ମାପୁରୁଦି ସତ୍ ବାକ୍ୟ
କଲସିୟ 3
ମିର୍ ଏସ୍କାଙ୍ଗ୍ କ୍ରିସ୍ତଦି ୱାଲେ ସାତିମାଣୁକୁ ନିଙ୍ଗିଁତି ମାନିଦେର୍, ଆଦେଙ୍ଗ୍ ମୁସ୍କୁପୁର୍ତି ବିସୟ୍ତି ଉଣ୍ତିଙ୍ଗ୍ ମନ୍ ସିଦୁ, ଇରିଙ୍ଗ୍ କ୍ରିସ୍ତ ମୁସ୍କୁପୁର୍ତୁ ମାପୁରୁଦି ଉଣି ତରିନ୍ ବାସ୍ତାମାନାନ୍ । ଦୁନିଆଦି ବିସୟ୍ତି ଉଣ୍ତିଙ୍ଗ୍ ମନ୍ ସିଏଣ୍ଗା ମୁସ୍କୁପୁର୍ତି ବିସୟ୍ ଉଣ୍ତିଙ୍ଗ୍ ମନ୍ ସିଦୁ । ଇରିଙ୍ଗ୍ ମିର୍ ସାତି ମାନିଦେର୍, ମାରି ମି ଜିବନ୍ ମାପୁରୁଦିମାନୁ କ୍ରିସ୍ତଦି ୱାଲେ ନେଗେନ୍ତାନ୍ ମାନାତ୍ । ମା ଜିବନ୍ ୱାଜା ଜେ କ୍ରିସ୍ତନେ, ମାରି ଏସ୍ତିୱାଲେ ୱାନ୍ ତରାୟାଆନାନ୍, ନାସ୍ତିୱାଲେ ମିର୍ ବା ୱାନି ୱାଲେ ଗୌରବ୍ତାନ୍ ତରାୟାଆନିଦେର୍ ।
ପାଡ଼ିଇକା ନି ପୁନି ଜିବନ୍
ମି ଜିବନ୍ତୁ ପାଣିକିନିକା ଦୁନିଆଦି ପାଣିଙ୍ଗ୍ ଅର୍ତାତ୍ ଦାରିପାଣି, ତାଗ୍ଇସିନ୍ତା, ମନ୍ତୁ ଲାଲାୟ୍ଆନିକା, ଲାଲାୟ୍ଆନିକା ମାରି ଲବ୍ତିଙ୍ଗ୍ ମିର୍ ସାପିସ୍ କିଦୁ । ଲବ୍ ବମା ପୁଜାଦି ଉନ୍ଡ୍ରି ରୁପ୍ । ଇୟାୱିଜୁ ବିସୟ୍ଦୁ ମାନ୍ଜି ଆମାକାର୍ ମାପୁରୁଙ୍ଗ୍ ମାନାଏର୍, ୱାରି ମୁସ୍କୁ ମାପୁରୁ ରିସା ଆନାନ୍ । ଅର୍ଲେନ୍ ମିର୍ ବା ଇୟାୱିଜୁ ବିସୟ୍ତୁ ମାନାଜି ଆୟାୱାଜା ଜିଜି ମାଡ଼ିଜି ମାର୍ଇଦେର୍ ।
ମାତର୍ ଇଲେଇ ମିର୍ ବା ଇୟାୱିଜୁ ବିସୟ୍କୁ ଇନ୍ଡ୍ରେଙ୍ଗ୍ ସରିଙ୍ଗ୍ : ରିସା, ଆକାର୍, କାଡ଼୍ନିକା ଡ଼ିସ୍ତେଙ୍ଗ୍ ପଡ଼ାନାତ୍ । ମି ୱେୟୁଦାନ୍ ତାଗ୍ଇ ମାଟେଙ୍ଗ୍ ମାରି ତାଗ୍ଇ ବାସା ମୁଡ଼ୁକେ ଇନ୍ମାଟ୍ । 1ନିଜେନିଜେଦିଙ୍ଗ୍ ମିଚ୍ ଇନ୍ମାଟ୍, ଇରିଙ୍ଗ୍ ମିର୍ ପାଡ଼ିଇ ଗୁଣୁ ମାରି ତାନି ବ୍ୟବ୍ହାର୍ ଡ଼ିସ୍ତିମାନିଦେର୍, 2ମାରି ପୁନି ଗୁଣ୍ ଆସ୍ତିମାନିଦେର୍ । ଲୋକ୍ତି ଇୟା ପୁନିପାଣି, ତିଆର୍କିତି ମାପୁରୁ ନିଜେଦି ମୁର୍ତି ଇସାବ୍ତାନ୍ ପାଣି କିଜିନାନ୍ । ଇୟାଉଣ୍ତିଙ୍ଗ୍ ମିର୍ ୱାନି ବିସୟ୍ତାନ୍ ପୁରା ବୁଦି ପୟ୍ଜିନିଦେର୍ । ଇୟାୱାଜା ଜିହୁଦି, ଅଣଜିହୁଦି, ସୁନ୍ନତ ମାରି ଅସୁନ୍ନତ, ନିଜେଦି ଦେସ୍, ଆଇଦେସ୍, ଗତିମୁରୁଲି ମାରି ଆରେଏମାନି ଲୋକ୍ତି ଲୋଇ ଆମାଇନି ଅଲଗା ସିଲେତ୍ । ମାତର୍ କ୍ରିସ୍ତ ୱିଜେରିମାନୁ ମାନାନ୍ ମାରି ୱାନ୍ ଆଜିନାନ୍ ୱିଜୁୱିଜୁନେ । 3
