ମାପୁରୁଦି ସତ୍ ବାକ୍ୟ
ରୋମିୟ 5:8
Verse 8 is marked below, with the whole chapter around it. Read from the start
ମାପୁରୁଦି ୱାଲେ ମିସାନିକା
ଇଲେଇ ବିସ୍ବାସ୍ତାନ୍ ମାଡ୍ ମାପୁରୁଦି ଆଗ୍ଡ଼ି ଦାର୍ମୁଦିକାର୍ ଆତିମାନିକା ମାରି ପ୍ରବୁ ଜିସୁ କ୍ରିସ୍ତଦି ଉଣ୍ତିଙ୍ଗ୍ ମାପୁରୁଦି ୱାଲେ ମା ସାନ୍ତି ପୋଇତିମାନିକା । ଆୟା ଜିସୁ ମା ବିସ୍ବାସ୍ ଉଣ୍ତିଙ୍ଗ୍ ଇଲେଇ ମା ଜିବନ୍ତୁ ମାପୁରୁଦି ଦୟାଦୁ ମାନାଟ୍ । ଆଦେଙ୍ଗ୍ ମାପୁରୁଦି ଗୌରବ୍ତୁ ମିସାଦେଙ୍ଗ୍ ଆସା ମାଙ୍ଗିଁ ୱେଡ଼ିକାଦାନ୍ ଇଟ୍ତାମାନାତ୍ । ୱିଜୁ ରକମ୍ତି ଦୁକ୍ କାସ୍ଟୁଦୁ ବା ମାଡ୍ ୱେଡ଼ିକା କିଜିନିକା, ଇରିଙ୍ଗ୍ ତରବର୍ ଆଏଣ୍ତା କାସ୍ଟୁ ବଗାନି ମାଣାନ୍ ମନ୍ତୁ ସାସ୍ ୱାନାତ୍ । ସାସ୍ତାନ୍ ବପୁଦି ଗୁଣ୍ ମାରି ବପୁଦି ନେଗି ଗୁଣ୍ତାନ୍ ଆସା ୱାନାତ୍ । ଆସା ମାଙ୍ଗିଁ ନିରାସ୍ ଆଦେଙ୍ଗ୍ ସିଏତ୍, ଇରିଙ୍ଗ୍ ମାପୁରୁ ମାଙ୍ଗିଁ ପବିତ୍ର ଆତ୍ମା ସିଜି ମା ଜିବନ୍ତୁ ୱାନି ଜିବନ୍ନୋନିକା ବର୍ତି କିତା ସିତାମାନାନ୍ ।
ମାଡ୍ ନିରାସ୍ ମାର୍ଇୱାଲେ ମାପୁରୁଦି ତିଆର୍କିତି ସମୟ୍ତୁ କ୍ରିସ୍ତ ପାପି ଲୋକା ଉଣ୍ତିଙ୍ଗ୍ ସାତାନ୍ । ଦାର୍ମୁଲୋକା ଉଣ୍ତିଙ୍ଗ୍ ଆଇକାନ୍ ଏନ୍ ନିଜେଦି ଜିବନ୍ ସିଦେଙ୍ଗ୍ ବଦା କିଏନ୍ । ଆନାତ୍ ଆମା ନେଗି ଲୋକା ଉଣ୍ତିଙ୍ଗ୍ଁ ସାଦେଙ୍ଗ୍ ତିଆର୍ ଆନାନ୍ । ମାତର୍ ମାଡ୍ ପାପି ମାରିଇୱାଲେ କ୍ରିସ୍ତ ମା ଉଣ୍ତିଙ୍ଗ୍ ନିଜେଦି ଜିବନ୍ ସିତାନ୍ । ତେନେ ମାଣାନ୍ ମାପୁରୁ ମାଙ୍ଗିଁ ଏସା ଜିବନ୍ନୋନାନ୍, ଆକା ୱାନ୍ ତର୍ତାମାନାନ୍ । କ୍ରିସ୍ତଦି ଜିବନ୍ ସିନିମାଣାନ୍ ମାପୁରୁ ମାଙ୍ଗିଁ ଦାର୍ମୁଦିକାର୍ ୱାଜା ଆସ୍ତାମାନାନ୍ । ଆତିଙ୍ଗ୍ ମାପୁରୁଦି ରିସାଦାନ୍ ମାଙ୍ଗିଁ ରକିୟା କିଦେଙ୍ଗ୍ଁ କ୍ରିସ୍ତ ଏସା ନାଣ୍ତ ମନ୍ସିନିକାନ୍ ଆଏନ୍ । ମାଡ୍ ମାପୁରୁଦି ସାତ୍ରୁ ମାରି ୱାଲେ ୱାନି ମାରିସି ମା ଉଣ୍ତିଙ୍ଗ୍ ଜିବନ୍ ସିତାନ୍, ତାନି ମାଣାନ୍ ମାପୁରୁଦି ୱାଲେ ମା ମିସାନିକା ଆତାତ୍ । ମାପୁରୁଦି ୱାଲେ ମିସାତି ୱେନ୍କା ଇଲେଇ କ୍ରିସ୍ତଦି ଜିବନ୍ତାନ୍ ରକିୟା ପୟ୍ଦେଙ୍ଗ୍ଁ ଇଜି ମାଡ୍ ଏସା ନାଣ୍ତ ସୁଜୋଗ ପୟ୍ଇକା ? କେବଲ ଆକାନେ ସିଲେ, ପ୍ରବୁ ଜିସୁ କ୍ରିସ୍ତଦି ମାଣାନ୍ ମାପୁରୁ ଏମେ ୱିଜୁ ପାଣି କିତାମାନାନ୍, ଆୟାଉଣ୍ତିଙ୍ଗ୍ ମା ଜିବନ୍ ୱେଡ଼ିକାଦି ପୁରା ଆତାମାନାତ୍ । ଆୟା ଜିସୁ ମାପୁରୁଦି ୱାଲେ ମା ମିସାନିକା କିତାମାନାନ୍ ।
ଆଦମ ନି କ୍ରିସ୍ତ
ଏସ୍ତିୱାଲେ ଅରେନ୍ୱାନି ମାଣାନ୍ ଦୁନିଆଦୁ ପାପ୍ ୱାତାତ୍ ମାରି ପାପ୍ତାନ୍ ସାନିକା ୱାତାତ୍ । ୱିଜେରେ ପାପ୍ କିତାର୍ଆକା ସାନିକା ୱିଜୁ ଲୋକା ଜାତିଦିଙ୍ଗ୍ ୱାତାତ୍ । ନିୟମ୍ ସିନି ଆଗ୍ଡ଼ିରାନ୍ ଦୁନିଆଦୁ ପାପ୍ ମାର୍ହାତ୍; ମାତର୍ ନିୟମ୍ ସିଲି ୱାଲେ ପାପ୍ତି ଇସାବ୍ ଆଏଜି ମାର୍ହାତ୍ । ଆଦମ୍ତି ୱେଡ଼ାଦାନ୍ ମୋସାଦି ୱେଡ଼ା ସାନ୍ଦି ଏନ୍ ଆଦମ୍ତି ୱାଜା ମାଟା ମାନାଏଜି ପାପ୍ କିଏତି ମାରିଙ୍ଗ୍ଁ ବା, ୱିଜେରେ ସାନି ଆଡ୍ଗି ମାର୍ହାର୍ । ଆମାୱାନିଦି ୱାନିକା ମାର୍ହାତ୍, ଆଦମ ୱାନି ଉନ୍ଣ୍ତ୍ରି ନିଡ଼ିଗାୱାଜା; ମାତର୍ ଇୟା ରିଏରି ଲୋଇ ନାଣ୍ତ ୱେର୍ଏ ମାନାତ୍ । ଆଦମ୍ତି ପାପ୍ ନି ମାପୁରୁଦି ଇସାବ୍ସିଲି ଦାନ୍ତି ବପୁ ସାମାନ୍ ସିଲେ । ଅରେନ୍ ଲୋକ୍ତି ପାପ୍ ଉଣ୍ତିଙ୍ଗ୍ଁ ନାଣ୍ତ ଲୋକ ସାତାର୍ । ମାତର୍ ମାପୁରୁ ୱାନି ପେରି ଦୟାଦାନ୍, ମାରି ଅରେନ୍ ଲୋକ୍, ପ୍ରବୁ ଜିସୁ କ୍ରିସ୍ତଦି ମାଣାନ୍ ଲୋକା ଉଣ୍ତିଙ୍ଗ୍ ଏମେ ଦାନ୍ତି ନିୟମ୍ କିତାନ୍, ଆକା ନାଣ୍ତ ବପୁ । ଅରେନ୍ ଲୋକ୍ତି ପାପ୍ ଉଣ୍ତିଙ୍ଗ୍ଁ ଲୋକୁ ବିଚାର୍ତି ଆଗ୍ଡ଼ି