Tơs Sơđah Jơno Ndăp 19

1Ma-ngkơi lơ̆gay bră gư̆n, ăñ kơnău jơno tơs gôlơh gư̆ptî jơno tơs dơng du tơmpôl cro khăi ngăn cŭngsî trồ, lah:

“Haleluya!

Jơno dŏng-klàs, jơno gơklŏ gư̆m gơnăp-gơnoăr gôtrê ma Yang Tơm Trồ ƀòn mơ̆n.

2Bơh lơ̆gay jơno cahrña Kơnràñ dê la tơpăt-ngăn gư̆m tơpăt-durư̆ng,

bơh Kơnràñ sŏng cahrña cro-ua hrơh kliê rơ̆ la cro lơh ple-ù kŏng ôm-lề bơh jơno rês-àr bơnan gô dê.

Kơnràñ sŏng kla wăl ma mham lơ̆gay cro dê̆-gơna Kơnràñ dê bơh nơ̆m tê gô.”

3Sŏng gư̆n ƀòn gô tơs dơ̆ bea te, lah:

“Haleluya!

Phô̆ bơh anẵu gô kư̆ pơ cŭngsî trôh dî miek miek, ơ̆lơ̆ ơ̆lŭi.”

4Bea-jư̆t puôn hê cro kwăng kra gư̆m puôn-lăm jơno wîn jîng tơmbĭc să nteàh gư̆m duh-khoai Yang Tơm Trồ, Bơtao ndăng nggui cŭngsî sơban, lah:

“Amen. Haleluya!”

5Du jơno tơs bơh sơban tơs tơlôh, lah:

“Jong-rơ cĕ Yang Tơm Trồ ƀòn mơ̆n,

ơ jơh lơ̆gay cro dê̆-gơna Kơnràñ,

î tơmpôl cro duh kơ̆mbrit Kơnràñ,

cro êt băl î cro dơng!”

6Sŏng gư̆n ăñ kơnău jơno tơs gôlơh gư̆ptî jơno kơ̆ntàs tơmpôl cro khăi, gư̆ptî jơno kơ̆ntàs rbong dà khăi, gư̆m gư̆ptî jơno kơ̆ntàs tơnàs dơng, lah:

“Haleluya!

Bơh Yang la Yang Tơm Trồ ƀòn mơ̆n dê, rơ̆ Bơtao Gơnoăr Dơng Rlo Lơ̆gay, ăt-bồ.

7Ƀòn mơ̆n sơhờp-sờhơn cĕ, hưh hơh,

gư̆m ăn jơno gơklŏ ma Kơnràñ

bơh jơno tơmhòp Belàt Kon dê sŏng trôh,

gư̆m cro ƀan Kơnràñ dê sŏng rcăng mhơ̆ să sŏng lờt,

8jơno dî dờp ma gô rơ̆ la gô dî tơngcù ao bơh î bơtơi săy tơme lơbăn ang gơcrà sang-ngơt.”

(Bơh bơtơi săy tơme lơbăn la lơ̆gay bră tơpăt-durư̆ng lơ̆gay cro sang-goh dê).

9Sŏng gư̆n cro gơndrơh gư̆n tơs î ăñ: “Cêh cĕ: Lơnge ngăn ma tơmpôl cro dî hôi jà bơjư̆m-sa tơmhòp Belàt Kon.” Cro gơndrơh gư̆n kŭng tơs î ăñ: “Dô la lơ̆gay jơno tơpăt-ngăn Yang Tơm Trồ dê.” 10Ăñ tơmbĭc să anẵu jư̆ng cro gơndrơh gư̆n lơi duh-khoai gô, mà gô tơs î ăñ: “Bư̆ng lơh tîgư̆n! Ăñ la cro kŭng lơh bră dê̆-gơna băl gư̆ptî mê î lơ̆gay oh mi mê dê, la tơmpôl cro tom jơno lơh cư̆ng Yang Jesu dê. Duh-khoai cĕ Yang Tơm Trồ, bơh jơno lơh cư̆ng Yang Jesu dê la Yang hwîng lơh rngoh-rngăc cro gơnoăr-hwơr dê.”

