Konda Porja Bible
ଏଜ୍ରା 3
ପାର୍ତନା ଡ଼େସି ଆରାମ୍ ଆନିକା
ମାରି, ସାତ୍ ଲେଜ୍ଜୁ ଇଗା ୱାତାତ୍, ମାରି ଇସ୍ରାଏଲ ଲୋକୁ ଆୟାୱିଜୁ ଗାଡ଼୍ଦୁ ମାର୍ହାର୍, ନାସ୍ତିୱାଲେ ଲୋକୁ ଉଡ୍ରେ ମନ୍ ଆଜି ଜିରୁସାଲମତୁ ଉଣ୍ତାତାର୍ । ଆବେଟ୍ ଯୋସାଦକଦି ମାରିନ୍ ଜେସୁୟ ନି ୱାନି ଜାଜକ ତଡ଼ାନ୍କୁ ମାରି ଶଲ୍ଟିୟେଲଦି ମାରିନ୍ ଜିରୁବ୍ବାବିଲ୍ ନି ୱାନି ତଡ଼ାନ୍କୁ ନିଙ୍ଗିଁଜି ମାପୁରୁଦି ଲୋକା ମୋସାଦି ରାସାତି ନିୟମ୍ଦି ଇସାବ୍ତାନ୍ ହମ୍ ଆଡ଼ିକ୍ନି ପୁଜା କିନି ଉଣ୍ତିଙ୍ଗ୍ ଇସ୍ରାଏଲତି ମାପୁରୁଦି ଜଜ୍ଞବେଦି ତିଆର୍ କିତାର୍ ।
ମାରି, ୱାର୍ ୱିଜୁ ଦେସ୍ତି ଲୋକା ଉଣ୍ତିଙ୍ଗ୍ ତିଲାତାର୍ଆକା ଜଜ୍ଞବେଦିଦିଙ୍ଗ୍ ଆବେଣି କୁନାଦି ମୁସ୍କୁ ତିଆର୍ କିତାର୍; ମାରି, ଆୟା ମୁସ୍କୁ ପ୍ରବୁଦି ଉଦେସ୍ତାନ୍ ହମ୍ ଆଡ଼ିକ୍ନି ପୁଜା, ମାରି, ସାଲ୍ଦି ନି ମିଲିମିଲିକା ଆକ୍ଡ଼ି ପୁଜା କିତାର୍ । ତାନିୱେନ୍କା ୱାର୍ ରାସ୍ତି ଇସାବ୍ତାନ୍ ଆକୁଗୁଡ଼ା ପଣ୍ତ୍ୟ କିତାର୍ ମାରି ୱିଜୁ ଦିନ୍ତି ପାଣି ଆସା ଇସାବ୍ତାନ୍ ବିଦିଦାନ୍ ଲେକିସ୍କିଜି ୱିଜୁଦିନ୍ ଆକ୍ଡ଼ି ପୁଜା କିତାର୍; ଆୟାୱେନ୍କା ୱାର୍ ୱିଜୁଦିନ୍ତି ହମ୍ ଆଡ଼ିକ୍ନି ପୁଜା, ମାରି ଆମାସ୍ତି ମାରି ପ୍ରବୁଦି ପବିତ୍ରକିତି ୱିଜୁ ତିଆର୍ଆତି ପଣ୍ତ୍ୟତି ନି ପ୍ରବୁଦି ଉଦେସ୍ତାନ୍ ନିଜେଦି ବଦାଦାନ୍ ସିତି ପୁଜା ସିନିୱାରି ୱିଜୁ ଲୋକାଦି ଦାନ୍ ସିଦେଙ୍ଗ୍ ଆସ୍ତାର୍ । ସାତ୍ଗୋଟା ଲେଜ୍ଦି ପାର୍ତୁମ୍ ଦିନ୍ତାନ୍ ୱାର୍ ପ୍ରବୁଦି ଉଦେସ୍ତାନ୍ ହମ୍ ଆଡ଼ିକ୍ନି ପୁଜା ସିଦେଙ୍ଗ୍ ଆସ୍ତାର୍; ମାତର୍ ଆୟାବେଡ଼ାଦୁ ପ୍ରବୁଦି ପାର୍ତନା ଇଲୁଦି କୁନାଦି ତିଆର୍ ଆଏତ୍ ମାର୍ହାତ୍ ।
ପାର୍ତନା ଇଲୁ ପୁନାତିଆର୍ କିନିକା
ମାରି, ୱାର୍ ପାରସ୍ୟ ଦେସ୍ତି ରାଜା କରସ୍ଦି ୱେର୍ତି ଇସାବ୍ତାନ୍ କାଲୁକୁପାଟ୍ନିୱାରିଙ୍ଗ୍ ନି ମାରାକ୍କୟ୍ନିୱାରିଙ୍ଗ୍ ଡାବୁଙ୍ଗ୍ ସିତାର୍; ମାରି ଲିବାନୋନ ମାଣାନ୍ ଯାଫୋ ଲାକ୍ତୁରି ସାମ୍ଦୁର୍ ସାନ୍ଧି ଦେବଦାରୁ ୱେର୍କୁ ତାନି ଉଣ୍ତିଙ୍ଗ୍ ସିଦୋନିୟ ନି ସୋରିୟ ଲୋକାଙ୍ଗ୍ କାଦି ନି ଉଣି ଜିନିସ୍ ମାରି ଜିତ ନିୟୁ ସିତାର୍ । ମାପୁରୁଦି ଜିରୁସାଲମତି ପାର୍ତନା ଇଲୁଦିଙ୍ଗ୍ ୱାର୍ ୱାତି ମାରିଉଣ୍ଡ୍ରି ବାର୍ସେକ୍ତି