Tơs Sơđah Jơno Ndăp 18

1Ma-ngkơi lơ̆gay bră gư̆n ăñ tơmpơl du hôi cro gơndrơh nde jư bơh cŭngsî trồ, dî gơnăp-gơnoăr dơng ngăn, gừn ple-ù dî bơang-ang bơh jơno gơklŏ cro gơndrơh gư̆n. 2Gư̆m jơno tơs bîng gơnoăr-pran, cro gơndrơh gư̆n dreo dơng, lah:

“Ƀaƀilôn dơng tơlah-rlăm lờt!

Gô sŏng sơlôh gôjîng anẵu ăm lơ̆gay cà dê,

anẵu ăm-pan lơ̆gay hwîng sơmơ̆-sơmĭñ dê,

gư̆m anẵu ăm-pan kơp sêm sơmơ̆-sơmĭñ dê, păl sơmơ̆ kơkiê ngăn.

3Bơh lơ̆gay kơp lơgơ sŏng mañơ̆l-lơmbẵy bơh alăk jơno tơcao dơng bơh jơno rês-àr bơnan gô dê,

lơ̆gay bơtao nơ̆m ù-teàh sŏng tìs-glài rês-àr bơnan î gô,

tơmpôl cro kă-brău nơ̆m ù-teàh sŏng kơnhơ̆p-mơ̆nda kơnơm bơh jơno pran-kơdăng bơh rai-jîng gơlîng-gơlang gô dê.”

4Sŏng gư̆n ăñ kơnău du jơno nde bơh cŭng trồ tơs lah:

“Ơ lang bol ăñ, tơlôh cĕ bơh sơ gô,

lơi ƀòn kon ơ̆ du băt băl nơ̆m lơ̆gay tồi-glài gô dê,

gư̆m lơi ƀòn kon ơ̆ păl kŏng anẵu jơno rŭng-rai gô dê.

5Bơh glài gô dê sŏng dăp bîng ngơ̆k trôh cŭngsî trồ,

gư̆m Yang Tơm Trồ sŏng sơdơ wăl lơ̆gay jơno tồi-glài bờk-mơsăk gô dê.

6Lơh cĕ gô jơno gô kŭng gư̆ptî gô sŏng lơh rơ̆,

gư̆m kla cĕ wăl bea dơ̆ rlo, khăi bea dơ̆ rlo jăt lơ̆gay bră lơh gô dê;

nhòng cơdŏ ma gô sŏng pơiyuă, pơiyuă cĕ ma gô khăi bea dơ̆ rlo.

7Gô sŏng tơngyơng dêh să mơ̆n gư̆m lơh gơlîng-gơlang dư̆ng găy,

gừn lơh cĕ ma gô jơno sơòs-gleh î moat-jrum dư̆ng rơ̆.

Bơh gô tơs nhòng nùs gô, lah:

‘Ăñ nggui cŭng sơban gư̆ptî du hôi bơtao ua,

ăñ ơ̆-iyŏ la ua mơ̆ndro,

gư̆m ăñ rơp ơ̆ tom dơ̆ găy tơmpơl jơno ñim-rèa.’

8Kŭng tài bơh tîgư̆n, nơ̆m du-nge, lơ̆gay jơno rŭng-rai gô dê rơp trôh hal-apàl:

sơ̆t-roh, ñim-rèa, jơgloh rƀah,

gư̆m gô rơp kŏng su tơngroh bơh î oềs,

bơh Yang la Yang Tơm Trồ, Bơtao cahrña gô, la Bơtao gơnăp-gơnoăr.”

9Lơ̆gay bơtao nơ̆m ù-teàh, la tơmpôl cro tìs-glài rês-àr bơnan gư̆m jîng gơlîng-gơlang î gô, rơp ñim-rèa gư̆m alô̆ng bơh gô, dơ̆ ƀòn gô tơmpơl khô̆k phô̆ oềs sa gô, 10Tơm tô̆ ñă bơh ma-wĭc tài bơh kơ̆mbrit jơno sơòs-gleh gô dê, tơs lah:

“Sơòs-gleh ngăn, sơòs-gleh ngăn ma ƀòn dơng,

Ƀaƀilôn, ƀòn dơng bîng gơnoăr-pran!

Bơh nhòng du jơ, jơno lơh-glài mê sŏng trôh.”

