1 Jăng 5

1Dilah cro găy don lah Yang Jesu la Yang Dŏng-Klàs gừn dî tơlôh bơh Yang Tơm Trồ, dilah cro găy kơloh Bơtao sŏng bơda mơ̆n gừn kŭng kơloh cro sŏng dî bơda bơh Kơnràñ. 2Kơnơm bơh jơno dô, ƀòn mơ̆n gư̆t lah mơ̆n kơñ-kơloh kon so Yang Tơm Trồ la tơm tô̆ ƀòn mơ̆n kơñ-kơloh Yang Tơm Trồ î prăp jư lơ̆gay jơno pơđơ bơlăm Kơnràñ dê. 3Bơh dô la jơno kơñ-kơloh Yang Tơm Trồ, rơ̆ la ƀòn mơ̆n prăp jư lơ̆gay jơno pơđơ bơlăm Kơnràñ dê. Lơ̆gay jơno pơđơ bơlăm Kơnràñ dê ơ̆ iyŏ la kơjơ̆. 4Bơh dilah cro găy dî tơlôh bơh Yang Tơm Trồ gừn pha-lĭn rlo dunya. Gừn jơno pha-lĭn sŏng pha-lĭn rlo dunya rơ̆ la jơno don ƀòn mơ̆n dê. 5Mà cro găy la cro pha-lĭn rlo ma dunya, dilah ơ̆-iyŏ cro don lah Yang Jesu la Kon Yang Tơm Trồ. 6Rơ̆ la Bơtao sŏng trôh bơh dà î mham: Yang Dŏng-Klàs Jesu ơ̆ trôh bơh dà gời, mơya la bơh dà î mham. Gư̆m Yang Hwîng Goh la Bơtao lơh cư̆ng, bơh Yang Hwîng Goh la jơno sŏng ngăn. 7Gư̆n-jîng, tom păy jơno cư̆ng-tang: 8Yang Hwîng Goh băl î dà gư̆m mham; mà lơ̆gay păy-lăm sơđah bơh du-lăm jơno. 9Dilah ƀòn mơ̆n dưñ jơno lơh cư̆ng kon-mơnùs, gừn jơno lơh cư̆ng Yang Tơm Trồ dê hôm dơng rlo te. Bơh jơno lơh cư̆ng Yang Tơm Trồ la jơno mà Kơnràñ lơh cư̆ng ma Kon Kơnràñ. 10Cro găy don anẵu kon Yang Tơm Trồ gừn dî jơno lơh cư̆ng gư̆n nơ̆m cro rơ̆. Cro găy ơ̆ don Yang Tơm Trồ gừn e Kơnràñ la cro tơs blăc, bơh cro rơ̆ ơ̆ don anẵu jơno lơh cư̆ng mà Yang Tơm Trồ sŏng dờp ma Kon Kơnràñ dê. 11Gừn dô la jơno lơh cư̆ng, rơ̆ la Yang Tơm Trồ sŏng e ma ƀòn mơ̆n jơno jîng miek miek, î jơno jîng rơ̆ ăm nơ̆m Kon Kơnràñ. 12Cro găy dî Kon gừn dî jơno jîng. Cro găy ơ̆ dî Kon Yang Tơm Trồ gừn ơ̆ dî jơno jîng.

13Ăñ sŏng cêh nhẵư jơno dô ma oh mi rôh lŏ, la e ma tơmpôl cro don anẵu sơnăn Kon Yang Tơm Trồ, lơi oh mi rôh lŏ gư̆t lah mơ̆n dî jơno jîng miek miek. 14Hôm dô la jơno don nên-nôn mà ƀòn mơ̆n dî anẵu Kơnràñ, rơ̆ la dilah ƀòn mơ̆n hôi-dăn du-lăm jơno găy jăt nùs-kơñ Kơnràñ, gừn Kơnràñ iet ƀòn mơ̆n. 15Dilah ƀòn mơ̆n gư̆t lah Kơnràñ kơnău ƀòn mơ̆n, bulah ƀòn mơ̆n hôi-dăn jơno găy, gừn ƀòn mơ̆n gư̆t lah mơ̆n lăñ dî jơno hôi-dăn mà mơ̆n sŏng răc-dăn bơh Kơnràñ. 16Dilah cro găy tơmpơl oh mi rôh lŏ mơ̆n tìs du-lăm jơno ơ̆ păl sơ̆t, gừn cro rơ̆ rơp hôi-dăn, gừn Yang Tơm Trồ rơp e jơno jîng ma cro oh mi rôh lŏ năy, la cro tìs-glài ơ̆ dî păl trôh sơ̆t. Tom du-lăm glài dî păl trôh sơ̆t; ăñ ơ̆ tơs lah cro gư̆n păl hôi-dăn bơh tồi-glài rơ̆. 17Lơ̆gay jơno ơ̆ tơpăt-durư̆ng la tồi-glài, gừn tom glài ơ̆ dî păl trôh sơ̆t.

18Ƀòn mơ̆n gư̆t lah dilah cro găy sŏng dî tơlôh bơh Yang Tơm Trồ gừn ơ̆ tìs-glài, mơya Bơtao ờs bơda bơh Yang Tơm Trồ prăp jư cro rơ̆, î cà-ràk ơ̆ lơh bờk ƀòn gô dî. 19Ƀòn mơ̆n gư̆t lah mơ̆n gôtrê ma Yang Tơm Trồ, hôm lơ̆gay dunya ăm nteàh gơnoăr cà-ràk. 20Mơya ƀòn mơ̆n gư̆t lah Kon Yang Tơm Trồ sŏng trôh gư̆m e ma ƀòn mơ̆n jơno gư̆t wơng, lơi ƀòn mơ̆n digơlăn gư̆t đăl Bơtao Tơpăt-Ngăn. Gư̆m ƀòn mơ̆n ăm nơ̆m Bơtao Tơpăt-Ngăn, rơ̆ la nơ̆m nhòng Kon Kơnràñ — la Yang Dŏng-Klàs Jesu. Kon rơ̆ ngăn la Kon Yang Tơm Trồ, kŭng la jơno jîng miek miek. 21Ơ̆ ƀòn kon, păl jư să tơm mơ̆n bơh sơ rồp-ràk.