Tơs Sơđah Jơno Ndăp 12

1Sŏng gư̆n du jơno têl phadêh dơng dî lăng tơmpơl nơ̆m cŭngsî trồ: du hôi cro-ua cù ma să mơ̆n măttơnge, gư̆m mătkhe ăm nteàh jư̆ng gô, băl î du-lăm sơgơn-bơtao jư̆t-bea lăm sơmăñ cŭngsî găl gô, 2gừn bơh tơwă, gô dreo dơng bơh jơno jê bơda, gư̆m ndăng jê-kơkua gleh-glăr lơi bơda. 3Gư̆m du-lăm têl phadêh nde dî sơđah tơmpơl cŭngsî trồ: Lăng tò, du-lăm nagrài dơng să brông dî poh-lăm găl, jư̆t ƀĕ ngkăy, î poh-lăm sơgơn-bơtao cŭngsî kơp găl gô dê. 4Tieng gô dê hwa du pơnah păy khà sơmăñ cŭngsî trồ, sŏng gư̆n mbư̆ng ƀòn gô nteàh ple-ù. Sŏng gư̆n nagrài ñă ăm sơđàp cro-ua mơñ bơda, lơi tơm tô̆ cro-ua bơda gừn gô rơp dưñ sa lon kon gô dê. 5Gô bơda du hôi kon klo, kon klo la cro rơp ăt-bồ lơ̆gay kơp lơgơ bơh î mư̆ng-jra lòs. Sŏng gư̆n kon gô dê dî tơmpìt dưñ ma Yang Tơm Trồ gư̆m trôh anẵu sơban Kơnràñ, 6hôm cro-ua gừn toat pleh nơ̆m ƀlang-càs, anẵu mà gô tom du-anẵu dî Yang Tơm Trồ rcăng lơs lai nơ̆m gư̆n, lơi dî tơmpôl cro jư lăng gô nơ̆m anẵu dô nhòng du-rbô bea-rhieng pro-jư̆t nge.

7Sŏng gư̆n tom du jơno tơmlơh cŭngsî trồ. Mikael gư̆m lơ̆gay cro gơndrơh gô dê tơmlơh î nagrài; gừn nagrài băl î lơ̆gay cro gơndrơh gô tơmlơh wăl. 8Bơh gư̆n gô ơ̆ tăl pran tơmdră wăl, anẵu ƀòn gô ăm kŭng ơ̆ hôm dî tơmpơl cŭngsî trồ te. 9Bơh gư̆n la nagrài dơng kŏng mbư̆ng nteàh — beh yo, dî sơnăn la càrak hala Satan, cro blăc-pơlum du dunya — gô kŏng mbư̆ng nteàh ple-ù, lơ̆gay cro gơndrơh gô dê kŭng kŏng mbư̆ng nteàh băl î gô. 10Sŏng gư̆n ăñ kơnău du jơno tơs dơng cŭngsî trồ, lah:

“Jơ dô, jơno dŏng-klàs, gơnăp-gơnoăr,

gư̆m lơgơ Yang Tơm Trồ ƀòn mơ̆n dê sŏng trôh,

băl î gơnăp-gơnoăr Bơtao Kŏng Bŏng Mơñà Kơnràñ dê,

tài bơh cro yă yom oh mi rôh lŏ ƀòn mơ̆n dê,

la cro tơnge-tơmăng yă yom ƀòn gô sơđàp măt Yang Tơm Trồ ƀòn mơ̆n, sŏng kŏng mbư̆ng nteàh ple-ù.

11Ƀòn gô sŏng pha-lĭn rlo ma gô kơnơm bơh mham Belàt Kon gư̆m kơnơm bơh jơno lơh cư̆ng mơ̆n dê,

ƀòn gô ơ̆ kơloh-kơlài jơno jîng mơ̆n dê tien gơs păl sơ̆t.

12Tài bơh jơno rơ̆, sơhờp-sờhơn cĕ, ơ lơ̆gay dăp trồ

băl î lơ̆gay cro găy ăm nơ̆m gư̆n!

Sơòs-gleh ma ù nteàh gư̆m dàlîng,

bơh càrak sŏng jư anẵu ƀòn mê,

tơm tô̆ ndăng tom jơno tơcao dơng,

bơh gô gư̆t gô hôm nư̆ng du êt tô̆ tơnge te.”

13Tơm tô̆ nagrài đăl gư̆t lah gô sŏng kŏng mbư̆ng nteàh ple-ù, gừn gô tơte jăt cro-ua, la cro sŏng bơda kon klo rơ̆. 14Sŏng gư̆n mơnơ klang-bŭng dơng dî e ma cro-ua gư̆n lơi gô pơ trôh nơ̆m ƀlang-càs, trôh anẵu mơ̆n dê, anẵu mà gô dî rong-siem nơ̆m gư̆n nhòng du tô̆ tơnge, lơ̆gay tô̆ tơnge î nggùl tô̆ tơnge — pleh wĭc bơh sơ măt beh. 15Bơh gư̆n la, beh kơ̆mbròt dà tơlôh bơh nhòng kơndẵư gư̆ptî dà măy dơng tơte jăt cro-ua, lơi gô digơlăn lơh cro-ua kŏng dà blah kơbôt iyà. 16Sŏng gư̆n ple-ù dŏng-kơl cro-ua, ple-ù hà kơndẵư gừn hùc lon rbong dà mà nagrài sŏng kơ̆mbròt tơlôh bơh kơndẵư gô. 17Bơh gư̆n la nagrài gơhao tơcao î cro-ua, sŏng gư̆n gô swà gung swà tơmlơh î pơnah hôm wăl nơ̆m nŏk-noi cro-ua dê, la tơmpôl cro don jăt jơno-bơlăm Yang Tơm Trồ dê gư̆m prăp jơno lơh cư̆ng bơh Yang Jesu dê. 18Sŏng gư̆n gô ñă ăm cŭngsî ƀlang-càs anẵu mamằ dàlîng.