ମାରି, ମିର୍ ମାପୁରୁଦି ଲୋକୁ । ୱାନ୍ ମିଙ୍ଗିଁ ଜିବନ୍ନୋଜି ନିଜେଦି ଉଣ୍ତିଙ୍ଗ୍ ଆସ୍କିତାମାନାନ୍ । ଆଦେଙ୍ଗ୍ ମିର୍ ସିତ୍ଡ଼ି ଜିବନ୍, ଦୟା, ସାନ୍ତି, କରୁଣା ମାରି ସାହାସ୍ତିନାନି ଆଙ୍ଗିଁ ଆରାଦୁ । 4ନିଜେନିଜେଦି ଉଣ୍ତିଙ୍ଗ୍ ମିସାବିଡ଼ା ଆଦୁ, ମାରି ଜଦି ଆଇ ଏମେୱାନି ବିରୁଦ୍ତାନ୍ ଇନି ମାଟା ମାର୍ଇଙ୍ଗାଁ, ଆର୍ତିଙ୍ଗ୍ ନିଜେନିଜେଦିଙ୍ଗ୍ କେମା କିଦୁ । ପ୍ରବୁ ଏଣ୍ତେସ୍ ମିଙ୍ଗିଁ କେମା କିତାମାନାନ୍, ମିର୍ ବା ଆୟାୱାଜା ନିଜେନିଜେଦିଙ୍ଗ୍ କେମା କିଦୁ । ମାରି ଇୟାୱିଜୁ ଗୁଣୁ ୱାଲେ ଜିବନ୍ନୋନିକା ମିସାକିଦୁ । ଜିବନ୍ନୋନିକା ୱିଜୁ ବିସୟ୍ତିଙ୍ଗ୍ ମିସାକିଜି ଉନ୍ଡ୍ରେମାନୁ କିନାତ୍ । କ୍ରିସ୍ତସିତିମାନି ସାନ୍ତି ମି ଜିବନ୍ତିଙ୍ଗ୍ ସାଲାକିପିତ୍; ଇରିଙ୍ଗ୍ ଇୟା ସାନ୍ତି ଉଣ୍ତିଙ୍ଗ୍ ମାପୁରୁ ମିଙ୍ଗିଁ ଅରେସ୍ୱାଜା ଉନ୍ଡ୍ରେ ମେନ୍ଧଲ୍ ଆନି ଉଣ୍ତିଙ୍ଗ୍ କୁକ୍ତାମାନାନ୍ । ୱିଜୁଦିନ୍ ଦନ୍ୟବାଦ୍ ସିଦୁ । 5କ୍ରିସ୍ତଦି ବାକ୍ୟ ନାଣ୍ତଦାନ୍ନାଣ୍ତ ମି ଜିବନ୍ତୁ ବାସା କିପିତ୍; ମିର୍ ନିଜେନିଜେଦିଙ୍ଗ୍ ପୁରା ବୁଦିଦି ୱାଲେ ସିକିୟା ମାରି ସତେନେ ସିଦୁ । ମାରି ଆତ୍ମିକ ମାପୁରୁଦି ଉଦେସ୍ତାନ୍ ପାଟା ପାର୍ଦୁ, ଆରାଦନା କିଦୁ, ମାରି ଦନ୍ୟବାଦ୍ଦାନ୍ ୱେଡ଼ିକାଦି ଜିବନ୍ତାନ୍ ପାଟା ପାର୍ଦୁ । ମାରି, ବାକ୍ୟ ସିଲିତିଙ୍ଗ୍ ପାଣିଦାନ୍ ମିର୍ ଆମାକା ଇନିକା କିଦୁ, ଆୟାୱିଜୁ ପ୍ରବୁ ଜିସୁଦି ଦର୍ତାନ୍ କିଜି ୱାନିମାଣୁକୁ ବୁବା ମାପୁରୁଙ୍ଗୁଁ ଦନ୍ୟବାଦ୍ ସିଦୁ ।
ପୁନି ଜିବନ୍ତୁ ନିଜେଦି ମିସାବିଡ଼ାନିକା
ଏ ଆଇମେକ୍, ମି କନ୍ଲିରି ଆଡ୍ଗି ତେବାଦୁ, ଇରିଙ୍ଗ୍ ପ୍ରବୁ ଜିସୁ କ୍ରିସ୍ତଦି ୱେନ୍କାସନି ୱାଜା ଇକା ମି ପାଣି । 7
ଏ କନ୍ଲିରି, ନିଜେ ନିଜେଦି ଆଇମେକାଙ୍ଗ୍ଁ ଜିବନ୍ନୋଦୁ, ୱାନିକା ଉଣ୍ତିଙ୍ଗ୍ ତାଗ୍ଇ ବ୍ୟବ୍ହାର୍ କିମାଟ୍ । 8
