ମାପୁରୁଦି ସତ୍ ବାକ୍ୟ
କଲସିୟ 4
ଏ ମାଲିକ୍କୁ, ମୁସ୍କୁପୁର୍ତୁ ମି ଉଣ୍ତିଙ୍ଗ୍ ବା ପ୍ରବୁ ମାନାନ୍ ଇଜି ନେସ୍ସି ନିଜେ ନିଜେଦି ଗତିମୁରୁଲିଙ୍ଗାଁ ଉଣ୍ତିଙ୍ଗ୍ ନ୍ୟାୟ୍ ମାରି ସାମାନ୍ତାନ୍ ସୁଡ଼୍ଦୁ ।
ଆଇଆଇ ମାଟେଙ୍ଗ୍
ୱିଜୁୱାଲେ ପାର୍ତାନାଦାନ୍ ଜିଜି ମାଡ଼ିଦୁ ମାରି ମାପୁରୁଦି ଦନ୍ୟବାଦ୍ କିଜି ପାର୍ତାନାଦୁ ଜାଗାର୍ତା ତେବାଦୁ । କ୍ରିସ୍ତଦି ମାର୍ଗିତି ମାଟା ପ୍ରଚାର୍ କିନି ଉଦେସ୍ତାନ୍ ମାପୁରୁ ଏଣ୍ତେସ୍ ମାଙ୍ଗିଁ ସାରି ସିନାନ୍, ଆୟାଉଣ୍ତିଙ୍ଗ୍ ବା ପାର୍ତାନା କିଦୁ । ଆମା ବାକ୍ୟ ପ୍ରଚାର୍ କିତି ଉଣ୍ତିଙ୍ଗ୍ ନାନ୍ ଇଲେଇ ଜଇଲ୍ତୁ ମାନା । ପାର୍ତାନା କିଦୁ, ଏଣ୍ତେସ୍ ନାନ୍ ଟିକ୍ତାନ୍ ମାରି ନେଗେନ୍ତାନ୍ ଆକା ପ୍ରଚାର୍ କିଦେଙ୍ଗ୍ ଆଟ୍ନା । 2
ସୁଜୋଗ୍ତି ସତ୍ ବ୍ୟବ୍ହାର୍ କିଜି ଅବିସ୍ବାସ୍ରି ଲୋକା ଲାକ୍ତୁ ବୁଦିଦାନ୍ ନେଗେନ୍ତାନ୍ ସାଲାବୁଲାଦୁ । ମି ମାଟା ୱିଜୁଦିନ୍ ଦୟା ୱାଜା ସାୱି ମାରି ମୋନ୍ତିଙ୍ଗ୍ ୱେଡ଼ିକାକିନିକେଙ୍ଗ୍ ଆପିତ୍ । ୱିଜେରିଙ୍ଗ୍ ଏଣ୍ତେସ୍ ଟିକ୍ ଉତର୍ ସିଦେଙ୍ଗ୍ ଆଟ୍ନିଦେର୍, ଇୟା ମାଟା ମିର୍ ନେସ୍ନିକା ଦର୍କାର୍ ମାନାତ୍ ।
ସାରାସାରି ମାଡ଼ିସ୍କିନିକା
ଲାଡ୍ତି ତଡ଼ାନ୍, ପ୍ରବୁଦି ପାଣିଦୁ ବିସ୍ବାସ୍ତି ସେବାକିନିକାନ୍ ମାରି ନା ୱାଲେ ଅର୍ସେ ସେବାକିନିକାନ୍ ଜେ ତୁକିକ, ୱାନ୍ ନା ୱିଜୁ ବିସୟ୍ ମିଙ୍ଗିଁ ୱେର୍ନାନ୍; ମାପୁ ଏଣ୍ତେସ୍ ମାନାପ୍, ୱିଜୁ ବିସୟ୍ ୱେର୍ସି ମିଙ୍ଗିଁ ୱେଡ଼ିକା ସିନି ଉଣ୍ତିଙ୍ଗ୍ ନାନ୍ ୱାନିଙ୍ଗ୍ ମି ଲାକ୍ତୁ ପୋକ୍ତାଜିନା । 5ୱାନି ୱାଲେ ନାନ୍ ବିସ୍ବାସ୍ତି ମାରି ଲାଡ୍ତି ତଡ଼ାନ୍ ଅନିସିମସ୍ଦିଙ୍ଗ୍ ପୋକ୍ତାତା, ୱାନ୍ ମି ଲୋଇରାନ୍ ଅରେନ୍ । ୱାର୍ ମିଙ୍ଗିଁ ଇୟା ବାଡିଦୁ ଗଟାଜିମାନି ୱିଜୁ ମାଟା ୱେର୍ନାନ୍ । 6
