Juđe 1

1Juđe, dê̆-gơna Yang Dŏng-Klàs Jesu î oh klo Jakơ, pơyoa ma lơ̆gay cro dî hôi-săc, la tơmpôl cro dî kơñ-kơloh ngăn nhòng Yang Tơm Trồ la Bàp, î dî prăp jư nhòng Yang Dŏng-Klàs Jesu: 2Dăn jơno kơloh-kơlài rngoh-rngăc gư̆m jơno lơngăp-lơnge băl î jơno kơñ-kơloh dî bơtăl khăi rlo te e ma oh mi rôh lŏ.

3Ơ oh mi rôh lŏ kơloh ngăn, nhòng tơm tô̆ ăñ lơ̆ pran grat ayua lơi cêh e ma oh mi rôh lŏ bơh jơno dŏng-klàs băl ƀòn mơ̆n dê, ăñ tơmpơl jơno păl cêh lơi kôh-kồt tơngkah oh mi rôh lŏ e ma oh mi rôh lŏ ngăc-ngăr tơmlơh bơh jơno don, sŏng dî phi jao e ma lang bol sang-goh du dơ̆ tăl lờt. 4Bơh tom du pơnah cro sŏng rlèt mơ̆t nhòng tơmpôl oh mi rôh lŏ, tơmpôl cro bơh yo sŏng kŏng lơh nên e ma jơno lơh nên glài dô, tơmpôl cro ơ̆ don-duh bơgăl jơno sơmah Yang Tơm Trồ ƀòn mơ̆n dê tơlôh jơno gơlîng-gơlang. Ơ̆ gư̆t đăl Bơtao-Tơm Ăt-bồ tom nư̆ng du hôi î Yang ƀòn mơ̆n la Yang Dŏng-Klàs Jesu.

5Jơ dô ăñ kơñ tơngkah oh mi rôh lŏ, bulah oh mi rôh lŏ gư̆t nê̆-năn jơno dô, lah Yang Jesu sŏng dŏng-klàs du lang bol tơlôh klàs bơh lơgơ Ejiptơ, mơya ma-ngkơi gư̆n Kơnràñ tơngroh lơ̆gay cro ơ̆ don. 6Ƀăt băl î lơ̆gay cro gơndrơh la lơ̆gay cro ơ̆ prăp jư bơkhê gơnoăr bră dêh ƀòn gô dê, mà lơi căư wăl anẵu ăm ăn lơi e ma ƀòn gô, gư̆n-jîng Yang Tơm Trồ sŏng căp jư ƀòn gô nhòng săy-srê̆ hôm miek miek, nơ̆m anẵu kơnăm ñô̆ng, lơi kŏng cahrña nhòng nge dơng mang, 7gư̆ptî Sôđôm î Gômôrơ băl î lơ̆gay ƀòn dơng tĕdơ ƀòn gư̆n, sŏng tơmơ̆t mơ̆n nơ̆m jơno rês-àr bơnan gôlơh gư̆ptî rai-jîng ƀòn gô dê, cơplŏk jăt lơ̆gay jơno ham-kơñ tơblơ̆ î ờs dờm să-jăn. Ƀòn gô kŏng cro tơs lơh sơntu bơh lơ̆gay cro kŏng lơh-glài jam nơ̆m oềs miek miek. 8Mơya, kŭng gư̆p tîgư̆n, tơmpôl cro kơlôi-sơnư̆ng dô ơ̆ dî nư̆ng lơh sơmơ̆-sơmĭñ să-jăn mơ̆n, mà ƀòn gô kŭng lăng ơ̆săp lơ̆gay bơtao gơnăp-gơnoăr, mơya hôm tơs wăl jơno sràt-bơtăng lơ̆gay bơtao jơno ang gơklŏ. 9Tơblơ̆ wăl, cro gơndrơh dơng la Micel, nơ̆m jơ tơmlơh-tơmpìt î cà-ràk, bơyê bơh ƀùc Môise dê, cro gơndrơh gư̆n ơ̆ khơ̆n tơs tơlôh jơno cahrña lơi tơmdră wăl gô î nùs sràt-bơtăng. Ala sơgư̆n, cro gơndrơh tơs lah: “Dăn Yang ƀoah-đas mê.” 10Mơya tơmpôl gô sràt-bơtăng bulah kơp jơno găy ƀòn gô ơ̆ wơng dî, hôm lơ̆gay jơno ƀòn gô wơng bơh nùs tua gư̆ptî jơno puôn ƀĕ jư̆ng ơ̆ dî tơngoh-kơlôi, rơ̆ la lơ̆gay jơno tơngroh ƀòn gô. 11Sơòs-sơngeh ma ƀòn gô! Bơh ƀòn gô swà mơ̆t jăt gung Kain dê, bơh jơno công nha gô sŏng tơmơ̆t nơ̆m jơno tìs kơ̆mprah Ƀalaam dê, gừn ƀòn gô sŏng kŏng tơngroh thơ̆t nhòng jơno tơmdră Kôre dê. 12Tơmpôl ƀòn dô la tơmpôl cro nơ̆m lơ̆gay jơno bơjư̆m-sa kơñ-kơloh oh mi rôh lŏ dê, gư̆ptî têl lô̆ trăm, ñô sa khăt-gơboh î oh mi rôh lŏ dubă ơ̆ gư̆t ƀasmôh ƀasmăt, nư̆ng gư̆t kơlôi rong dêh sătan mơ̆n; tơmpôl ƀòn gư̆n la lơ̆gay tô̆ ơ̆ tom mih, kŏng cah pôh swà, la lơ̆gay sî kơnnhe dôh ơ̆ tom ple, sŏng sơ̆t bea dơ̆, bơh kŏng bŭi tơm-rieh cŭngsî; 13la lơ̆gay jơno ndôl sơn-gàc kơ̆mbrit-kơ̆mbròt ngăn nơ̆m dàlîng nggua jîng kơmbôh ƀasmôh ƀasmăt; Ƀòn gô la lơ̆gay sơmăñ dà bô̆ lîng-lang, gừn jơno kơnăm ñô̆ng klư̆k sŏng ăn lơi miek miek e ma ƀòn gô. 14Pơnah nde, Enŏk, kon so rai dơ̆ poh tơs bơh Ađam, kŭng sŏng tơs hwơr lai bơh ƀòn dô, lah: “Lăng cĕ năy! Yang trôh î rbô rhieng cro sang-goh Kơnràñ dê, 15lơi lơh nên jơno cahrña gôtrê î kơp cro, lơi lơh-glài kơp du hôi bơh lơ̆gay bră lơh ơ̆ duh kơ̆mbrit ƀòn gô dê, rơ̆ la lơ̆gay jơno găy mà ƀòn gô sŏng lơh ơ̆ duh kơ̆mbrit, gư̆m bơh lơ̆gay jơno tơs gơlîng-gơlang mà tơmpôl cro tìs-glài ơ̆ duh kơ̆mbrit sŏng tơs tơmdră î Kơnràñ.” 16Ƀòn dô la tơmpôl cro rƀu, tơmpôl cro ƀoah-yoam, swà jăt lơ̆gay jơno ham-kơñ mơ̆n dê, î Yôi lơm-piet ƀòn gô tơs tơlôh lơ̆gay jơno tơngyeh să, pồ tơngyơng cro nde lơi lơh dî công nha dêh ma mơ̆n.

