Konda Porja Bible
ଜିସାଇୟ 13
ବାବିଲଦି ଦଣ୍ଡ
ବାବିଲ ବିସୟ୍ଦି ମାଟା, ଆମସଦି ମାରିନ୍ ଜିସାଇୟ ଇୟା ଦର୍ସନ ପୋଇତାନ୍ ।
ମିର୍ ମାରାକୁ ସିଲି ଗରନୁ ମୁସୁକୁ ଜେଣ୍ତା ନିକ୍ତୁ, ଲୋକା ଉଣ୍ତିଙ୍ଗ୍ ମାଟା ନିକ୍ତୁ, କିୟୁ ଦୁକ୍ତୁ, ୱାର୍ ସାସନ୍କିନିୱାରି ଗାଡ଼୍ତି ଦୁୱାର୍ତୁ ଡ଼ୁଗ୍ନାର୍ । ମାପ୍ ନିଜେଦି ପବିତ୍ର ଲୋକାଙ୍ଗ୍ ଆଦେସ୍ କିତାମାନା, ହୁଁ, ମାପ୍ ନିଜେଦି ରିସାଦି ପୁରାକିନି ଉଣ୍ତିଙ୍ଗ୍ ମା ବିରରିଙ୍ଗ୍, ମାରି, ମା ଗର୍ବଦି ୱେଡ଼ିକାଦି ଲୋକାଙ୍ଗ୍ କୁକୁସିନାପ୍ ।
ଗରକାଙ୍ଗ୍ ନାଣ୍ଡ ଲୋକାଦି ନିୟାଇ ଲୋକାଦି ଆଉଲି ଆଜିନାତ୍ ! ଉଣ୍ଡ୍ରେମାନୁଆଜି କୁଡ଼ାଦିୱାରି ରାଜିଙ୍ଗ୍ ୱିଜୁ କୋଲକଲା ଆଜିନାତ୍ ! ସଦାପ୍ରବୁ ଜୁଦ୍ତି ଉଣ୍ତିଙ୍ଗ୍ ସନ୍ୟରିଙ୍ଗ୍ ଉଣ୍ଡା କିଜିନାନ୍ । ୱାର୍, ସଦାପ୍ରବୁ ମାରି ୱାନି ରିସାଦି ସାଜୁ ୱିଜୁ ସାରାଦେସ୍ ପେର୍ନି ଉଣ୍ତିଙ୍ଗ୍ ଆକ ଦେସ୍ତାନ୍, ବାଦଡ଼୍ ଇତି ସାନ୍ଦିଦାନ୍ ୱାଜିନାର୍ ।
ମିର୍ ଦୁଃକ୍ତାନ୍ ଆଡ଼ାବାଦୁ; ଇରିଙ୍ଗ୍ ସଦାପ୍ରବୁଦି ଦିନ୍ ଇଗାୱାତାତ୍; ସର୍ବସାକ୍ତିମାନ୍ଦି ଲାକ୍ତୁରାନ୍ ଦଂସଦି ନିୟାଇ ଆକା ୱାନାତ୍ । ଇୟାଉଣ୍ଡିଙ୍ଗ୍ ଡାଟ୍ କିୟୁ ସାକିସିଲିକା ଆନାତ୍ ମାରି ତିଏଲ୍ତାନ୍ ୱିଜେରି ଲୋକା ଜିବନ୍ ତର୍ଲେ ଆନାତ୍; ମାରି, ୱାର୍ ତିଲାନାର୍; କାସ୍ଟୁ ମାରି ନପି ୱାରିଙ୍ଗ୍ ଆସ୍ନାତ୍; ୱାରିଙ୍ଗ୍ ଆସ୍ନାତ୍; ୱାକ୍ କୋଡ଼ ଜନମ୍ସିନି ଆଇମାଦି ୱାଜା ନପି ଆନାର୍; ୱାର୍ ନିଜେନିଜେଦି ବିସୟ୍ତାନ୍ ତିଲାନେ; ୱାନିକା ୱେୟୁ ସିସୁଦି ୱାଜା ଆନାତ୍ । ସୁଡ଼ୁଦୁ, ଦେସ୍ ଦଂସ କିଦେଙ୍ଗ୍ ମାରି ଆୟା ଲୋଇରାନ୍ ମାନି ପାପି ଲୋକାଙ୍ଗ୍ ସାପିସ୍ କିଦେଙ୍ଗ୍ ସଦାପ୍ରବୁଦି ଦିନ୍ ଭୟଙ୍କାର୍; ରିସା ମାରି ନାଣ୍ଡ ରିସା ମିସାଜି ୱାଜିନାତ୍ । ଇରିଙ୍ଗ୍ ବାଦଡ଼୍ତି ସୁକେଙ୍ଗ୍ ମାରି ଆବେଣି ପେରି ସୁକେଙ୍ଗ୍ ଜାୟ୍ ସିଉ; ୱେଡ଼ା ନିଜେ ସୋନି ବେଡ଼ାଦୁ ସିକାଟି ଆନାତ୍ ମାରି ଲେଜୁ ନିଜେଦି ଜାୟ୍ ସିଏଣ୍ଡା ଆନାତ୍ ।
ମାରି, ମାପ୍ ଦେସ୍ତିଙ୍ଗ୍ ତାଗ୍ଇ ଉଣ୍ତିଙ୍ଗ୍ ମାରି ତାଗ୍ଇୱାରିଙ୍ଗ୍ ୱାରି ଅଦାର୍ମୁତି ଉଣ୍ତିଙ୍ଗ୍ ସାସ୍ତି ସିନା ମାରି ମାପ୍ ଆକାର୍ଆନିୱାରି ଗର୍ବ ବନ୍ଦ କିବିସ୍ କିନା ମାରି ଭୟଙ୍କାର୍ ଲୋକାଦି ଗର୍ବ ରୁକ୍ନା ପକ୍ନା । ମାପ୍ ନେଗି ବାଙ୍ଗାରାମ୍ତି ବାଦ୍ଲୁ ଦୁନିଆଦିଙ୍ଗ୍ ମାରି ଓପିରଦି ନେଗି ବାଙ୍ଗାରାମ୍ତି ବାଦ୍ଲୁ ଲୋକ୍ତିଙ୍ଗ୍ ନାଣ୍ତ ଦାରା କିନିକା । ଇୟାଉଣ୍ଡିଙ୍ଗ୍ ମାପ୍ ବାଦଡ଼୍ତିଙ୍ଗ୍ କମ୍ପେ କିନିକା, ମାରି ପେରିସାକ୍ତିଦି ସଦାପ୍ରବୁଦି ରିସାଦାନ୍ ମାରି ୱାନି ନାଣ୍ଡ୍ ରିସାଦି ଦିନ୍ତୁ ଦୁନିଆ ମାର୍ଜି ଆୟାବାଡି ଦଂସ ଆନାତ୍ ।
ଆବେନୁ ଇୟାୱାଜା ଗୋଟାନାତ୍ ଜେ, ପେରାଜିତାସି ମାନି ବନ୍ଗରିଆଦି ନିୟାଇ ମାରି ଗାଉଡ଼ୁଏନ୍ ସିଲି ମେଣ୍ଡା ୱାଜା ଲୋକୁ ୱିଜେରେ ନିଜେ ନିଜେଦି କୁଟୁମ୍ ଉଣ୍ତିଙ୍ଗ୍ ଡ଼େସିୱାନାର୍ ମାରି ୱିଜେରେ ନିଜେ ନିଜେଦି ଦେସ୍ ତରିନ୍ ଉର୍କୁନାର୍ । ଆମା ଲୋକୁଦି ଉଦେସ୍ ପୁଟ୍ନାତ୍, ୱାନିଙ୍ଗ୍ ଡାକ୍ନାର୍ ମାରି ଆମା ଲୋକୁ ଦାରାସିନାନ୍, ୱାନ୍ କାଣ୍ତାଦାନ୍ କାତାନାନ୍ । ୱାରି ଇସ୍ରି କଡ଼ରିଙ୍ଗ୍ ବା ୱାରି ଆଗ୍ଡ଼ି ସାନାର୍; ୱାରି ଇଲ୍କୁ ଡଙ୍ଗାକିନାର୍ ମାରି ୱାରି ଆଡ଼ିକାଙ୍ଗ୍ ଦାରିପାଣି କିନାର୍ ।
