Tơs Sơđah Jơno Ndăp 3:20

1Cêh cĕ ma cro gơndrơh hîh jư̆m goh nơ̆m Sardơ lah:

‘Bơtao dî poh-lăm hwîng Yang Tơm Trồ dê î poh-lăm sơmăñ tơs tîdô lah: “Ăñ gư̆t lơ̆gay bră lơh kon dê. Kon dî sơnăn la jîng, mà kon gừn sơ̆t. 2Kah-rngăl cĕ gư̆m lơh kơđư̆ng-bơkhê lơ̆gay jơno găy hôm wăl, rơ̆ la lơ̆gay jơno mơñ sơ̆t, bơh Ăñ hôm dahrăư tơmpơl lơ̆gay bră kon dê dî lơh wêl-tăl sơđàp măt Yang Tơm Trồ Ăñ jê. 3Gư̆n-jîng, kah sơdơ wăl cĕ lơ̆gay jơno kon sŏng dưñ-lăñ î sŏng kơnău. Don jăt cĕ jơno gư̆n mà tơcao mbư̆ng glài cĕ. Hôm dilah kon ơ̆ kah-rngăl, Ăñ rơp trôh gư̆ptî cro kơntô̆ng, gừn kon nê̆-năn rơp ơ̆ gư̆t jơ găy Ăñ trôh tơmdră wăl kon. 4Mơya, kon dî nhẵư hê cro nơ̆m Sardơ, la tơmpôl cro sŏng ơ̆ lơh sơmơ̆-sơmĭñ ôi-ao mơ̆n, gừn ƀòn gô rơp swà băl î Ăñ nơ̆m ôi-ao bẵu, bơh ƀòn gô dî păl. 5Cro pha-lĭn rơp dî tơngcù ao yơ bẵu gư̆p tîgư̆n, Ăñ rơp ơ̆ dơ̆ găy jut sơnăn cro gư̆n bơh sơ Sră Jơno Jîng, gừn Ăñ rơp hôi sơnăn cro gư̆n sơđàp măt Bàp Ăñ gư̆m sơđàp măt lơ̆gay cro gơndrơh Kơnràñ. 6Cro găy dî tua, iet cĕ jơno Yang Hwîng tơs î lơ̆gay hîh jư̆m goh.”’

7Cêh cĕ ma cro gơndrơh hîh jư̆m goh nơ̆m Philadelphi lah:

‘Bơtao sang-goh, Bơtao tơpăt-ngăn,

Bơtao iyà cơ-khwà mpông Dabit dê,

Bơtao pẵư gừn ơ̆ cro găy kơl dî,

î kơl gừn ơ̆ cro găy pẵư dî,

tơs tîdô lah:

8“Ăñ gư̆t lơ̆gay bră kon dê (Lăng tò, Ăñ sŏng ăn sơđàp măt kon du-lăm mpông dơng pẵư mà ơ̆ cro găy tăl pran kơl dî gô), bơh kon dî dư̆ng-iè gơnoăr pran, mà kon sŏng prăp jư jơno Ăñ, gừn ơ̆ khan lơi căư sơnăn Ăñ. 9Lăng dô, Ăñ rơp lơh tơmpôl cro gôtrê ma tơmpôl cà Satan, la tơmpôl cro sơnăn dêh mơ̆n la cro Juđa mà ơ̆-iyŏ tîgư̆n, tơblơ̆ wăl, ƀòn gô nư̆ng la ndăng tơs blăc — Lăng năy, Ăñ rơp lơh ƀòn gô amơh lơi ƀòn gô rơp trôh gư̆m cun gơtăng mađàp jư̆ng kon, gừn ƀòn gô digơlăn gư̆t lah Ăñ kơñ-kơloh kon. 10Bơh kon sŏng prăp jư kơđư̆ng jơno lơh nên Ăñ dê, gư̆n-jîng Ăñ kŭng rơp lăng jư kon klàs bơh sơ tô̆ jơ jơno lòng sơòs-gleh mơñ trôh nơ̆m lơ̆gay dunya, lơi lòng lơ̆gay cro găy ndăng jîng nơ̆m ù-teàh. 11Ăñ ndăng trôh dubă khơñ ngăn. Jư kơđư̆ng cĕ jơno kon dî lơi ơ̆ cro găy digơlăn tă dưñ dî sơgơn-bơtao kon dê. 12Cro găy pha-lĭn, Ăñ rơp lơh cro gư̆n gôjîng jrŏng nơ̆m hîh Yang Tơm Trồ Ăñ jê. Cro gư̆n rơp ơ̆ dơ̆ jơ găy tơlôh bơh sơgư̆n te, î Ăñ rơp cêh cŭngsî gô sơnăn Yang Tơm Trồ Ăñ jê, sơnăn ƀòn dơng Yang Tơm Trồ Ăñ jê (Jerusalem mhăy bơh cŭngsî jư nteàh, bơh anẵu Yang Tơm Trồ Ăñ jê), gư̆m sơnăn mhăy Ăñ jê. 13Cro găy dî tua, iet cĕ jơno Yang Hwîng tơs î lơ̆gay hîh jư̆m goh.”’