17Mơya ơ oh mi rôh lŏ, tơmpôl cro dî kơloh ngăn, sơdơ wăl cĕ lơ̆gay jơno dî tơs lai ƀua bơh lơ̆gay cro gơnoăr bơtău dơng Yang ƀòn mơ̆n dê, la Yang Dŏng-Klàs Jesu, 18lah ƀòn gô sŏng tơs î oh mi rôh lŏ lah: “Nhòng tô̆ tơnge lŭi-dơ̆t rơp tom tơmpôl cro tơngyŏ-tơnghiel swà jăt lơ̆gay jơno ham-kơñ dêh ơ̆ duh kơ̆mbrit să tơm mơ̆n dê.” 19Tơmpôl ƀòn dô la tơmpôl cro lơh tơmcơlah; jăt đah dunya, ơ̆ tom Yang Hwîng. 20Mơya ơ oh mi rôh lŏ, la tơmpôl cro dî kơloh ngăn, bơh î bră băt bơtao dêh nơ̆m jơno don sang-goh ngăn mơ̆n dê, e sơnăn Yang Hwîng Goh mà hôi-dăn, 21prăp jư cĕ sătan mơ̆n nhòng jơno kơñ-kơloh Yang Tơm Trồ dê, tơm tô̆ ăm cang jơno sơmah kơloh-kơlài Yang ƀòn mơ̆n dê, la Yang Dŏng-Klàs Jesu, trôh dî jơno jîng miek miek. 22Păl dî jơno niem-lơhơn băl î lơ̆gay cro ờs ping tơwêh-tơwăl, 23hôm tơmpôl cro năy, dŏng-tă cĕ, hoa ƀòn gô tơlôh klàs bơh sơ oềs; Păl kơloh ngăn lơ̆gay cro tò te tien gơs gư̆m băl î nùs kơ̆mbrit tơcao lơi căư du blah ao poăc-să tài bơh sŏng kŏng sơmơ̆-sơmĭñ.

24Dăn Bơtao dî gơnăp-gơnoăr jư lăng oh mi rôh lŏ klàs bơh sơ jơno sơmăm blă, gư̆m lơh oh mi rôh lŏ ñă kơđư̆ng nơ̆m jơno hơn-sờ nơ̆m sơđàp jơno gơklŏ kơnràñ dê, dubă ơ̆ têl sồt, 25dăn Yang Tơm Trồ nư̆ng du hôi, la Yang Dŏng-Klàs ƀòn mơ̆n dê, bơh Yang Dŏng-Klàs Jesu, Yang ƀòn mơ̆n, dî ang tơcrà, ryŭ-ryơ̆m gơnoăr-pran, gư̆m gơnăp-gơnoăr, bơh lai, jơ dô hôm trôh dî anẵu miek miek. Amen.