Koya Bible
ଉପଦେଶକ 10
ଡଲ୍ତେ ୱିସ୍ ଗାବ୍ତେ ସାୟେତ୍ ଗାବ୍ତେ ନିୟ୍ଦିଙ୍କ୍ ପିନ୍ଦ୍ୱେ ଗାବ୍ ମାଡ଼ିତେ; ଆଦେଲେକାମ୍ ସୁଦୁର୍ ମୁର୍କନ୍ ସେଙ୍ଗେ ସୁଦୁର୍ ଜ୍ଞାନ ନୁ ଗୌରବ୍ତିଙ୍କ୍ ନଷ୍ଟ ମାଡ଼ିତେ । ଜ୍ଞାନିନାଦ୍ ହୃଦୟ୍ ସାୟେ ଆର୍ଦା ମାନ୍ତେ; ମାତର୍ ମୁର୍କନ୍ ହୃଦୟ ପିନ୍ଦ୍ୱେ ଆର୍ଦା ମାନ୍ତେ । ମେଣ୍ଡେ, ମୁର୍କନ୍ ଆର୍ଦାଗ୍ ଆଦାନ୍ ୱେଲେ ଅନାଦ୍ ବୁଦ୍ଦ୍ତେ ଅବାନ୍ ତନ୍ଦିତ୍, ମେଣ୍ଡେ ଅଣ୍ଡ୍ ସାରେତଡ଼୍କିଙ୍କ୍ କେତିତଣ୍ଡ୍ ଯେ, ଅଣ୍ଡ୍ ମୁର୍କ । ନି ପର ଶାସନ୍ ମାଡ଼ାନଣ୍ଡ୍ ମନ୍ଦାଗ୍ ବିରୁଦ୍ଦ୍ ଆଲ୍ସାନାଦ୍ ପେୟ୍କେ, ନିଜର୍ ପଡ଼୍ୟେ ୱିଡ଼୍ସ୍ମା; ବାତେଙ୍କ୍ଇତ୍କେ ବିଶ୍ୱାସ୍ତେ କଟ ମାତ୍କେ ବେଡ଼୍ୟେ ବେଡ଼୍ୟେ ପାପ ଅପରାଦ୍ ୱିଡ଼୍ସାନଙ୍କ୍ ଆଦ୍ତେ । ନାନେ ପଡ଼ଦ୍ତେ ମଦଲ୍ ଅଣ୍ଡୟ୍ ପିନ୍ଦ୍ୱେ ବିଷୟ୍ ଉଡ଼ି ମିନ୍ଦେନ୍, ଆଦ୍ ଶାସନ୍ ମାଡ଼ାନନାଗାଙ୍କ୍ ପେଇତେ ବୁଲ୍ଦେ ଲେକାମ୍ ତନ୍ଦିତ୍; ମୁର୍କତା ଗାଟି ଡେଙ୍ଗ୍ପଦତାଗେ ତିଆର୍ ଆତ୍ତେ, ମେଣ୍ଡେ ସାଉକାରି ମଦଲ୍ ପଡ଼ିୟ୍ତାଗେ କୁଦିତଣ୍ଡ୍ । ନାନେ ଦାସଡ଼୍କ୍ ଗୁରାତ୍ ପର ନୁ ଅଦିପତିଡ଼୍କ୍ ଦାସନ୍ ଲେକାମ୍ ପାଦାମ୍ତେ ଆଦାନାଦ୍ ଗଞ୍ଜ୍ ଉଡ଼୍ତାନ୍ । ବେନ ଗୁୟ୍ନ୍ଦେ ଡେୱିତଣ୍ଡ୍, ଅଣ୍ଡ୍ ଆଗେ ରାଲିତଣ୍ଡ୍ ନୁ ବେନ୍ ନାରୁଣ୍ଡ୍ ଏଲୁମ୍ତେ ପୁତ୍ ଉଃତିତଣ୍ଡ୍, ଅଂକିଙ୍କ୍ ତାଡ଼ାମ୍ କାସିତେ । ବେନ୍ ନାରୁଣ୍ଡ୍ କାଲ୍ବଦେ ଡେୱିତଣ୍ଡ୍, ଅଣ୍ଡ୍ ଆଦିନ୍ତଡ଼୍ ତାଲ୍ଗିତଣ୍ଡ୍; ମେଣ୍ଡେ, ବେନ ୱେର୍କି ପାଃତିତଣ୍ଡ୍, ଅଣ୍ଡ୍ ଆଦିନ୍ତଡ଼୍ ତାଲ୍ଗିତଣ୍ଡ୍ । ଲୁହା ୱାୟ୍ମାତ୍କେ ବେସୁଙ୍କ୍ ଅଣ୍ଡ୍ ତାନ୍ ୱାୟେ କଲ୍ସଣ୍ଡ୍, ଆଲାଇତ୍କେ ତାନ୍ପେର୍କେ ଅଦିକ୍ ଶକ୍ତି ମାଡ଼୍ ୱେୟ୍ତିତ୍; ମାତର୍ ପାଡ଼ିୟ୍ଦିଙ୍କ୍ ତତାନ୍ ମାଇଦିଙ୍କ୍ ପ୍ରତମ୍ତେ ଜ୍ଞାନ ଦର୍କାର୍। ତାଡ଼ାମ୍ ମନ୍ତର୍ ତେରାନ୍ ମୁନେଙ୍କ୍ କାସ୍କେ ୱାଡେନାଦ୍ ବାତେ ଲାବ୍ ଇଲେ । ଜ୍ଞାନିନ୍ ପାୟୁର୍ତେ ବାକ୍ୟ ଅନୁଗ୍ରହ ଲେକାମ୍; ମାତର୍ ମୁର୍କନ୍ ନିଜର୍ ପାୟୁର୍ ଅଙ୍କ୍ ନଷ୍ଟ ମାଡ଼ିତେ । ତାନ୍ ପାୟୁର୍ତେ ଆରାମ୍ତେ ବାକ୍ୟ ଅଜ୍ଞାନତା ଆଦ୍ତେ ନୁ ତାନ୍ ଗଟିନେ ତେରାନ୍ ଦୁକାତେ ବାୟାନ୍ ଲେକାମ୍ । ମୁର୍କ ଗାଟି ଗଟି କେତିତଣ୍ଡ୍; ଆଗେକ୍ବା ବାତେ ଆଦ୍ତେ, ନାରୁଣ୍ଡ୍ ପୁନଣ୍ଡ୍; ମେଣ୍ଡେ, ତାନ୍ପେର୍କେ ବାତେ ଗଟେମ୍ ଆଦ୍ତେ, ବେନ ଅଂକିଙ୍କ୍ କେତେ ପାର୍ତଣ୍ଡ୍ ? ସାରେତଡ଼୍ ମୁର୍କନ୍ ତିପାଲ୍ ଅଂକିଙ୍କ୍ ଆୟ୍ସ୍ପିତ୍, ବାତେଙ୍କ୍ଇତ୍କେ ବେଲା ନାର୍ଦା ଆଦାନଙ୍କ୍ ଆଦ୍ତେ, ଆଦ୍ ଅଣ୍ଡ୍ ପୁନଣ୍ଡ୍ । ଇ ଦେଶ୍, ନି ରାଜାଲ୍ ବେସୁଙ୍କ୍ ପେକାଲ୍ ଆଦ୍ତଣ୍ଡ୍ ନୁ ନି ଶାସନ୍ମାଡ଼ାନଡ଼୍ ବେସୁଙ୍କ୍ ନାର୍କକେ ତିନ୍ଦ୍ତଡ଼୍, ଆଲାଇତ୍କେ ମିଡ଼୍ ଦଣ୍ଡତେ ନାରୁଡ଼ି । ଇ ଦେଶ, ରାଜାନ୍ ପିଲୁଡ଼୍ତେ ମାର୍ର୍ ବେସୁଙ୍କ୍ ନି ରାଜାଲ୍ ଆଦ୍ତଣ୍ଡ୍ ନୁ ନି ଶାସନ୍ମାଡ଼ାନଡ଼୍ ବେସୁଙ୍କ୍ ଅସାନ୍ ମାଇଦିଙ୍କ୍ ଆୟ, ମାତର୍ ବପୁତେ ମାଇଦିଙ୍କ୍ ଟିକ୍ ସମୟ୍ତେ ତିନ୍ଦ୍ତଡ଼୍, ଆଲାଇତ୍କେ ମିଡ଼୍ ସାୟେତଡ଼ି ! ମଣ୍ଡିନାରୁନ୍ ମୁର୍ସ୍ ଉର୍ଙ୍ଗି ରାଲିତେ, ମେଣ୍ଡେ କାୟ୍ଦେ ପାଡ଼ିୟ୍ ମାଡ଼କଟ ମାତ୍କେ ଲତ୍ତାଗେ ଏର୍ ଜଡ଼୍ଗିତେ । ସାର୍ଦେତେ ମାଇଦିଙ୍କ୍ ବଜି ତିଆର୍ ଆଦ୍ତେ, ମେଣ୍ଡେ ଅଙ୍ଗୁର୍ ରସ୍ ଜିଉନ୍ତିଙ୍କ୍ ସାର୍ଦେ ମାଡ଼ିତେ; ଡାବ୍ ସାରେ ପାଡ଼ିୟ୍ତାଗେ ୱାଦ୍ତା । ରାଜାଙ୍କ୍ ଅବିସାପ୍ ଇମାଟ୍, ବା ମନ୍ଦେ ମନ୍ଦେ ଆନ୍ତେ ଇମାଟ୍ ମେଣ୍ଡେ ସାଉକାରିଙ୍କ୍ ନିଜର୍ ଉଞ୍ଜାନ୍ ଲତ୍ତାଗେ ଅବିସାପ୍ ଇମାଟ୍; ବାତେଙ୍କ୍ଇତ୍କେ ପାର୍ତାନ୍ ପିଟେ ଆ ଗଟ୍ ଏୱ୍ସ୍ ପାର୍ଦେ ନୁ ତାନ୍ ରେକା ସାରେ ଗଟି ଜଣା ମାଡ଼ିଦ୍ତେ ।
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.