Tơs Sơđah Jơno Ndăp 10

1Pơnjăt bơh gư̆n, ăñ tơmpơl du hôi cro gơndrơh pran-kơdăng nde bơh cŭngsî trồ jư, gô treh nơ̆m să du khô̆k tô̆, î bơlăngkăng cŭngsî găl gô, măt cro gơndrơh gư̆n gư̆ptî măttơnge, jư̆ng gô cro gơndrơh gư̆n gừn gư̆ptî jrŏng oềs, 2gừn ndăng iyà nơ̆m tê gô du păng sră bôt êt sŏng pẵư tơlôh. Cro gơndrơh gư̆n jă jư̆ng ma mơ̆n nơ̆m dàlîng, hôm jư̆ng eo cŭngsî mamằ, 3sŏng gư̆n dreo dơng du dẵư gư̆ptî klîh-phơ̆m ơhùm-ngrư̆m. Tơm tô̆ cro gơndrơh gư̆n dreo dơng, gừn poh-lăm jơno kơ̆ntàs tơnàs ndrăm-ndròm băl î jơno tơs ƀòn gô dê. 4Tơm tô̆ poh-lăm jơno kơ̆ntàs tơnàs tơs tơlôh, ăñ sơmơn cêh wăl, gừn ăñ kơnău du jơno tơs bơh trồ, tơs lah: “Tăp ƀăng-kì cĕ lơ̆gay jơno găy bơh poh-lăm jơno kơ̆ntàs tơnàs sŏng tơs, gư̆n-jîng bư̆ng cêh wăl gô.” 5Sŏng gư̆n cro gơndrơh, mà ăñ tơmpơl ñă cŭngsî dàlîng î nơ̆m mamằ, yŏk tê ma mơ̆n cŭngsî trồ 6gừn sràt-să bơh sơnăn Bơtao jîng trôh dî miek miek, ơ̆lơ̆ ơ̆lŭi, la Bơtao sŏng mon bơjîng trồ băl î lơ̆gay jơno cŭngsî trồ, ù băl î lơ̆gay jơno nơ̆m ù, gư̆m dàlîng băl î lơ̆gay jơno nơ̆m dàlîng, lah: “Rơp ơ̆ hôm ăm cang ƀăt te ơ̆h. 7Mơya nơ̆m lơ̆gay nge tom dẵư tơs cro gơndrơh dơ̆ poh, tơm tô̆ cro gơndrơh gư̆n mơñ ôh kơmbòt, gừn jơno ndăp-ndơ Yang Tơm Trồ dê păl tơlôh iyŏ ngăn, jăt gư̆ptî jơno Kơnràñ sŏng tơs tơnggư̆t jơno sơhờp-sờhơn gư̆n ma dê̆-gơna Kơnràñ la lơ̆gay cro gơnoăr-hwơr.” 8Sŏng gư̆n dẵư mà ăñ kơnău bơh trồ tơs te î ăñ, lah: “Swà cĕ, dưñ sră bôt êt sŏng pẵư tơlôh nơ̆m tê cro gơndrơh ndăng ăm ñă cŭngsî dàlîng î nơ̆m mamằ.” 9Bơh gư̆n la ăñ trôh î cro gơndrơh gư̆n, tơs î cro gơndrơh gư̆n dờp ma ăñ sră bôt êt. Cro gơndrơh gư̆n tơs î ăñ: “Dưñ iyà cĕ î sa gô cĕ, sŏng gư̆n gô rơp lơh klô̆ng mê jîng bơtăng, mơya nơ̆m kơndẵư mê gôjîng lơnguơ̆t gư̆ptî dà lơwăy.” 10Ăñ dưñ iyà sră bôt êt bơh tê cro gơndrơh î sa gô, gô ăm nhòng kơndẵư ăñ lơnguơ̆t gư̆ptî dà lơwăy, mà tơm tô̆ ăñ sŏng sa gô, klô̆ng ăñ gôjîng bơtăng. 11Sŏng gư̆n khăi dẵư tơs î ăñ: “Mê păl tơs hwơr du dơ̆ te bơh khăi lang bol, khăi lơgơ, lơ̆gay jơno tơs, gư̆m cro bơtao.”