ଆଜି ଦସି ଆତାର୍; ମାତର୍ ଗାଦି ଲୋକା ନାଣ୍ତ ପାପ୍ ଆତିଙ୍ଗ୍ବା ମାରି କେମା ପୟ୍ଦେଙ୍ଗ୍ଁ ଇଜି ଇନି ଜଗ୍ ସିଲିତିଙ୍ଗ୍ ବା, ମାପୁରୁ ଆୟା ଦାନ ଉଣ୍ତିଙ୍ଗ୍ଁ, ଇଲେଇ ଲୋକୁ ଦସ୍ସିଲିକାର୍ ଇଜି ୱେଙ୍ଗ୍ଁଦେଙ୍ଗ୍ଁ ଆଟ୍ନାନ୍ । ମାରିବା ଅରେନ୍ ଲୋକ୍ତି ପାପ୍ ଉଣ୍ତିଙ୍ଗ୍ଁ, ସାନି ସାସନ୍ କିନିକା ୱାତାତ୍; ମାତର୍ ମାରି ଅରେନ୍ ଅର୍ତାତ୍ ଜିସୁ କ୍ରିସ୍ତ ଆମାକା କିତାମାନାନ୍, ଆକା ଏସା ପେରିକା । ଏମେ ୱିଜେରେ ମାପୁରୁଦି ପେରି ଦୟାଦାନ୍ ଆର୍ଏନେ ମାପୁରୁଦି ଲାକ୍ତୁ ଦାର୍ମୁତିକାର୍ ଆନାର୍, ୱାର୍ କ୍ରିସ୍ତଦି ୱାଲେ ଜିଣାନି ଜିବନ୍ କାଟେକିନାର୍ ।
ଅରେନ୍ୱାନି ପାପ୍ ଏଣ୍ତେସ୍ ୱିଜୁ ଲୋକା ଜାତିଦିଙ୍ଗ୍ ଦଣ୍ତ୍ କିତାତ୍, ଆୟାୱାଜା ଅରେନ୍ୱାନି ଦାର୍ମୁ ୱିଜୁ ଲୋକୁ ଜାତି ଉଣ୍ତିଙ୍ଗ୍ଁ ମୁକ୍ଡ଼ାନିକା ନି ଜିବନ୍ତି ସାରି ତାତା ସିତାମାନାନ୍ । ଅରେନ୍ୱାନି ଅମାନ୍ୟ ଉଣ୍ତିଙ୍ଗ୍ଁ ଏଣ୍ତେସ୍ ୱିଜେରେ ପାପି ଆତାର୍, ଆୟାୱାଜା ଅରେନ୍ୱାନି ମାନାନି ଉଣ୍ତିଙ୍ଗ୍ଁ ୱିଜେରେ ମାପୁରୁ ଆଗ୍ଡ଼ି ଦାର୍ମୁତିକାର୍ ଆନାର୍ ।
ନିୟମ୍ତି ସାଲାନି ଉଣ୍ତିଙ୍ଗ୍ଁ ତାଗ୍ଇପାଣି ପିରିତାତ୍ । ମାତର୍ ପାପ୍ ପିର୍ନି ଦାପେ ଦାପେ ମାପୁରୁଦି ଦୟା ବା ନାଣ୍ତଦାନ୍ ନାଣ୍ତ ଆତାତ୍ । ପାପ୍ ଏଣ୍ତେସ୍ ସାନି ମାଣାନ୍ ନିଜେଦି ସାସନ୍ କିଜିମାର୍ହାତ୍, ଆୟାୱାଜା ମାପୁରୁଦି ଦୟା ପ୍ରବୁ ଜିସୁ କ୍ରିସ୍ତଦି ଦୟାଦାନ୍ ମାଙ୍ଗିଁ ଦାର୍ମୁଦିକାର୍ ଲେକିସ୍ କିଜି ଏସ୍କାଙ୍ଗ୍ୱିଜ୍ଇ ଜିବନ୍ ସିନାତ୍ ।
ମାପୁରୁଦି ସତ୍ ବାକ୍ୟ. Copyright © 2020 The Word for the World International and Konda Porja Translation Samithi, Dasamanthpur, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.