3 Jăng 1

1Cro kwăng kra pơyoa ma Gaius la cro mà ăñ kơñ-kơloh nơ̆m jơno tơpăt-ngăn.

2Ơ cro bơyô kơñ-kơloh, nơ̆m lơ̆gay jơno, ăñ hôi dăn ma mê dî bơtoah, tien gơs dî pơnah să-jăn pran-kơdăng gư̆ptî hwîng soan mê ndăng dî bơtoah. 3Bơh ăñ sơhờp-sờhơn ngăn tơm tô̆ lơ̆gay oh mi trôh î lơh cư̆ng jơno ngăn bơh mê, jăt gư̆ptî jơno mê hôm ndăng lơbà swà nơ̆m jơno tơpăt-ngăn. 4Ăñ ơ̆ tom jơno sơhờp găy dơng rlo lơ̆gay jơno dô, rơ̆ la ăñ digơlăn kơnău lah kon so mơ̆n dê ndăng lơbà swà nơ̆m jơno tơpăt-ngăn.

5Ơ cro bơyô kơñ-kơloh, mê ndăng lơh bră lơi kŭng don sŏng bulah mê lơh ma oh mi rôh lŏ hala lơh jơno ma cro năc crêh-crai, 6la tơmpôl cro sŏng lơh cư̆ng bơh jơno kơñ-kơloh mê dê sơđàp măt hîh jư̆m goh. Mê rơp lơh dubă niem ngăn tơm tô̆ lơboh ƀòn gô swà gung lơh dî păl î Yang Tơm Trồ, 7bơh ƀòn gô tơlôh swà bơh sơnăn gư̆n, tơm tô̆ ơ̆ dưñ-lăñ dî jơno găy bơh lang bol bơdih. 8Gư̆n-jîng ƀòn mơ̆n păl wă-rẵu tơmpôl cro tîgư̆n, lơi ƀòn mơ̆n sơlôh gôjîng tơmpôl cro lơh bră ma jơno tơpăt-ngăn.

9Ăñ sŏng cêh nhẵư jơno ma hîh jư̆m goh, mơya Diôtrep, cro kơñ ăt-bồ lơ̆gay cro, ơ̆ kơñ wă-rẵu ƀòn hî. 10Tài bơh jơno dô, dilah ăñ trôh, ăñ rơp kơhea lơ̆gay bră lơh ông gư̆n mà ông gư̆n ndăng lơh tơm tô̆ tơmdră ƀòn hî î lơ̆gay jơno tơs bờk-mơsăk. Mơya î lơ̆gay jơno gư̆n kŭng hôm dahrăư tăl, ông gư̆n kŭng ơ̆ wă-rẵu oh mi, mà ông gư̆n hôm cơkhă î tơmprơh tơlôh bơh hîh jư̆m goh lơ̆gay cro dî nùs wă-rẵu.

11Ơ cro bơyô kơñ-kơloh, bư̆ng tơngkơt lơh-jăt jơno bờk-mơsăk, mà păl tơngkơt lơh-jăt jơno niem. Cro găy lơh jơno niem gừn gôtrê ma Yang Tơm Trồ; hôm cro lơh bờk-mơsăk gừn hôm dahrăư dơ̆ găy tơmpơl Yang Tơm Trồ.

12Demetrius dî lơh cư̆ng niem bơh lơ̆gay cro gừn bơh nơ̆m jơno tơpăt-ngăn. Pơnah nde, ƀòn hî kŭng lơh cư̆ng te, gừn mê gư̆t lah jơno lơh cư̆ng ƀòn hî la ngăn.

13Ăñ dî khăi ngăn jơno lơi cêh ma mê, mà ăñ ơ̆ kơñ ngui dà mưk cêh gư̆m mư̆ng cêh lơi cêh ma mê. 14Mơya ăñ kơp kơñ tơmtom ơm mê, gừn ƀòn mơ̆n rơp răk-sa măt tơmtom măt. 15Dăn jơno lơnge ăm î mê. Lơ̆gay bơyô nơ̆m dô còp-să mê. Dăn pơyoa jơno còp-să lơ̆gay oh mi rôh lŏ nơ̆m gư̆n trôh kơp du hôi cro.