କେ ଅଣ୍ଡ୍ ଅବ୍ରାମ୍ ନୁ ନାହୋର ନୁ ହାରଣ, ଇଡ଼୍କିଙ୍କ୍ ଜନ୍ମ ମାଡ଼୍ତଣ୍ଡ୍।
ତେରହନ୍ତେ ପିଲୁଡ଼୍
ତେରହନ୍ତେ ପିଲୁଡ଼୍। ତେରହ, ଅବ୍ରାମ୍, ନାହୋର୍ ନୁ ହାରଣତିଙ୍କ୍ ଜନ୍ମ ମାଡ଼୍ତଣ୍ଡ୍। ମେଣ୍ଡେ ଆ ହାରଣ ଲୋଟଙ୍କ୍ ଜନ୍ମ ମାଡ଼୍ତଣ୍ଡ୍; ମାତର୍ ହାରଣ ନିଜର୍ ବାବାନ୍ ତେରହନ୍ ମୁନେ କଲଦିୟଡ଼୍ ଊର୍ ପେଦେର୍ତେ ନିଜର୍ ଜନ୍ମ ଦେଶ୍ତାଗ୍ ଡଲ୍ତଣ୍ଡ୍। ଅବ୍ରାମ୍ ନୁ ନାହୋର ପେଣ୍ଡୁଲ୍ ଆତ୍ତଡ଼୍; ଅବ୍ରାମ୍ତେ ମୁତେନ୍ ପେଦେର୍ ସାରିଲ୍ ନୁ ନାହୋର୍ତେ ମୁତେନ୍ ପେଦେର୍ ମିଲ୍କା, ଆଦ୍ ହାରଣତେ ମାୟାଡ଼୍ ମାତ୍ତେ; ଆ ହାରଣ ମିଲ୍କା ନୁ ଯିସ୍କାର୍ତେ ବାବାଲ୍ ମାତ୍ତଣ୍ଡ୍। ଆ ସାରିଲ୍ ୱାଞ୍ଜଲ୍ ମାତ୍ତେ, ତାଙ୍କ୍ ୱେରଡ୍ ବା ମାର୍ମାୟାସ୍କ୍ ଇଲକଟ ମାତ୍ତା।
ତେରହ ନିଜର୍ ମାର୍ ଅବ୍ରାମ୍ତିଙ୍କ୍ ନୁ ହାରଣତେ ମାର୍ ଲୋଟ ପେଦେର୍ତେ ମାରିଙ୍କ୍ ମେଣ୍ଡେ ଅବ୍ରାମ୍ତେ ମୁତେ ସାରିଲ୍ ପେଦେର୍ତେ ମାରିନ୍ ମୁତେଙ୍କ୍ ତଡ଼୍ ଅତ୍ତଣ୍ଡ୍; ମେଣ୍ଡେ ଆ ସାରେ କଲଦିୟଡ଼୍ ଊର୍ ତାଗାଙ୍କ୍ କିଣାନ୍ ଦେଶ୍ତା ତାକି ଆଞ୍ଜ୍ ହାରଣ ନଗର୍ତାଗ୍ ବାସେ ମାଡ଼୍ତଡ଼୍। ମେଣ୍ଡେ ତେରହ ଦୁଇଶହ ଏଇଙ୍ଗ୍ ବର୍ଷ ଗେଲ୍ସି ହାରଣ ନଗର୍ତାଗ୍ ଡଲ୍ତଣ୍ଡ୍।
Source notes (1)
- Footnote ଇଟା ଜଡ଼ା ମାଡ଼ାଙ୍କ୍ ଦର୍କାର୍ ଆସ ମାନ୍ଦାନ୍ ଅଣ୍ଡୟ୍ ରକମ୍ ତାଦ୍ ତାରୁ ନିୟ୍
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.