Konda Porja Bible
ହିତୋପଦେଶ 4
ଗ୍ୟାନ୍ତି ଲାବ୍
ଏ ନା ମାରିନ୍କୁ, ବୁବା ଅଜାକିନି ମାଟା ୱେନ୍ଡ୍ରୁ ମାରି ନେଗି ବିସାର୍ଦି ଗ୍ୟାନ୍ଦୁ ମନ୍ ସିଦୁ । ଏନ୍ଦାଇର୍ରିଙ୍ଗ୍ ନାନ୍ ମିଙ୍ଗିଁ ନେଗି ସିକିୟା ସିଜିନା, ନା ସିକିୟା ବାଣାମାଟ୍ । ନାନ୍ ନିଜେଦି ବୁବାଦି ମାରିନ୍ ମାର୍ହା, ମାରି, ୟାୟାଦି ଆଗ୍ଡ଼ି କଡ଼୍କିକଡ଼ ମାରି ଅରେନେ ଲାଡ୍ତିକାନ୍ ମାର୍ହା । ବୁବା ନାଙ୍ଗି ସିକିୟା ସିଜି ଇର୍ହାନ୍, “ନି ମନ୍ତୁ ନା ମାଟାୱିଜୁ ଇଡ୍ଆ, ମାରି ନା ମାଟାୱିଜୁ ମାନାଆ ଆବେଟ୍ ନିନୁ ଜିନି । ଗ୍ୟାନ୍ ପୟ୍ଆ, ନେଗି ବିସାର୍ ଲାବ୍ କିଆ, ଆକା ବାଣାମା; ମାରି, ନା ୱେୟୁଦି ମାଟାଦିଙ୍ଗ୍ ବାଣାମା । ତାନିଙ୍ଗ୍ ଡ଼ିସ୍ମା; ଆବେଟ୍ ୱାଦ୍ ନିଙ୍ଗିଁ ଜାତୁନ୍ କିନାତ୍; ତାନିଙ୍ଗ୍ ଜିବନ୍ ନଆ, ଆବେଟ୍ ୱାଦ୍ ନିଙ୍ଗିଁ ରକିୟା କିନାତ୍ । ଗ୍ୟାନ୍ ୱିଜୁଦିଙ୍ଗ୍ ପେରି ବିସୟ୍, ଆଦେଙ୍ଗ୍ ଗ୍ୟାନ୍ ଲାବ୍ କିଆ; ମାରି, ନି ୱିଜୁ ଲାବ୍ ମାଣାନ୍ ନେଗି ବିସାର୍ ଲାବ୍ କିଆ । ତାନିଙ୍ଗ୍ ଜିବନ୍ ନଆ, ଆବେଟ୍ ୱାଦ୍ ନିଙ୍ଗିଁ ପିରିସ୍କିନାତ୍; ତାନିଙ୍ଗ୍ ପମିତିଙ୍ଗା, ୱାଦ୍ ନିଙ୍ଗିଁ ସନ୍ମାନ୍ତି ଅଦିକାରି କିନାତ୍ । ୱାଦ୍ ନି ତାଲାଦୁ ନେଗି ସାଜୁ ଆରିସ୍କିନାତ୍; ୱାଦ୍ ନିଙ୍ଗିଁ ସବାଦି ମୁକୁଟ୍ ଆରିସ୍କିନାତ୍ ।”
ଏ ନା ମାରିନ୍, ୱେନ୍ଆ, ନା ମାଟା ୱେନ୍ଆ; ଆବେଟ୍ ନିନ୍ ନାଣ୍ତ ବାର୍ସେକ୍ ଜିନି । ନାନ୍ ନିଙ୍ଗିଁ ଗ୍ୟାନ୍ଦି ସାରିଦୁ ସିକିୟା ସିତାମାନା, ନାନ୍ ଦାର୍ମୁ ସାରିଦୁ ନିଙ୍ଗିଁ ଅତାମାନା । ନିନୁ ବୁଲାନି ୱାଲେ ନି ପାଦାମ୍ତୁ ଇନି ବାଦା ରେଏତ୍; ମାରି, ଉରୁକ୍ନି ୱାଲେ ନିନୁ ତାକାଇ । ଅଜାକିନି ମାଟା ନେଗେଣ୍ଡ୍ତାନ୍ ଆସ୍ଆ; ତାନିଙ୍ଗ୍ ଡ଼ିସ୍ମା; ତାନିଙ୍ଗ୍ ଇଡ୍ଆ; ଇର୍ରିଙ୍ଗ୍ ଆକା ନି ଜିବନ୍ । ସେଇପାଣିକିନି ଲୋକା ସାରିଦୁ ଡ଼ୁଗ୍ମା ମାରି ତାଗ୍ଇ ଲୋକା ସାରିଦୁ ବୁଲାମା । ଆକା ଡ଼ିସ୍ଆ, ଆୟା ଲାକ୍ତୁରାନ୍ ସଲ୍ମା; ଆବେଣାନ୍ ଡ଼େସିମାର୍ଜି ସାଙ୍ଗ୍ଆ । ଏନ୍ଦାଇର୍ରିଙ୍ଗ୍ ସେଇ ପାଣି କିଏତିଙ୍ଗା ୱାର୍ ସୁଜ୍ଏର୍, ମାରି ଏଙ୍ଗ୍ ଆରେପ୍ଏତିଙ୍ଗା ୱାରି ସୁସୁକାଣ୍କୁ ରେଉ । ଏନ୍ଦାଇର୍ରିଙ୍ଗା ୱାର୍ ସେଇ ପାଣିଦାନ୍ ଉଣ୍ତାକିତି କାଦି ଉଣାର୍; ମାରି, ଜାଟି କିଜି ପୟ୍ତି ଅଙ୍ଗୁର୍ ରସ୍ ଉଣାର୍ ।
ମାତର୍ ଦାର୍ମୁ ଲୋକାଦି ସାରି ସାଲ୍ଦିରି ଜାୟ୍ ୱାଜା, ଆମାକା ୱେଡ଼େ ସାନ୍ଦି ମାରି ମାରି ନାଣ୍ଡ ଜାୟ୍ ଆନାତ୍ । ମାରି ସେଇ ଲୋକା ସାରି ସିକାଟି ୱାଜା; ୱାର୍ ଏମେବାନୁ ତାକାନାର୍, ଆକା ନେସ୍ଏର୍ ।
ଏ ନା ମାରିନ୍, ନା ମାଟାଦୁ ମନ୍ ସିଆ; ନା ମାଟାଦୁ ଗିତଣିଦାନ୍ ୱେନ୍ଆ । ଆକାୱିଜୁ ନି କାଣାଗାଦାନ୍ ସଲ୍ମାକିତ୍; ଆକାୱିଜୁ ନି ଜିବନ୍ତୁ ଜାତୁନ୍ତାନ୍ ଇଡ୍ଆ । ଏନ୍ଦାଇର୍ରିଙ୍ଗ୍ ଆକା ଆମାକାର୍ ପୟ୍ନାର୍, ୱାରି ଉଣ୍ତିଙ୍ଗ୍ ଆକା ଜିବନ୍ ମାରି ୱିଜୁ ମେନ୍ଦଲ୍ତି ଉଣ୍ତିଙ୍ଗ୍ ନେଗିକା ଆନାତ୍ । ନି ଜିବନ୍ତିଙ୍ଗ୍ ନାଣ୍ତ ଜାତୁନ୍ତାନ୍ ଇଡ୍ଆ; ଏନ୍ଦାଇର୍ରିଙ୍ଗ୍ ଆବେଣାନ୍ ଜିବନ୍ତି ନେଗି ସିନ୍ତା ସନାତ୍ । ନି ମାଣାନ୍ କୁଟ୍ ମାଟେଙ୍ଗ୍ ସମାକିୟ୍ ମାରି ୱେକଡେକ ମାଟେଙ୍ଗ୍ ସମାକିୟ୍ । ନି କାଣୁକୁ ଆଗ୍ଡ଼ି ସୁଡ଼ିୱି ମାରି ନି କାଣ୍ଗା ବୁଡା ଆଗ୍ଡ଼ି ସିଦା ସୁଡ଼ିତ୍ । ନିନୁ ନିଜେଦି ପାଦାମ୍ ସିଦାକିଜି ବୁଲାଆ ମାରି ନି ୱିଜୁ ସାରି ଟିକ୍ ଆପିତ୍ । ଉଣେରି ଗି ଡେବ୍ରା ତରିନ୍ ସଲ୍ମା, ମାରି ନି ପାଦାମ୍ ସେଇ ମାଣାନ୍ ଆକ ଇଡ୍ଆ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.