Tơs Sơđah Jơno Ndăp 1

1Dô la jơno e sơđah Yang Dŏng-Klàs Jesu dê mà Yang Tơm Trồ sŏng dờp e ma Kơnràñ lơi sơđah ma lơ̆gay dê̆-gơna Kơnràñ lơ̆gay jơno găy păl tơngtrôh dubă khơñ ngăn. Kơnràñ sŏng rang sơđah, ma-ngkơi tơm jơ kơnơm bơh cro gơndrơh Kơnràñ dê pơyoa trôh ma Jăng, dê̆-gơna Kơnràñ dê, 2la cro sŏng lơh cư̆ng bơh jơno Yang Tơm Trồ dê î jơno lơh cư̆ng Yang Dŏng Klàs Jesu dê, rơ̆ kơp jơno gô sŏng tơmpơl nê̆. 3Lơnge ma cro đŏk î cro iet lơ̆gay jơno sră cro gơnoăr-hwơr dô, mơya kŭng prăp jư lơ̆gay jơno găy sŏng dî cêh nhòng gư̆n, bơh tô̆ jơ mơñ en lờt.

4Jăng pơyoa ma poh-lăm hîh jư̆m goh anẵu lơgơ Asi: Dăn oh mi rôh lŏ dî jơno sơmah î jơno lơngăp-lơnge bơh Bơtao hôm tom, sŏng tom, î ndăng trôh, kŭng gư̆ptî bơh poh-lăm hwîng sơđàp sơban Kơnràñ dê, 5gư̆m bơh Yang Dŏng-Klàs Jesu, la “Cro lơh cư̆ng tơpăt-ngăn”, “Bơtao jîng sơm ngăn” bơh anẵu sơ̆t, gư̆m “Bơtao ăt-bồ lơ̆gay bơtao nơ̆m ple-ù”. Gôtrê ma Bơtao kơñ-kơloh ƀòn mơ̆n, sŏng dŏng-tă ƀòn mơ̆n klàs bơh sơ tồi-glài ƀòn mơ̆n kơnơm bơh mham Kơnràñ dê, 6gừn Kơnràñ sŏng lơh ƀòn mơ̆n jîng du lơgơ, gôjîng lơ̆gay cro gơnoăr ăn jơno duh-khoai ma Yang Tơm Trồ, Bàp Kơnràñ dê — dăn jơno gơcrà î gơnăp-gơnoăr gôtrê ma Kơnràñ trôh dî miek miek. Amen.

7“Lăng năy, Kơnràñ trôh băl î lơ̆gay tơnăng tô̆,”

gừn “kơp gơ-măt rơp lăng tơmpơl Kơnràñ,

băl î tơmpôl cro sŏng wơ̆t Kơnràñ,”

sŏng gư̆n kơp nŏk-noi nơ̆m ple-ù “rơp ñim alô̆ng tài bơh Kơnràñ.”

Ngăn tîrơ̆, Amen.

8Yang la Yang Tơm Trồ tơs lah: “Ăñ la Alpha î Ômega, Bơtao hôm tom, sŏng tom, î ndăng trôh, Bơtao Gơnoăr Dơng Ăt Bồ Rlo Lơ̆.”

9Ăñ la Jăng — cro oh mi rôh lŏ gư̆m la cro tơmpà băl î oh mi rôh lŏ bơh jơno rŭng-rai, dà lơgơ, î jơno ăt-ăl kŏng-ăt nơ̆m Yang Jesu — ăñ ăm nơ̆m bôt bơlao dî sơnăn la Pătmôs tài bơh jơno Yang Tơm Trồ dê î jơno lơh cư̆ng Yang Jesu dê. 10Nơ̆m nge Yang dê, ăñ ăm nơ̆m Yang Hwîng, gừn ăñ kơnău đah ma-ngkơi ăñ du jơno tơs dơng gư̆ptî dẵư kơ̆ntàs kơmbòt, 11lah: “Păl cêh cĕ nơ̆m sră bôt lơ̆gay jơno găy kon tơmpơl gừn pơyoa trôh ma poh-lăm hîh jư̆m goh — ma Ephesô, Simirnơ, Pergăm, Thiatirơ, Sardơ, Philadelphi, î Laodise.” 12Ăñ blăc wăl lơi lăng jơno ờs ndăng tơs î ăñ, sŏng gư̆n tơm tô̆ blăc wăl, ăñ lăng tơmpơl poh-lăm jư̆ng đeng lơh î màh, 13î ăm nhòng lơ̆gay jư̆ng đeng tom Bơtao gư̆ptî Kon-Mơnùs, cù ao yơ trôh tî jư̆ng, băl î du-dăng săy bơ̆t lơh î màh dî kăt tơpăt dơda nùs. 14Găl î sŏ Kơnràñ dê gừn bẵu sơntu gư̆ptî sơnẵu belàt, bẵu gư̆ptî pliê, măt Kơnràñ gừn gư̆ptî lơm-piet oềs. 15Jư̆ng Kơnràñ sơntu gư̆ptî kong ang gơcrà, gư̆ptî sŏng dî rèa jŏ nơ̆m nhă oềs, dẵư Kơnràñ gư̆ptî dẵư khăi rbong dà, 16nơ̆m tê ma Kơnràñ dê tom poh-lăm sơmăñ, î du ƀĕ pàs-đao sồt bea đah măt tơlôh bơh kơndẵư Kơnràñ, hôm măt Kơnràñ gừn gư̆ptî măt tơnge ang gơcrà tơm tô̆ gô bơang-ang lơ̆gay. 17Tơm tô̆ ăñ tơmpơl Kơnràñ, ăñ blă duh nteàh anẵu jư̆ng Kơnràñ gư̆ptî cro sơ̆t, sŏng gư̆n Kơnràñ ăn tê ma Kơnràñ nơ̆m ăñ, tơs lah: “Bư̆ng kơ̆mbrit. Ăñ la Bơtao bơh sơm î dơ̆t-lŭi, 18kŭng la Bơtao jîng miek; Ăñ sŏng kŏng sơ̆t, gừn lăng dô, Ăñ jîng trôh dî miek miek ơ̆ lôi, Ăñ dî gơnoăr iyà cơ-khwà jơno sơ̆t dê î lơgơ lang-ƀùc. 19Gư̆n-jîng, cêh wăl cĕ lơ̆gay jơno kon sŏng tơmpơl, lơ̆gay bră hôm tom î lơ̆gay jơno găy mơñ tơngtrôh ma-ngkơi lơ̆gay bră dô. 20Dô la jơno ndăp-ndơ poh-lăm sơmăñ dê gư̆m kon sŏng tơmpơl nơ̆m tê ma Ăñ dê, băl î poh-lăm jư̆ng oềs đeng màh: Poh-lăm sơmăñ la lơ̆gay cro gơndrơh poh-lăm hîh jư̆m goh dê, î poh-lăm jư̆ng oềs đeng la poh-lăm hîh jư̆m goh.