ନା ୱାଲେ ଅର୍ସେ ଜଇଲ୍ତୁ ମାର୍ଇ ଆରିସ୍ଟାର୍କସ୍ ମାରି ୱାନି ୱାଲେ ବର୍ଣ୍ଣବାଦି କୁଟୁମ୍ତି ତଡ଼ାନ୍ ମାର୍କ ବା ମିଙ୍ଗିଁ ନମସ୍କାର୍ ଜାଣେକିଜିନାନ୍ । ମାର୍କ ମି ଲାକ୍ତୁ ୱାତିଙ୍ଗ୍ ୱାନିଙ୍ଗ୍ ନେଗେନ୍ କୁକ୍ତୁ, ଇୟା ଆଦେସ୍ ମିଙ୍ଗିଁ ଆଗ୍ଡ଼ିରାନ୍ନେ ୱେର୍ତାମାନାର୍ । ମାରି, ଯୁସ୍ତ ଦର୍ଦାନ୍ ଜାଣାସିନା ଯିହୋଶୁୟ ବା ମିଙ୍ଗିଁ ନମସ୍କାର୍ ଜାଣେକିଜିନାନ୍; କ୍ରିସ୍ଟାନ୍ ଦର୍ମ ମାନାତିମାନିକାର୍ କେବଲ ଇୟା ମୁଏର୍ ଜିହୁଦି ମାପୁରୁଦି ରାଜି ଉଣ୍ତିଙ୍ଗ୍ ନା ୱାଲେଅର୍ସେ ପାଣିକିନିକାନ୍ ଆଜି ନାଙ୍ଗିଁ ନାଣ୍ତ ସାହାଜ୍ୟ କିତାମାନାର୍ । 7
ମି ଦଲ୍ତି ମାରି ଅରେନ୍ ଲୋକ୍ ମାରି କ୍ରିସ୍ତ ଜିସୁଦି ସେବାକିନି ଏପାଫ୍ରା ବା ନମସ୍କାର୍ ଜାଣେକିଜିନାନ୍ । ଏଣ୍ତେସ୍ ମିର୍ ଟିକ୍ ମାରି ମାପୁରୁଦି ୱିଜୁ ବଦା ବିସୟ୍ତାନ୍ ପୁରା ମାନାଜି ଡାଟ୍ କ୍ରିସ୍ତ ବିସ୍ବାସି ୱାଜା ଦୁଙ୍ଗୁଁଏଣ୍ଗା ନିନ୍ଡ୍ରେଙ୍ଗ୍ ଆଟ୍ନିଦେର୍, ଆୟାଉଣ୍ତିଙ୍ଗ୍ ୱାନ୍ ୱିଜୁଦିନ୍ ମାପୁରୁଦି ଲାକ୍ତୁ ସାନିଜିନିୱାଜା ସାକ୍ତିଦି ପାର୍ତାନା କିଜିନାନ୍ । ଇରିଙ୍ଗ୍ ୱାନ୍ ମି ଉଣ୍ତିଙ୍ଗ୍ ମାରି ଲାଅଦିକିଆ ମାରି ହିଏରାପଲିଦି ଲୋକା ଉଣ୍ତିଙ୍ଗ୍, ୱାନ୍ କିତିମାନି କାସ୍ଟୁପାଣି ବିସୟ୍ତାନ୍ ନାନ୍ ନିଜେ ଇୟା ସାକ୍ୟ ୱେର୍ସିନା । 8ଲାଡ୍ତି ଡାକ୍ତର୍ ଲୁକ ମାରି ଦିମା ମିଙ୍ଗିଁ ନମସ୍କାର୍ ଜାଣେକିଜିନାର୍ ।
