Konda Porja Bible
ହିତୋପଦେଶ 3
ମୁରୁ କଡ଼ର୍ ଆଇଲିକାଙ୍ଗ୍ କାର୍ପିନି ମାଟା
ଏ ନା ମାରିନ୍, ନିନ୍ ନା ନିୟମ୍ ବାଣାମା; ମାତର୍ ନି ଜିବନ୍ ନା ମାଟା ୱିଜୁ ମାନାପିତ୍ । ଏନ୍ଦାଇର୍ରିଙ୍ଗ୍ ଆୟାମାଣାନ୍ ନାଣ୍ତ ବାର୍ସେକ୍ ସାନ୍ଦି ଜିବନ୍ ଜିଦେଙ୍ଗ୍ ଆଟ୍ନି ମାରି ସାନ୍ତିଦାନ୍ ଜିଦେଙ୍ଗ୍ ଆଟ୍ନି । ଦୟା ମାରି ସତ୍ ନିଙ୍ଗିଁ ଡ଼ିସ୍ମାକିତ୍; ନିଜେଦି କକ୍ଲା ସାରିବେଡ଼୍ତି ତର୍ହା ମାରି ନିଜେଦି ଜିବନ୍ତି ପାଟାଦୁ ରାସ୍ସି ଇଡ୍ଆ । ଆକା କିତିଙ୍ଗା, ନିନ୍ ମାପୁରୁ ମାରି ଲୋକା ଆଗ୍ଡ଼ି ଦୟା ମାରି ନେଗିବିସାର୍ ଲାବ୍ ପୟ୍ନି ।
ନିନ୍ ପୁରା ମନ୍ତି ୱାଲେ ପ୍ରବୁଦିମାନୁ ବିସ୍ବାସ୍ କିଆ ମାରି ନିଜେଦି ନେଗିବିସାର୍ତୁ ଆସା ଇଡ୍ମା । ନିଜେଦି ୱିଜୁ ସାରିଦୁ ୱାନିଙ୍ଗ୍ ମାନାଆ; ଆବେଟ୍ ୱାନ୍ ନି ସାରିୱିଜୁ ସାଡ଼ୁକୁ କିନାନ୍ । ନିନ୍ ନିଜେଦି କାଣ୍ଗାଦୁ ନିଜେଦିଙ୍ଗ୍ ବୁଦିଦିକାନ୍ କିମା; ପ୍ରବୁଙ୍ଗ୍ ତିଲାଆ ମାରି ସେଇ ପାଣିଦାନ୍ ଆକ ମାନ୍ଆ । ଆକା କିତିଙ୍ଗାଁ ନି ମେନ୍ଦଲ ପୁରା ନେଗେନ୍ ତେବାନାତ୍ ମାରି ପେଡ଼େନ୍ତି ଲୁଦ୍ଗୁଲ୍ ବପୁ ପୟ୍ନାତ୍ । ନିନ୍ ନିଜେଦି ଦନ୍ତୁ ମାରି ୱିଜୁଦି ମାଣାନ୍ ପୟ୍ନି ପାର୍ତୁମ୍ ପଲ୍ ସିଜି ପ୍ରବୁଙ୍ଗ୍ ମାନାଆ । ଆବେଣାନ୍ ନି କାଦି ଇଡ୍ନି ଇଲୁ ନାଣ୍ତ ଦନ୍ତୁ ପୁରା ଆନାତ୍ ମାରି ନି କୁଣ୍ତ୍ତୁ ପୁନି ଅଙ୍ଗୁର୍ ରସ୍ ବର୍ତି ଆଜି ୱାଙ୍ଗ୍ଜି ସନାତ୍ ।
