Tơs Sơđah Jơno Ndăp 13

1Pơnjăt bơh gư̆n, ăñ tơmpơl du-lăm jơno puôn jư̆ng swà hao tơlôh bơh sơ dàlîng, dî jư̆t ƀĕ ngkăy gư̆m poh-lăm găl, î cŭngsî kơp ngkăy gô dê la jư̆t-lăm sơgơn-bơtao, mà cŭngsî kơp găl gô dê la du sơnăn tơs sơmăm tìs î Yang Tơm Trồ. 2Jơno puôn jư̆ng mà ăñ tơmpơl gừn gư̆ptî klîh-sơmăñ, kơ̆mpang jư̆ng gô dê gư̆ptî jơko, hôm kơndẵư gô gừn gư̆ptî kơndẵư klîh-phơ̆m, gư̆m nagrài dờp gơnoăr mơ̆n ma gô, băl î sơban mơ̆n gư̆m gơnăp-gơnoăr dơng ngăn. 3Du-lăm nhòng lơ̆gay găl gô dê gôlơh gư̆ptî sŏng kŏng pơng tơngsơ̆t trôh sơ̆t, mà sồt-rmañ păl sơ̆t gô dê sŏng dî sămƀeah. Du dunya e lơh phadêh-phadai mà swà jăt jơno puôn jư̆ng, 4gừn ƀòn gô duh-khoai nagrài bơh gô sŏng dờp gơnoăr ma jơno puôn jư̆ng, ƀòn gô kŭng duh-khoai jơno puôn jư̆ng, lah: “Cro găy gư̆ptî jơno puôn jư̆ng, gư̆m cro găy digơlăn tơmlơh tơmdră wăl dî gô?” 5Du-lăm kơndẵư tơs jơno tơngyơng să gư̆m jơno tơs sơmăm tìs î Yang Tơm Trồ dî dờp e ma jơno puôn jư̆ng, gơnăp-gơnoăr kŭng dî dờp e ma gô lơi lơh bră nhòng puôn-jư̆t bea kơnnhe. 6Bơh gư̆n la, jơno puôn jư̆ng pẵư dẵư gô tơs jơno sơmăm tìs tơmdră wăl Yang Tơm Trồ, tơngyŏ-tơnghiel sơnăn Kơnràñ gư̆m hîh jư̆m bơdơh Kơnràñ dê — tơmpôl cro ăm anẵu cŭngsî trồ. 7Jơno puôn jư̆ng dî e gơnoăr swà tơmlơh î cro sang-goh gư̆m pha-lĭn rlo ƀòn gô, gơnăp-gơnoăr kŭng dî dờp e ma gô nơ̆m kơp nŏk-noi, lang bol, jơno tơs î kơp lơgơ. 8Lơ̆gay kơp lang bol nơ̆m ple-ù rơp duh-khoai gô, la kơp cro găy mà sơnăn măt cro rơ̆ dê sŏng ơ̆ dî cêh nhòng Sră Jơno Jîng Belàt Kon dê, Bơtao kŏng tơngsơ̆t, bơh sơm bơjîng lơgơ dunya. 9Dilah cro găy dî tua, gừn iet cĕ.

10Dilah cro găy sŏng lơh nên păl kŏng kơ̆p iyà,

cro gư̆n dî păl swà gung dô,

dilah cro găy rơp kŏng tơngsơ̆t bơh pàs-đao,

cro gư̆n păl kŏng tơngsơ̆t bơh pàs-đao.

Dô la jơno ăt-ăl kŏng-ăt gư̆m jơno don lơ̆gay cro sang-goh dê.

11Sŏng gư̆n ăñ tơmpơl du-lăm jơno puôn jư̆ng nde swà hao tơlôh bơh nơ̆m ù, gừn gô dî bea ƀĕ ngkăy gư̆ptî belàt kon, mà gô răk-sa gư̆ptî nagrài. 12Gô ngui lơ̆ gơnoăr jơno puôn jư̆ng dơ̆ sơm sơđàp măt jơno puôn jư̆ng gư̆n, gư̆m gô sơntơm lơh gơnoăr dô lơi lơh ple-ù băl î lang bol nơ̆m ple-ù rơp duh-khoai jơno puôn jư̆ng dơ̆ sơm, rơ̆ la jơno puôn jư̆ng dî sồt-rmañ păl sơ̆t sŏng dî sămƀeah. 13Gô lơh lơ̆gay têl phadêh dơng mang, tien gơs gô digơlăn lơh oềs bơh cŭngsî trồ duh nteàh ù ƀăt sơđàp măt kon-mơnùs. 14Bơh î lơ̆gay têl phadêh mà gô dî e gơnoăr lơh sơđàp măt jơno puôn jư̆ng, gô pơlum lang bol nơ̆m ple-ù, tơm tô̆ pơđơ lang bol nơ̆m ple-ù lơh rồp-ràk jơno puôn jư̆ng tom sồt-rmañ bơh pàs-đao mà kŭng hôm jîng. 15Gô dî e gơnoăr dờp nhim ma rồp-ràk jơno puôn jư̆ng gư̆n dê, lơi rồp-ràk jơno puôn jư̆ng tien gơs tơs dî, gư̆m lơh cro găy ơ̆ duh-khoai rồp-ràk jơno puôn jư̆ng păl kŏng tơngsơ̆t sơ̆t. 16Gô kŭng lơh kơp cro, êt kŭng gư̆ptî dơng, kơnhơ̆p kŭng gư̆ptî kơsòt, khăt-gơboh băl î dê̆-gơna, lơh mơmơh digơlăn e kon-mơnùs du-lăm têl nơ̆m kơ̆mpang tê ma ƀòn gô dê hala cŭngsî klieng ƀòn gô, 17lơi ơ̆ tom kơp cro găy digơlăn tăc hala brău dî dilah cro gư̆n ơ̆ dî têl gư̆n, la sơnăn Jơno puôn jư̆ng dê, hala khà sơnăn gô dê. 18Jơno jăk-sai la dô: Cro găy dî jơno gư̆t wơng, cro gư̆n yà katîng khà cĕ jơno puôn jư̆ng dê. Bơh gô la khà kon-mơnùs dê, gừn khà gô dê la pro-rhieng pro-jư̆t pro.