Konda Porja Bible
ଉପଦେସକ 7
ଜ୍ଞାନ୍ମାନିକାନ୍ ମାରି ବୁଦିସିଲିକାନ୍
ନାଣ୍ତଦାରାଦି ନିୟୁ ବାଦ୍ଲୁ ନେଗି ଦରୁ ନେଗେତ୍ ମାରି ଜନମ୍ ଦିନ୍ ବାଦ୍ଲୁ ସାନି ଦିନ୍ ନେଗେତ୍ । ବଜି ଇନ୍ଡ୍ର ସନି ବାଦ୍ଲୁ ଆଡ଼ାବାନି ଇନ୍ଡ୍ର ସନିକା ନେଗେତ୍; ଇରିଙ୍ଗ୍ ଆକା ୱିଜୁ ଲୋକ୍ତି ସାରାସାରି ଦିନ୍ ମାରି ଜିତିମାନି ଲୋକ୍ ଆବେନୁ ମନ୍ ସିନାର୍ । ସିକ୍ନି ବାଦ୍ଲୁ ଦୁଃକ୍ ଆନିକା ନେଗିକା; ଇରିଙ୍ଗ୍ ମକମ୍ ସିମ୍ରାଆନି ବାଦ୍ଲୁ ଜିବନ୍ ୱେଡ଼ିକା ଆନିକା ନେଗେତ୍ । ବୁଦିଲୋକା ଜିବନ୍ ଆଡ଼୍ବାନି ଇନ୍ଡ୍ର ତେବାନାତ୍, ମାତର୍ ମୁର୍କୁରି ଜିବନ୍ ୱେଡ଼ିକା ଇନ୍ଡ୍ର ତେବାନାତ୍ । ମୁର୍କୁରି ପାଟା ୱେନି ବାଦ୍ଲୁ ବୁଦି ଲୋକା ଲାଗାନିକା ୱେନିକା ନେଗିକା । ଏଣ୍ତେସ୍ ସାଟିଦି ଆଡ୍ଗି କାସ୍ସିମାନି କୁଟିଙ୍ଗ୍ କଡ଼ କଡ଼ ଆଉଲି, ଆୟାୱାଜା ମୁର୍କୁ ଲୋକ୍ ସିକ୍ନାନ୍, ଇକା ନେ ୱାର୍ହିକା । ସତେନେ ଅନ୍ୟାୟ ଦନ୍ ଉଣ୍ତାକିନିକା ବୁଦି ଲୋକ୍ତିଙ୍ଗ୍ ବୁଦିସିଲିକା କିନାତ୍ ମାରି ଲାଞ୍ଚ୍ ଜିବନ୍ ନାସ୍ଟୁ କିନାତ୍ । ପାଣିଦି ଆରାମ୍କିନି ବାଦ୍ଲୁ ଆବେଣି ୱିସ୍ନିକା ନେଗେତ୍; ମାରି, ଆତ୍ମାଦୁ ଗର୍ବ ଆନି ବାଦ୍ଲୁ ଆତ୍ମାଦୁ ସାସ୍ ଆସ୍ନିକା ଆନିକା ନେଗେତ୍ । ଦାପ୍ରେ ନିଜେଦି ଆତ୍ମାଦୁ ରିସା ଆମାଟ୍; ଇରିଙ୍ଗ୍ ମୁର୍କୁରି ଜିବନ୍ଦୁ ରିସା ତେବାନାତ୍ । “ଇଲେଇତି କାଡ଼ା ବାଦ୍ଲୁ ପୁର୍ବେ କାଡ଼ା ନେଗେନ୍ ମାନି ମାଟା ଇନିକା,” ଇକା ଇନ୍ମା, ଇରିଙ୍ଗ୍ ନିନୁ ଇୟା ବିସୟ୍ ବୁଦିଦାନ୍ ୱେନ୍ବାଇଜିନି । ବୁଦି ପୁର୍ବେଦି ଡକ୍ରାଦାଦାରି ଅଦିକାର୍ଦି ୱାଜା ନେଗିକା; ମାରି, ଏମେକାର୍ ଜିତାମାନାର୍ ୱାରି ଉଣ୍ତିଙ୍ଗ୍ ବୁଦି ଲାବ୍ । ଇରିଙ୍ଗ୍ ଦନ୍ ଏଣ୍ତେସ୍ ଆସା ୱାଜା, ବୁଦି ବା