Konda Porja Bible
ହିତୋପଦେଶ 21
ରାଜାଦି ଜିବନ୍ ପ୍ରବୁଦି କିୟୁଦୁ ଉସା ଏରୁ ସାମାନ୍ ତେବାନାତ୍; ୱାନ୍ ଆମା ତରିନ୍ ବଦା, ଆୟା ତରିନ୍ ଆକା ପକ୍ନାନ୍ ।
ଲୋକା ୱିଜୁ ସାରି ନିଜେଦି ସୁଣି କାଣାଗାଦୁ ନେଗିକା ତର୍ନାତ୍, ମାତର୍ ପ୍ରବୁ ଜିବନ୍ତିଙ୍ଗ୍ ବିସାର୍ କିନାନ୍ ।
ପୁଜାସିନି ବାଦ୍ଲୁ ନ୍ୟାୟ୍ ମାରି ଦାର୍ମୁ ପ୍ରବୁ ନାଣ୍ତ ୱେଡ଼ିକା ଆନାନ୍ ।
ସେଇ ଲୋକା ଦିୱା ୱାଜା ଆମାକାନ୍ ଆକାର୍ତାନ୍ ସୁଣାନାନ୍ ମାରି ଗର୍ବୁଦି ମନ୍, ଆକା ପାପ୍ଦିକା ଆନାତ୍ ।
ପାଣିକିନି ସିନ୍ତାଦାନ୍ ପାଣିକିତିଙ୍ଗ୍ ନାଣ୍ଡ ଲାବ୍ ଆନାତ୍ ମାତର୍ ୱିଜୁ ଦାନ୍ଦା ପାଣିକିନିକାନ୍ ଆବ୍କା ଉଣା ପୟ୍ନାନ୍ ।
ମିସ୍ ୱେର୍ସି ଉଣ୍ତାକିନି ଦନ୍ ଇନିଙ୍ଗା ଆନିଙ୍ଗାଁ ଇମ୍ନି ଦୁରି ୱାଜା ଆନାତ୍, ଆମାକାର୍ ଆକା ରେବାନାର୍, ୱାର୍ ସାନିକା ରେବାନାର୍ ।
ସେଇ ଲୋକା ସେଇପାଣି ୱାରିଙ୍ଗ୍ ଇପ୍ସି ଅନାତ୍; ଏନ୍ଦାଇର୍ରିଙ୍ଗ୍ ୱାର୍ ନେଗି ପାଣି କିଦେଙ୍ଗ୍ ମାନାଏର୍ ।
ପାପ୍ତୁ ମାନି ଲୋକା ସାରି ନାଣ୍ଡ ୱେକ; ମାତର୍ ପବିତ୍ର ଲୋକ୍ତି ପାଣି ନେଗିକା ।
ଜାଟିଜଗ୍ଡ଼ାକିନି ଆଡ଼ି ୱାଲେ ପେରି ଇଲୁଦୁ ବାସାନି ବାଦ୍ଲୁ ସାତ୍ତି ଉନ୍ଡ୍ରି କନାଦୁ ବାସାନିକା ନେଗେତ୍ ।
ସେଇ ଲୋକା ମନ୍ ସେଇପାଣି କିଦେଙ୍ଗ୍ ଅଡ଼୍ବିନାତ୍, ମାରି, ୱାନି କାଣ୍ଗାଦୁ ୱାନି ପାଡ଼ାକାଦି ଲୋକୁ ଆମାବା ଦୟା ପୟ୍ଏର୍ ।
ନିନ୍ଦାକିନିୱାନିଙ୍ଗ୍ ଦଣ୍ଡ୍ ସିତିଙ୍ଗା, ବୁଦିସିଲି ଲୋକୁ ବୁଦିମାନ୍ ଆନାନ୍; ମାରି, ବୁଦିମାନି ଲୋକାଙ୍ଗ୍ ବୁଜାକିତିଙ୍ଗା, ୱାନ୍ ଜ୍ଞାନ୍ ପୟ୍ନାନ୍ ।
ଦାର୍ମୁଦି ଲୋକ୍ ସେଇ ଲୋକା ଇଲୁକୁ ବିସୟ୍ ସିନ୍ତା କିନାନ୍; ଆୟା ସେଇ ଲୋକୁ ଏଣ୍ତେସ୍ ପୁରା ନାସ୍ଟୁ ଆନାର୍, ଇକା ୱାନ୍ ନେସ୍ତାମାନାନ୍ ।
ଆମା ଲୋକୁ ସିଲିସାତି ଲୋକା କୁକୁନି ବଲୁଦୁ ଗିତଣିଙ୍ଗ୍ ୱେନ୍ଏନ୍, ୱାନ୍ ବା ନିଜେ କୁକୁନାନ୍, ମାତର ୱାନି ବଲୁ ବା ଆଇକାର୍ ୱେନ୍ଏର୍ ।
ମାରାକ୍ସି ଦାନ୍ ସିତିଙ୍ଗାଁ ରିସା ଉଣା ଆନାତ୍, ମାରି, ଅଟିଦୁ ସିତି ଲାଞ୍ଚ୍ ନାଣ୍ଡ ରିସା ସାନ୍ତି କିନାତ୍ ।
ନ୍ୟାୟ୍ ଦାର୍ମୁଦି ଲୋକା ଉଣ୍ତିଙ୍ଗ୍ ୱେଡ଼ିକାଦି ମାଟା ତାନାତ୍; ମାତର୍ ଆକା ସେଇପାଣି କିନି ଲୋକା ଉଣ୍ତିଙ୍ଗ୍ ନାସ୍ଟୁଦିକା ଆନାତ୍ ।
