Konda Porja Bible
ଉପଦେସକ 10
ସାତି ୱିଜେଙ୍ଗ୍ ଉଡ୍ରି ପୁରା ବତଲ୍ ବାସ୍ନା ନିୟୁ କାପୁ କିନାତ୍ ମାରି ଅଡ଼ପ୍ ମୁର୍କୁ ନାଣ୍ତ୍ନେସ୍ତି ବୁଦିଦିଙ୍ଗ୍ ନାସ୍ଟୁ କିଦେଙ୍ଗ୍ ଆଟ୍ନାତ୍ । ବୁଦିଦିୱାନି ଜିବନ୍ ୱାନିଙ୍ଗ୍ ନେଗି ସାରିଦୁ ଅନାତ୍; ମାତର୍ ମୁର୍କୁ ଲୋକ୍ତି ଜିବନ୍ ୱାନିଙ୍ଗ୍ ତାଗ୍ଇ ସାରିଦୁ ଅନାତ୍ । ମାରିବା, ମୁର୍କୁ ଲୋକୁ ସାରିଦୁ ବୁଲାନି ୱାଲେ ୱାନି ବୁଦିଦୁ ଉଣା ତର୍ନାତ୍, ମାରି ୱାନ୍ ୱିଜେରିଙ୍ଗ୍ ୱେର୍ନାନ୍ ଜେ, ୱାନ୍ ନିଜେ ମୁର୍କୁଦିକାନ୍ । ନି ମୁସୁକୁ ସାସନ୍କିନିୱାନି ମନ୍ତୁ ବିରୁଦ୍ ନିଙ୍ଗିଁତିଙ୍ଗ୍, ନିଜେଦି ବାଡି ଡ଼ିସ୍ମାଟ୍; ଇରିଙ୍ଗ୍ ସାସ୍ ଆସ୍ତିଙ୍ଗ୍ ନାଣ୍ତ ପାପ୍ ପାଣି କେମା ଆନାତ୍ । ନାନୁ ୱେଡ଼ା ଆଡ୍ଗି ତାଗ୍ଇ ବିସୟ୍ ସୁଡ଼ୁତାମାନା, ଆକା ସାସନ୍କିନିୱାନି ମାଡ଼ାନ୍ ସନିକା ବୁଲ୍ ୱାଜା ତର୍ନାତ୍, ମୁର୍କୁ ଲୋକ୍ ନାଣ୍ତ ପେରିପଦ୍ଦୁ ତେବାନାନ୍, ମାରି ଦନି ଲୋକ୍ ଇସ୍ରି ପଦ୍ଦୁ ଆଡ୍ଗି ବାସ୍ନାନ୍ । ନାନୁ ଦାସରିଙ୍ଗ୍ ଗଡ଼େଙ୍ଗାଁ ମୁସୁକୁ ମାରି ପେରିୱାରିଙ୍ଗ୍ ସାକର୍ ୱାଜା ୱାରିଇ ପାଦାମ୍ତାନ୍ ବୁଲାନିକା ସୁଡ଼ୁତାମାନା । ଏନ୍ ଗୁଟା କାର୍ନାନ୍, ୱାନ୍ ଆବେନୁ ଆର୍ନାନ୍ ମାରି ଏମେ ଲୋକ୍ ଗଡା ବାସ୍ଡ଼ା କିନାନ୍, ୱାନିଙ୍ଗ୍ ସାରାସ୍ କତ୍ନାତ୍ । ଏମେ ଲୋକ୍ କାଲ୍କୁ ପାଟ୍ନାନ୍, ୱାନ୍ ଆୟା ମାଡ଼ାନ୍ ଗାଉ ଆନାନ୍; ମାରି ଏନୁ ୱେରୁକୁ ନାଡ଼ାସ୍ନାନ୍, ୱାନ୍ ଆୟା ମାଡ଼ାନ୍ କାତାନାନ୍ । ଜଦି ମି ପାଡ଼୍ସି ବାଣ୍ତାଆତିଙ୍ଗ୍ ଜଦି ଏନ୍ ଇୟାତାନିଙ୍ଗ୍ କଲ୍ବିସ୍ କିଏନ୍, ଆର୍ତିଙ୍ଗ୍ ତାନିୱେନ୍କା ବପୁ ତିଗ୍ଦେଙ୍ଗ୍ ଆନାତ୍; ମାତର୍ ପାଣିଦିଙ୍ଗ୍ ତର୍ନି ଉଣ୍ତିଙ୍ଗ୍ ବୁଦି ନେଗିକା । ସାରାସ୍ ମନ୍ତର୍ କିନି ଆଗ୍ଡ଼ି ସାରାସ୍ କତ୍ତିଙ୍ଗ୍ ଗୁଣିଆଦି ଇନି ଲାବ୍ ସିଲେତ୍ । ବୁଦିଦିକାର୍ ଆମାକା ଇନାର୍ ୱାରିଙ୍ଗ୍ ସନ୍ମାନ୍ ସିନାର୍; ମାତର୍ ମୁର୍କୁଦି ଲୋକୁ ନିଜେଦି ମାଟାଦାନ୍ ନାସ୍ଟୁ ଆନାର୍ । ୱାର୍ ତାଗ୍ଇ ମାଟାଦି ୱାଲେ ଆରାମ୍ କିନାନ୍ ମାରି ନେଗି ବାୟାଦି ୱାଲେ ୱିସ୍ନାନ୍ । ମୁର୍କୁ ଲୋକ୍ ନାଣ୍ତ ମାଟେଙ୍ଗ୍ ଇନାନ୍; ଇରିଙ୍ଗ୍ ଇନିକା ଆନାତ୍, ଲୋକ୍ ଆକା ନେସ୍ଏନ୍; ମାରି ତାନିୱେନେକା ଏମେକା ଗଟାନାତ୍, ଏନ୍ ୱାନିଙ୍ଗ୍ ୱେର୍ତେଙ୍ଗ୍ ଆଟ୍ନାନ୍ ? ୱିଜେରି ମୁର୍କୁ ଲୋକ୍ତି ପାଣିଦୁ ୱାନି ୱାଦ୍ନିକା, ଇରିଙ୍ଗ୍ ଏଣ୍ତେସ୍ ଗାଡ଼୍ଦୁ ସନ୍ଡ଼୍ରେଙ୍ଗ୍ ଆନାତ୍, ଆକା ୱାନ୍ ନେସ୍ଏନ୍ । ଇୟା ଦେସ୍, ନି ରାଜା ଜଦି କଡ଼ ଆନାନ୍ ମାରି ନି ପେରିକାର୍ ଜଦି ସାଲ୍ଦିନେ ଉଣାର୍, ଆର୍ତିଙ୍ଗ୍ ମିରୁ ଦୁଃକ୍ ପଇନି ଲୋକୁ । ଏନ୍ ରାଜା କୁଟୁମ୍ତି ମାରିନ୍ ଏସାଙ୍ଗ୍ ମି ରାଜା ଆନାନ୍ ମାରି ନି ପେରିକାର୍ ଏସାଙ୍ଗ୍ ସନି ଉଣ୍ତିଙ୍ଗ୍ ସିଲେ, ମାତର୍ ସାକ୍ତି ଉଣ୍ତିଙ୍ଗ୍ ଟିକ୍ ବେଡ଼ାଦୁ ଉଣାର୍, ଆର୍ତିଙ୍ଗ୍ ମିରୁ ଦନ୍ୟ ! ଏସ୍ତିୱାଲେ ଏନ୍ ୱାନି ସାତ୍ତିଙ୍ଗ୍ ତିଆର୍ କିଦେଙ୍ଗ୍ ନାଣ୍ତ ଗାଡ଼ିଆ ଆନାନ୍, ଇକା ଏରୁ ସନାତ୍ ମାରି ଇଲୁ ଆର୍ନାତ୍ । ସିକ୍ନି ଉଣ୍ତିଙ୍ଗ୍ ଉଣିକା ତିଆର୍ ଆନାତ୍, ମାରି, ଅଙ୍ଗୁରୁରସ୍ ଜିବନ୍ତିଙ୍ଗ୍ ୱେଡ଼ିକା କିନାତ୍; ଦନ୍ ୱିଜୁ ପାଣିଦୁ ସିନାତ୍ । ରାଜେଙ୍ଗ୍ ଆନାଦୁରିଆ ସିମାଟ୍, ସିଲେ ମନ୍ତୁ ମନ୍ତୁ ବା ସିମାଟ୍; ମାରି, ମାଜନ୍ ଲୋକତିଙ୍ଗ୍ ନିଜେଦି ଡର୍ନି ଇଲୁଦୁ ଆନାଦୁରିଆ ସିମାଟ୍; ଇରିଙ୍ଗ୍ ଇମ୍ଜିମାନି ପଟି ଆୟା ମାଟାଦିଙ୍ଗ୍ ଅସିସନାତ୍ ମାରି ତାନି ରେକା ୱିଜୁ ଆୟା ମାଟାଦିଙ୍ଗ୍ ୱେର୍ନା ସିନାତ୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.