ଏ କଡ଼ର୍ ଆଇଲିକ୍, ୱିଜୁଦିନ୍ ମି ବୁବା ୟାୟାରି ମାଟା ଆସ୍ତୁ, ଇକା ମି କ୍ରିସ୍ଟାନ୍ତି ପାଣି, ଇରିଙ୍ଗ୍ ଇବେନୁ ମାପୁରୁ ୱେଡ଼ିକା ଆନାନ୍ । 9
ଏ ବୁବାୟାୟାର୍, ନିଜେ ନିଜେଦି କଡ଼ରିଙ୍ଗ୍ ରିସା କିମାଟ୍, ଏଣ୍ତେସ୍ ୱାର୍ ୱେଡ଼ିକା ଆଏର୍ । 10
ଏ ଗତିମୁରୁଲିର୍, ୱିଜୁ ବିସୟ୍ତୁ ମି ମାଲିକ୍କା ମାଟା ଆସ୍ତୁ । ୱାର୍ ମି ଉଣ୍ତିଙ୍ଗ୍ ସୁଡ଼ୁଜି ମାନିୱାଲେ ୱାରିଙ୍ଗ୍ ୱେଡ଼ିକା କିନି ଉଣ୍ତିଙ୍ଗ୍ ସିଲେ, ମାତର୍ ପ୍ରବୁଦି ଉଣ୍ତିଙ୍ଗ୍ ମି ତିଲାଏତାନ୍ ତିର୍ ଜିବନ୍ତାନ୍ ଇକା କିଦୁ । ମିର୍ ଆମାକା ଇନିକା କିନିଦେର୍, ପ୍ରବୁଦି ଉଣ୍ତିଙ୍ଗ୍ କିତି ୱାଜା ଜିବନ୍ତି ୱାଲେ ଆକା କିଦୁ, ଲୋକା ଉଣ୍ତିଙ୍ଗ୍ କିତି ୱାଜା କିମାଟ୍ । ମନେଇଡ଼୍ଦୁ, ମାପୁରୁ ତାମି ଲୋକା ଉଣ୍ତିଙ୍ଗ୍ ଆମାକା ଇଟ୍ତାମାନାନ୍, ଆକା ୱାନ୍ ମିଙ୍ଗିଁ ପୁରସ୍କାର୍ ୱାଜା ସିନାନ୍ । ମିର୍ ପ୍ରବୁ କ୍ରିସ୍ତଦିଙ୍ଗ୍ନେ ସେବା କିଜିନିଦେର୍ । 11ମାରି ଏନ୍ ଅନ୍ୟାୟ୍ କିନାନ୍, ୱାନ୍ ନିଜେଦି ଅନ୍ୟାୟ୍ଦି ବାଦ୍ଲୁ ଦଣ୍ତ୍ ପୟ୍ନାନ୍; ଇରିଙ୍ଗ୍ ମାପୁରୁ ସାମାନ୍ତାନ୍ ୱିଜେରି ବିଚାର୍ କିନାନ୍ ।
Source notes (11)
- Cross-reference ଏପିସିୟ ୪:୨୨.
- Cross-reference ଏପିସିୟ ୪:୨୪.
- Cross-reference ଏପିସିୟ ୪:୨.
- Cross-reference ଏପିସିୟ ୪:୩୨.
- Cross-reference ଏପିସିୟ ୫:୧୯,୨୦.
- Cross-reference ଏପିସିୟ ୫:୨୨; ୧ ପିତର ୩:୧.
- Cross-reference ଏପିସିୟ ୫:୨୫; ୧ ପିତର ୩:୭.
- Cross-reference ଏପିସିୟ ୬:୧.
- Cross-reference ଏପିସିୟ ୬:୪.
- Cross-reference ଏପିସିୟ ୬:୫-୮.
- Cross-reference ଏପିସିୟ ୬:୯.
ମାପୁରୁଦି ସତ୍ ବାକ୍ୟ. Copyright © 2020 The Word for the World International and Konda Porja Translation Samithi, Dasamanthpur, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.