Tơs Sơđah Jơno Ndăp 9

1Sŏng gư̆n cro gơndrơh dơ̆ prăm ôh kơmbòt, gừn ăñ tơmpơl du-lăm sơmăñ bơh cŭng trồ sŏng duh nteàh ple-ù, gừn cơ-khwà trôm jrô hwơng gời dê sŏng dî e ma gô. 2Gô pẵư trôm jrô hwơng gời dê, gừn phô̆ bơh trôm jrô pơ cŭngsî gư̆ptî phô̆ du-lăm nhă oềs dơng dê, gừn măttơnge băl î lơwah gời sơlôh ñô̆ng bơh anẵu phô̆ trôm jrô dô. 3Sŏng gư̆n bơh phô̆ gư̆n, tơlôh măy sơđah-kơtîng lam lơ̆ nơ̆m ple-ù, gư̆m gơnăp-gơnoăr dî dờp e ma ƀòn gô gư̆ptî gơnăp-gơnoăr lơ̆gay tơmpôl adieng tom nơ̆m ple-ù. 4Jơno dî pơđơ ma gô rơ̆ la gô bư̆ng phà tơngroh khơ̆ nơ̆m ù hala kơp jơno tơpreh tơliê hala sî nha găy, mà nư̆ng phà tơngroh kon-mơnùs gời, la tơmpôl cro ơ̆ tom ƀăng-kì Yang Tơm Trồ dê cŭngsî klieng mơ̆n. 5Gơnoăr dî e ma gô rơ̆ la gô bư̆ng tơngsơ̆t sơ̆t ƀòn gư̆n, mơya ƀòn gư̆n rơp kŏng lơh sơòs-gleh nơ̆m prăm kơnnhe, gư̆m jơno lơh jê-kơkua cŭngsî ƀòn gư̆n gư̆ptî jơno jê-kơkua bơh adieng tơm tô̆ gô dî côh cro. 6Nhòng lơ̆gay nge gư̆n, lơ̆gay cro rơp jôi jơno sơ̆t, mà ƀòn gô nên-nôn ngăn rơp ơ̆ jôi dî gô, gư̆m ƀòn gô rơp kơp kơñ dî sơ̆t, mà jơno sơ̆t gừn pleh wĭc bơh sơ ƀòn gô. 7Rồp-să lơ̆gay măy sơđah-kơtîng gư̆ptî aseh rcăng sơmơn swà tơmlơh. Cŭngsî găl gô la jơno găy gư̆n gư̆ptî sơgơn-bơtao gôlơh gư̆ptî jơno lơh î màh, hôm măt gô gừn gư̆ptî măt kon-mơnùs. 8Gô dî sŏ gư̆ptî sŏ cro-ua, gư̆m sề gô gừn gư̆ptî sề klîh-phơ̆m dê. 9Gô dî ao tơmlơh tơmbàk dơda nùs gư̆ptî ao lơh î lòs, gư̆m kơ̆ntàs mơnơ gô dê gư̆ptî kơ̆ntàs kơp rơdeh aseh dê, khăi aseh ndăng rơndôh nơ̆m anẵu tơmlơh dê. 10Gô dî tieng băl î kăm côh gư̆ptî adieng, gư̆m jơno pran-kơdăng gô dê nơ̆m lơ̆gay tieng gô lơi lơh jơh lơ̆gay cro nơ̆m prăm kơnnhe. 11Gô dî bơtao ăm cŭngsî ƀòn gô la càrak trôm jrô hwơng gời dê. Sơnăn gô jăt jơno Heƀrơ la Aƀađôn, hôm jăt jơno Grek, gô dî sơnăn la Apôlyôn.

12Jơno sơòs-gleh dơ̆ sơm sŏng swà găn lờt. Lăng năy, kŭng hôm bea jơno sơòs-gleh te ndăng trôh ma-ngkơi lơ̆gay bră dô.

13Sŏng gư̆n cro gơndrơh dơ̆ pro ôh kơmbòt, gừn ăñ kơnău du jơno tơs kơ̆ntàs bơh lơ̆gay ngkăy kaƀang duh-khoai lơh î màh ăm sơđàp măt Yang Tơm Trồ, 14pơđơ ma cro gơndrơh dơ̆ pro, la cro gơndrơh ndăng dî kơmbòt: “Hồ cĕ puôn hê cro gơndrơh sŏng kŏng căp nơ̆m dà dơng Ơphrat.” 15Bơh gư̆n la puôn hê cro gơndrơh, la lơ̆gay cro gơndrơh sŏng dî rcăng rơndăp lai nơ̆m tô̆ jơ, nge, kơnnhe, năm gư̆n, dî hồ tơlôh lơi e ƀòn gô digơlăn tơngsơ̆t roh du pơnah păy kon-mơnùs. 16Khà cro lĭñ hao aseh la bea-rhieng tơlăk; Ăñ sŏng kơnău lơ̆gay khà ƀòn gô tîrơ̆. 17Gừn nhòng jơno e sơđah lai, ăñ sŏng tơmpơl lơ̆gay aseh gư̆m tơmpôl cro hao cŭngsî gô gư̆ptî dô — dî cù ao tơmbàk dơda brồng-rhăp, gư̆m dà pơ̆t-dư̆m tơliê trồ, î dà rmơ̆t gư̆ptî sieu dê. Găl lơ̆gay aseh dô gừn gư̆ptî găl klîh-phơ̆m, bơh kơndẵư gô khôm sơlôh oềs, phô̆ gư̆m sieu. 18Du pơnah păy kon-mơnùs kŏng tơngsơ̆t sơ̆t bơh anẵu păy-lăm jơno rŭng-rai dô, bơh oềs, phô̆, gư̆m sieu khôm tơlôh bơh kơndẵư gô. 19Bơh gơnoăr-pran tơmpôl aseh dê la nhòng kơndẵư ƀòn gô gư̆m anẵu tieng ƀòn gô, bơh tieng ƀòn gô gư̆ptî beh dî găl, gư̆m bơh rơ̆ ƀòn gô lơh jê-sồt lơ̆gay cro. 20Pơnah hôm wăl kon-mơnùs dê, la tơmpôl cro hôm dahrăư kŏng tơngsơ̆t sơ̆t bơh lơ̆gay jơno rŭng-rai dô, sŏng ơ̆ tơcao mbư̆ng glài bơh lơ̆gay bră lơh bơh tê mơ̆n dê, lơi ma ƀòn gô rơp ơ̆ duh-khoai cà-ràk băl î lơ̆gay rồp-ràk lơh î màh, priè, kong, lô̆ gư̆m sî, la lơ̆gay jơno ơ̆ digơlăn tơmpơl, hala ơ̆ kơnău dî, hala ơ̆-rgê swà. 21Ƀòn gô kŭng ơ̆ tơcao mbư̆ng glài bơh lơ̆gay glài tơngsơ̆t cro, hôi gru, rês-àr bơnan, hala kơntô̆ng-kơño mơ̆n dê.