Tơs Sơđah Jơno Ndăp 5

1Sŏng gư̆n ăñ tơmpơl nơ̆m tê ma Bơtao nggui cŭngsî sơban du păng sră bôt sŏng dî cêh đah ngglăm î đah makin, dî tăp bơh poh-lăm ƀăng-kì. 2Ăñ kŭng tơmpơl du hôi cro gơndrơh pran-kơdăng dơng dẵư tơs lah: “Cro găy dî păl pẵư sră bôt gư̆m doh lơ̆gay tăp ƀăng-kì gô dê?” 3Ơ̆ tom cro găy cŭngsî trồ hala nteàh ù, hala nteàh ù digơlăn pẵư sră bôt hala lăng nơ̆m gô. 4Bơh gư̆n ăñ ñim lơngŏ-lơngañ bơh ơ̆ cro găy dî swì lăng la dî păl lơi pẵư sră bôt hala đŏk gô. 5Sŏng gư̆n du hôi nhòng lơ̆gay cro kwăng kra tơs î ăñ: “Bư̆ng ñim. Lăng năy! Klîh-phơ̆m, Bơtao tơlôh bơh nŏk-noi Juđa, Tơm Reah Dabit dê, Kơnràñ sŏng pha-lĭn lơi pẵư dî sră bôt băl î poh-lăm tăp ƀăng-kì gô dê.” 6Gừn nơ̆m nhòng sơban băl î puôn-lăm jơno wîn jîng, gư̆m nơ̆m nhòng tơmpôl kwăng kra, ăñ tơmpơl Belàt Kon ndăng ñă, gư̆ptî sŏng kŏng tơngsơ̆t, dî poh-lăm ngkăy î poh-lăm gơ-măt, rơ̆ la poh hwîng Yang Tơm Trồ dê dî pơđơ swà lam lơ̆ ple-ù. 7Kơnràñ trôh gừn dưñ iyà sră bôt bơh tê ma Bơtao nggui cŭngsî sơban. 8Tơm tô̆ Kơnràñ sŏng dưñ iyà sră bôt, puôn-lăm jơno wîn jîng î bea-jư̆t puôn hê cro kwăng kra tơmbĭc să nteàh sơđàp măt Belàt Kon, kơp cro dî du-lăm kơñi pĕ gư̆m du-lăm wan lơh î màh ăn bîng kơlhô ƀôhơ̆, rơ̆ la lơ̆gay jơno hôi-dăn lơ̆gay cro sang-goh dê. 9Ƀòn gô đas-sờ du jơno đas-sờ mhăy, lah:

“Kơnràñ dî păl dưñ iyà sră bôt

gư̆m pẵư lơ̆gay tăp ƀăng-kì gô dê.

Bơh Kơnràñ sŏng kŏng tơngsơ̆t gư̆m bơh mham mơ̆n, Kơnràñ tăc trê ma Yang Tơm Trồ

tơmpôl cro gôtrê kơp nŏk-noi, jơno tơs, lang bol gư̆m dà lơgơ.

10Kơnràñ sŏng lơh ƀòn gô gôjîng du lơgơ gư̆m lơ̆gay cro gơnoăr ăn jơno duh-khoai Yang Tơm Trồ ƀòn mơ̆n,

gừn ƀòn gô rơp ăt-bồ nơ̆m ple-ù.”

11Sŏng gư̆n ăñ lăng tơmpơl gư̆m kơnău khăi dẵư cro gơndrơh tĕdơ sơban băl î lơ̆gay jơno wîn jîng gư̆m lơ̆gay cro kwăng kra, mà tơgom lơ̆gay khà ƀòn gô la nhẵư rhieng-rbô nhẵư tơlăk tơmal, 12du nùs băl tơs dơng lah:

“Belàt Kon sŏng kŏng tơngsơ̆t, ngăn la dî păl lơi dưñ iyà gơnăp-gơnoăr, kơnhơ̆p-mơ̆nda, jăk-sai, gơnoăr-pran, kingam, gơklŏ, gư̆m jong-rơ.”

13Sŏng gư̆n ăñ kơnău kơp jơno bơjîng cŭngsî trồ, nơ̆m ù, ngglăm nteàh ù, nơ̆m dàlîng, gư̆m lơ̆gay jơno nhòng ƀòn gô, tơs lah:

“Jong-rơ Bơtao nggui cŭngsî sơban băl î Belàt Kon dî jong-rơ, kingam, gơklŏ, gư̆m gơnoăr-pran trôh dî miek miek, ơ̆lơ̆ ơ̆lŭi.”

14Puôn-lăm jơno wîn jîng tơs: “Amen!” hôm lơ̆gay cro kwăng kra tơmbĭc să mơ̆n nteàh gư̆m duh-khoai.