Mathiơ 27

1Jơ gư̆n, nơ̆m brê tơm ang ndrư̆m, lơ̆gay cro gơnoăr bơlăm-găl ăn jơno duh-khoai dơng gư̆m lơ̆gay cro kwăng kra nơ̆m tơmpôl lang bol sŏng tơmbơyê jôi kai-kơnĕ tơmdră wăl Yang Jesu lơi tơngsơ̆t Kơnràñ cĕ. 2Tơm tô̆ sŏng căp Kơnràñ wăl, ƀòn gô iyà Kơnràñ swà î jao nap ma cro kwăng dơng lơgơ Pilat.

3Jơ gư̆n, ma-ngkơi jơ Juđa, cro tơmdră Kơnràñ, tơmpơl lah Kơnràñ sŏng kŏng lơh nên glài, gừn bơh kah sơdơ wăl, gô kla wăl păy-jư̆t đŏng priè ma lơ̆gay cro gơnoăr bơlăm-găl ăn jơno duh-khoai dơng gư̆m lơ̆gay cro kwăng kra, 4tơs lah: “Ăñ sŏng tìs-glài bơh jao mham ơ̆ tom glài.” Mơya ƀòn gô kla dẵư: “Jơno bră gư̆n lêh ma ƀòn hî? Mê kŏng dêh.” 5Gừn ma-ngkơi jơ mbư̆ng nhẵư priè nơ̆m hîh duh-khoai, gô ruc tơlôh makin, gừn tơm tô̆ swà wĭc lờt, gô iyon ngkău tơngsơ̆t să. 6Jơ gư̆n, ma-ngkơi jơ săc khà đŏng priè, lơ̆gay cro gơnoăr bơlăm-găl ăn jơno duh-khoai dơng tơs lah: “Lơi khà priè dô nơ̆m tơ̆m hîh duh-khoai la ơ̆ dî păl bơh gư̆n la khà priè mham dê.” 7Mơya tơm tô̆ tơmbơyê lờt, ƀòn gô sŏng tăc ƀlang srăy cro lơh gŏ bơh î khà priè gư̆n ăn lơi ma bră tăp ƀùc lơ̆gay cro năc crêh. 8Gư̆n-jîng, ƀlang srăy gư̆n dî sơnăn la “Ƀlang Srăy mham” trôh dî nge dô. 9Bơh gư̆n la, jơno dî tơs tơnggư̆t bơh cro gơnoăr-hwơr Jeremi dî sơlôh jîng iyŏ ngăn, lah: “Ƀòn gô dưñ păy-jư̆t đŏng priè, la khà priè cro lơh nên, la cro mà sŏng dî katîng khà bơh anẵu kon so Israel, 10gừn ƀòn gô dờp khà priè gư̆n lơi tăc ƀlang srăy cro jăk lơh mon ù dê, jăt gư̆ptî Yang sŏng sơđah pơđơ ăñ.”

