Koya Bible
ଏଜ୍ରା 9
ଏଜ୍ରା ଅଣଯିହୁଦି ନଡ଼୍ତଡ଼୍ ପେଣ୍ଡୁଲ୍ ପୁନ୍ଦାନାଦ୍
ଇ ସାରେ ପାଡ଼୍ୟି ତେର୍ତେ ପେର୍କେ ଅଦିପତିଡ଼୍ ମା ଗାରେ ୱାସ୍କେତ୍ତଡ଼୍, “ଇସ୍ରାଏଲତେ ନାରୁଡ଼୍, ଯାଜକିଡ଼୍ ନୁ ଲେବିୟଡ଼୍ ୱେର୍ ଦେଶତେ ନଗର୍କନ୍ ନିଜରତିଙ୍କ୍ ୱେର୍ ମାଡ଼୍ୱକଟ ଅଡ଼୍, ଆତ୍ତଡ଼୍, କିଣାନୀୟ, ହିତ୍ତୀୟ, ପରିଷୀୟ, ଯିବୂଷୀୟ, ଅମ୍ମୋନିୟ, ମୋୟାବିୟ, ମିସ୍ରିୟ, ନୁ ଇମୋରିୟଡ଼୍ ପାସ୍କାନ୍ ଲେକେତ୍ ପାଡ଼୍ୟି ଲେକାମ୍ ମାଡ଼ମିନ୍ଦେଡ଼୍। ବାତେଙ୍କ୍ଇତ୍କେ ଅଡ଼୍ ନିଜର ନୁ ନିଜର ମାର୍କିଡ଼୍ ମାଇଦିଙ୍କ୍ ଅଡ଼୍ ମାୟାସ୍କିଙ୍କ୍ ନେସ୍ ମିନ୍ଦେଡ଼୍; ଇଲାନେ ପବିତ୍ର ପିଲୁଡ଼୍ ୱେର୍ଦେଶତେ ନଗର୍ତେ ତଡ଼୍ ନିଜରତିଙ୍କ୍ କାଲ୍ପିମିନ୍ଦେଡ଼୍; ମେଣ୍ଡେ, ଇ ଅପରାଦ୍ତେ ଅଦିପତିଡ଼୍ ନୁ ଶାସନକର୍ତ୍ତାଲଡ଼୍ କାଇ ମହାନ୍ ଆସ୍ମିନ୍ଦେ।” ଆସୁଟ୍ ନାନ୍ ଇ ଗଟ୍ କେଞ୍ଜୱାନାକେ, ନିଜର ସିଲେ ନୁ ସିଲେ ଇକି ନିଜର ତାଲ୍ତାଗ୍ ନୁ ଦାଢ଼ିତେ କେଲ୍କ୍ ଦେଶ୍ ବାକ୍ୱା ଆସ୍ କୁଦ୍ତାନ୍। ଆସୱେଲେ ଏଞ୍ଚିଆତ୍ତେ ନାରୁଡ଼୍ ଅପରାଦ୍ତେ ମାଇଦିଙ୍କ୍ ଇସ୍ରାଏଲତେ ପରମେଶ୍ୱରତେ ବାକ୍ୟତେ ୱେର୍ସ ସାରେ ନାରୁଡ଼୍ ନା ଗାରେ ଅଣ୍ଡୟାଗ୍ ଆତ୍ତଡ଼୍; ମେଣ୍ଡେ, ନାନ୍ ମୁଲ୍ପୁଟ୍ ପୁଜାନ୍ ସମୟ ଏୱୁନା ବକୁୱା ଆସ୍ କୁଦ୍ତାନ୍। ତାନ୍ପେର୍କେ ମୁଲ୍ପୁଟ୍ତେ ପୁଜାନ୍ ସମୟତେ ନାନ୍ ନିଜର ଦୁଃକାତେକନ୍ ତେଦ୍ତାନ୍, ନା' ମେନ୍ଦୁଲ୍ତାଗ୍ ନାୟାଦ୍ ଇଙ୍ଗ୍ତେ ସିଲେ ନୁ ଲାଟିଚକା ମାତ୍ତେ; ମେଣ୍ଡେ, ନାନ୍ ନିଜର ମରମିଣ୍ଡାଇସ୍ ସଦାପ୍ରବୁ ନା' ପରମେଶ୍ୱରତା କାଇ ଆସ୍ କେତ୍ତାନ୍, “ଅ ନା ପରମେଶ୍ୱର, ନାନ୍ ସିଗ୍ତେମିନ୍ଦେନ୍, ଅ ନା ପରମେଶ୍ୱରଦନି, ନାନ୍ ନିୟିପାକେ ମକମ୍ ତେତାଙ୍କ୍ ୱେର୍ଦୁତାନ୍; ବାତେଙ୍କ୍ଇତ୍କେ ମା ଅପରାଦ୍ ମାନାଙ୍କ୍ ତାଲେତ୍ ପର ପେର୍ସି ତେଦିମିନ୍ଦେ ନୁ ମାନ୍ ଦୋଷ ମାବ୍ତାଗ୍ ମୟିମିନ୍ଦେ। ମାନ୍ ଆନିଦାଦିଡ଼୍ତେ ସମୟକନ୍ ନେଣ୍ଡ୍ ଏୱୁନା ମାନାଡ଼୍ ଅଦିକ୍ ଦୋଷି ଆସମିନ୍ଦେମ୍; ମିଇ ନିଜରତେ ଅପରାଦ୍ତେ ମାଇଦିଙ୍କ୍ ନେଟ୍ତେ ବିଷୟ୍ ମାନାଡ଼୍, ମାନ୍ ରାଜାଲଡ଼୍ ନୁ ମାନ୍ ଯାଜକିଡ଼୍ ୱେରେ ଦେଶତେ ରାଜାଲଡ଼୍ କାଇଦେ, ସାକୁତେ, ବନ୍ଦିଆସ୍ ନୁ ଡଙ୍ଗ୍ତେ ନୁ ମକମ୍ ୱେର୍ଦେ ପୟିସ୍ ଆସମିନ୍ଦେମ୍। ମେଣ୍ଡେ, ମାନ୍ ପରମେଶ୍ୱର ବେଲାନେ ମାନ୍ କଣ୍ଡା ୱେସ୍ ମାଡ଼ିତଣ୍ଡ୍ ନୁ ମାନ୍ ବନ୍ଦି ଅବସ୍ଥାତେ ମାନାଙ୍କ୍ ଇସୁର୍ ଶାନ୍ତି ଇଦ୍ତଣ୍ଡ୍, ଇଦିନ୍ମାଇଦିଙ୍କ୍ ରକ୍ଷାତେ ମାଇଦିଙ୍କ୍ ମାନାଙ୍କ୍ ଆତ୍ତେ ରକମ୍ ନେଃତାନଙ୍କ୍ ନୁ ନିଜର ପବିତ୍ର ପଡ଼୍ୟେତେ ମାକିଙ୍କ୍ ଅଣ୍ଡୟ କୟେ ଇଦାନଙ୍କ୍ ଇଞ୍ଜେ ସଦାପ୍ରବୁ ମାନାଙ୍କ୍ ପରମେଶ୍ୱରଦେକନ୍ ସୁଜୁର୍ ସମୟତେ ଅନୁଗ୍ରହ କେସ୍ମିନ୍ଦେ। ବାତେଙ୍କ୍ଇତ୍କେ ମାମେ ବନ୍ଦି ଆତ୍ତେନମ୍। ଆଗେକ୍ବା ମାନ୍ ବନ୍ଦି ଅବସ୍ଥାତେ ମାନ୍ ପରମେଶ୍ୱର ମାନାଙ୍କ୍ ୱିଡ଼୍ସଣ୍ଡ୍, ମାତର୍ ମାନାଙ୍କ୍ ଶାନ୍ତି ଇଦାନ୍ ମାଇଦିଙ୍କ୍, ମାନ୍ ପରମେଶ୍ୱରଦେ ଲନ୍ ତିଆର ମାଡ଼ାନ୍ ମାଇଦିଙ୍କ୍ ନୁ ଆଗେତ୍ ଉର୍ଙ୍ଗତେ ପଡ଼୍ୟି ପୁଃନେତିଆର୍ ମାଡ଼ାନ୍ ମାଇଦିଙ୍କ୍, ମେଣ୍ଡେ ଯିହୁଦା ନୁ ଯିରୁଶାଲମତାଗ୍ ମାକିଙ୍କ୍ ଅଣ୍ଡୟ୍ ନେଟେ ଇଦାନ୍ ମାଇଦିଙ୍କ୍ ଅଣ୍ଡ୍ ପାରସ୍ୟ ରାଜାଲଡ଼୍ କଣ୍ଡେତେ ମା ପରୁ ଦୟା ମାଡ଼ିମିନ୍ଦେଣ୍ଡ୍।
ଇଞ୍ଜେ ହୋ ମାନ୍ ପରମେଶ୍ୱର, ଦିନାଗ୍କନ୍ ମାନାଡ଼୍ ମେଣ୍ଡେ ବାତେ କେତିକାଡ଼୍ ? ମିଡ଼୍ ନିଜର ଦାସ ବବିଷ୍ୟଦ୍ବକ୍ତାଲଡ଼୍ ତଡ଼୍ ଆଦେଶ୍ ମାଡ଼ି କେସ୍ ମାତ୍ତିଡ଼୍, ମିଡ଼୍ ବେନ୍ ଦେଶ ଅଦିକାର ମାଡ଼୍ନଙ୍କ୍ ଆଦୁତିଡ଼୍, ଆଦ୍ ୱେର୍ଦେଶତେ ନଗର୍ତେ ଅଶୁଚିତା ତଡ଼୍ ଅଶୁଚି