Konda Porja Bible
ଜିସାଇୟ 26
ଦନ୍ୟବାଦ୍ତି ପାଟା
ଆୟା ନାଣ୍ତିଙ୍ଗ୍ ଜିହୁଦା ଦେସ୍ତୁ ଇୟା ପାଟା ପାରାଇ ଆନାତ୍; ମା ଉନ୍ଡ୍ରି ଡାଟ୍ତି ଗାଡ଼୍ ମାନାତ୍; ମାପୁରୁ ନିଜେ ଆବେଣି ରକିୟାଦିଙ୍ଗ୍ ପେରି ଗଡା ମାରି ପରିକା ୱାଜା କିନାନ୍ । ସତ୍ ମାନାନିକାର୍ ଦାର୍ମୁଦି କୁଡ଼ା ଏଣ୍ତେସ୍ ସନ୍ଡ୍ରେଙ୍ଗ୍ ଆଟ୍ଏର୍, ଇୟାଉଣ୍ଡିଙ୍ଗ୍ ମିର୍ ଗାଡ଼୍ତି ସେର୍ଲେଙ୍ଗ୍ ୱିଜୁ ରେତୁ । ଏମେୱାନି ମୋନ୍ ମି ମାନୁ ତିର୍ ମାନ୍ଜିନାତ୍, ୱାନିଙ୍ଗ୍ ନିନୁ ସାନ୍ତିଦାନ୍ ଇଡ୍ନି; ଇରିଙ୍ଗ୍ ୱାନ୍ ମି ଲାକ୍ତୁ ଆସା ଇଡ୍ନାନ୍ । ମିର୍ ୱିଜୁଦିନ୍ ସଦାପ୍ରବୁଦି ଲାକ୍ତୁ ଆସା ଇଡ୍ଦୁ; ଇରିଙ୍ଗ୍ ସଦାପ୍ରବୁ ଜିହୋବାଦି ମାନୁ ଏସେଙ୍ଗ୍ୱିଜ୍ଇ ପିଡ଼ିପି କାଲୁ ମାନାତ୍ । ମାରି, ଏମେକାର୍ ଗର୍ବ ମାର୍ହାର୍ ୱାନ୍ ସାନ୍ତି କିତା ମାନାନ୍, ପେରି ଗାଡ଼୍ତୁ ବାସାତି ମାନି ଲୋକାଙ୍ଗ୍ ଦ୍ୱଂସ କିତା ମାନାନ୍; ୱାନ୍ ଦାନିଙ୍ଗ୍ ଦୁଡ଼ିଦୁ ମିସାକିନାନ୍ । ସିଲିସାତି ଲୋକା ପାଦାମ୍ ମାରି କାକୁର୍ତି ଲୋକା ପାଦାମ୍ଦାନ୍ ମାଟ୍ନାର୍ । ଦାର୍ମୁଦି ଲୋକା ସାରି ସାଡ଼ୁକୁ; ନାଣ୍ତ ଜେ ମିରୁ, ମିରୁ ଦାର୍ମୁଦି ସାରି ତର୍ସିନି । ଏ ସଦାପ୍ରବୁ, ମାପ୍ ନି ବିସାର୍ କିନି ସାରିଦୁ ନିଙ୍ଗିଁ କାପ୍କିଜି ତେବାତାମାନାପ୍; ନି ଦରୁ ମାରି ନି ଏତ୍କିନି ସିନା ଉଣ୍ତିଙ୍ଗ୍ ମା ଜିବନ୍ତି ଆସା ମାନାତ୍ । ନାଡ଼ା ବେଡ଼ାଦୁ ନାନ୍ ନା ଜିବନ୍ତି ୱାଲେ ନି ଆସା କିତାମାନା; ହୁଁ, ନାନ୍ ନା ଜିବନ୍ତି ଆତ୍ମାଦି ୱାଲେ ଦାପ୍ରେନେ ନିଙ୍ଗିଁ ରେବାଜିନା; ଇରିଙ୍ଗ୍ ଦୁନିଆଦୁ ନି ନିୟାଇ ବିସାର୍ ଆତିଙ୍ଗାଁ ଦୁନିଆଦି ଲୋକୁ ଦାର୍ମୁଦି ସିକିୟା ପୋଇନାର୍ । ତାଗ୍ଇ ଲୋକା ଉଣ୍ତିଙ୍ଗ୍ ଦୟା କିତିଙ୍ଗ୍ ବା ୱାନ୍ ଦାର୍ମୁ ଅଜାଏନ୍; ସାନ୍ତି ଦେସ୍ତୁ ୱାନ୍ ଅନ୍ୟାୟ୍ କିନାନ୍ ମାରି ସଦାପ୍ରବୁଦି ମହିମାଦିଙ୍ଗ୍ ସୁଡ଼ୁଏନ୍ । ଏ ସଦାପ୍ରବୁ, ନି କିୟୁ ପେର୍ତା ମାନାନ୍, ଇରିଙ୍ଗ୍ ୱାର୍ ସୁଡ଼ୁଦେଙ୍ଗ୍ ଆଟ୍ଏର୍, ମାତର୍ ଲୋକା ମାଣାନ୍ ନି ସାକ୍ତି ସୁଡ଼ୁଜି ୱାର୍ ସେମାର୍ ଆନାର୍; ହୁଁ, ସିସୁ ମି ସାତ୍ରୁରିଙ୍ଗ୍ ସାପିସ୍ କିନାତ୍ । ଏ ସଦାପ୍ରବୁ, ନିନୁ ମା ଉଣ୍ତିଙ୍ଗ୍ ସାନ୍ତି ତିୟାର୍ କିନି; ଇରିଙ୍ଗ୍ ନିନୁ ମା ଉଣ୍ତିଙ୍ଗ୍ ମା ୱିଜୁ ପାଣି ପୁରା କିତିମାନି । ଏ ସଦାପ୍ରବୁ, ମା ମାପୁରୁ, ନିଙ୍ଗିଁ ଡ଼ିସ୍ତିଙ୍ଗ୍ ଆଇକାର୍ ମା ମୁସୁକୁ ଶାସନ୍ କିଜିମାର୍ହାର୍, ମାତର୍ କେବଲ ନି ମାଣାନ୍ ମାପ୍ ନି ଦର୍ତାନ୍ ସେବା କିନାପ୍ । ଇଲେଇ ୱାର୍ ସାତାମାନାର୍, ୱାର୍ ମାରି ଜିବନ୍ ଆଏର୍; ୱାର୍ ସାତାମାନାର୍, ୱାର୍ ନିଙ୍ଗ୍ଏର୍ନି; ଇୟାଉଣ୍ଡିଙ୍ଗ୍ ନିନ୍ ସାସ୍ତି ସିଜି ୱାରିଙ୍ଗ୍ ସାପିସ୍ତିମାନି ମାରି ୱାରିଙ୍ଗ୍ ଏତ୍ କିନିକା ଆଡ଼୍କିତିମାନି । ନିନ୍ ଇୟା ଦେସ୍ତି ଲୋକାଙ୍ଗ୍ ନାଣ୍ତ କିତିମାନି, ଏ ସଦାପ୍ରବୁ ନିନ୍ ଇୟା ଦେସ୍ତି ଲୋକାଙ୍ଗ୍ ପିରିପ୍ତି ମାନି; ନିନୁ ନିଜେ ଗୌରବ୍ ପୋଇତିମାନି; ନିନୁ ଦେସ୍ତି ଇତିସାନ୍ଦି ୱିଜୁ ଅସାର୍ କିତିମାନି । ଏ ସଦାପ୍ରବୁ, କାସ୍ଟୁଦି ୱେଡ଼ାଦୁ ୱାର୍ ନିଙ୍ଗିଁ ରେବାତାମାନାର୍, ନି ସାନ୍ତି ୱାରି ମୁସୁକୁ ମାର୍ହି ୱାଲେ ୱାର୍ ସାନ୍ତିଦାନ୍ ପାର୍ତନା କିତାର୍ । ଗାର୍ବୁଦୁମାନି କଡ଼ ଜନମ୍କିନି ୱେଡ଼ାଦୁ ପଟାଦୁ ନୋପି ଆନାତ୍ ମାରି ନୋପିଦାନ୍ ଆଡ଼୍ବାନାତ୍, ଆୟାୱାଜା ଏ ସଦାପ୍ରବୁ, ମାପ୍ ନି ଆଗ୍ଡ଼ି ଆତାମାନାପ୍ । ମାପ୍ ଗାର୍ବୁଦୁମାନି ଆଇମା ୱାଜା ଆତାମାନାପ୍, ମାପ୍ କିଲିବିଲି ଆଜି ଇନିକା ଜନମ୍ କିତାମାନାପ୍; ମାପ୍ ଦେସ୍ତି ରକିୟା କିନି ପାଣି ପୁରା କିଏପ୍; ମାରିବା ଦେସ୍ତି ଲୋକୁ ଜନମ୍ ଆଏର୍ । ମି ସାତିକାର୍ ଜିବନ୍ ଆନାର୍; ନା ମାଡ଼େଙ୍ଗ୍ ୱିଜୁ ନିଙ୍ଗ୍ନେ । ଏ ଦୁନିଆଦି ଲୋକୁ, ମିର୍ ନିଙ୍ଗିଁଜି ପାର୍ଦୁ; ଇର୍ରିଙ୍ଗ୍ ମି ମାସୁ ଲାଟାଦି ମାସୁ ୱାଜା ମାରି ବୁମି ସାତି ଲୋକାଙ୍ଗ୍ ନିକ୍ନାତ୍ ।
ବିସାର୍ ମାରି ଉଦାର୍
ଏ ନା ଲୋକୁ, ରାଦୁ, ମି ଇଲୁଦୁ ଡ଼ୁଗୁଜି ମି ସାରିବେଡ଼େତି ସେର୍ଲା କେର୍ତୁ; ରିସା ସୋନେଣ୍ଡା ସାଣେକ୍ତିଙ୍ଗ୍ ନିଜେଦିଙ୍ଗ୍ ମାର୍ଗ୍ଦୁ । ଇରିଙ୍ଗ୍ ସୁଡ଼ୁଦୁ, ମାପୁରୁ ଦୁନିଆଦି ଲୋକା ପାପ୍ ଉଣ୍ତିଙ୍ଗ୍ ସାସ୍ତି ସିନି ଉଣ୍ତିଙ୍ଗ୍ ନିଜେ ମୁସ୍କୁପୁର୍ତାନ୍ ସୋସି ୱାଜିନାନ୍; ଦୁନିଆ ନେ ନିଜେଦି ସାପିସ୍ନିକା ୱେର୍ନାତ୍ ମାରି ନିଜେଦି ସାତି ଲୋକାଙ୍ଗ୍ ମାରି ଆଡ଼୍କ୍ସି ଇଡ୍ଏନ୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.