Tơs Sơđah Jơno Ndăp 14

1Sŏng gư̆n ăñ lăng tơmpơl, gừn tò, Belàt Kon ñă ăm cŭng-yồ Siôn, gư̆m băl î Kơnràñ la du-rhieng puôn-jư̆t puôn rbô hê cro dî sơnăn Kơnràñ î sơnăn Bàp Kơnràñ dî cêh cŭngsî klieng ƀòn gô dê. 2Gừn ăñ kơnău jơno tơs bơh cŭngsî trồ gư̆ptî jơno tơs ndrăm-ndròm sơdieng dà khăi dê, gư̆ptî ndrăm tơnàs dơng, î Jơno ăñ sŏng kơnău gừn gư̆ptî jơno kơ̆ntàs lơ̆gay cro ăm pĕ kơñi gô. 3Ƀòn gô đas-sờ du jơno đas-sờ mhăy sơđàp sơban gư̆m sơđàp puôn-lăm jơno wîn jîng î lơ̆gay cro kwăng kra, mà ơ̆ tom cro găy digơlăn bơtê gư̆t jơno đas-sờ gư̆n nư̆ng sî du-rhieng puôn-jư̆t puôn rbô hê cro sŏng dî tơwai tăc bơh dunya. 4Dô la tơmpôl cro hôm dahrăư kŏng sơmơ̆-sơmĭñ î cro-ua, bơh ƀòn gô la tơmpôl cro hôm rlung. Dô la tơmpôl cro swà jăt Belàt Kon anẵu găy mà Kơnràñ swà. Tơmpôl ƀòn dô sŏng dî tơwai bơh nhòng kon-mơnùs gư̆ptî ple sơm năm ma Yang Tơm Trồ gư̆m ma Belàt Kon, 5ơ̆ tom jơno blăc blơ̆ găy dî jôi tơmpơl anẵu kơndẵư ƀòn gô, bơh ƀòn gô ơ̆ tom têl sơmơ̆ găy.

6Sŏng gư̆n ăñ tơmpơl du hôi cro gơndrơh nde pơ nơ̆m nhòng trồ, tom Jơno Niem hôm miek miek lơi tơs tơnggư̆t ma lang bol nơ̆m ple-ù — băl î ma lơ̆gay lơgơ, nŏk-noi, kơp jơno tơs gư̆m lang bol — 7dreo dơng dẵư lah: “Duh kơ̆mbrit cĕ Yang Tơm Trồ gư̆m ăn jơno gơklŏ ma Kơnràñ, bơh tô̆ jơ cahrña Kơnràñ dê sŏng trôh. Duh-khoai cĕ Bơtao bơjîng trồ, ù, dàlîng gư̆m lơ̆gay sơdieng dà.”

8Du hôi cro gơndrơh nde, cro gơndrơh dơ̆ bea, jăt ma-ngkơi, tơs lah: “Gô tơlah rlăm lờt, Ƀaƀilôn dơng sŏng tơlah rlăm, rơ̆ la cro bơtrôt lơ̆gay kơp lơgơ ñô bơh alăk jơno tơcao dơng bơh jơno rês-àr bơnan gô dê.”

9Du hôi cro gơndrơh nde, cro gơndrơh dơ̆ păy, jăt ma-ngkơi ƀòn gô, tơs dơng dẵư, lah: “Dilah cro găy duh-khoai jơno puôn jư̆ng băl î rồp-ràk gô, gư̆m dưñ-lăñ têl cŭngsî klieng hala nơ̆m tê mơ̆n, 10gừn cro rơ̆ kŭng rơp ñô alăk jơno tơcao dơng Yang Tơm Trồ dê, la alăk ơ̆ klài trồt nơ̆m wan jơno tơcao dơng Kơnràñ dê, gư̆m cro rơ̆ rơp kŏng jê-kơkua bơh oềs î sieu sơđàp măt lơ̆gay cro gơndrơh sang-goh î sơđàp măt Belàt Kon. 11Phô̆ bơh anẵu jê-kơkua ƀòn gô dê pơ cŭngsî trôh dî miek miek, ơ̆lơ̆ ơ̆lŭi, gư̆m ƀòn gô ơ̆ tom jơno bơdê tơnge băl î tơmăng, rơ̆ tơmpôl cro duh-khoai jơno puôn jư̆ng băl î rồp-ràk gô, gừn cro găy dưñ-lăñ têl sơnăn gô dê. 12Dô la jơno ăt-ăl kŏng-ăt lơ̆gay cro sang-goh dê, tơmpôl cro prăp ăn lơ̆gay jơno pơđơ bơlăm Yang Tơm Trồ dê gư̆m jơno don anẵu Yang Jesu.”

13Ăñ kơnău du jơno tơs bơh cŭngsî trồ, lah: “Cêh cĕ: Bơh dô trôh ma-ngkơi, lơnge ma cro sơ̆t la cro sơ̆t nơ̆m Yang.” Yang Hwîng tơs: “Ngăn, lơi ƀòn gô rơp bơdê bơh lơ̆gay bră sơòs-gleh ƀòn gô dê, bơh lơ̆gay bră lơh ƀòn gô dê rơp jăt băl î ƀòn gô.”

14Sŏng gư̆n ăñ lăng nê̆, gừn năy, du khô̆k tô̆ bẵu, gừn nggui cŭngsî tô̆ la cro gôlơh gư̆ptî Kon-Mơnùs, tom sơgơn-bơtao bơh î màh đoa cŭngsî găl Kơnràñ, gư̆m du ƀĕ mơ̆ sồt nơ̆m tê Kơnràñ. 15Sŏng gư̆n du hôi cro gơndrơh nde tơlôh bơh hîh duh-khoai, dơng dẵư hôi Bơtao ndăng nggui cŭng tô̆: “Dăn dờp mơ̆ Kơnràñ gừn koh, bơh tô̆ jơ lơi koh sŏng trôh, bơh kơnnhe koh nơ̆m ple-ù sŏng dư̆m lờt.” 16Bơh gư̆n la Bơtao nggui cŭng tô̆ mbư̆ng mơ̆ Kơnràñ nơ̆m ple-ù, gừn ù kŏng koh.

17Sŏng gư̆n du hôi cro gơndrơh nde tơlôh bơh hîh duh-khoai cŭngsî trồ, cro gơndrơh dô kŭng dî du ƀĕ mơ̆ sồt. 18Du hôi cro gơndrơh nde te, la cro gơndrơh dî gơnoăr nơ̆m oềs, tơlôh bơh kaƀang duh-khoai, gừn gô dơng dẵư hôi cro gơndrơh dî mơ̆ sồt, lah: “Dờp e tơlôh cĕ mơ̆ sồt mơ̆n gừn pĕ tơgom lơ̆gay ngkơ̆m ño bơh lơ̆gay sî ño nơ̆m ple-ù, bơh lơ̆gay ngkơ̆m ño ƀòn gô dê sŏng dư̆m lờt.” 19Bơh gư̆n la cro gơndrơh mbư̆ng mơ̆ gô nteàh ù gừn pĕ tơgom buơn ño nơ̆m ù, sŏng gư̆n mbư̆ng nơ̆m mpăl păt ño dơng jơno tơcao dơng Yang Tơm Trồ dê. 20Mpăl păt ño dî jă makin ƀòn dơng gư̆m mham nơ̆m mpăl păt gư̆n hua makin yơng trôh nơ̆m ƀơng kang aseh, lơmŏng du-rbô pro-rhieng ettađơ.