Tơs Sơđah Jơno Ndăp 2

1Cêh cĕ ma cro gơndrơh hîh jư̆m goh anẵu Ephesô lah:

‘Bơtao iyà poh-lăm sơmăñ nơ̆m tê ma Kơnràñ, la Bơtao lơbà swà ăm nhòng poh-lăm jư̆ng đeng lơh î màh, tơs tîdô lah: 2“Ăñ gư̆t lơ̆gay bră lơh kon dê, bră sơòs-gleh, băl î jơno kŏng-ăt ăt-ăl kon dê; Ăñ kŭng gư̆t lah kon ơ̆ kơñ kŏng-ăt cro mơsăk, kon sŏng lòng lơ̆gay cro sơnăn dêh gô la cro gơnoăr bơtău dơng, gừn ƀòn gô ơ̆-iyŏ la gư̆ptî rơ̆, gừn kon sŏng tơmpơl nê̆ ƀòn gô la cro blăc blơ̆; 3kon kŭng dî jơno kŏng-ăt, î sŏng kŏng gleh-glăr tài bơh sơnăn Ăñ mà ơ̆ sơòs-sơngeh. 4Mơya, Ăñ dî jơno ƀoah-đas kon, rơ̆ la kon sŏng lơi căư jơno kơñ-kơloh bơh sơm mơ̆n dê. 5Gư̆n-jîng, kah sơdơ wăl cĕ mơ̆n sŏng gơhuc ngềt bơh sơgăy, tơcao mbư̆ng glài cĕ î lơh lơ̆gay bră bơh sơm. Hôm dilah ơ̆, Ăñ rơp trôh î kon gừn Ăñ rơp tă lơi căư jư̆ng đeng kon dê bơh sơ anẵu gô — dilah kon ơ̆ tơcao mbư̆ng glài. 6Mơya kon tom jơno dô, rơ̆ la kon ngañ lơ̆gay bră lơh tơmpôl Nikôla, la lơ̆gay bră mà Ăñ kŭng ngañ. 7Cro găy dî tua, păl iet cĕ jơno Yang Hwîng tơs băl î lơ̆gay hîh jư̆m goh. Gôtrê î cro pha-lĭn, Ăñ rơp e ma cro gư̆n sa ple tơlôh bơh sî jơno jîng ăm nơ̆m Paradi Yang Tơm Trồ dê.”’

8Cêh cĕ ma cro gơndrơh hîh jư̆m goh dê anẵu Simirnơ lah:

‘Bơtao bơh sơm î dơ̆t-lŭi, Bơtao sŏng kŏng sơ̆t gư̆m sŏng jîng wăl, Kơnràñ tơs tîdô lah: 9“Ăñ gư̆t jơno rŭng-rai kon dê î jơno kơsòt-rƀah anẵu kon (mơya, tơblơ̆ wăl, kon ndăng kơnhơ̆p-mơ̆nda), băl î jơno yă blăc trôh bơh lơ̆gay cro sơnăn dêh să ƀòn gô la cro Juđa mà ƀòn gô ơ̆-iyŏ, mơya la tơmpôl jơnư̆m cà Satan dê. 10Bư̆ng kơ̆mbrit jơno găy gôtrê î lơ̆gay jơno mà kon mơñ păl kŏng. Lăng năy, càrak mơñ sơbê̆ du pơnah cro nơ̆m ƀòn kon tơmơ̆t nơ̆m hîh jam lơi ma ƀòn kon kŏng têl lòng, gừn ƀòn kon rơp kŏng jơno rŭng-rai nơ̆m jư̆t nge. Don-tơpăt cĕ trôh dî sơ̆t, sŏng gư̆n Ăñ rơp e ma kon sơgơn-bơtao jơno jîng dê. 11Cro găy dî tua, iet cĕ jơno Yang Hwîng tơs băl î lơ̆gay hîh jư̆m goh. Cro pha-lĭn rơp ơ̆ dơ̆ găy kŏng jê-sồt bơh jơno sơ̆t dơ̆ bea.”’

12Cêh cĕ ma cro gơndrơh hîh jư̆m goh nơ̆m anẵu Pergăm lah:

