Konda Porja Bible
ଉପଦେସକ 8
ରାଜାଦି ମାଟା ମାନାନିକା
ବୁଦିଦି ଲୋକ୍ ୱାଜା ଏନ୍ ମାନାନ୍ ? ମାରି ଏନ୍ ମାଟାଦି ଅର୍ତ ନେସ୍ନାନ୍ ? ଲୋକ୍ତି ବୁଦି ୱାନି ମୋକମ୍ ୱେଡ଼ିକା କିନାତ୍ ମାରି ୱାନି ମୋକମ୍ତି ରିସା ବାଦ୍ଲେ ଆନାତ୍ । ନିନୁ ରାଜାଦି ମାଟା ମାନାଦୁ, ନାନୁ ଇକା ୱେର୍ସିନା ମାରି ମାପୁରୁଦି ଆଗ୍ଡ଼ି ପାର୍ମାଣ୍ କିତିମାନି ଉଣ୍ତିଙ୍ଗ୍ ଆକା କିଦୁ । ୱାନି ଲାକ୍ତୁରାନ୍ ସସି ସନ୍ଡ୍ରେଙ୍ଗ୍ ଦାନ୍ଦା ଆମାଟ୍; ଇନି ତାଗ୍ଇ ବିସୟ୍ତି ତରନ୍ ନିଲ୍ମାଟ୍; ଇରିଙ୍ଗ୍ ଏମେକା ୱାନି ବଦା, ୱାନ୍ ଆକା କିନାନ୍ । ଏଣ୍ତେସ୍କି ରାଜାଦି ମାଟା ଅଦିକାର୍ତିକା; ମାରି, ନିନୁ ଇନିକା କିଜିନି, ଇକା ୱାନିଙ୍ଗ୍ ଏନ୍ ଇନ୍ଡ୍ରେଙ୍ଗ୍ ଆଟ୍ନାନ୍ ? ଏନ୍ ମାଟା ମାନାନାନ୍, ୱାନ୍ ଇନି ତାଗ୍ଇ ବିସୟ୍ ନେସ୍ତେଙ୍ଗ୍ ଆଟ୍ଏନ୍; ମାରି ବୁଦିଦି ମନ୍ ବେଡ଼ା ମାରି ବିସାର୍ ନେସ୍ନାନ୍; ଇରିଙ୍ଗ୍ ୱିଜୁ ବିସୟ୍ ଉଣ୍ତିଙ୍ଗ୍ ବେଡ଼ା ମାରି ବିସାର୍ ମାନାତ୍; ଏଣ୍ତେସ୍ ଲୋକ୍ତି ଦୁଃକ୍ ୱାନି ଉଣ୍ତିଙ୍ଗ୍ ନାଣ୍ତ ଆନାତ୍; ଇରିଙ୍ଗ୍ ଇନିକା ଗଟାନାତ୍, ଆକା ୱାନ୍ ନେସ୍ଏନ୍ ମାରି ଏଣ୍ତେସ୍ ୱାଜା ଆକା ଗଟାନାତ୍, ଇକା ଏନ୍ ୱାନିଙ୍ଗ୍ ୱେର୍ତେଙ୍ଗ୍ ଆଟ୍ନାନ୍ ? ଜିବନ୍ ଆଙ୍ଗ୍ଜି ଇଡ୍ନି ଉଣ୍ତିଙ୍ଗ୍ ଜିବନ୍ ମୁସୁକୁ ଏମେ ଲୋକ୍ତି ଅଦିକାର୍ ସିଲେତ୍; ମାରିବା ସାନି ଦିନ୍ ମୁସୁକୁ ୱାନି ଇନି ଅଦିକାର୍ ସିଲେତ୍; ମାରି ଆୟା ଜୁଦ୍ଦାନ୍ ଡ଼ିସ୍ମାଟ୍; ମାରିବା ତାଗ୍ଇମାନୁ ମିସାତି ଲୋକାଙ୍ଗ୍ ତାଗ୍ଇକା ରକିଆ କିଏତ୍ ।
ତାଗ୍ଇକାନ୍ ନି ଦାର୍ମୁ
ଇୟାୱିଜୁ ନାନୁ ସୁଡ଼ୁଜିନା ମାରି ୱେଡ଼ା ଆଡ୍ଗି ଏମେ ୱିଜୁ ପାଣି କିଆନାତ୍, ଆବେନୁ ନାନୁ ମନ୍ଦିୟାନ୍ ସିତାମାନା; ଏସାଙ୍ଗ୍ ଏସାଙ୍ଗ୍ ଅରେନ୍ ଲୋକୁ ଆଇ ମୁସୁକୁ ୱାନି ନାସ୍ଟୁ କିନି ଉଣ୍ତିଙ୍ଗ୍ ଅଦିକାର୍ ତେବାନାତ୍ । ମାରିବା, ନାନୁ ତାଗ୍ଇୱାରିଙ୍ଗ୍ ଦୁକିଦୁ ମୁସ୍ନିକା ସୁଡ଼ୁତା; ମାରି ନେଗି ପାଣିକିନିକାର୍ ପବିତ୍ର ବାଡିଦୁ ସର୍ହାର୍ ମାରି ଗାଡ଼୍ଦାନ୍ ଅଲଗା ଆତାର୍; ଇକା ନେ ବେକାର୍ଦିକା ସୁଡ଼ୁତା ।
