Konda Porja Bible
ହିତୋପଦେଶ 20
ଅଙ୍ଗୁର୍ରସ୍ ନିନ୍ଦା କିନିକାନ୍, କାଡ଼ୁ ଉଣିଜି ଜାଟି ନିକ୍ନିକାନ୍; ଆମାକାନ୍ ଆୟାମାଣାନ୍ ବାୟା ଆନାନ୍, ୱାନ୍ ବୁଦିସିଲିକାନ୍ ।
ରାଜାଦି ବଲୁ ନରେସ୍ ଆଉଲି ୱାଜା; ଏନ୍ ୱାନିଙ୍ଗ୍ ରିସା କିବିସ୍ନାନ୍, ୱାନ୍ ନିଜେଦି ଜିବନ୍ତି ବିରୁଦ୍ତାନ୍ ପାପ୍ କିନାନ୍ ।
ଜାଟିଜଗ୍ଡ଼ାଦାନ୍ ସାନ୍ତି ଆନି ଲୋକ୍ତି ଗୌରବ୍ ମାଟା; ମାତର୍ ୱିଜୁ ନିର୍ବୁଦି ଲୋକ୍ ଜଗ୍ଡ଼ା କିନାନ୍ ।
ଗାଡ଼ିଆବାଡୁ ଲୋକ୍ ପିନିଦି ଉଣ୍ତିଙ୍ଗ୍ ସେରୁ ଅସି ଡ଼ୁଏନ୍; ଆଦେଙ୍ଗ୍ ୱାନ୍ କାଦିକଣ୍ତା କୟ୍ନି ବେଡ଼ାଦୁ ୱାନ୍ ରେବାତିଙ୍ଗା ବା ଇନିକା ପୋଇଏନ୍ ।
ଲୋକା ମନ୍ତି ସିନ୍ତା ନାଣ୍ଡ ଗୁମି ଏରୁ ୱାଜା, ମାତର୍ ବୁଦିଦି ଲୋକ୍ ଆକା କୁତ୍ନାନ୍ ।
ଏସୋ ଲୋକୁ ନିଜେ ନିଜେଦି ଦୟାଦି ମାଟା ୱେର୍ନାର୍; ମାତର୍ ବିସ୍ବାସ୍ତି ଲୋକ୍ତିଙ୍ଗ୍ ଏନ୍ ପୋଇଦେଙ୍ଗ୍ ଆଟ୍ନାନ୍ ?
ଆମା ଦାର୍ମୁଦି ଲୋକ୍ ନିଜେଦି ନେଗି ଇସାବ୍ତାନ୍ ବୁଲାସାଲା କିନାନ୍, ଆୟା ୱେନ୍କା ୱାନି ମାରିନ୍କୁ ଦନ୍ୟ ଆନାର୍ ।
ଆମା ରାଜା ବିସାର୍ କିନି ବାଡିଦୁ ବାସ୍ନାନ୍, ୱାନ୍ ନିଜେଦି କାଣ୍ଗାଦାନ୍ ସେଇ ବିସୟ୍ତିଙ୍ଗ୍ ଇପ୍ନା ପକ୍ନାନ୍ ।
ନାନୁ ନା ମନ୍ତିଙ୍ଗ୍ ନେଗେନ୍ ଇଟ୍ତାମାନା, ନାନୁ ନା ପାପ୍ତାନ୍ ନରାତାମାନା, ଇକା ଏନ୍ ଇଣ୍ଡ୍ରେଙ୍ଗ୍ ଆଟ୍ନାନ୍ ?
ୱିଜୁ ରକମ୍ତି କେଜିଗୁଣ୍ତୁଙ୍ଗ୍ ମାରି ୱିଜୁ ରକମ୍ତି ଲେକିସ୍କିନି ରୁଣ୍ଡିୱାନିକାଙ୍ଗ୍ ବା ସାମାନ୍ତାନ୍ ପ୍ରବୁ କାଡ଼୍ନାନ୍ ।
ନିଜେଦି ପାଣି ନେଗେଣ୍ଡ୍ ମାରି ସାନ୍ତି ନ ସିଲେ, ଇକା ଅରେନ୍ କଡ଼ ବା ନିଜେଦି ପାଣିଦାନ୍ ନିଜେଦି ବିସୟ୍ ତର୍ନାନ୍ ।
ୱେନି ଗିତଣି ମାରି ସୁଣି କାଣ୍ଗା, ଇୟା ରୁଣ୍ଡିୱାନିକାଙ୍ଗ୍ ପ୍ରବୁ ତିଆର୍ କିତାମାନାନ୍ ।
ସୁଜ୍ଦେଙ୍ଗ୍ ଜିବନ୍ନୋମା, ସିଲେତିଙ୍ଗ୍ ନିନୁ କାକୁର୍ତି ଆନି; ନି କାଣୁକୁ ରେଆ, ଆବେନୁ ନିନୁ କାଦି ଉଣ୍ତେଙ୍ଗ୍ ପୋଇନି ।
କଣି ଲୋକ୍ ଇନାନ୍, “ନେଗେତ୍ ସିଲେ, ନେଗେତ୍ ସିଲେ,” ମାତର୍ ନିଜେଦି ସାରିଦୁ ସନି ୱାଲେ ଗର୍ବ କିନାନ୍ ।