ଦେଶ, ଅଡ଼୍ ପାସ୍କାନ୍ ପାଡ଼୍ୟି ଦେଶତିଙ୍କ୍ ଅଣ୍ଡୟ ସିମାକନ୍ ୱେରେ ସିମା ଏୱୁନା ଅଡ଼୍ କାରାପ୍ ପାଡ଼ିୟ୍ଦେ ନିଣ୍ଡି ମିନ୍ଦେଡ଼୍। ଇଦିନ୍ ମାଇଦିଙ୍କ୍ ମିଡ଼୍ ନିଜର ମାୟାସ୍କିଙ୍କ୍ ଅଡ଼୍ ମାର୍କ୍କିଡ଼୍ ତଡ଼୍ ପେଣ୍ଡୁଲ୍ ଇମାଟ୍, ବା ମି ମାର୍କ୍କିଡ଼୍ ମାଇଦିଙ୍କ୍ ଅଡ଼୍ ମାୟାସ୍କିଙ୍କ୍ ପେଣ୍ଡୁଲ୍ ତାଡ଼୍ମାଟ୍, ବା ଅଡ଼୍ ଶାନ୍ତି ବା ଉନ୍ନତି ବେସୁଙ୍କ୍ ବା ଚେଷ୍ଠା ମାଡ଼୍ମାଟ୍; ଆସୁଙ୍କ୍ ମିଡ଼୍ ଶକ୍ତିତଡ଼ି ଆଦ୍ତିଡ଼୍ ନୁ ଦେଶତେ ସାୟେତ୍ ସାମାନ୍ ତିନ୍ତିଡ଼୍ ନୁ ସାରେଦାମ୍ ନିଜର ପିଲାକିନ୍ ଅଦିକାର୍ତେ ମାଇଦିଙ୍କ୍ ଆଦ୍ ନେଃସ୍ ଆଦ୍ତିଡ଼୍। ମାତର୍ ମାମ୍ ମିଇ ଇ ସାରେ ଆଦେଶ୍ ୱିଡ଼୍ସିମିନ୍ଦେମ୍। ଆଦିଙ୍କ୍ ଇଡ଼୍ ମାନ୍ ପରମେଶ୍ୱର, ମାନ୍ କାରାପ୍ ନୁ ବାଡ଼ିୟେ ଦୋଷ ମାଇଦିଙ୍କ୍ ମା ପର ଇ ସାରେ ଗଟେମ୍ ଆତ୍କେନେ ମିଡ଼୍ ଯେ ମା ଅପରାଦ୍ତେ ଲେକେତ୍ ଦଣ୍ଡକନ୍ ସୁଦୁର୍ ଦଣ୍ଡ୍ ମାକିଙ୍କ୍ ଇସ୍ ମିନ୍ଦେନି ନୁ ମା ଇଲାନେ ଅବଶିଷ୍ଟ ନାରୁଡ଼୍କ୍ ନେସ୍ମିନ୍ଦେଡ଼୍, ଇଦି ଉଡ଼ି ମାମ୍ ବାତେ ମେଣ୍ଡନ୍ଦାମ୍ ମିଇ ଆଦେଶ୍- ପାଲନ୍ ମାଡ଼ିତମ୍ ନୁ ଇ ପାସ୍କାନ୍ ପଡ଼୍ୟିଦେନଡ଼୍କ୍ ୱେର୍ ଗୋଷ୍ଟିତଡ଼୍ ମେଣ୍ଡନ୍ଦାମ୍ କୁଟ୍ମାମ୍ ମାଡ଼ିତମ୍ ? ମାଡ଼୍କେ ମିଡ଼୍ ବାତେ ମାକିଙ୍କ୍ ନିଃଶେଷ ମାଡ଼୍ନା କ୍ରୁଦ୍ଦ ଆୟିୱିଡ଼୍ ? ଆଗାକନ୍ ବେନ୍ ମାନଡ଼୍। ଅ ସଦାପ୍ରବୁ, ଇସ୍ରାଏଲତେ ପରମେଶ୍ୱର, ମାମେ ଦର୍ମମୟ; ବାତେଙ୍କ୍ଇତ୍କେ ମାମ୍ ନେଣ୍ଡେ ଆୟିନା ରକ୍ଷା ମାଇଦିଙ୍କ୍ ସାରେତମ୍ ମିନ୍ଦେମ୍; ଉଡ଼୍, ମାମ୍ ମିଇ ମୁନେ ନିଜର ଦଷ୍ତେ ଦୋଷି ଆସ୍ମିନ୍ଦେମ୍; ବାତେଙ୍କ୍ଇତ୍କେ ଆଦିନ୍ ମାଇଦିଙ୍କ୍ ବେନ୍ ମିଇ ମୁନେ ନିତ୍ପାର୍ୱଣ୍ଡ୍।”
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.