ମାରିଉଣ୍ଡ୍ରି ଲେଜ୍ତୁ ଶଲ୍ଟିୟେଲଦି ମାରିନ୍ ଜିରୁବ୍ବାବିଲ୍ ନି ଯୋସାଦକଦି ମାରିନ୍ ଜେସୁୟ ମାରି ୱାରି ତେବାତିମାନି ଜାଜକ ନି ଲେବିୟ ତଡ଼ାନ୍କୁ ମାରି ଜଇଲ୍ତାନ୍ ଜିରୁସାଲମତୁ ୱାତି ଲୋକ୍ ୱିଜେରେ ଆରାମ୍ କିଜି ପ୍ରବୁଦି ଇଲୁଦିପାଣି ଜାତୁନ୍ କିନି ଉଣ୍ତିଙ୍ଗ୍ କଡ଼େ ବାର୍ସେକ୍ ମାରି ତାନି ମାଣାନ୍ ନାଣ୍ତ ବୟସ୍ଆତି ଲେବିୟରିଙ୍ଗ୍ ଆସ୍ କିତାର୍ ।
ନାସ୍ତିୱାଲେ ଜେସୁୟ, ୱାନି ମାରିନ୍ ନି ତଡ଼ାନ୍କୁ, କଦ୍ମିୟେଲ ନି ୱାନି ମାରିନ୍କୁ, ଜିହୁଦାଦି ମାରିନ୍କୁ, ମାପୁରୁଦି ଇଲୁଦୁ ପାଣିକିନିୱାରି ଜାତୁନ୍ଅନି ବଜୁ ପୟନି ଉଣ୍ତିଙ୍ଗ୍ ଉଡ୍ରେମାନୁ ନିର୍ହାର୍; ହେନାଦଦ୍ଦି ମାରିନ୍କୁ, ୱାରି ମାରିନ୍ ନି ତଡ଼ାନ୍କୁ, ଇୟାକାର୍ ଲେବିୟ ଲୋକୁ ।
ମାରି, ତିଆର୍କିନିକାର୍ ପ୍ରବୁଦି ପାର୍ତନା ଇଲୁଦି କୁନାଦି ବାସାକିନି ୱାଲେ ୱାର୍ ଇସ୍ରାଏଲତି ରାଜା ଦାଉଦଦି ତିଆର୍କିତି ଇସାବ୍ତାନ୍ ପ୍ରବୁଦି ଦନ୍ୟବାଦ୍ କିନି ଉଣ୍ତିଙ୍ଗ୍ ନିଜେ ନିଜେଦି ଆଙ୍ଗିଁ ଆରାତି ଜାଜକରିଙ୍ଗ୍ ମୋରିଦି ୱାଲେ ନି ଆସପଦି ମାରିନ୍ ଲେବିୟରିଙ୍ଗ୍ ଟାପୁଡ଼ୁଦି ୱାଲେ ନିଲ୍ପ୍ତାର୍ ।
ମାରି, ୱାର୍ ପ୍ରବୁଦିଙ୍ଗ୍ ଦନ୍ୟବାଦ୍ ସିଜି ଅରେନ୍ ମାରିଅରେନ୍ ଉଣ୍ତିଙ୍ଗ୍ ପାର୍ଜି ଇର୍ହାର୍, “ୱାନ୍ କାର୍ମୁ ସୁଣିକାନ୍, ଏଣ୍ତେସ୍କି ଇସ୍ରାଏଲତି ଉଣ୍ତିଙ୍ଗ୍ ୱାନି ଦୟା ୱିଜୁଦିନ୍ସାନ୍ଧି ।” ମାରି, ପ୍ରବୁଦି ପାର୍ତନା ଇଲୁଦି କୁନାଦି ବାସାକିନି ଉଣ୍ତିଙ୍ଗ୍ ୱାର୍ ପ୍ରବୁଦି ଦନ୍ୟବାଦ୍ କିନି ୱାଲେ ୱିଜୁ ଲୋକୁ ପେରି ୱେୟୁଦାନ୍ ପାରିତାର୍ । ମାତର୍ ଏମେ ଜାଜକ ନି ଲେବିୟ ମାରି ବୁବାରି କୁଟୁମ୍ତି ପେରି ପେରି ଲୋକୁ ପାର୍ତୁମ୍ ଇଲୁ ସୁଡ଼ୁତା ମାର୍ହାର୍, ୱାରି କାଣେକେଆଙ୍ଗ୍ଁ ଇୟା ଇଲୁଦି ମୁଲ୍କୁନାଦିକାଲୁ ବାସାକିନି ୱାଲେ ୱାରି ଲୋଇରାନ୍ ଏସଲୋକ୍ ନାଣ୍ତ ଆଉଲି ଆଜି ଆଡ଼ାବାତାର୍ ମାରି ଏସଲୋକ୍ ୱେଡ଼ିକା ଉଣ୍ତିଙ୍ଗ୍ ପାଟା ପାରିତାର୍; ଆବେଟ୍ ଲୋକୁ ୱେଡ଼ିକାଦି ଆଉଲି ମାରି ଲୋକା ଆଡ଼ାବାନି ଆଉଲି ନେସ୍ତେଙ୍ଗ୍ ଆଟ୍ଏତାର୍; ଲୋକୁ ନାଣ୍ତ ଆଉଲିଦାନ୍ ପାଟା ପାରିତାର୍, ମାରି ଆବେଣି ଆଉଲି ନାଣ୍ତ ଆକ ୱେନାୟ୍ ଆତାତ୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.