Konda Porja Bible
ଜିସାଇୟ 12
ଦନ୍ୟବାଦ୍ତି ପାଟା
ଆୟା ନାଣ୍ତିଙ୍ଗ୍ ମିର୍ ଇନିଦେର୍, “ଏ ସଦାପ୍ରବୁ, ନାନ୍ ନି ଦନ୍ୟବାଦ୍ କିନା; ଇରିଙ୍ଗ୍ ନିନ୍ ମା ଉଣ୍ତିଙ୍ଗ୍ ରିସାଦାନ୍ ମାର୍ହି, ନି ରିସା ସାନ୍ତି ଆତାମାନାତ୍ ମାରି ନିନ୍ ମାଙ୍ଗିଁ ସାନ୍ତି ସିତିମାନି । ସୁଡ଼ୁଆ, ମାପୁରୁ ମା ରକିୟା କିନିକାନ୍; ମାଡ୍ ବିସ୍ବାସ୍ କିନାଟ୍ ମାରି ତିଲାଏଟ୍; ଇରିଙ୍ଗ୍ ଜିହୋବା ସଦାପ୍ରବୁ ମା ସାକ୍ତି ମାରି ବୁଦି; ମାରି, ୱାନ୍ ମାଙ୍ଗିଁ ମୁକୁଡ଼ା କିତାମାନାନ୍ ।” ଇୟାଉଣ୍ଡିଙ୍ଗ୍ ମିର୍ ୱେଡ଼ିକାଦି ରକିୟାକିନି କୁଇକାଲ୍ଦାନ୍ ଏରୁ ରେନିଦେର୍ ।
ମାରି, ଆୟା ନାଣ୍ତିଙ୍ଗ୍ ମିର୍ ଇନିଦେର୍, “ସଦାପ୍ରବୁଦି ଦନ୍ୟବାଦ୍ କିଦୁ, ୱାନି ଦର୍ତାନ୍ ପାର୍ତନା କିଦୁ, କୁଟୁମ୍ଦି ଲୋଇରାନ୍ ୱାନି କିତି ପାଣି ୱିଜୁ ପ୍ରଚାର୍ କିଦୁ, ୱାନି ଦରୁ ୱିଙ୍ଗିଁତ୍ ଇଜି ୱେର୍ତୁ । ସଦାପ୍ରବୁଦି ଉଦେସ୍ଦାନ୍ ପାଟା ପାର୍ଦୁ; ମାତର୍ ୱାନ୍ ମହିମାଦି ପାଣି କିତାମାନାନ୍; ଆକା ୱିଜୁ ଦୁନିଆ ନେସ୍ତି । ଏ ସିୟୋନଦି ଲୋକୁ, ମିର୍ ନାଣ୍ତ ଆଉଲି ଆଜି ୱେଡ଼ିକାଦାନ୍ ୱେଡ଼ିକା କିଦୁ; ଇରିଙ୍ଗ୍ ଏନ୍ ଇସ୍ରାଏଲଦି ଦାର୍ମୁଦିୱାଜା, ୱାନ୍ ମି ଲୋଇ ପେରିକାନ୍ ଆନାନ୍ ।”
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.