Koya Bible
ଉପଦେଶକ 9
ସାରେତଡ଼୍ ମାଇଦିଙ୍କ୍ ଡଲାନାଦ୍
ନାନେ ଇ ସାରେ ବିଷୟ୍ତେ ମନ୍ଇସ୍ ମେଃକ୍ତାନ୍; ଦାର୍ମିକ ନୁ ବୁଦ୍ଦ୍, ମେଣ୍ଡେ ଅଡ଼୍ ପାଡ଼ିୟ୍ ପରମେଶ୍ୱର୍ତେ କାୟ୍ଦାଦ୍; ଇଦ୍ ପ୍ରେମ କି ପାସ୍କାନାଦ୍, ଆ ନାରୁଣ୍ଡ୍ ପୁନଣ୍ଡ୍; ସାରେ ଅଡ଼୍ ମୁନେ ମାନ୍ତା । ସାରେ ବିଷୟ୍ ସାରେତଡ଼୍ ପର ସମାନ୍ ଗଟେମ୍ଆଦ୍ତେ; ଦାର୍ମିକ ନୁ ଦୁଷ୍ଟ, ସାୟେତଣ୍ଡ୍, ମେଣ୍ଡେ ଶୁଚି ନୁ ଅଶୁଚି; ପୂଜାନାଦ୍ ନୁ ପୂଜ୍ୱାଦ୍, ସାରେତଡ଼୍ ପର ଅଣ୍ଡୟ ଗଟନା ଆଦ୍ତେ; ସାୟେତଣ୍ଡ୍ ବେଲା, ପାପି ଆଦ୍ପୁଟୁଙ୍କ୍; ମେଣ୍ଡେ ଶପତମାଡ଼ାନଣ୍ଡ୍ ବେଲା, ଶପତତିଙ୍କ୍ ୱେର୍ତେନଣ୍ଡ୍ ଆଦ୍ ପୁଟୁଙ୍କ୍ । ପଡ଼ଦ୍ତେ ମଦଲ୍ ବେସର୍ ପାଡ଼ିୟ୍ ମାଡ଼ାନଙ୍କ୍ ଆଦ୍ତେ, ଆଦିନ୍ ଲପେ ଦୁକତେ ବିଷୟ୍ ଇଦ୍ ଯେ, ସାରେତଡ଼୍ ପର ସମାନ୍ ଗଟନାଆଦ୍ତେ; ମେଣ୍ଡେ ଆନ୍ତେ ନାରୁନ୍ ପିଲାକିନ୍ ହୃଦୟ ଦୁଷ୍ଟତାତେ ବର୍ତ୍ତି ନୁ ବାଦ୍କି ମାନା ଜାକ ଅଡ଼୍ ହୃଦୟ୍ ବାୟେ ମାନ୍ତେ, ମେଣ୍ଡେ ତାନ୍ ପେର୍କେ ଅଡ଼୍ ଡଲ୍ତେନଡ଼୍ ଗାରେ ଆଦ୍ତଡ଼୍ । ବାତେଙ୍କ୍ଇତ୍କେ ବେନ୍ ନାରୁଣ୍ଡ୍ ଜିଉମାନ୍ଦାନ୍ ଲପେ କାଇଲ୍ତଣ୍ଡ୍, ଅନାଦ୍ ଆଶେ ମାନ୍ତେ; ବାତେଙ୍କ୍ଇତ୍କେ ଡଲ୍ତେ ସିଂହଡୁୱ୍ ବାଦୁଲ୍ତେ ଜିୱ୍ ମାନ୍ଦାନ୍ ନେୟ୍ ସାୟେ । ଜିଉନ୍ ମାନ୍ଦାନ୍ ନାରୁଡ଼୍ ଡଲିତଡ଼୍ ଇଞ୍ଜ ପୁତ୍ତାଡ଼୍; ମାତର୍ ଡଲ୍ତେ ନାରୁଡ଼୍ ବାତେବା ପୁନଡ଼୍, ଆଗେକ୍ବା ଅଡ଼୍ ମେଣ୍ଡେ ବାତେବା କାୟା ଦର୍ସ୍କଡ଼୍; ବାତେଙ୍କ୍ଇତ୍କେ ଅଡ଼୍ ବିଷୟ୍ତେ ଏର୍କେ ମାର୍ଙ୍ଗି ଆଦ୍ତେ । ବେଲା ଅଡ଼୍ ପ୍ରେମ, ଆଲେକେ ଅଡ଼ାଦ୍ ପାସ୍କାନାଦ୍ ନୁ କପାମ୍ ନଷ୍ଟ ଆଦ୍ତେ; ଆଗେକ୍ବା ପଡ଼ଦ୍ତେ ମଦଲ୍ ବାତେବା ମାଡ଼ାନଙ୍କ୍ ଆଦ୍ତେ, ଆଗାଙ୍କ୍ ସାରେକାଲ ଅଡ଼ାଦ୍ ବାତେବା ଦୁଡ଼୍ ମାନ । ନିମେ ନିଜର୍ ଆର୍ଦା ଆନ୍, ସାର୍ଦେତେ ନିଜର୍ କାଦି ତିନ୍ ନୁ ସାର୍ଦେତେ ନିଜର୍ ଅଙ୍ଗୁର୍ରସ୍ ଉନ୍ ବାତେଙ୍କ୍ଇତ୍କେ ପରମେଶ୍ୱର୍ ନିୟାଦ୍ ପାଡ଼ିୟ୍ ଗ୍ରହଣ ମାଡ଼ି ତେରୁତଣ୍ଡ୍ । ନିୟାଦ୍ ସକା ସାରେଦାମ୍ ପାଣ୍ଡ୍ରିମାନି ନୁ ନି ତାଲେତାଗେ ନିୟ୍ଦେ ଅବାବ୍ ଆୟ୍ମା କି । ପଡ଼ଦ୍ତେ ମଦଲ୍ ପରମେଶ୍ୱର୍ ନିକିଙ୍କ୍ ବେକାର୍ତେ ବେକାର୍ତାୱୁ ବେସ୍କ୍ଦିନା ଇସ୍ ମିନ୍ଦେଣ୍ଡ୍, ନିୟାଦ୍ ଆଦ୍ ବେକାର୍ତେ ସାତ୍ଦିନ୍ ନିଜର୍ ପ୍ରେମତେ ମୁତେନ୍ତଡ଼୍ ସାର୍ଦେତେ ମାନ୍; ବାତେଙ୍କ୍ଇତ୍କେ ଜିଉନ୍ତେ ଲପେ ନୁ ପଡ଼ଦ୍ତେ ମଦଲ୍ ନିମେ ବେନ୍ ତିପାଲ୍ ଆସ ମିନ୍ଦେନି, ଆ ତିପାଲ୍ତେ ଲପେ ଇଦେକେ ନିୟାଦ୍ ଦୁଡ଼୍ । ନିୟାଦ୍ କାଇ ବାତେବା ପାଡ଼ିୟ୍ ମାଡ଼ାନଙ୍କ୍ ଦର୍ସ୍କିତ୍, ଆଦ୍ ନିଜର୍ ଶକ୍ତିତେ ମାଡ଼ା; ବାତେଙ୍କ୍ଇତ୍କେ ନିମେ ବେନ୍ ପଡ଼ିୟ୍ତାଗେ ଆଦୁତିନ୍, ଆ କବର୍ତାଗେ ବାତେବା ପାଡ଼ିୟ୍ ବାତେ ଆଲ୍ସାନାଦ୍ ବାତେ ଶିକ୍ଷା ବାତେ ଜ୍ଞାନ୍ ଇଲା । ନାନେ ମାଲ୍ସ୍ ପଡ଼ଦ୍ତେ ମଦଲ୍ ଉଡ଼୍ତାନ୍ ଯେ, ଉର୍ଗିନ୍ ଆଦାନାୱିଙ୍କ୍ ତାଲ୍ଗି, ବାତେ ବୀରଡ଼୍କ୍ ଜିଡ଼ାନାଦ୍, ମେଣ୍ଡେ ଜ୍ଞାନିଡ଼୍କ୍ କାଦି, ମେଣ୍ଡେ ବୁଦ୍ଦ୍ମାନ୍ଦାନ୍ ନାରୁଡ଼୍କିଙ୍କ୍ ଦନ, ମେଣ୍ଡେ ପଣ୍ଡିତିଡ଼୍କ୍ ଅନୁଗ୍ରହ ଦର୍କ, ମାତର୍ ସାରେତଡ଼୍ ପର ସମୟ ନୁ ଅଟାତ୍ ଗଟେମ୍ ଆଦ୍ତେ । ବାତେଙ୍କ୍ଇତ୍କେ ନାରୁଣ୍ଡ୍ ଆନ୍ତେ ନିଜର୍ ଡଲାନ୍ ସମୟ୍ ପୁନଣ୍ଡ୍; ବେଲାକି କିକେ କଷ୍ଟଆଦାନ୍ ୱାଲ୍ତାଗେ ଆର୍ଦ୍ତା ନୁ ବେଲା ପିଟେ ଉଡ଼ିୟ୍ଦାଗେ ଦର୍କିତା, ଆଲେକେ ନାରୁଣ୍ଡ୍ପିଲା ଅଟାତ୍ ଏୱୁତ୍ତେ ବିପଦ୍ ସମୟ୍ତେ ଦର୍କିତଣ୍ଡ୍ ।
ଜ୍ଞାନି ନୁ ମୁର୍କ
ନାନେ ପଡ଼ଦ୍ତେ ମଦଲ୍ ଇଦ୍ ଲେକାମ୍ତେ ଜ୍ଞାନ ଉଡ଼୍ତାନ୍, ମେଣ୍ଡେ ଆଦ୍ ନା କଣ୍ଡାନେ ବେଡ଼ିୟାଦ୍ ଇଞ୍ଜ ପୁନ୍ଦାନଙ୍କ୍ ଆତ୍ତେ; ଇତ୍କେ ସୁକୁକ୍ ନାରୁଡ଼୍ ମାନ୍ଦାନ୍ ଅଣ୍ଡୟ ସୁଦୁରାଦ୍ ନାର୍ ମାତ୍ତେ; ମେଣ୍ଡେ, ୱେରଣ୍ଡ୍ ମହାରାଜାଲ୍ ଅନ୍ ବିରୁଦ୍ଦ୍ତେ ୱାସ୍ ଆଦ୍ ସାରେ ପାକେ ତିଡ଼୍ୟି ଉଡ଼୍ତଡ଼୍ ନୁ ଆଦିନ୍ ବିରୁଦ୍ଦ୍ତେ ବେଡ଼୍ୟା ବେଡ଼୍ୟା ଟାୱାର୍ ତିଆର୍ ମାଡ଼୍ତଣ୍ଡ୍ । ଇସତ୍ ସମୟ୍ତେ ଆଦିନ୍ ଲପେ ଅଣ୍ଡୟ ଗରିବ୍ ଜ୍ଞାନୀ ନାରୁଣ୍ଡ୍ ତନ୍ଦ୍ତଣ୍ଡ୍, ମେଣ୍ଡେ ଅଣ୍ଡ୍ ନିଜର୍ ଜ୍ଞାନତଡ଼୍ ନାର୍ଦିଙ୍କ୍ ରକ୍ଷା ମାଡ଼୍ତଣ୍ଡ୍; ଆଗେକ୍ବା ଆ ଗରିବ୍ ନାରୁଙ୍କ୍ ବେନ ବା ଏର୍କେ ମାଡ଼ଡ଼୍ । ଆସୁଟ୍ ନାନେ କେତ୍ତାନ୍, ଶକ୍ତିତିଙ୍କ୍ ଆନ୍ ଜ୍ଞାନ୍ ସାୟେ; ଆଗେକ୍ବା ଗରିବ୍ ନାରୁନ୍ ଜ୍ଞାନ ଆସାତାଦ୍ଇନା ଆଦ୍ତେ ନୁ ଅନ୍ ବାକ୍ୟ କେଞ୍ଜାନଙ୍କ୍ ବେନ ଇଚ୍ଛା ମାଡ଼ଡ଼୍ । ମୁର୍କନାରୁଡ଼୍ ଲପେ ଶାସନମାଡ଼ାନଡ଼୍ କିର୍କାନାଦିଙ୍କ୍ ବାଦୁଲ୍ତେ ଶାନ୍ତିତେ କେତାନ୍ ଜ୍ଞାନତେ ବାକ୍ୟ ନାର୍ଗେ କେଞ୍ଜାନଙ୍କ୍ ଆଦ୍ତେ । ଯୁଦ୍ଦ୍ ମାଡ଼ାନ୍ ସାମାନ୍ ବାଦୁଲ୍ତେ ଜ୍ଞାନ୍ ସାୟେ; ମାତର୍ ୱେରଣ୍ଡ୍ ପାପି ନାର୍ଗେ ସାୟେତାଦ୍ ନଷ୍ଟ ମାଡ଼ିତଣ୍ଡ୍ ।
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.