ଆମାକାନ୍ ବୁଦିଦି ସାରି ଡ଼ିସ୍ସି ଆଇ ସାରିଦୁ ବୁଲାନାନ୍, ୱାନ୍ ସାତି ଲୋକା ଦଲ୍ତୁ ବାସାକିନାନ୍ ।
ଆମା ଲୋକୁ ସୁକ୍ତିଙ୍ଗ୍ ଜିବନ୍ନୋନାନ୍, ୱାନ୍ କାକୁର୍ତି ଆନାନ୍; ମାରି, ଆମାକାନ୍ ଅଙ୍ଗୁର୍ ରସ୍ ଉଣ୍ତେଙ୍ଗ୍ ମାରି ନିୟୁ ଉସାଦେଙ୍ଗ୍ ଜିବନ୍ନୋନାନ୍, ୱାନ୍ ମାଜନ୍ ଆଏନ୍ ।
ସେଇ ଲୋକ୍ ନେଗି ଲୋକା ଉଣ୍ତିଙ୍ଗ୍ ଏମେ ଦୁଃକ୍ ତାତେଙ୍ଗ୍ ବଦା କିନାର୍, ଆକା ନିଜେଦି ମୁସ୍କୁ ତାନାନ୍ ।
ଜାଟିଙ୍ଗ୍କିନି ମାରି ଗିଦ୍ରି ଆନି ଆଇମା ୱାଲେ ବାସାନି ବାଦ୍ଲୁ ବନ୍ ବାଡିଦୁ ବାସା କିନିକା ନେଗେତ୍ ।
ଗ୍ୟାନ୍ମାନି ଲୋକା ଇଲୁଦୁ ନାଣ୍ଡ ଦାରାଦି ଦନ୍ ମାରି ନିୟୁ ତେବାନାତ୍; ମାତର୍ ନିର୍ବୁଦି ଲୋକୁ ଆକା ବୁଡା କିନାନ୍ ।
ଆମା ଲୋକୁ ଦାର୍ମୁ ମାରି ଦୟାଦୁ ତେବାନାନ୍, ୱାନ୍ ଜିବନ୍ ମାରି ଦାର୍ମୁ ମାରି ସନ୍ମାନ୍ ପୟ୍ନାନ୍ ।
ଗ୍ୟାନିଦି ଲୋକ୍ ସାକ୍ତିମାନି ଲୋକ୍ତି ଗାଡ଼୍ତୁ ସଲ୍ସି ଡ଼ୁଗ୍ନାନ୍, ମାରି, ଆବେଣି ସାସ୍ ସିଜିମାନି ସାକ୍ତି ୱାନ୍ ନାସ୍ଟୁ କିନାନ୍ ।
ଆମାକାନ୍ ନିଜେଦି ୱେୟୁ ମାରି ୱେତଲ୍ ୱାର୍ଗିଦେଙ୍ଗ୍ ତେବାକିନାନ୍, ୱାନ୍ କାସ୍ଟୁଦାନ୍ ନିଜେଦି ଜିବନ୍ ରକିୟା କିନାନ୍ ।
ଆକାର୍ତି ଲୋକୁ ମାରି ଗର୍ବଦି ଲୋକୁ ନିନ୍ଦାକିନି ଦର୍ତାନ୍ ୱେଙ୍ଗ୍ଁନାନ୍, ୱାନ୍ ଆକାର୍ତି ସିନ୍ତାଦିଙ୍ଗ୍ ପେରିକା କିଜି ପାଣି କିନାନ୍ ।
ଗାଡ଼ିଆ ଲୋକ୍ତି ଆସା ବିସୟ୍ ୱାନିଙ୍ଗ୍ ସାନିକା ଗଟାକିନାତ୍; ଇର୍ରିଙ୍ଗ୍ ୱାନି କିୟୁ ପାଣି କିଦେଙ୍ଗ୍ ମାନା କିନାତ୍ ।
ଏନ୍ ଏନ୍ ୱେଡ଼ାରୁ ନାଣ୍ଡ ଆସା କିନାର୍; ମାତର୍ ଦାର୍ମୁଦି ଲୋକୁ ଦାନ୍ ସିନାନ୍, ମୁସ୍କା ଆଏନ୍ । ସେଇ ଲୋକା ପୁଜାସିନିକା କାଡ଼୍ନି ବିସୟ୍, ମାତର ୱାନ୍ ସେଇ ଅଡ଼୍ପୁଦାନ୍ ତାତିଙ୍ଗାଁ ଆକା ଏସୋ ନାଣ୍ଡ କାଡ଼୍ନି ମାଟା ଆନାତ୍ ।
ମିସ୍ ସାକିସିନିକାନ୍ ନାସ୍ଟୁ ଆନାନ୍; ମାତର୍ ଆମା ଲୋକୁ ୱେନାନ୍, ୱାନ୍ ନାମ୍ନି ମାଟା ଇନାନ୍ ।
ସେଇ ଲୋକ୍ ନିଜେଦି ମକମ୍ ଉତ୍ନାନ୍, ମାତର୍ ସାନ୍ତିଦି ଲୋକ୍ ନିଜେଦି ସାରି ସୁସ୍ତି କିନାନ୍ ।
ପ୍ରବୁଦି ବିରୁଦ୍ତାନ୍ ଆମାବା ଗ୍ୟାନ୍ କି ବୁଦି ମାରି ସିନ୍ତା ସିଲେତ୍ ।
ଜୁଦ୍ ଉଣ୍ତିଙ୍ଗ୍ ଗଡ଼ା ତିଆର୍ ଆନାତ୍; ମାତର୍ ଜିଣାନିକା ପ୍ରବୁଦି ମାଣାନ୍ ୱାନାତ୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.