ଆୟାୱାଜା ଆସା ୱାଜା; ମାତର୍ ବିଦ୍ୟାଦି ପେରିକା ଇକା ଜେ, ବୁଦି ନିଜେଦି ଅଦିକାର୍ତିଙ୍ଗ୍ ଜିବନ୍ ରକିଆ କିନାତ୍ । ମାପୁରୁଦି ପାଣି ସିନ୍ତା କିଦୁ; ଇରିଙ୍ଗ୍ ୱାନ୍ ଆମାକା ୱେକଣି କିତାମାନାନ୍, ଏନ୍ ଆକା ସିଦା କିଦେଙ୍ଗ୍ ଆଟ୍ନାନ୍ ? ୱେଡ଼ିକା ବେଡ଼ାଦୁ ୱେଡ଼ିକା କିଦୁ ମାରି ଦୁଃକ୍ ବେଡ଼ାଦୁ ସିନ୍ତା କିଦୁ; ଲୋକ୍ତିଙ୍ଗ୍ ୱାଜିନିଦିନ୍ତୁ ଇନିକା ଗଟାନାତ୍, ଆକା ଏଣ୍ତେସ୍ ୱାନ୍ ନେସ୍ତେଙ୍ଗ୍ ଆଟ୍ଏନ୍, ଇୟାଉଣ୍ତିଙ୍ଗ୍ ମାପୁରୁ ସୁକ୍ ମାରି ଦୁଃକ୍ତିଙ୍ଗ୍ ଲାକୁତୁ ଇଟ୍ତାମାନାନ୍ । ନାନୁ ନିଜେଦି ବେକାର୍ଦି ବେଡ଼ାଦୁ ଇୟାୱିଜୁ ସୁଡ଼ୁତାମାନା; ଦାର୍ମୁ ଲୋକ୍ ଏସାଙ୍ଗ୍ ଏସାଙ୍ଗ୍ ନିଜେଦି ଦାର୍ମୁଦୁ ନାସ୍ଟୁ ଆନାନ୍, ମାରି ତାଗ୍ଇ ଲୋକୁ ନିଜେଦି ତାଗ୍ଇପାଣିଦୁ ନାଣ୍ତଦିନ୍ ଜିନାନ୍ । ନାଣ୍ତ ଦାର୍ମୁ ତର୍ମାଟ୍; ମାରିବା ନିଜେଦିଙ୍ଗ୍ ନାଣ୍ତ ବୁଦିଦିକାନ୍ ତରାଇ ଆମାଟ୍; ଇନିଦାନିଙ୍ଗ୍ ନିନୁ ନିଜେଦିଙ୍ଗ୍ ନାସ୍ଟୁ କିନି ? ମିରୁ ନାଣ୍ତ ତାଗ୍ଇକାର୍ ଆମାଟ୍, ମାରିବା ନିର୍ବୁଦି ଆମାଟ୍; ନିଜେଦି କାଡ଼ା ୱାନି ଆଗ୍ଡ଼ି ଇନିଦାନିଙ୍ଗ୍ ସାନିଦେର୍ ? ଇକା ଆସ୍ସି ଇଡ୍ନିକା, ମାରି ୱାନି ମାଡ଼ାନ୍ କିୟୁ କୁତ୍ସି ଅଇକା ମି ଉଣ୍ତିଙ୍ଗ୍ ନେଗେତ୍; ଇରିଙ୍ଗ୍ ଏନ୍ ମାପୁରୁଦିଙ୍ଗ୍ ମାନାନାନ୍, ୱାନ୍ ଇୟା ୱିଜୁଦାନ୍ ଜିଣାନାନ୍ । ବୁଦିଦି ଲୋକୁ ୱିଜୁ ଗାଡ଼୍ତି ଦସ୍ ଲୋକୁ ସାସନ୍କିନିୱାରି ବାଦ୍ଲୁ ଅରେନ୍ ବୁଦିଦି ଲକା ନାଣ୍ତ ସାକ୍ତି ଆନାତ୍ । ପାପ୍ କିଏଣ୍ଗା ସତ୍ ପାଣି କିନାନ୍, ଇୟାୱାଜା ଅରେନ୍ ଦାର୍ମୁଦି ଲୋକ୍ ସତ୍ନେ ଦୁନିଆଦୁ ସିଲେନ୍ । ଏସ ମାଟେଙ୍ଗ୍ ଇନାୟ୍ ଆନେ, ଆୟା ୱିଜୁଦୁ ମନ୍ ସିମାଟ୍; ଏଣ୍ତେସ୍ଆତିଙ୍ଗ୍ ମି ଦାସ୍ ମିଙ୍ଗିଁ ଆନାଦୁରିଆ ସିନିକା ମିରୁ ୱେନିଦେର୍; ଇରିଙ୍ଗ୍ ମି ମୋନ୍ ନେସ୍ନାତ୍ ଜେ, ମିରୁ ବା ଆଇୱାରିଙ୍ଗ୍ ଆୟାୱାଜା ଜାରିଦିଙ୍ଗ୍ ଜାରି ଆନାଦୁରିଆ ସିତିମାନିଦେର୍ । ନାନୁ ଇର୍ହା, ନାନୁ ବୁଦିଦାନ୍ ଇୟାୱିଜୁ ପରିକା କିତାମାନା । “ନାନୁ ବୁଦିଦିକାନ୍ ଆନା,” ମାତର୍ ଆକା ନା ମାଡ଼ାନ୍ ଆକ ମାର୍ହାତ୍ । ଏମେକା ମାନାତ୍, ଆକା ଆକ ମାନାତ୍ ମାରି ନାଣ୍ତ ନିରିକା; ଆକା ଏନ୍ ପଇଦେଙ୍ଗ୍ ଆଟ୍ନାନ୍ ? ବୁଦି ମାରି ଆଇ ବିସୟ୍ଦି ମାଟା ନେସ୍ତେଙ୍ଗ୍, ମାରି ତାଗ୍ଇକାନ୍ ଜେ ନିର୍ବୁଦି ମାରି ମୁର୍କୁଦିକା ଜେ ବାୟା, ଇକା ନେସ୍ତେଙ୍ଗ୍ ନାନୁ ଡ଼େସିୱାତା ମାରି ନା ମନ୍ ଆକା ପଇଦେଙ୍ଗ୍ ବଦା ଆତାତ୍ । ମାରି, ନାନୁ ସୁଡ଼ୁଜିନା ଜେ, ଏମେ ଆଇମାଦି ଜିବନ୍ ଉରି ନି ଜାଡ଼ି ୱାଜା ମାରି କିୟୁ ଗାଟି ୱାଜା, ଆୟା ସାନି ବାଦ୍ଲୁ ନାଣ୍ତ୍ କେୟ୍ନାତ୍; ଏନ୍ ମାପୁରୁଦିଙ୍ଗ୍ ୱେଡ଼ିକା କିନାନ୍, ୱାନ୍ ୱାନିମାଡ଼ାନ୍ ରକିଆ ପୋଇନାନ୍; ମାତର୍ ପାପି ଲୋକ୍ ୱାନି ମାଡ଼ାନ୍ ଆସାଇଆନାନ୍ । ଅଜାକିନିକାନ୍ ଇଜିନାନ୍, ସୁଡ଼ୁଦୁ, ନାନୁ ମାଟା ନେସ୍ନି ଉଣ୍ତିଙ୍ଗ୍ ଉଡ୍ରି ବିସୟ୍ତିଙ୍ଗ୍ ଆଇ ବିସୟ୍ତି ୱାଲେ ସାମାନ୍ କିତା, ମାରି ଆୟା ବିସୟ୍ତିଙ୍ଗ୍ ପଇତାମାନା; ନା ଜିବନ୍ ନେରୁ ସାନ୍ଦି ନାଣ୍ତ ବିସୟ୍ ପଇଜିମାନା, ମାତର୍ ନାନୁ ଆକା ପଇଏତା; ଅଜାର୍ ବାର୍ସେକ୍ ଲୋଇ ନାନୁ ଅରେନ୍ ମେମାର୍ଏନ୍ତିଙ୍ଗ୍ ପଇତାମାନା; ମାତର୍ ଆୟା ୱିଜେରି ମାଡ଼ାନ୍ ନାନୁ ଅରେତ୍ ଆଇମାଦିଙ୍ଗ୍ ପଇଏତା । ସୁଡ଼ୁଦୁ, ନାନୁ ନିସନେ ପଇତାମାନା ଜେ, ମାପୁରୁ ଲୋକାଙ୍ଗ୍ ନେଗେନ୍ତାନ୍ ତିଆର୍ କିତାନ୍; ମାତର୍ ୱାର୍ ନାଣ୍ତ ତିଆର୍ କିଦେଙ୍ଗ୍ ପଇଜିଅସିନାର୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.