ତାଗ୍ଇ ପାଣିକିନିୱାରିଙ୍ଗ୍ ବେଗି ଦଣ୍ତ୍ ସିଆଇ ଆଇ ଉଣ୍ତିଙ୍ଗ୍ ଲୋକା ଜିବନ୍ତିଙ୍ଗ୍ ତାଗ୍ଇ ପାଣି କିନି ଉଣ୍ତିଙ୍ଗ୍ ବଦା ଆନାତ୍ । ମାରି ପାପି ଲୋକ୍ ସହେ ଦେବେଙ୍ଗ୍ ତାଗ୍ଇପାଣି କିଜି ୱିଜୁଦିନ୍ ଜିନାନ୍, ଇରିଙ୍ଗ୍ ନାନୁ ସତେନେ ନେସ୍ନା ଜେ, ମାପୁରୁଦିଙ୍ଗ୍ ତିଲାନିକାର୍ ୱାନି ଆଗ୍ଡ଼ି ତିଲାନାର୍ ଇଜି ୱାରି ନେଗେତ୍ ଆନାତ୍; ମାତର୍ ତାଗ୍ଇୱାନି ନେଗିକା ଆଏତ୍, ମାରିବା ୱାନ୍ ନିଜେଦି ନିଡ଼ିଗାଦି ୱାଜା ନିଜେଦି ବାର୍ସୁ ପିରିସ୍ କିଏନ୍; ଇରିଙ୍ଗ୍ ୱାନ୍ ମାପୁରୁଦି ଆଗ୍ଡ଼ି ତିଲାଏନ୍ । ଦୁନିଆଦୁ ଇକା ଉଣ୍ତ୍ରି ବେକାର୍ଦିକା ପୁରା ଆନାତ୍; ଏସାଙ୍ଗ୍ ଏସାଙ୍ଗ୍ ଦାର୍ମୁଦି ଲୋକାଙ୍ଗ୍ ତାଗ୍ଇୱାରି ପାଣି ଇସାପ୍ତାନ୍ ପଲ୍ ପଇନାର୍, ମାରି ଏସାଙ୍ଗ୍ ଏସାଙ୍ଗ୍ ତାଗ୍ଇୱାରିଙ୍ଗ୍ ଦାର୍ମୁଦିଲୋକା ପାଣି ଇସାପ୍ତାନ୍ ପଲ୍ ପଇନାର୍; ନାନୁ ଇର୍ହା, ଇକା ନେ ବେକାର୍ଦିକା । ଆବେଟ୍ ନାନୁ ୱେଡ଼ିକାଦାନ୍ ପ୍ରସଂସା କିତା, ଇରିଙ୍ଗ୍ ଉଣି ତିନିକା ମାରି ୱେଡ଼ିକା କିନି ବାଦ୍ଲୁ ୱେଡ଼ା ଆଡ୍ଗି ଲୋକା ଉଣ୍ତିଙ୍ଗ୍ ଇନି ନେଗି ବିସୟ୍ ସିଲେତ୍; ମାପୁରୁ ଇୟା ଦୁନିଆଦୁ ମାଙ୍ଗିଁ ସିତିମାନି ଜିବନ୍ତି ବେଡ଼ାଦୁ ଏମେ ଏମେ ପାଣିକିନାନ୍, ଆୟା ୱିଜୁଦୁ ଇକାନେ ୱାନି ସାକା ଆନାତ୍ । ଏସ୍ତିୱାଲେ ନାନୁ ବୁଦିଦି ବିସୟ୍ ନେସ୍ନି ଉଣ୍ତିଙ୍ଗ୍ ମାରି ଦୁନିଆଦୁ ଆଜିମାନି ପାଣି ସୁଡ଼ୁଦେଙ୍ଗ୍ ମୋନ୍ କିତା, ଇରିଙ୍ଗ୍ ନାଡ଼ାୱେଡ଼େ ଏମେୱାନି କାଣୁକୁ ସୁଜ୍ନିକା ସୁଡ଼ୁଏନ୍, ଇୟାୱାଜା ଲୋକୁ ବା ମାନାର୍; ନାସ୍ତିୱାଲେ ନାନୁ ମାପୁରୁଦି ୱିଜୁ ପାଣି ବିସୟ୍ ସୁଡ଼ୁତା ଜେ, ଲୋକୁ ୱେଡ଼ା ଆଡ୍ଗି ଆତିମାନି ପାଣିଦି ବିସୟ୍ ପୋଇଦେଙ୍ଗ୍ ଆଟ୍ଏନ୍; ଇରିଙ୍ଗ୍ ଆକା ସିନ୍ତା କିନି ଉଣ୍ତିଙ୍ଗ୍ ଲୋକୁ ଏସ ପାଣି କିତିଙ୍ଗ୍ ବା ଆକା ପୋଇଦେଙ୍ଗ୍ ଆଟ୍ଏନ୍; ମାରି, ବୁଦିଦି ଲୋକୁ ଆକା ନେସ୍ନି ଉଣ୍ତିଙ୍ଗ୍ ସିନ୍ତା କିତିଙ୍ଗ୍ ବା ଆବେଣି ବିସୟ୍ ପୋଇଦେଙ୍ଗ୍ ଆଟ୍ଏନ୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.