11Sŏng gư̆n lơ̆gay cro kă-brău nơ̆m ple-ù ñim-rèa î ƀoah pơle bơh gô, tài bơh ơ̆ hôm cro găy tăc jini-jơno ƀòn gô te — 12jini-jơno lơh bơh màh, priè, lô̆ mang, lô̆ acŏng mang, bơtơi săy tơme lơbăn, bơtơi bơcăñ, bơtơi rơla, bơtơi brông, gư̆m lơ̆gay kơp sî kơlhô, lơ̆gay jini-jơno lơh bơh bla ròs, lơ̆gay jini-jơno lơh bơh khô̆k sî mang, lơh bơh kong, lơh bơh lòs, lơh bơh lô̆ sơna, 13băl î sî hơ, jơno cĕ bièp, kơ̆mbui kơlhô, cai-trô̆, kơlhô, alăk tơnơm, mơñà, kơ̆mpong bum lơmhên, kôi-mi, rơ-pu lamău, belàt bĕy, aseh gư̆m rơdeh, băl î cro dê̆ gư̆m hwîng-soan cro. 14Ple kơnnhe koh e dê, jơno kơp kơñ hwîng-soan dê, sŏng pleh wĭc bơh e. Lơ̆gay jơno bơkah î sơhờp-sờhơn sŏng roh thơ̆t bơh e, gừn gô rơp ơ̆ tom dî jôi tơmpơl te. 15Lơ̆gay cro kă-brău lơ̆gay kơp jơno dô dê, la tơmpôl cro sŏng sơlôh gôjîng kơnhơ̆p-mơ̆nda, rơp ñă ăm bơh ma wĭc bơh gô, ñim-rèa gư̆m ƀoah pơle tài bơh kơ̆mbrit jơno sơòs-gleh gô dê, 16lah:

“Sơòs-gleh ngăn, sơòs-gleh ngăn ma ƀòn dơng

bơh lai cù bơtơi lơbăn lơmhên,

bơtơi bơcăñ, bơtơi brông,

gư̆m dî mhơ̆ bŏng bơh î màh,

lô̆ mang, lô̆ acŏng mang,

17bơh nhòng du jơ, jơno kơnhơ̆p-mơ̆nda màng-ryŭ tîgư̆n kŏng roh-rùi.”

Lơ̆gay cro ăt-bồ ahẵu, lơ̆gay cro năc swà ahẵu trôh anẵu găy gư̆n, kơp cro lơh bră nhòng ahẵu, băl î lơ̆gay cro kă-brău nơ̆m dàlîng kŭng ñă ăm bơh ma wĭc, 18gừn dreo dơng tơm tô̆ lăng tơmpơl phô̆ hwơ su gô dê, lah: “Tom ƀòn dơng găy gư̆ptî ƀòn dơng gư̆n?” 19Ƀòn gô sêh buh cŭng găl gô, gừn dreo dơng, ñim-rèa, pơle, lah:

“Sơòs-gleh ngăn, sơòs-gleh ngăn ƀòn dơng dơng,

anẵu mà lơ̆gay cro nơ̆m gô dî ahẵu nơ̆m dàlîng sŏng sơlôh gôjîng kơnhơ̆p-mơ̆nda kơnơm bơh jini-jơno gô,

bơh nơ̆m du jơ, gô kŏng tơngroh lề làt.”

20(“Ơ trồ, sơhờp-sờhơn cĕ bơh gô,

băl î lơ̆gay cro sang-goh, cro gơnoăr bơtău dơng î cro gơnoăr-hwơr,

bơh Yang Tơm Trồ sŏng tơs tơnggư̆t jơno yă yom oh mi dê gôtrê bơh gô!”)

21Sŏng gư̆n du hôi cro gơndrơh pran-kơdăng yŏk ne-lô̆ gư̆ptî mpăl ƀŏ dơng gừn mbư̆ng nơ̆m dàlîng, tơs lah:

“Jăt gư̆p jơno dô, ƀòn dơng Ƀaƀilôn

rơp kŏng mbư̆ng kơdăng nteàh,

gư̆m rơp ơ̆ dơ̆ găy dî lăng tơmpơl te,

22jơno kơ̆ntàs cro pĕ kơñi, pŏ cư̆ng, cro ôh kơluôk,

gư̆m cro ôh kơmbòt

rơp ơ̆ dơ̆ găy kơnău dî anẵu e te,

lơ̆gay cro jăk-sai

rơp ơ̆ hôm tom dî jôi tơmpơl anẵu e te,

jơno kơ̆ntàs ƀŏk mpăl

rơp ơ̆ hôm tom kơnău dî anẵu e te.

23Jơno ang oềs đeng

rơp ơ̆ dơ̆ găy bơang-ang anẵu e te,

jơno tơs cro bơtô klo î bơtô ua

rơp ơ̆ dơ̆ găy kơnău dî nơ̆m anẵu e te,

bơh tơmpôl cro kă-brău e dê la tơmpôl cro dî gơnoăr-pran nơ̆m ple-ù,

bơh lơ̆gay lơgơ sŏng kŏng blăc-pơlum bơh jơno hôi gru e dê.

24Mham kơp cro gơnoăr-hwơr băl î cro sang-goh,

gư̆m jơh lơ̆gay tơmpôl cro găy sŏng kŏng tơngsơ̆t nơ̆m ple-ù sŏng dî jôi tơmpơl anẵu gô.”