ଆବେନୁ ବାଙ୍ଗାରାମ୍ ମାନାତ୍ ମାରି ନାଣ୍ତ ଦାରାଦି କାଲୁ ମାନାତ୍, ମାତର୍ ଗ୍ୟାନ୍ତି ମାଟା ୱେର୍ସିମାନି ୱେୟୁ ଉଣ୍ତ୍ରି ନାଣ୍ତଦାରା କାଲୁ ୱାଜା । ଅରେନ୍ ନେସ୍ଇ ଲୋକ୍ତି ରକିୟା ଉଣ୍ତିଙ୍ଗ୍ ଦାୟି ଆନାନ୍, ୱାନି ଆଙ୍ଗିଁପାସିୟା ଅତୁ; ମାରି, ଆମାକାନ୍ ଆଇଦେସ୍ତି ଲୋକ୍ତି ଉଣ୍ତିଙ୍ଗ୍ ସାକି ଆନାନ୍, ୱାନିଙ୍ଗ୍ ବାନ୍ଦା ଇଡ୍ଦୁ ।
ମିସ୍ ମାଟାଦାନ୍ ପୋଇତି କାଦି ଲୋକ୍ତିଙ୍ଗ୍ ସାୱି ଆନାତ୍; ମାତର୍ ୱେନ୍କା ୱାନି ୱେୟୁ ମାଣୁଦାନ୍ ବର୍ତି ଆନାତ୍ ।
ସିନ୍ତାଦାନ୍ ୱିଜୁ ଉପାୟ୍ ତିର୍ ଆନାତ୍; ମାରି, ନିନୁ ନେଗି ମାଟା ଆସ୍ସି ଜୁଦ୍ କିଆ ।
ଆମାକାନ୍ ସେଡି ମାଟେଙ୍ଗ୍ ଇଜି ବୁଲାନାନ୍, ୱାନ୍ ମାର୍ଗିତି ମାଟା ୱିକ୍ନାନ୍; ଇୟାଉଣ୍ଡିଙ୍ଗ୍ ନାଣ୍ତ ୱାର୍ଗିଜି ମାନି ଲୋକ୍ତି ୱାଲେ ମିସାମାଟ୍ ।
ଜଦି ଆମାକାନ୍ ନିଜେଦି ବୁବା ୟାୟେଙ୍ଗ୍ ଆନାଦୁରିଆ ସିନାନ୍, ଆର୍ତିଙ୍ଗ୍ ୱାନି ଦିୱା ନାଣ୍ଡ ସିକାଟିଦୁ ନାମ୍ନାତ୍ ।
ପାର୍ତୁମ୍ ଆମାବା ଅଦିକାର୍ ଦାପ୍ରେ ପୁଟ୍ନାତ୍; ମାତର୍ ଆବେଣି ସାରାସାରିଦି ଆସିର୍ବାଦ୍ ପୁଟ୍ଏତ୍ ।
ଇୟାୱାଜା ମାଟା ଇନ୍ମା, “ନାନୁ ଇୟା ସେଇପାଣିଦି ଦଣ୍ତ୍ ସିନା,” ପ୍ରବୁମାନୁ କାପ୍କିଦୁ, ୱାନ୍ ନିଙ୍ଗିଁ ରକିୟା କିନାନ୍ ।
ୱିଜୁ ରକମ୍ତି ତୁସ୍ନି ଗୁଣ୍ତୁଆଙ୍ଗ୍ ପ୍ରବୁ କାଡ଼୍ନାନ୍, ମାରି ନେଗେନ୍ ତୁସ୍ଇକା ତାଗ୍ଏତ୍ ।
ପ୍ରବୁଦିମାଣାନ୍ ଲୋକ୍ତି ବୁଲାନି ସାରି ତିର୍ ଆନାତ୍; ଆଦେଙ୍ଗ୍ ଲୋକୁ ନିଜେଦି ସାରି ଆମାଜାକୁ ବୁଜାଦେଙ୍ଗ୍ ଆଟ୍ନାନ୍ ?
ଇକା ପବିତ୍ର ଇଜି ଦାପ୍ରେ ଇଣ୍ଡ୍ରେଙ୍ଗ୍ ମାରି ମାନତ୍ କିତି ୱେନ୍କା ବିସାର୍ କିନିକା, ଲୋକ୍ତି ଉଣ୍ତିଙ୍ଗ୍ ଉରିଦି ୱାଜା ଆନାତ୍ ।
ଅରେନ୍ ବୁଦିଦି ରାଜା ସେଇ ଲୋକାଙ୍ଗ୍ ରେସ୍ନା ପକ୍ନାନ୍, ୱାନ୍ ୱାରି ମୁସ୍କୁ ସକ୍ର ମାଟିସ୍କିନାନ୍ ।
ଲୋକ୍ତି ଆତ୍ମା ପ୍ରବୁଦି ଦିୱା, ଆକା ମନ୍ତି ଲୋଇରି ୱିଜୁ ବିସୟ୍ ରେବାନାତ୍ ।
ଦୟା ମାରି ସତ୍ ରାଜେଙ୍ଗ୍ ରକିୟା କିନାତ୍; ମାରି, ଦୟା ମାଣାନ୍ ୱାନି ରାଜାଗାଦି ତିର୍ ଆନାତ୍ ।
ମୁରୁଲି ଲୋକା ସାକ୍ତି ୱାରି ସନ୍ମାନ୍, ଡକ୍ରା ଲୋକା ପାଣ୍ଡିତି କୁକୁଟି ୱାରି ସବାଦି ମାଟା ।
ମାଡ୍ତିର୍ହିଙ୍ଗା ଏମେ ଗାଉ ଆନାତ୍, ସେଇଦାନିଙ୍ଗ୍ ଆକ କିନାତ୍, ମାରି, ମାଡ୍ ତିର୍ହିଙ୍ଗାଁ ମନ୍ ଲୋଇ ନେଗେତ୍ ଆନାତ୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.