Konda Porja Bible
ଉପଦେସକ 11
ବୁଦିମାନି ପାଣି
ନିନୁ ଏରୁ ମୁସ୍କୁ ନିଜେଦି କାଦି ପକ୍ତୁ, ଇରିଙ୍ଗ୍ ନାଣ୍ତ ଦିନ୍ ୱେନେକା ଆକା ପୟ୍ନିଦେର୍ । ସାତ୍ ଲୋକାଙ୍ଗ୍, ସିଲେତିଙ୍ଗ୍ ଆଟ୍ ଲୋକାଙ୍ଗ୍ ବାଗ୍ ବାଗ୍ କିଆ; ଇରିଙ୍ଗ୍ ଦୁନିଆଦୁ ଇନି କାସ୍ଟୁ ଗଟାନାତ୍, ଆକା ମିରୁ ନେସ୍ଇଦେର୍ । ଏସ୍ତିୱାଲେ ବାଦଡ଼ ପିରୁଦାନ୍ ବର୍ତି ଆନାତ୍, ପିରୁ ଆନାତ୍ ମାରି, ଉଣ୍ତ୍ରି ମାରାନ୍ ଜଦି ଉଣି ତରନ୍ ମାରି ଡେବ୍ରି ତରିନ୍ ଆର୍ନାତ୍, ଆର୍ତିଙ୍ଗ୍ ଏମେ ବାଡିଦୁ ଆର୍ନାତ୍, ଆୟା ବାଡିଦୁ ତେବାନାତ୍ । ଏମେ ଲକୁ ଗାଲିଦିଙ୍ଗ୍ ସୁଣାନ୍, ୱାନ୍ ୱିତ୍ଏନ୍ ମାରି ଏମେ ଲକୁ ବାଦଡ଼୍ତିଙ୍ଗ୍ ସୁଣାନ୍, ୱାନ୍ କୟ୍ଏନ୍ । ମାପୁରୁ ୱିଜୁ ଇନିକା ତିଆର୍ କିତାମାନାନ୍, ମାରି ନିନୁ ଗାର୍ବୁଦୁମାନି ଆଇମାଦି ପଟାଦୁ ଏଣ୍ତେସ୍ ପୁନି ଜିବନ୍ ଆରାମ୍ ଆନାତ୍ ଆକା ବୁଜାନି ବାଦ୍ଲୁ ୱାନ୍ ଇନିକା କିନାନ୍, ଆକା ନିନୁ ନାଣ୍ତ ବୁଜାଦେଙ୍ଗ୍ ଆଟ୍ଇ । ମିରୁ ସାଲ୍ଦି ମାରି ମିଲିମିଲିକା ୱିତୁ ୱିତ୍ତୁ; ଇରିଙ୍ଗ୍ ଇକା ବା ଆକା ପୁରା ଆନାତ୍, ମାରିବା ରୁଣ୍ତି ସାମାନ୍ ନେଗିକା ଆନାତ୍, ଇକା ମିରୁ ନେସ୍ଇଦେର୍ । ସତେନେ ଜାୟ୍ ସୁକ୍ତିକା, ମାରି କାଣାଗା ଉଣ୍ତିଙ୍ଗ୍ ୱେଡ଼ା ସୁଣିକା ନେଗିକା । ଜଦି ଲୋକ୍ ନାଣ୍ତ ବାର୍ସୁ ଜିନାନ୍, ଆର୍ତିଙ୍ଗ୍ ଆୟା ୱିଜୁଦୁ ୱାନ୍ ୱେଡ଼ିକା ଆପିନ୍; ମାତର୍ ସିକାଟିଦି ଦିନ୍ୱିଜୁ ୱାନ୍ ମନ୍ତୁ ଇଡ୍ନି, ଇରିଙ୍ଗ୍ ଆୟା ଦିନ୍ ୱିଜୁ ନାଣ୍ତ ଆନାତ୍ । ଇନି ଇନିକା ଗଟାନାତ୍, ୱିଜୁ ଆର୍ଏଦିକା ।
ମୁରୁଲି ଲୋକାଙ୍ଗ୍ ସିକିୟା
ଏ ମୁରୁଲି କଡ଼ର୍, ମି ମୁରୁକାଡ଼ାଦୁ ୱେଡ଼ିକା କିଦୁ । ମୁରୁଲି କାଡ଼ାଦୁ ମିରୁ ଇନିକା କିଦେଙ୍ଗ୍ ଅଡ଼୍ବିଜିନିଦେର୍ ଆକା କିଦୁ, ମି ଜିବନ୍ତି ବଦାଦାନ୍ ବୁଲାଦୁ । ମାତର୍ ମନ୍ତୁ ଇଡ୍ଦୁ ଜେ ମିରୁ ଇନିକା ବା କିଦୁ ଆୟାଉଣ୍ତିଙ୍ଗ୍ ମାପୁରୁ ମିଙ୍ଗିଁ ବିସାର୍ କିଦେଙ୍ଗ୍ ସଲ୍ସିନାନ୍ । ଇୟାଉଣ୍ତିଙ୍ଗ୍ ନିଜେଦି ଜିବନ୍ତାନ୍ ରିସା ଆକ କିଦୁ ମାରି ନିଜେଦି ମେନ୍ଦଲ୍ତାନ୍ ଦୁଃକ୍ ଆକ କିଦୁ; ଇରିଙ୍ଗ୍ ମୁରୁଲି କାଡ଼ାଦି ଜିବନ୍ତି ୱିଜୁ ବେକାର୍ଦିକା ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.