Tơs Sơđah Jơno Ndăp 4

1Ma-ngkơi lơ̆gay bră gư̆n, ăñ lăng tơmpơl gừn tò, du-lăm mpông dî pẵư hwơng cŭngsî trồ, sŏng gư̆n dẵư dơ̆ sơm mà ăñ sŏng kơnău tơs î ăñ gư̆ptî dẵư kơ̆ntàs kơ̆mbwòc, tơs lah: “Swà cĕ madô, sŏng gư̆n Ăñ rơp sơđah ma kon tơmpơl lơ̆gay bră păl tơngtrôh ma-ngkơi lơ̆gay bră dô.” 2Ƀăt jơ rơ̆ jai, ăñ ăm nơ̆m Yang Hwîng, gừn lăng năy, du-lăm sơban dî ăn cŭngsî trồ! Gừn tom du Bơtao ndăng nggui cŭngsî sơban. 3Bơtao nggui cŭngsî sơban tơmpơl hel gư̆ptî lô̆ mang gơcrà gư̆m lô̆ mang brông, î du bơlăngkăng tĕdơ sơban tơmpơl hel gư̆ptî lô̆ mang tơliê khơk. 4Tĕdơ sơban tom bea-jư̆t puôn-lăm sơban, î nggui cŭngsî sơban la bea-jư̆t puôn hê cro kwăng kra ƀòn gô cù ao yơ bẵu, băl î sơgơn lơh î màh tơngđoa nơ̆m găl ƀòn gô. 5Bơh nơ̆m sơban tơlôh lơ̆gay jơno ang gơcrà lơp, jơno kơ̆ntàs ndrăm-ndròm, băl î jơno ndrăm tơnàs. Poh ƀĕ đeng oềs ndăng hit mađàp sơban, rơ̆ la poh hwîng Yang Tơm Trồ dê. 6Mađàp sơban gư̆ptî du-lăm dàlîng krơh, gôlơh gư̆ptî krơh ang-hơt, hôm nơ̆m nhòng sơban gư̆m tĕdơ sơban la puôn-lăm jơno wîn jîng, bîng gơ-măt, đah mađàp gư̆m đah ma-ngkơi. 7Jơno wîn jîng dơ̆ sơm gư̆ptî klîh-phơ̆m, jơno wîn jîng dơ̆ bea gư̆ptî lamău kon, jơno wîn jîng dơ̆ păy dî rồp măt gư̆ptî măt kon-mơnùs, gư̆m jơno wîn jîng dơ̆ puôn gư̆ptî klang-bŭng ndăng pơ. 8Puôn-lăm jơno wîn jîng, kơp du-lăm nơ̆m khà gô kơp du-lăm du-lăm dî pro-lăm mơnơ tĕdơ, nơ̆m nhòng dî bîng gơ-măt, gư̆m tơnge î tơmăng, ƀòn gô ơ̆ bơdê-bơdơ̆h tơm tô̆ tơs lah:

“Sang-goh, sang-goh, sang-goh la Yang, Yang Tơm Trồ Gơnoăr Dơng lam lơ̆,

Bơtao sŏng tom, hôm tom gư̆m ndăng trôh.”

9Dilah jơ găy lơ̆gay jơno wîn e jơno gơklŏ, jơno kingam, î jơno ưnngai ma Bơtao nggui nơ̆m sơban, rơ̆ la Bơtao jîng trôh dî miek miek, ơ̆lơ̆ ơ̆lŭi 10gừn bea-jư̆t puôn hê cro kwăng kra tơmbĭc să sơđàp măt Bơtao nggui nơ̆m sơban, gư̆m duh-khoai Bơtao jîng trôh dî miek miek, ơ̆lơ̆ ơ̆lŭi, gừn ƀòn gô ăn sơgơn-bơtao mơ̆n nteàh sơđàp sơban, tơs lah:

11“Khoai Yang î Yang Tơm Trồ ƀòn hî,

Yang ngăn dî păl dưñ-lăñ jơno gơklŏ, jơno kingam, î gơnăp-gơnoăr,

bơh Kơnràñ sŏng mon bơjîng lơ̆gay jơno;

kŭng bơh nùs-kơñ Kơnràñ mà gô dî hôm miek gư̆m dî mon bơjîng.”