ମାପୁରୁଦି ସତ୍ ବାକ୍ୟ
ରୋମିୟ 6
ପାପ୍ ଉଣ୍ତିଙ୍ଗ୍ ସାନିକା; ମାତର୍ କ୍ରିସ୍ତଦି ୱାଲେ ମିସାନି ମାଣୁକୁ ପୁନି ଜିବନ୍
ଆର୍ତିଙ୍ଗ୍ ଇନିକା ଇନାଟ୍ ? ମାପୁରୁଦି ଦୟା ମାରି ନାଣ୍ତ ଆନାତ୍ ଇଜି ମାଡ୍ ଇନିକା ପାପ୍ତୁ ଜିନା ମାଡ଼ିନାଟ୍ ? ଏସାଙ୍ଗ୍ ସିଲେ । ପାପ୍ ଉଣ୍ତିଙ୍ଗ୍ ମାଡ୍ ସାତି ମାନିକା ଆବେ ମାରି ଜିନାଟ୍ ଏଣ୍ତେସ୍ ? ମିର୍ ନେସ୍ନିଦେର୍, ଡୁବନ୍ ଅନି ମାଣାନ୍ କ୍ରିସ୍ତ ଜିସୁଦି ୱାଲେ ମିସାଜି ମାଡ୍ ୱାନି ସାତି ମାନୁ ବା ମିସାତି ମାନିକା । ଡୁବନ୍ ଅନି ମାଣାନ୍ ମାଡ୍ ୱାନି ସାତି ମାନୁ ମିସାଜି ୱାନି ୱାଲେ ମୁସାତି ମାନିକା । କ୍ରିସ୍ତ ଏଣ୍ତେସ୍ ବୁବାଦି ଗୌରବ୍ଦି ସାକ୍ତି ଦାନ୍ ମାରିଡ଼େସିଜିବନ୍ ଆଜି ନିଙ୍ଗିଁତାନ୍, ମାଡ୍ ବା ୱାନି ଉଣ୍ତିଙ୍ଗ୍ ପୁନିୱାଜା ଜିଦେଙ୍ଗ୍ ଆଟ୍ନିକା ।
ଏଣ୍ତେସ୍ଇରିଙ୍ଗ୍ ମାଡ୍ ସାନି ମାନୁ ମିସାଜି ୱାନି ୱାଲେ ଉନ୍ଡ୍ରେ ଆତିମାନିକା, ୱାନି ମାରିଡ଼େସି ନିଙ୍ଗ୍ଁନିମାନୁ ବା ୱାନି ୱାଲେ ଉନ୍ଡ୍ରେ ଆଜି ପୁନି ଜିବନ୍ ପୟ୍ନିକା । ମାଡ୍ ନେସ୍ନିକା, ଜେ କ୍ରିସ୍ତଦି ୱାଲେ କ୍ରୁସ ମୁସ୍କୁ ମା ପାଡ଼୍ଇ ମେନ୍ଦଲ୍ତି ମୁର୍ତି ସାତାମାନାତ୍ । ଆବେଣାନ୍ ମା ପାପ୍ ଗୁଣ୍ ନାସ୍ଟୁ ଆତାମାନାତ୍ ମାରି ମାଡ୍ ପାପ୍ତି ଦାସ୍ତାନ୍ ଡ଼ିସାୟ୍ ଆତିମାନିକା, ଇରିଙ୍ଗ୍ ଲୋକୁ ସାତିସରିଙ୍ଗ୍ଁ, ପାପ୍ ଗାଟିଦାନ୍ ରକିୟା ପୟ୍ନାନ୍ । ମାଡ୍ ଜିସୁଦି ୱାଲେ ସାତିମାନିକାଆକା, ୱାନି ୱାଲେ ବା ଜିନିକା ଇଜି ବିସ୍ବାସ୍ କିଜିନିକା । ମାଡ୍ ନେସ୍ନିକା, କ୍ରିସ୍ତ ସାତିମାଣାନ୍ ନିଙ୍ଗିଁତାମାନାନ୍ ଆକା, ୱାନ୍ ମାରି ଏସାଙ୍ଗ୍ଁ ସାଏନ୍ । ୱାନି