Tơs Sơđah Jơno Ndăp 15

1Sŏng gư̆n ăñ tơmpơl du-lăm têl dơng î phadêh nde cŭngsî trồ: poh hê cro gơndrơh ndăng iyà poh jơno rŭng-rai, lơ̆gay jơno lŭi-dơ̆t, tài bơh jơno tơcao dơng Yang Tơm Trồ dê dî wêl-tăl anẵu gô.

2Ăñ kŭng tơmpơl du-lăm jơno găy gư̆n gôlơh gư̆ptî dàlîng bơh î krơh dî tơm pơiyuă î oềs. Tơmpôl cro sŏng pha-lĭn rlo ma jơno puôn jư̆ng, rlo ma rồp-ràk gô, gư̆m rlo khà sơnăn gô dê, ndăng ăm ñă nơ̆m dàlîng krơh, iyà kơñi pĕ Yang Tơm Trồ dê. 3Ƀòn gô đas-sờ jơno đas-sờ Môise dê, cro dê̆-gơna Yang Tơm Trồ dê, î jơno đas-sờ Belàt Kon dê, lah:

“Khoai Yang la Yang Tơm Trồ, Bơtao Gơnoăr Dơng Rlo Lơ̆,

lơ̆gay bră lơh Kơnràñ dê dơng ngăn gư̆m phadêh ngăn.

Khoai Bơtao kơp lơ̆gay rai dê,

gung dà Kơnràñ la tơpăt-durư̆ng gư̆m tơpăt-ngăn.

4Khoai Yang, mơ̆t cro ơ̆ kơ̆mbrit-kơ̆mbròt,

gư̆m rơp ơ̆ jong-rơ sơnăn Kơnràñ?

Bơh nư̆ng du hôi Kơnràñ la sang-goh.

Bơh lơ̆gay lang bol rơp trôh

gư̆m duh-khoai sơđàp măt Kơnràñ

bơh lơ̆gay bră tơpăt-durư̆ng Kơnràñ dê sŏng dî tơs tơlôh makin.”

5Ma-ngkơi lơ̆gay bră gư̆n, ăñ lăng tơmpơl, hîh duh-khoai hîh bơdơh cư̆ng-tang dê pẵư tơlôh cŭngsî trồ. 6Poh hê cro gơndrơh iyà poh jơno rŭng-rai tơlôh bơh hîh duh-khoai, nơ̆m jơno cù lơh î bơtơi săy tơme sang-ngơt, ang gơcrà, gư̆m dî kăt săy đai lơh î màh tĕdơ klư̆k nùs. 7Sŏng gư̆n du-lăm nhòng puôn jơno wîn jîng dờp e ma poh hê cro gơndrơh poh-lăm jrồ lơh î màh ăn bîng jơno tơcao dơng Yang Tơm Trồ dê, Bơtao jîng trôh dî miek miek, ơ̆lơ̆ ơ̆lŭi. 8Hîh duh-khoai tơlôh bîng phô̆ bơh jơno gơklŏ Yang Tơm Trồ dê gư̆m bơh gơnăp-gơnoăr Kơnràñ, ơ̆ cro găy digơlăn mơ̆t dî nơ̆m nhòng hîh duh-khoai trôh dî jơ poh-lăm jơno rŭng-rai poh hê cro gơndrơh dê dî lơh wêl-tăl.