ଏ ନା ମାରିନ୍, ପ୍ରବୁଦି ନେଗି ବୁଦି ଅଜାକିନି ମାଟା ଡ଼ିସ୍ମା ମାରି ୱାନି ନେଗି ବୁଦି ଅଜାକିନି ମାଟାଦିଙ୍ଗ୍ ଅମାନ୍ୟ କିମା । ଇର୍ରିଙ୍ଗ୍ ଏଣ୍ତେସ୍ ବୁବା ନିଜେଦି ଲାଡ୍କିନି ମାର୍ରିନ୍ତିଙ୍ଗ୍, ଆୟାୱାଜା ପ୍ରବୁ ନିଜେଦି ଲାଡ୍କିନି ମାରିନ୍ତିଙ୍ଗ୍ ନେଗି ବୁଦିଦି ମାଟା ଅଜାକିନାନ୍ । ଆମା ଲୋକୁ ଗ୍ୟାନ୍ ପୟ୍ନାନ୍ ମାରି ବୁଦି ପୟ୍ନାନ୍, ୱାନ୍ ଦନ୍ୟ । ଏନ୍ଦାଇର୍ରିଙ୍ଗ୍ ୱେଣ୍ଡିଦି ବେପାର୍ଦାନ୍ ତାନି ବେପାର୍ ନେଗିକା, ମାରି ନେଗି ବାଙ୍ଗାରାମ୍ଦି ମାଣାନ୍ ତାନି ଲାବ୍ ନାଣ୍ଡ ପେରିକା । ଗ୍ୟାନ୍ ବାଙ୍ଗାଁରାମ୍ତାନ୍ ବା ନାଣ୍ଡ ଦାରା, ମାରି ନି ଆମାବା ନେଗି ଜିନିସ୍ ତାନି ଦାରା ୱାଜା ଆଦେଙ୍ଗ୍ ଜଗ୍ସିଲେତ୍ । ତାନି ଉଣି କିୟୁଦୁ ନାଣ୍ତ ବାର୍ସେକ୍ ଜିନିକା ମାନାତ୍, ତାନି ଡେବ୍ରା କିୟୁଦୁ ଦନ୍ ମାରି ସନ୍ମାନ୍ ତେବାନାତ୍ । ତାନି ସାର୍ରିୱିଜୁ ସୁକ୍ଦି ସାରି ମାରି ତାନି ୱିଜୁ ସାରି ସାନ୍ତିଦିକା ନେ । ଆମାକାର୍ ତାନିଙ୍ଗ୍ ଆସା କିନାର୍, ୱାରି ଉଣ୍ତିଙ୍ଗ୍ ୱାନ୍ ଜିବନ୍ ସିନି ମାରାନୁ ୱାଜା ଆନାର୍; ଆମା ଲୋକୁ ଆକା ଆସି ଇଡ୍ନାନ୍, ୱାନ୍ ଦନ୍ୟ ।
ପ୍ରବୁ ଗ୍ୟାନ୍ତାନ୍ ଦୁନିଆ ତିଆର୍ କିତାନ୍,
ୱାନ୍ ବୁଦିଦାନ୍ ବାଦଡ଼୍ ତିର୍ କିତାନ୍ ।
ୱାନି ଗ୍ୟାନ୍ତୁ ଆଡ୍ଗି ବାଡିଦାନ୍ ଏରୁ ପୁରୁନ୍ଆଜି ନିଙ୍ଗ୍ନେ,
ମାରି, ବାଦଡ଼୍ତାନ୍ ମାସୁ ବଟ୍କୁ ବଟ୍କୁ ଆର୍ନେ ।
ଏ ନା ମାରିନ୍, ଇକାୱିଜୁ ନି ଆଗ୍ଡ଼ିରାନ୍ ସଲ୍ମାକିତ୍, ନିନ୍ ଗ୍ୟାନ୍ ମାରି ବୁଜାନି ସାକ୍ତି ରକିୟା କିଆ । ଆକା ନି ଜିବନ୍ତି ଜିବନ୍ ମାରି କକ୍ଲାଦି ପୁସା ଆରାନି ସବା ଆନାତ୍ । ଆଦେଙ୍ଗ୍ ନିନୁ ନିଜେଦି ସାରିଦୁ ତିଲାଏଣ୍ଡା ବୁଲାନି, ମାରି, ନି ପାଦାମ୍ ତାକାଏତ୍ । ସୁଜ୍ନି ୱେଡ଼ାଦୁ ନିଙ୍ଗିଁ ଇନି ତିଲାନିକା ରେଏତ୍, ହୁଁ, ନିନୁ ସୁଜ୍ନି ମାରି ନି ସୁସ୍କାଣ୍କୁ ସାନ୍ତିଦିକା ଆନାତ୍ । ଦାପ୍ରେ ନିଙ୍ଗ୍ନି ବାଦାଦିଙ୍ଗ୍ ମାରି ସେଇ ଲୋକାଙ୍ଗ୍ ୱାନି ନାସ୍ଟୁଦିଙ୍ଗ୍ ତିୟେଲ୍ ଆମା । ଏନ୍ଦାଇର୍ରିଙ୍ଗ୍ ପ୍ରବୁ ନି ସାକାଦିକାନ୍ ଆନାନ୍, ୱାନ୍ ନି ପାଦାମ୍ ଉରିଦାନ୍ ରକିୟା କିନାନ୍ ।
ନେଗି ପାଣିକିନି ସାକ୍ତି ନି କିୟୁଦୁ ମାର୍ରିଙ୍ଗା, ଦରକାର୍ ମାନି ଲୋକାଙ୍ଗ୍ ଦାନ୍ ସିଦେଙ୍ଗ୍ ମାନା କିମା । ନିଜେଦି ଲାକ୍ତୁ ଜିନିସ୍ ମାର୍ରିଙ୍ଗା, “ସାଣ୍ଡ୍ରୁ, ମାରିଡ଼େସି ରାଦୁ, ନାନ୍ ୱିଗେ ସିନା ଇକା ନି ପାଡ଼ାକାଦି ଲୋକାଙ୍ଗ୍ ଇନ୍ମା ।” ନି ପାଡ଼ାକାଦି ଲୋକୁ ନି ଲାକ୍ତୁ ତିଲାଏଣ୍ତା ବାସା କିତିମାନିଙ୍ଗ୍ ୱାରି ବିରୁଦ୍ତାନ୍ ସେଇକା ସିନ୍ତା କିମା । ଲୋକୁ ନି ଇନିକା ନାସ୍ଟୁ କିଏତିଙ୍ଗ୍, ସେଡିନେ ୱାନି ୱାଲେ ବିରୁଦ୍ କିମା । ଜାଟିଜଗଡ଼ା କିନି ଲୋକା ଉଣ୍ତିଙ୍ଗ୍ ଆକାର୍ ଆମା, ମାରି, ୱାନି ଆମାବା ସାରି ଆସ୍ମା । ଇର୍ରିଙ୍ଗ୍ ସେଇ ଲୋକାଙ୍ଗ୍ ପ୍ରବୁ କାଡ଼୍ନାନ୍; ମାତର୍ ଦାର୍ମୁଦି ଲୋକା ୱାଲେ ୱାନ୍ ମିସାନାନ୍ । ପାପି ଲୋକା ଇଲ୍କାଙ୍ଗ୍ ପ୍ରବୁଦି ଆନାଦୁରିଆ ତେବାନାତ୍, ମାତର୍ ୱାନ୍ ଦାର୍ମୁଦି ଲୋକା ଇଲ୍କାଙ୍ଗ୍ ଆର୍ସିବାଦ୍ କିନାନ୍ । ଜଦିବା ୱାନ୍ ନିନ୍ଦା କିନି ଲୋକାଙ୍ଗ୍ ନିନ୍ଦା କିନାନ୍, ମାତର୍ ୱାନ୍ ସାନ୍ତିଦି ଲୋକାଙ୍ଗ୍ ଦୟା ସିନାନ୍ । ଗ୍ୟାନ୍ଦି ଲୋକୁ ସନ୍ମାନ୍ତି ଅଦିକାର୍ ପୋଇନାର୍, ମାତର ଅଗ୍ୟାନି ଲୋକୁ ନିଜେଦି ସେମାର୍ ପୋଇନାର୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.