ମୁସ୍କୁ ସାନିକା ମାରି ସାସନ୍ କିଏତ୍ । ୱାନ୍ ଏମେନୁ ସାତାନ୍ ଆବେଣାନ୍ ପାପ୍ତି ସାକ୍ତିଦାନ୍ ଜିଣାତାମାନାନ୍ । ୱାନ୍ ଇଲେଇ ଆମା ଜିଜି ମାଡ଼ିଜିନାନ୍, ଆକା ମାପୁରୁଦି ୱାଲେ ମିସାତି ଜିବନ୍ । ଆୟାୱାଜା ମିର୍ ବା ପାପ୍ ଉଣ୍ତିଙ୍ଗ୍ ସାତି ମାନିଦେର୍ ଇଜି ଅଡ଼୍ବିଦୁ । ମିର୍ ଇଲେଇ କ୍ରିସ୍ତ ଜିସୁଦି ମାଣାନ୍ ଜିବନ୍ତୁ ମାପୁରୁଦି ୱାଲେ ମିସାତି ମାନିଦେର୍ ।
ଇୟା ମି ସାତି ମେନ୍ଧଲ୍ ମୁସ୍କୁ ପାପ୍ ମାରି ସାସନ୍ କିମାକିତ୍; ମିର୍ ମାରି ଇନି ମେନ୍ଦଲ୍ତି ଆସା ଆଡ୍ଗି ତେବାମାଟ୍ । ମିର୍ ନିଜେଦିଙ୍ଗ୍ଁ ଏମେ ଇସାବ୍ତାନ୍ ପାପ୍ ଲାକ୍ତୁ ସର୍ପେ କିଜି ତାଗ୍ଇ ପାଣି ୱାଜା ବ୍ୟବହାର୍ ଆମାଟ୍ । ମାତର୍ ସାନି ମାଣାନ୍ ରକିୟା ପୟ୍ଜି ଜିବନ୍ ପୟ୍ତିମାନି ଉଣ୍ତିଙ୍ଗ୍ଁ ମିର୍ ସତ୍ପାଣି କିଦେଙ୍ଗ୍ଁ ଇଜି ନିଜେ ନିଜେଦିଙ୍ଗ୍ଁ ସାଜୁଦାନ୍ ମାପୁରୁମାନୁ ସର୍ପେ କିଦୁ । ମାତର ପାପ୍ ମି ମୁସ୍କୁ ସାସନ୍ କିମାପିତ୍ । ମିର୍ ମାରି ନିୟମ୍ତି ଆଡ୍ଗି ସିଲିଦେର୍ । ମାତର୍ ମାପୁରୁଦି ଦୟାଦି ଆଡ୍ଗି ମାନିଦେର୍ ।
ଦାର୍ମୁଦି ଦାସ୍କୁ
ଆର୍ତିଙ୍ଗ୍, ମାଡ୍ ନିୟମ୍ତି ଆଡ୍ଗି ତେବାଏଣ୍ତା ମାପୁରୁଦି ଦୟା ପୟ୍ତିମାନିକା ଇଜି ଇନିକା ପାପ୍ କିଜିମାନାଟ୍ ? ଆକା ଏସାଙ୍ଗ୍ ସିଲେ । ମିର୍ ପୁରା ନେସ୍ତିମାନିଦେର୍, ଜଦି ମିର୍ ଆମାୱାନି ଆଡ୍ଗି ମାନିକା ମାନାଜି ୱାନି ପୁରା ମାଟା ମାନାନିଦେର୍, ଆର୍ତିଙ୍ଗ୍ ମିର୍ ୱାନି ଦାସ୍ । ଜଦି ପାପ୍ତି ଦାସ୍ ଆନିଦେର୍, ତେନି ଦଣ୍ତ୍ ଆନାତ୍ ସାନିକା; ଜଦି ଦାର୍ମୁଦୁ ସାଲାନିଦେର୍, ଆର୍ତିଙ୍ଗ୍ ଜିବନ୍ ପୟ୍ନିଦେର୍ । ମାତର୍ ମାପୁରୁଙ୍ଗ୍ଁ ଦନ୍ୟବାଦ ସିଜିନା, ଜଦିବା ଅର୍ଲେନ୍ ମିର୍ ପାପ୍ତି ଦାସ୍କୁ ମାର୍ହିଦେର୍, ମିର୍ ଇଲେଇ ସୁସମାଚାର୍ତାନ୍ ଅଜାତିମାନି ସତ୍ମାଟେଙ୍ଗ୍ଁ ପୁରା ମୋନ୍ତାନ୍ ମାନାଜିନିଦେର୍ । ମିର୍ ପାପ୍ତାନ୍ ମୁକ୍ଡ଼ାଜି ଦାର୍ମୁଦି ଦାସ୍କୁ ଆତିମାନିଦେର୍ । ମି ସାକିସିଲି ଉଣ୍ତିଙ୍ଗ୍, ଇୟାୱିଜୁ ମାଟା ! ନାନୁ ଲୋକୁ ୱାଜା ୱିଜୁଦିନ୍ ୱାର୍ଗିନି ବାସାଦାନ୍ ୱେର୍ସିନା । ଅର୍ଲେନ୍ ମିର୍ ତାଗ୍ଇକା ନି ତାଗ୍ଇ ପାଣିଦୁ ନିଜେ ନିଜେଦିଙ୍ଗ୍ ମିସାକିଜି ଇଟ୍ତିମାର୍ହିଦେର୍ । ଆୟାୱାଜା ଇଲେଇ ପବିତ୍ର ଆଦେଙ୍ଗ୍ ଇଜି ଦାର୍ମୁଦି ଲାକ୍ତୁ ନିଜେଦିଙ୍ଗ୍ଁ ପୁରାଦାନ୍ ସିଦୁ ।
ମିର୍ ପାପ୍ତି ଦାସ୍ ମାର୍ଇୱାଲେ, ଦାର୍ମୁଦାନ୍ ଆକ ମାର୍ହିଦେର୍ । ଇଲେଇ ମିଙ୍ଗିଁ ଏମେ ୱିଜୁ ପାଣି କିଦେଙ୍ଗ୍ ସେମାର୍ ଆଜିନାତ୍, ନାସ୍ତିୱାଲେ ଆୟାୱିଜୁ କିଜିମାର୍ଇଦେର୍ । ଆବେଣାନ୍ ଇନି ଲାବ୍ ପୟ୍ତିଦେର୍ ? ଆୟାୱିଜୁ ପାଣିଦି ଦଣ୍ତ୍ ସାନିକା । ମାତର୍ ଇଲେଇ ମିର୍ ପାପ୍ତାନ୍ ମୁକ୍ଡ଼ାଜି ମାପୁରୁଦି ପବିତ୍ର ଦାସ୍ ଆତିମାନିଦେର୍ । ତେନି ଲାବ୍ ଆଜିନାତ୍, ମାପୁରୁମାନୁ ପୁରାଦାନ୍ ଜିବନ୍ ସର୍ପେ କିନିକା ମାରି ତେନି ପଲ୍ ଏସ୍କାଙ୍ଗ୍ୱିଜ୍ଇ ଜିବନ୍ । ପାପ୍ତି ବାଦ୍ଲୁ ସାନିକା, ମାତର୍ ମାପୁରୁଦି ଦୟାଦି ଦାନ୍ ଆଜିନାତ୍, ପ୍ରବୁ ଜିସୁ କ୍ରିସ୍ତଦି ୱାଲେ ମିସାନି ମାଣାନ୍ ଏସ୍କାଙ୍ଗ୍ୱିଜ୍ଇ ଜିବନ୍ ।
ମାପୁରୁଦି ସତ୍ ବାକ୍ୟ. Copyright © 2020 The Word for the World International and Konda Porja Translation Samithi, Dasamanthpur, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.