11Jơ gư̆n, Yang Jesu ñă sơđàp măt cro kwăng dơng lơgơ, gừn cro kwăng rơ̆ lùp Kơnràñ lah: “Tơm iyŏ mê la Bơtao lang bol Juđa?” Sŏng gư̆n Yang Jesu tơs î ông gư̆n: “Ông ndăng tơs gư̆n” 12Gừn nơ̆m jơ Kơnràñ kŏng lơh-glài bơh lơ̆gay cro gơnoăr bơlăm-găl ăn jơno duh-khoai dơng gư̆m lơ̆gay cro kwăng kra, gừn Kơnràñ ơ̆ kla dẵư wăl jơno găy. 13Pơnjăt te, Pilat tơs î Kơnràñ: “Mê ơ̆ kơnău gư̆t nhẵư dơ̆ jơno ƀòn gô ndăng lơh cư̆ng tơmdră mê ơ̆h?” 14Gừn Kơnràñ ơ̆ kla dẵư ông gư̆n, tien gơs băl du dẵư kŭng ơ̆, trôh dî cro kwăng dơng lơgơ tơmpơl phadêh-phadai ngăn. 15Jơ gư̆n, nơ̆m nge bơjư̆m-sa, cro kwăng dơng lơgơ tom jơno ờs hồ ma lang bol du hôi cro glài mà ƀòn gô săc-rwơh. 16Pơnah nde, nơ̆m tô̆ tơnge gư̆n, cro ndăng jam du hôi cro glài tơngsơ̆t cro sơnăn la Ƀaraƀa. 17Gừn, ma-ngkơi jơ ƀòn gô dî jơnư̆m wăl, Pilat tơs î ƀòn gô lah: “Ƀòn oh mi kơñ ăñ hồ-toh cro găy ma ƀòn oh mi? Ƀaraƀa, hala Jesu, cro dî sơnăn la Yang Dŏng-Klàs?” 18Bơh ông ờs gư̆t lah ƀòn gô sŏng nap Kơnràñ ma ông bơh nùs tơmngañ. 19Jơ gư̆n, nơ̆m dơ̆ ông nggui nơ̆m kơgề cahrña, bo-ua cro kwăng pơyoa jơno tơs trôh ma ông, lah: “Dăn bư̆ng tom jơno găy trôh ma mê gư̆m ma cro tơpăt-durư̆ng gư̆n. Bơh nge dô, ăñ sŏng kŏng sơòs-sơngeh ngăn bơh du jơno bơbì bơh cro dô.” 20Hôm lơ̆gay cro gơnoăr bơlăm-găl ăn jơno duh-khoai dơng gư̆m lơ̆gay cro kwăng kra mơ̆ndơm nùs lang bol lơi ƀòn gô dăn hồ Ƀaraƀa mà tơngsơ̆t Yang Jesu. 21Mơya lơi kla wăl dẵư, cro kwăng dơng lơgơ tơs î ƀòn gô: “Oh mi kơñ ăñ hồ-toh cro găy nơ̆m bea hê cro dô ma oh mi?” Sŏng gư̆n ƀòn gô tơs lah: “Ƀaraƀa.” 22Pilat tơs î ƀòn gô: “Tîgư̆n, ăñ păl lơh jơno găy î Jesu, cro dî sơnăn la Yang Dŏng-Klàs?” Lơ̆gay ƀòn gô kla dẵư: “Gô păl kŏng pư̆ng điñ cŭngsî sî pư̆ng.” 23Mơya ông tơs: “Bơh jơno bờk-mơsăk găy mà cro gư̆n sŏng lơh tìs?” Mơya, ƀòn gô dreo dơng rlo te, lah: “Gô păl kŏng pư̆ng điñ cŭngsî sî pư̆ng.” 24Jơ gư̆n, Pilat, ma-ngkơi jơ tơmpơl lah mơ̆n ơ̆ tom dŏng dî jơno găy, mơya ala bơh gư̆n, du jơno sơlô̆ng-sơlăng ndăng sơlôh jîng, gừn dơ̆ e dưñ dà lờt, ông sŏng rao tê mơ̆n sơđàp măt lang bol, tơs lah: “Ăñ ơ̆ tom glài bơh mham nơ̆m cro dô. Oh mi kŏng dêh.” 25Gừn tơm tô̆ kla wăl dẵư, lơ̆gay lang bol tơs: “Mham gô dê tôh wăl cŭngsî ƀòn hî î cŭngsî kon so ƀòn hî.” 26Ma-ngkơi gư̆n, Pilat hồ-toh Ƀaraƀa ma ƀòn gô, sŏng gư̆n tơm tô̆ sŏng e pơng lơh Yang Jesu, ông e jao Kơnràñ swà lơi kŏng pư̆ng điñ cŭngsî sî pư̆ng.