ସୁଡ଼ୁଦୁ, ମାପ୍ ୱାରି କୁଟୁମ୍ଦି ମାଦିୟରିଙ୍ଗ୍ ୱେଡ଼ିକାକିବିସ୍ କିନାପ୍, ୱାର୍ ୱେଣ୍ତିଦିଙ୍ଗ୍ ସୁଡ଼ୁଏତାର୍ ମାରି ବାଙ୍ଗାରାମ୍ଦାନ୍ ୱାର୍ ୱେଡ଼ିକା ଆଏର୍ । ୱାରି ଦନୁ ମୁରୁଲି କଡ଼ରିଙ୍ଗ୍ ସାପିସ୍ କିନାତ୍ ମାରି ୱାରି ଗାର୍ବୁଦୁ ମାର୍ହି କୋଡ଼ରିଙ୍ଗ୍ ବା ଦୟା କିଏର୍, କୋଡ଼ରି ଉଣ୍ତିଙ୍ଗ୍ ୱାରି ଦୟା ଆଏତ୍ । ମାରି, ରାଜିଙ୍ଗ୍ ୱିଜୁ ଗୌରବ୍ ୱାଜା ମାରି କଲ୍ଦିୟରି କିତି ସୁନ୍ଦର୍ ୱାଜା ଜେ ବାବିଲ, ଆକା ମାପୁରୁଦି ମାଣାନ୍ ନାସ୍ଟୁଆତି ସଦୋମ ମାରି ହମରାଦି ୱାଜା ଆନାତ୍ । ଆକା ଏସେଙ୍ଗ୍ ବା ବାସାନି ବାଡ଼ି ଆଏତ୍, ଜୁଗୁ ଜୁଗୁ ସାନ୍ଦି ଏନ୍ ଆବେନୁ ବାସା କିଏର୍; ଆରବିୟ ଲୋକୁ ଆବେନୁ ଗୁଡ଼ା କିଏର୍, ମେଣ୍ଡେଙ୍ଗ୍ସାରାକିନିକାର୍ ନିଜେନିଜେଦି ମେଣ୍ଡେଙ୍ଗ୍ ମାନ୍ଦା ଆବେନୁ ତେବା କିଏର୍ । ମାତର୍ ବନୁତି ଜାତୁଙ୍ଗ୍ ଆୟା ବାଡିଦୁ ବାସା କିନେ ମାରି ୱାରି ଇଲ୍କୁ ଆଉଲିଆନି ଜାତୁଙ୍ଗ୍ ପୁରା ଆନେ; କସ ପଟିଙ୍ଗ୍ ଆବେନୁ ବାସା କିନେ ମାରି ବନୁ ଗରିଏଙ୍ଗ୍ ଆବେନୁ ଗାତ୍ସି ବୁଲାନେ । ମାରି ବେଡ୍ରକିଙ୍ଗ୍ ୱାନିକା ବାଡିଆଙ୍ଗ୍ ମାରି ଗଲୁକୁ ୱାନିକା ୱେଡ଼ିକାଦି ନାଣିମି ଇଣ୍ତ୍ର ଆଡ଼୍ବାନେ; ୱାନିକା ଦିନ୍ ଲାକ୍ତୁନେ ମାରି ୱାନିକା ଦିନ୍ ୱିଜୁ ନାଣ୍ଡ୍ ଆଏତ୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.