2 Jăng 1

1Cro kwang kra pơyoa ma tơmpôl mò la cro dî săc-rwơh băl î lơ̆gay kon mò dê, la tơmpôl cro mà ăñ kơñ-kơloh nơ̆m jơno tơpăt-ngăn — gừn ơ̆ dî nư̆ng du hôi ăñ, mơya lơ̆gay cro găy dî lăng gư̆t jơno tơpăt-ngăn kŭng tîgư̆n. 2Bơh jơno tơpăt-ngăn hôm ăm nơ̆m nhòng ƀòn mơ̆n gừn rơp ăm î ƀòn mơ̆n trôh dî miek miek. 3Jơno sơmah, nùs sơmah-kơloh, î jơno lơngăp-lơnge bơh Yang Tơm Trồ la bàp gư̆m bơh Yang Dŏng-Klàs Jesu, Kon Bàp dê, rơp ăm î ƀòn mơ̆n, nơ̆m jơno tơpăt-ngăn î jơno kơñ-kơloh.

4Ăñ sơhờp-sờhơn ngăn tài bơh ăñ tơmpơl du pơnah kon so mò dê lơbà swà nơ̆m jơno tơpăt-ngăn, gư̆ptî ƀòn mơ̆n dî dưñ-lăñ jơno pơđơ bơlăm bơh anẵu Bàp. 5Ơ mò, jơ dô ăñ răc-dăn mò — ơ̆-iyŏ gư̆ptî ăñ ndăng cêh ma mò du-lăm jơno pơđơ bơlăm mhăy, mà la jơno pơđơ bơlăm ƀòn mơ̆n sŏng dî bơh sơm lờt — lah ƀòn mơ̆n păl kơñ-kơloh băl ma găp. 6Gừn jơno kơñ-kơloh la tîdô, rơ̆ la ƀòn mơ̆n păl lơbà swà jăt lơ̆gay jơno pơđơ bơlăm Kơnràñ dê. Dô la jơno pơđơ bơlăm, gư̆ptî oh mi rôh lŏ sŏng kơnău bơh sơm lờt, rơ̆ la oh mi roh lŏ păl lơbà swà nơ̆m jơno kơñ-kơloh. 7Bơh khăi ngăn cro blăc-pơlum sŏng tơlôh nhòng dunya dô, la tơmpôl cro ơ̆ e bơh sơnăn Yang Dŏng-Klàs Jesu trôh nhòng poăc-să. Rơ̆ la cro blăc-pơlum î tơmdră Yang Dŏng-Klàs. 8Să tơm oh mi rôh lŏ păl kơhea cĕ lơi oh mi rôh lŏ ơ̆ lơh tơngroh lơ̆gay jơno mà ƀòn mơ̆n sŏng lơh sơòs-gleh, ala sơgư̆n oh mi rôh lŏ dưñ dî wêl-tăl phăn-ƀan. 9Cro găy swà ăm rơi gừn ơ̆ ăm nơ̆m nhòng jơno bơtău Yang Dŏng-Klàs dê gừn ơ̆ tom Yang Tơm Trồ. Hôm cro găy kư̆ ăm nơ̆m jơno bơtău, gừn cro rơ̆ dî băl î Bàp gư̆m Kon. 10Dilah cro găy trôh î oh mi rôh lŏ mà ơ̆ iyà băl jơno bơtău rơ̆, gừn bư̆ng wă-rẵu cro rơ̆ mơ̆t nơ̆m hîh gư̆m bư̆ng tơs î gô: Dăn còp-să. 11Bơh cro găy tơs î cro gư̆n: “Dăn còp-să”, la ngui băl nơ̆m pơnah lơ̆gay bră bờk-mơsăk gô dê.

12Bơh tom khăi ngăn jơno ăñ ơ̆ kơñ cêh ma oh mi rôh lŏ bơh î sră î mưk cêh. Mơya ăñ kơp kơñ swà trôh î oh mi rôh lŏ răk-sa măt tơmtom măt, lơi jơno sơhờp oh mi rôh lŏ dê dî wêl-tăl. 13Lơ̆gay kon ua mò dê dî săc-rwơh pơyoa jơno còp-să mò.