Tơs Sơđah Jơno Ndăp 6

1Sŏng gư̆n ăñ lăng nê̆ tơm tô̆ Belàt Kon pẵư du-lăm nơ̆m poh-lăm tăp ƀăng-kì, gừn ăñ kơnău du-lăm nơ̆m puôn-lăm jơno wîn jîng tơs gư̆ptî jơno ndrăm tơnàs, lah: “Trôh cĕ!” 2Bơh gư̆n la, ăñ lăng nê̆ gừn tò, du-lăm aseh bẵu! Cro hao cŭng aseh gư̆n dî du ƀĕ sơna à, gư̆m du-lăm sơgơn-bơtao dî e ma gô, sŏng gư̆n cro gư̆n tơlôh swà gư̆ptî cro pha-lĭn lơi pha-lĭn.

3Tơm tô̆ Belàt Kon pẵư tăp ƀăng-kì dơ̆ bea, ăñ kơnău jơno wîn jîng dơ̆ bea tơs: “Trôh cĕ!” 4Bơh gư̆n la du-lăm aseh nde tơlôh — să gô brông gư̆ptî oềs. Gôtrê ma cro hao cŭngsî aseh dô gừn sŏng dî e ma gô gơnoăr tă iyà jơno lơngăp-lơnge nơ̆m ple-ù, lơi lơ̆gay cro rơp tơngsơ̆t găp, gư̆m du ƀĕ pàs-đao dơng ngăn sŏng dî dờp ma cro gư̆n.

5Tơm tô̆ Belàt Kon pẵư tăp ƀăng-kì dơ̆ păy, ăñ kơnău jơno wîn jîng dơ̆ păy tơs: “Trôh cĕ!” Bơh gư̆n la ăñ lăng nê̆ gừn tò, du-lăm aseh uñ, gư̆m cro hao cŭng aseh dô dî du-lăm dơnău kì nơ̆m tê gô. 6Sŏng gư̆n ăñ kơnău gư̆ptî tom jơno tơs ăm nơ̆m nhòng puôn-lăm jơno wîn jîng, lah: “Du dơnău kôi-mi î du-dơñe; păy dơnău kôi môh î du-dơñe. Gừn bư̆ng lơh roh-rùi mơñà î tơnơm.”

7Tơm tô̆ Belàt Kon pẵư tăp ƀăng-kì dơ̆ puôn, ăñ kơnău jơno wîn jîng dơ̆ puôn tơs: “Trôh cĕ!” 8Bơh gư̆n la ăñ lăng nê̆ gừn tò, du-lăm aseh pàl. Cro hao cŭng aseh dô, sơnăn gô la Jơno Sơ̆t, gư̆m lơgơ lang-ƀùc swà jăt ma-ngkơi gô. Gơnoăr ăm nơ̆m gô du pơnah puôn ple-ù sŏng dî e ma gô, lơi tơngsơ̆t roh î pàs-đao, jơgloh-dơng, kòp jê, gư̆m bơh lơ̆gay jơno jañ mơsăk nơ̆m ple-ù.

9Tơm tô̆ Belàt Kon pẵư tăp ƀăng-kì dơ̆ prăm, ăñ tơmpơl nteàh kaƀang duh-khoai hwîng-soan tơmpôl cro sŏng kŏng tơngsơ̆t tài bơh jơno Yang Tơm Trồ dê gư̆m bơh jơno lơh cư̆ng ma ƀòn gô prăp ăn. 10Ƀòn gô du nùs băl dreo dơng lah: “Khoai Bơtao Tơm Ăt-bồ, Bơtao sang-goh î tơpăt-ngăn, trôh dî jơ găy mà Kơnràñ hôm dahrăư cahrña gư̆m kla wăl bơh mham ƀòn kon dê bơh tơmpôl cro hôm jîng nơ̆m ple-ù?” 11Sŏng gư̆n kơp cro nơ̆m ƀòn gô dî dờp e du blah ao yơ bẵu, gừn ƀòn gô dî pơđơ lah ƀòn gô păl ăm cang dư̆ng-iè jŏ te trôh dî jơ tăl khà cro bơyô lơh bră băl ƀòn gô dê gư̆m oh mi rôh lŏ ƀòn gô dê, la tơmpôl cro mơn kŏng tơngsơ̆t kŭng gư̆ptî ƀòn gô.

12Tơm tô̆ Belàt Kon pẵư tăp ƀăng-kì dơ̆ pro, ăñ lăng nê̆, gừn tom du jơno wăñ-lơnggơh ù dơng ngăn, sŏng gư̆n măttơnge sơlôh gôjîng ñô̆ng kơnăm gư̆ptî ao bơtơi ket bơh î sơnẵu, hôm wêl tĕdơ mătkhe gừn sơlôh gôjîng gư̆ptî mham, 13gư̆m lơ̆gay sơmăñ cŭngsî trồ duh nơ̆m ù, gư̆ptî sî ƀăl ru ple bơda gô dê tơm tô̆ cal rbơ̆t rơnggô. 14Dăp trồ ha-ău thơ̆t gư̆ptî du păng sră kŏng bôt wăl, gư̆m lơ̆gay yồ grồi băl î bôt bơlao păl kŏng lơboh mande bơh anẵu gô dê. 15Sŏng gư̆n lơ̆gay bơtao nơ̆m ple-ù băl î lơ̆gay cro kwăng dơng, lơ̆gay cro ăt-bồ tơmpôl lĭñ, tơmpôl kơnhơ̆p-mơ̆nda, tơmpôl gơnoăr-pran, gư̆m kơp cro dê̆ băl î cro khăt-gơboh, ƀòn gô pôn să mơ̆n nơ̆m trôm lô̆ gòp gư̆m ăm nhòng lơ̆gay khô̆k lô̆ nơ̆m kơp yồ grồi; 16ƀòn gô tơs î lơ̆gay yồ grồi gư̆m lơ̆gay khô̆k lô̆: “Duh nteàh cĕ cŭngsî ƀòn hî gư̆m pôn-ndăp ƀòn hî klàs bơh sơ măt Bơtao nggui cŭngsî sơban gư̆m klàs bơh sơ jơno tơcao dơng Belàt Kon dê, 17bơh nge jơno tơcao dơng lơ̆gay Bơtao gư̆n sŏng trôh, gừn cro găy digơlăn kŏng dơi?”