Tơs Sơđah Jơno Ndăp 7

1Ma-ngkơi bră gư̆n, ăñ tơmpơl puôn hê cro gơndrơh ñă ăm puôn đah joñ ple-ù, kơ̆p bơkhê puôn lơngkòt cal ple-ù dê lơi cal ơ̆ khôm nơ̆m ple-ù, hala nơ̆m dàlîng hala nơ̆m sî nha găy. 2Sŏng gư̆n ăñ tơmpơl du hôi cro gơndrơh nde swà tơlôh trôh bơh đah măttơnge tơlôh, ndăng iyà ƀăng-kì Yang Tơm Trồ jîng miek dê. Gô dơng dẵư hôi puôn hê cro gơndrơh, la cro gơndrơh mà gơnoăr sŏng dî e ma ƀòn gô lơi lơh bờk ple-ù î dàlîng, 3lah: “Bư̆ng lơh bờk ple-ù, hala dàlîng, hala sî nha, trôh dî jơ ƀòn hî sŏng digơlăn tăp ƀăng-kì lơ̆gay dê̆-gơna Yang Tơm Trồ ƀòn hî dê nơ̆m cŭngsî klieng ƀòn gô dê.” 4Ăñ kơnău khà cro dî tăp ƀăng-kì la du-rhieng puôn-jư̆t puôn rbô, rơ̆ la tơmpôl cro dî tăp ƀăng-kì bơh anẵu lơ̆gay nŏk-noi kon so Israel:

5bơh nŏk-noi Juđa, jư̆t-bea rbô hê cro sŏng dî tăp ƀăng-kì;

bơh nŏk-noi Ruƀen, jư̆t-bea rbô;

bơh nŏk-noi Gat, jư̆t-bea rbô,

6bơh nŏk-noi Aser, jư̆t-bea rbô;

bơh nŏk-noi Neptali, jư̆t-bea rbô;

bơh nŏk-noi Manase, jư̆t-bea rbô;

7bơh nŏk-noi Simeôn, jư̆t-bea rbô;

bơh nŏk-noi Lebi, jư̆t-bea rbô;

bơh nŏk-noi Issaka, jư̆t-bea rbô;

8bơh nŏk-noi Saƀulôn, jư̆t-bea rbô;

bơh nŏk-noi Jôsep, jư̆t-bea rbô;

bơh nŏk-noi Ƀenjamin, jư̆t-bea rbô hê cro sŏng dî tăp ƀăng-kì.

9Ma-ngkơi lơ̆gay bră gư̆n, ăñ lăng nê̆, gừn tò, du tơmpôl cro khăi ngăn mà ơ̆ cro găy digơlăn yà dî tơmpôl khăi gư̆n, trôh bơh nơ̆m kơp lơgơ, kơp nŏk-noi, kơp lang bol, gư̆m lơ̆gay kơp jơno tơs, ndăng ăm ñă mađàp sơban î mađàp Belàt Kon, tơm tô̆ dî cù ao yơ bẵu, gư̆m kơp mbơlong sî gol nơ̆m tê ƀòn gô, 10sŏng gư̆n ƀòn gô dreo dơng dẵư, lah: “Jơno dŏng-klàs gôtrê ma Yang Tơm Trồ ƀòn mơ̆n, Bơtao ndăng nggui cŭngsî sơban, gư̆m gôtrê ma Belàt Kon!”

11Bơh gư̆n la lơ̆gay cro gơndrơh ndăng ñă ăm tĕdơ sơban băl î lơ̆gay cro kwăng kra gư̆m puôn-lăm jơno wîn jîng, lơ̆gay cun măt tơmbĭc să mơ̆n nteàh sơđàp sơban mà duh-khoai Yang Tơm Trồ, 12tơs lah:

“Amen! Jơno jong-rơ, gơklŏ, jăk-sai, ưnngai, kingam, gơnăp-gơnoăr, băl î jơno pran-kơdăng gôtrê ma Yang Tơm Trồ ƀòn mơ̆n trôh dî miek miek, ơ̆lơ̆ ơ̆lŭi! Amen!”

13Sŏng gư̆n du hôi nơ̆m lơ̆gay cro kwăng kra pẵư dẵư lùp ăñ, lah: “Lơ̆gay cro cù ao yơ bẵu năy — ƀòn gô la măt cro, gư̆m ƀòn gô bơh sơgăy trôh?” 14Ăñ tơs î ông: “Ơ yang ăñ, kơnràñ gư̆t lờt.” Sŏng gư̆n, ông gư̆n tơs î ăñ: “Dô la tơmpôl cro sŏng trôh bơh Jơno Rŭng-Rai Dơng, ƀòn gô pîh sŏng ao yơ mơ̆n, gư̆m lơh ƀòn gô jîng bẵu nơ̆m mham Belàt Kon.

15Tài bơh jơno dô, ƀòn gô dî ăm sơđàp sơban Yang Tơm Trồ,

tơmăng tơnge duh-khoai Kơnràñ nhòng hîh duh-khoai Kơnràñ.

Gư̆m Bơtao nggui cŭngsî sơban rơp drăng kơjang ăm cŭngsî ƀòn gô.

16Ƀòn gô rơp ơ̆ hôm jơgloh te, kŭng rơp ơ̆ hôm tơhiê te.

Măttơnge hala kơp jơno dôh tơal găy,

rơp ơ̆ dơ̆ găy hwơ su ƀòn gô.

17Tài bơh Belàt Kon, Bơtao ăm nhòng sơban, rơp lăng jư ƀòn gô,

Kơnràñ rơp tề-bơlăm ƀòn gô trôh nơ̆m sơdieng dà jơno jîng,

gư̆m Yang Tơm Trồ rơp jut tơsoh lơ̆ kơp dà măt bơh sơmăt ƀòn gô.”