14Cêh cĕ ma cro gơndrơh hîh jư̆m goh nơ̆m Laodise lah:

‘Bơtao Amen, Cro Lơh Cư̆ng păl don-tơpăt î tơpăt-ngăn, sơntơm bơhsơm nơ̆m jơno mon bơjîng Yang Tơm Trồ dê tơs tîdô lah: 15“Ăñ gư̆t lơ̆gay bră lơh kon dê, lah kon ơ̆ lơngềt, kŭng ơ̆ dôh. Kơp kơñ kon lơngềt tơlôh jîng lơngềt hala dôh tơlôh jîng dôh! 16Tîgư̆n, bơh mê răm răm — ơ̆ dôh kŭng ơ̆ lơngềt — gư̆n-jîng Ăñ mơñ rêh kon tơlôh bơh kơndẵư Ăñ. 17Bơh kon tơs lah: "Ăñ kơnhơ̆p, ăñ sŏng gôjîng tơngkah-tơngkăñ, gừn ăñ ơ̆ cang jơno găy te," tîrơ̆ mà kon ơ̆ gư̆t lah mơ̆n sơòs-sơngeh ngăn, kơloh ngăn, kơsòt-rƀah, ñô̆ng măt gư̆m ăm săkôh lơi sơlơ̆ñ. 18Ăñ tơngkah kon tăc cĕ màh bơh anẵu Ăñ sŏng dî rèa nơ̆m oềs lơi kon gôjîng kơnhơ̆p-mơ̆nda, tăc ao yơ bẵu lơi kon cù nơ̆m să mà ơ̆ hôm tơmpơl jơno ƀasmăt bơh jơno ăm săkôh lơi sơlơ̆ñ mơ̆n dê, gừn tăc sơnăm trŏ măt lơi bŏng măt kon dê lơi e kon dî lăng tơmpơl. 19Dilah tơmpôl cro găy mà Ăñ kơñ-kơloh, gừn Ăñ ƀoah-đas gư̆m lơh-glài tơmal. Gư̆n-jîng, ngăc-ngăr cĕ î tơcao mbư̆ng glài cĕ. 20Lăng năy, Ăñ ñă sî mpông mà toh. Dilah cro găy kơnău jơno Ăñ mà pẵư mpông, gừn Ăñ rơp mơ̆t băl î cro gư̆n, nggui sa băl î gô, gư̆m gô băl î Ăñ. 21Cro găy pha-lĭn, Ăñ rơp e ma cro gư̆n nggui băl î Ăñ cŭngsî sơban Ăñ, gư̆ptî Ăñ kŭng sŏng pha-lĭn gư̆m nggui băl î Bàp Ăñ cŭngsî sơban Kơnràñ. 22Cro găy dî tua, iet cĕ jơno Yang Hwîng tơs î lơ̆gay hîh jư̆m goh.”’”