‘Bơtao dî pàs-đao sồt bea đah măt tơs tîdô lah: 13“Ăñ gư̆t anẵu kon jîng, anẵu gư̆n la sơban cà Satan dê, mà kon sŏng kơ̆p kơđư̆ng bơkhê sơnăn Ăñ, gừn ơ̆ lơi căư jơno don anẵu Ăñ, ƀăt băl nơ̆m lơ̆gay nge Antipa dê, cro lơh cư̆ng-tang Ăñ jê, cro don-tơpăt î Ăñ, la cro kŏng tơngsơ̆t sơđàp măt ƀòn kon, anẵu mà cà Satan lơh anẵu ăm. 14Mơya, Ăñ tom nhẵư jơno ƀoah-đas kon: rơ̆ la nơ̆m anẵu gư̆n, kon dî nhẵư hê cro lơh-jăt jơno bơtău Ƀalaam dê, la cro sŏng bơtău Ƀalak ăn ne-lô̆ lơh sơmăm jư̆ng sơđàp măt kon so Israel lơi sa jơno ăn duh-khoai ma rồp-ràk gư̆m lơh jơno rês-àr bơnan. 15Jăt dubă jơno gư̆ptî rơ̆, kon kŭng tom nhẵư hê cro lơh-jăt jơno bơtău tơmpôl Nikôla dê. 16Gư̆n-jîng, păl tơcao mbư̆ng glài cĕ! Hôm dilah ơ̆, Ăñ rơp trôh khơñ ngăn î kon, gừn rơp tơmlơh tơmdră î ƀòn gô î pàs-đao bơh nơ̆m dẵư Ăñ. 17Cro găy dî tua, iet cĕ jơno Yang Hwîng tơs î lơ̆gay hîh jư̆m goh. Gôtrê î cro pha-lĭn, Ăñ rơp e ma gô mana ămpôn ndăp, gừn Ăñ rơp e ma gô du-ne lô̆ bẵu mà nơ̆m ne-lô̆ gư̆n, du sơnăn mhăy sŏng dî cêh, la sơnăn mà ơ̆ cro găy gư̆t rlo cro dưñ dî gô.”’

18Cêh cĕ ma cro gơndrơh hîh jư̆m goh anẵu Thiatirơ lah:

‘Kon Yang Tơm Trồ, Bơtao dî gơ-măt gư̆ptî lơm-piet oềs gư̆m jư̆ng gư̆ptî kong ang gơcrà, tơs tîdô lah: 19“Ăñ gư̆t lơ̆gay bră lơh kon dê, jơno kơñ-kơloh, jơno don, jơno duh bră, băl î nùs niem lơhơn kơđư̆ng-bơkhê kon dê, î lơ̆gay bră lơh kon dê ma-ngkơi dô khăi rlo te lơ̆gay bră dơ̆ lai. 20Mơya Ăñ dî jơno dô ƀoah-đas kon, rơ̆ la kon ndăng tơmpẵu mò Jesaƀel, cro sơnăn dêh gô la cro-ua gơnoăr-hwơr, gừn mò ƀăn mơntău băl î blăc pơlum lơ̆gay dê̆ gơna Ăñ jê tìs-glài rês-àr bơnan gư̆m sa jơno ăn duh-khoai ma rồp-ràk. 21Ăñ sŏng e ma mò tô̆ jơ lơi mò digơlăn tơcao mbư̆ng glài, mà mò ơ̆ kơñ tơcao mbư̆ng glài bơh jơno rês-àr bơnan mơ̆n dê. 22Lăng cĕ dô! Ăñ rơp mbư̆ng mò bĭc jê-kơkua nơ̆m cơnờng, gừn tơmpôl cro tìs-glài rês-àr bơnan băl î mò nơ̆m jơno rŭng-rai dơng, dilah ƀòn gô ơ̆ tơcao mbư̆ng glài bơh lơ̆gay bră lơh mò dê. 23Ăñ rơp pơng lơh lơ̆gay kon so mò bơh î jơno sơ̆t, sŏng gư̆n lơ̆gay hîh jư̆m goh rơp gư̆t lah Ăñ la Bơtao lăng swì ngglăm nùs-nhơ̆m, gừn Ăñ rơp e ma kơp cro nơ̆m ƀòn kon jăt lơ̆gay bră lơh ƀòn kon dê. 24Mơya Ăñ tơs î ƀòn kon, la khà hôm wăl nơ̆m tơmpôl cro anẵu Thiatirơ, dilah cro găy ơ̆ lơh jăt jơno bơtău gư̆n, rơ̆ la tơmpôl cro ơ̆ gư̆t lơ̆gay bră jrô ndăp cà Satan dê, gư̆ptî du pơnah cro sơnăn tîrơ̆, lah: "Ăñ ơ̆ tơng-añ ơnong kơjơ̆ găy nde nơ̆m ƀòn kon. 25Mơya, păl prăp jư kơđư̆ng lơ̆gay jơno găy mơ̆n dî trôh dî jơ găy Ăñ trôh."

26Gôtrê ma cro pha-lĭn gừn kư̆ prăp jư lơ̆gay bră lơh Ăñ jê trôh dî lŭi-dơ̆t, gừn Ăñ rơp e ma cro rơ̆ gơnoăr bơlăm-găl nơ̆m kơp lơgơ.

27"Cro rơ̆ rơp ăt-bồ ƀòn gô bơh du ƀĕ mư̆ng lòs,

gư̆ptî lơ̆gay kơlŏ pŏk ù lơ-ieng kŏng pơng bơcah-lề,"

28kŭng gư̆ptî Ăñ sŏng dưñ-lăñ dî gơnoăr bơh Bàp Ăñ, gừn Ăñ rơp e ma cro gư̆n sơmăñ kah ang. 29Cro găy dî tua, iet cĕ jơno Yang Hwîng tơs î lơ̆gay hîh jư̆m goh.”’