Konda Porja Bible
ଜିସାଇୟ 27
ଇସ୍ରାଏଲତିଙ୍ଗ୍ ଜିପିସ୍ନିକା
ଆୟା ନାଣ୍ତିଙ୍ଗ୍ ପ୍ରବୁ ନିଜେଦି ସାକ୍ତି ମାରି ପେରି କାଣ୍ତାଦାନ୍ ଲିବିୟାଥନଦିଙ୍ଗ୍ ଦଣ୍ତ୍ ସିନି ଉଣ୍ତିଙ୍ଗ୍ ଆୟା ସାରାସୁଦିଙ୍ଗ୍ ଲିବିୟାଥନଦିଙ୍ଗ୍ ଦଣ୍ତ୍ ସିନାନ୍; ମାରି, ୱାନ୍ ସାମ୍ଦୁର୍ତି ପେରି ଜାତୁଦିଙ୍ଗ୍ ନାଷ୍ଟୁ କିନାନ୍ ।
ଆୟା ନାଣ୍ତିଙ୍ଗ୍ ଉନ୍ଡ୍ରି ଅଙ୍ଗୁର୍ କିଡ଼ିଇ ମାନାତ୍, ମିର୍ ଆବେଣି ଉଦେଶ୍ୟଦାନ୍ ପାଟା ପାର୍ନିଦେର୍ । “ମାପ୍ ସଦାପ୍ରବୁ ଆକା ରକିୟା କିନାପ୍; ମାପ୍ ୱିଜୁୱେଡ଼ାଦୁ ଆବେନୁ ଏରୁ ସିତାପ୍; ଏନ୍ ଏଣ୍ଡେସ୍ ଦାନିଙ୍ଗ୍ ନାଷ୍ଟୁ କିଏନ୍, ଇୟାଉଣ୍ଡିଙ୍ଗ୍ ମାପ୍ ନାଡ଼ା ୱେଡ଼େ ଦାନିଙ୍ଗ୍ ରକିୟା କିତାପ୍ । ମା ମାନୁ ରିସା ସିଲେତ୍; ହୁଁ, ମାରି, ଜଦି କାଟାକଡ଼ି ମାରାକୁ ମାରି ସାମ୍ ମାରାକ୍ ୱିଜୁ ଜୁଦ୍ତାନ୍ ମା ସାତ୍ରୁରୁ ଆନାର୍ । ଆର୍ତିଙ୍ଗ୍ ମାପ୍ ଡାକ୍ସି ଆୟା ୱିଜୁଦିଙ୍ଗ୍ ଅର୍ସେ ୱେପିସ୍ କିନାର୍ । ସିଲେତିଙ୍ଗ୍ ମା ୱାଲେ ମିସାନି ଉଣ୍ତିଙ୍ଗ୍ ୱାନ୍ ମା ସାକ୍ତିଦି ଆଡିଗି ଆପିନ୍; ହୁଁ, ୱାନ୍ ମା ୱାଲେ ମିସାପିନ୍ ।”
ଇସ୍ରାଏଲ୍ତି ଲୋକୁ ୱେନ୍କାରି କାଡ଼ାଦୁ ଜାକୁବ କୁଟୁମ୍ ମାରାନ୍ ୱାଜା ମଦଲ୍ ଆନାର୍; ୱାର୍ ପୁଙ୍ଗୁଁ ପୁପିସ୍ନାର୍ । ୱାର୍ ସପ୍ସି ମାନି ପଲ୍ତି ୱାଲେ ଦୁନିଆ ପୁରାବର୍ତି ଆନାତ୍ ।
ଇସ୍ରାଏଲତି ଲୋକାଙ୍ଗ୍ ପ୍ରବୁ ଏଣ୍ତେସ୍ ଡାକ୍ତା ମାନାନ୍, ଆୟାୱାଜା ୱାନ୍ ଇନିକା ୱାନିଙ୍ଗ୍ ଡାକ୍ତା ମାନାର୍ ? ପ୍ରବୁ ମାଣାନ୍ ସାତି ଲୋକା ୱାଜା ୱାନ୍ ଇନିକା ସାତା ମାନାନ୍ ? ପ୍ରବୁ ୱାନି ଲୋକାଙ୍ଗ୍ ସୋପ୍ନି ୱାଲେ ରକିୟା କିଜି ପୋକ୍ତାନ୍; ୱାନ୍ ୱାରିଙ୍ଗ୍ ୱେଡ଼ାସୋନି ତରଟି ନାଣ୍ତ ଗାଲିଦାନ୍ ୱାନିଙ୍ଗ୍ ଗୁସାକିତା ମାନାନ୍ । ଇୟାଉଣ୍ତିଙ୍ଗ୍ ଜାକୁବଦି ପାପ୍ ସିଲେଣ୍ତା ଆନାତ୍ ମାରି ୱାନି ପାପ୍ ଆକ ଆନିଉଣ୍ଡିଙ୍ଗ୍ ୱିଜୁ ପଲ୍ ଇକା; ୱାନ୍ ଜଜ୍ଞବେଦିଦି କାଲ୍କୁ ୱିଜୁ ଚୁନ୍ଦି ରୁଙ୍ଗିଁତି କାଲୁ ୱାଜା କିତାନ୍, ଆସେରା ବମା ମାରି ୱେଡ଼ା ବମେଙ୍ଗ୍ ୱିଜୁ ମାରି ନିଙ୍ଗ୍ଉ ।
ଇରିଙ୍ଗ୍ ଡାଟ୍ତି ଗାଡ଼୍ତି ବାଟାବାଇଲୁ ଗରନୁ ୱାଜା ସିମ୍ରା ଆନାତ୍, ଲୋକୁ ସିଲିକା ମାରି ଡ଼ିସ୍ତି ବସ୍ତି ବାଡି ଆତାମାନାତ୍; ଆୟା ବାଡିଦୁ ବାଚିପିଲେକ୍ ସାରାନେ ମାରି ଗୁରୁନେ, ମାରି, ମାରାକାଣି କମେଙ୍ଗ୍ ତିନେ । ଆବେଣି କମେଙ୍ଗ୍ ୱିଜୁ ୱାର୍ତିଙ୍ଗା ରୁକାଇ ଆନେ; ଆଇମେକ୍ ୱାଜି ଆବେନୁ ସିସୁ କାସିସ୍ନେ; ଇର୍ରିଙ୍ଗ୍ ଆୟା ଲୋକୁ ବୁଦି ସିଲିକାର୍; ଇୟାଉଣ୍ଡିଙ୍ଗ୍ ଯେ ୱାରିଙ୍ଗ୍ ତିୟାର୍ କିତାନ୍, ୱାନ୍ ୱାରି ଉଣ୍ତିଙ୍ଗ୍ ଦୟା କିଏନ୍ ମାରି ଏନ୍ ୱାରିଙ୍ଗ୍ ତିୟାର୍ କିତାନ୍, ୱାନ୍ ୱାରି ଉଣ୍ତିଙ୍ଗ୍ ଦୟା କିଏନ୍ ।
ଆୟା ନାଣ୍ତିଙ୍ଗ୍ ସଦାପ୍ରବୁଦି ପରାତ୍ ଗାଡା ମିସରଦି ଗାଡା ସାନ୍ଦି, ଏଣ୍ତେସ୍ ଗଦ୍ମୁଦାନ୍ ପଟୁ ୱେର୍ଏ କିଜି ସାଡ଼୍ନାନ୍, ମାରି, ଇସ୍ରାଏଲଦି ଲୋକୁ, ଆୟାୱାଜା ମିର୍ ଅରେନ୍ ଅରେନ୍ ଆଜି ଉଣ୍ଡାଇ ଆନିଦେର୍ ।
ମାରି, ଆୟା ନାଣ୍ତିଙ୍ଗ୍ ଉନ୍ଡ୍ରି ମୋରି ଉକାଇ ଆନାତ୍; ମାରି, ଅସୁର ଦେସ୍ତୁ ନାସ୍ଟୁଆନିକାର୍ ମାରି ମିସର ଦେସ୍ତୁ ପେରାତିମାନି ଲୋକୁ ୱାନାର୍; ମାରି, ୱାର୍ ଜିରୁସାଲମତି ପବିତ୍ର ଗରନ୍ତୁ ସଦାପ୍ରବୁଙ୍ଗ୍ ମାଡ଼ିସ୍ କିନାର୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.