11Sŏng gư̆n ăñ tơmpơl trồ gô pẵư, gừn lăng tò, du-lăm aseh bẵu, Bơtao hao cŭngsî aseh dî sơnăn la don-tơpăt î tơpăt-ngăn, Kơnràñ cahrña î tơmlơh jăt jơno tơpăt-durư̆ng. 12Gơ-măt Kơnràñ gư̆ptî lơm-piet oềs, khăi sơgơn-bơtao cŭng găl Kơnràñ, tom du sơnăn dî cêh mà ơ̆ cro găy gư̆t dî rlo du hôi Kơnràñ gời. 13Kơnràñ cù du blah ao yơ iyrù nơ̆m mham, gư̆m sơnăn Kơnràñ dî sơnăn la Jơno tơs Yang Tơm Trồ dê. 14Lơ̆gay tơmpôl lîng cŭngsî trồ swà jăt Kơnràñ hao aseh bẵu, cù ao bơtơi săy tơme lơbăn bẵu î lơhiê. 15Du pĕ pàs-đao sồt swà tơlôh bơh nơ̆m kơndẵư Kơnràñ, lơi î gô Kơnràñ tơmlơh lơ̆gay lơgơ, sŏng gư̆n Kơnràñ rơp ăt-bồ ƀòn gô bơh î mư̆ng-jra lòs, gư̆m Kơnràñ jă mpăl păt alăk prăp ăn jơno tơcao dơng phưng phưng Yang Tơm Trồ dê, Bơtao Gơnoăr Dơng Rlo Lơ̆gay. 16Kơnràñ dî du sơnăn dî cêh nơ̆m ao yơ gư̆m nơ̆m mơnô Kơnràñ: “Bơtao lơ̆gay bơtao dê gư̆m Yang lơ̆gay yang dê.”

17Sŏng gư̆n ăñ tơmpơl du hôi cro gơndrơh ñă ăm nơ̆m măttơnge, gừn cro gơndrơh gư̆n dreo dơng î du jơno tơs dơng, tơs î jơh lơ̆gay kơp noi sêm pơ nơ̆m cŭngsî trồ, lah: “Trôh madô hă, bơjư̆m wăl cĕ ma jơno bơjư̆m-sa dơng Yang Tơm Trồ dê, 18lơi sa rlău lơ̆gay bơtao, rlău lơ̆gay cro kwăng dơng, rlău cro pran-kơdăng, rlău tơmpôl aseh î lĭñ hao cŭngsî gô, băl î rlău lơ̆gay cro dê, gư̆m cro khăt-gơboh î cro dê̆-gơna, băl cro êt gư̆m cro dơng.”

19Pơnjăt bơh gư̆n, ăñ tơmpơl jơno puôn jư̆ng gư̆m lơ̆gay bơtao nơ̆m ple-ù băl î tơmpôl lĭñ ƀòn gô dê dî jơnư̆m wăl lơi rcăng tơmlơh î Bơtao hao cŭngsî aseh gư̆m î tơmpôl lĭñ Kơnràñ dê. 20Sŏng gư̆n jơno puôn jư̆ng kŏng kơ̆p, băl î gô la cro gơnoăr-hwơr mablăc, cro lơh sơđàp măt gô lơ̆gay têl phadêh, kơnơm bơh gư̆n mà gô pơlum tơmpôl cro sŏng dưñ têl jơno puôn jư̆ng dê gư̆m tơmpôl cro duh-khoai rồp gô. Lơ̆ bea hê tơm tô̆ ndăng jîng kŏng mbư̆ng nơ̆m brông oềs dî hit rhô băl î sieu. 21Khà hôm wăl nhòng ƀòn gô gừn kŏng tơngsơ̆t bơh pàs-đao Bơtao hao cŭngsî aseh dê, rơ̆ la pàs-đao tơlôh bơh kơndẵư Kơnràñ, gư̆m lơ̆gay noi sêm dî hơm lề bơh rlău ƀòn gô.