ଲାଅଦିକିଆଦୁ ମାନି ତଡ଼ାନ୍କୁ ନି ତାଙ୍ଗିଁକି, ତାଙ୍ଗିଁ ନୁମ୍ଫା ମାରି ତାମି ଇନ୍ଡ୍ର ଉନ୍ଡ୍ରେମାନୁ ଆଜିମାନି ମଣ୍ତଲିଦି ୱିଜେରିଙ୍ଗ୍ ମା ନମସ୍କାର୍ ଜାଣେକିଦୁ । ମାରି, ମିର୍ ଏଣ୍ତେସ୍ ଇୟା ଆକୁ ପଡ଼ାତି ୱିସ୍ତିଙ୍ଗ୍ ଲାଅଦିକିଆ ମଣ୍ତଲିଦୁ ବା ଏଣ୍ତେସ୍ ଇକା ପଡ଼ାଦେଙ୍ଗ୍ ଆଟ୍ନାର୍, ମାରି ଲାଅଦିକିଆଦି ମଣ୍ତଲିଦି ତଡ଼ାନ୍କୁ ନି ତାଙ୍ଗିଁକି ମି ଲାକ୍ତୁ ଆମା ଆକୁ ପୋକ୍ତାନାର୍, ଆକା ମିର୍ ବା ଏଣ୍ତେସ୍ ପଡ଼ାଦେଙ୍ଗ୍ ଆଟ୍ନିଦେର୍, ଇୟାଉଣ୍ତିଙ୍ଗ୍ ଜାତୁନ୍ ଆଦୁ । 9ମାରି ଆର୍କିପତିଙ୍ଗ୍ ୱେର୍ନି, “ପ୍ରବୁଦି ସେବା କିନି ଉଣ୍ତିଙ୍ଗ୍ ମିଙ୍ଗିଁ ଆମା ଦାଇତ୍ ସିଆୟ୍ଆତାମାରାତ୍, ଆକା ଏଣ୍ତେସ୍ ୱାଜାବା ୱିସ୍ତୁ ।”
ନାନ୍ ପାଉଲ ନା ନିଜେଦି କିୟୁଦାନ୍ ଇୟା ନମସ୍କାର୍ ରାସ୍ସିନା । ନା ଜଇଲ୍ତି ଅବସ୍ତାଦିଙ୍ଗ୍ ବାଣାମାଟ୍ ।
ମାପୁରୁଦି ଦୟା ମି ୱିଜେରି ଲାକ୍ତୁ ମାନିତ୍ ।
Source notes (9)
- Cross-reference ଏପିସିୟ ୬:୯.
- Cross-reference ଏପିସିୟ ୫:୧୬.
- Cross-reference ପ୍ରେରିତ ୨୦:୪; ୨ ତିମତି ୪:୧୨.
- Cross-reference ଏପିସିୟ ୬:୨୧,୨୨.
- Cross-reference ପିଲିମନ ୧:୧୦-୧୨.
- Cross-reference ପ୍ରେରିତ ୧୯:୨୯; ୨୭:୨; ପିଲିମନ ୧:୨୪ ପ୍ରେରିତ ୧୨:୧୨,୨୫; ୧୩:୧୩; ୧୫:୩୭-୩୯.
- Cross-reference କଲସିୟ ୧:୭; ପିଲିମନ ୧:୨୩.
- Cross-reference ୨ ତିମତି ୪:୧୧; ପିଲିମନ ୧:୨୪ ୨ ତିମତି ୪:୧୦; ପିଲିମନ ୧:୨୪.
- Cross-reference ପିଲିମନ ୧:୨.
ମାପୁରୁଦି ସତ୍ ବାକ୍ୟ. Copyright © 2020 The Word for the World International and Konda Porja Translation Samithi, Dasamanthpur, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.