27Dơ̆ rơ̆, ma-ngkơi jơ iyà Yang Jesu mơ̆t nơ̆m gơlăng cro kwăng lơgơ, lơ̆gay tơmpôl lĭñ cro kwăng lơgơ sŏng bơjư̆m wăl sơđàp măt Kơnràñ lơ̆gay tơmpôl lĭñ. 28Ma-ngkơi jơ hồ ao Kơnràñ, ƀòn gô tơngcù du blah ao rơnjai brông ma Kơnràñ. 29Dơ̆ tañ du-lăm sơgơn bơh î lẵu lờt, ƀòn gô tơngđoa nơ̆m găl Kơnràñ, băl î mư̆ng proh nơ̆m tê ma Kơnràñ, gừn ma-ngkơi jơ cun gơtăng sơđàp măt Kơnràñ, ƀòn gô tơngyŏ-tơnghiel Kơnràñ, lah: “Khoai Bơtao lang bol Juđa dê!” 30Gừn ma-ngkơi jơ soh dà dreo nơ̆m Kơnràñ, ƀòn gô dưñ mư̆ng proh gừn kư̆ pơng nơ̆m găl Kơnràñ. 31Tơm tô̆ ƀòn gô tơngyŏ-tơnghiel Kơnràñ sŏng lờt, ƀòn gô hồ ao rơnjai brông gừn tơngcù wăl Kơnràñ ao Kơnràñ dê, sŏng gư̆n hwa Kơnràñ swà lơi pư̆ng điñ cŭngsî sî pư̆ng.

32Jơ gư̆n, tơm tô̆ ndăng swà tơlôh, ƀòn gô tơmpơl du hôi cro Siren, sơnăn Simôn, mà ƀòn gô kơ̆p lơi ông tî sî pư̆ng ma Kơnràñ. 33Ma-ngkơi jơ trôh du-anẵu sơnăn la Gôgôtha, mà anẵu rơ̆ gơtha la “Yồ Katîng Găl,” 34ƀòn gô e Kơnràñ ñô alăk bơyoă băl î năc bơtăng; Tơm tô̆ lièp sŏng, gừn Kơnràñ ơ̆ kơñ ñô. 35Jơ gư̆n, dơ̆ pư̆ng điñ Kơnràñ cŭngsî sî pư̆ng lờt, ƀòn gô tơmpà găp ôi ao Kơnràñ bơh î jơno tă khà, 36gừn ƀòn gô ăm jư Kơnràñ, tơm tô̆ nggui nơ̆m gư̆n. 37Đah cŭngsî găl Kơnràñ, ƀòn gô iyông jơno kơ̆p nên glài Kơnràñ, dî cêh tîdô: “DÔ LA JESU, BƠTAO LANG BOL ISRAEL.” 38Dơ̆ gư̆n, tom bea hê cro kơntô̆ng kŏng pư̆ng điñ î Kơnràñ, du hôi ăm đah ma î du hôi ăm đah eo. 39Tơmpôl cro swà găn tơngyŏ-tơnghiel Kơnràñ, tơtô găl mơ̆n, 40gừn tơs lah: “Ơ cro phà tơngroh hîh duh-khoai î băt tơngñă wăl nơ̆m păy nge năy, dŏng-klàs cĕ dêh sătan mê hă! Dilah mê la Kon Yang Tơm Trồ, gừn jư cĕ nteàh bơh nơ̆m sî pư̆ng!” 41Kŭng gư̆ptî rơ̆, lơ̆gay cro gơnoăr bơlăm-găl ăn jơno duh-khoai dơng, băl î lơ̆gay cro bơtău jơno-bơlăm gư̆m lơ̆gay cro kwăng kra, tơm tô̆ tơngyŏ-tơnghiel Kơnràñ, sŏng tơs lah: 42“Gô dŏng-klàs tơmpôl cro nde, gô gừn ơ̆-rgê dŏng-klàs dêh sătan mơ̆n. Gô la Bơtao Israel dê. Jơ dô, gô păl jư bơh nơ̆m sî pư̆ng, gừn ƀòn mơ̆n rơp don anẵu gô. 43Gô don kơnơm anẵu Yang Tơm Trồ, jơ dô gừn lơi cĕ Kơnràñ dŏng-klàs gô dilah Kơnràñ kơñ gô. Bơh gô sŏng tơs lah: ‘Ăñ la Kon Yang Tơm Trồ.’” 44Pơnah nde, sătan nhẵư hê cro kơntô̆ng, la tơmpôl cro kŏng pư̆ng điñ băl î Kơnràñ, ƀòn gô kŭng tơngyŏ-tơnghiel Kơnràñ.

45Jơ gư̆n, bơh jơ dơ̆ pro, brê kơnăm ñô̆ng tơlôh cŭngsî lơ̆ lơgơ trôh dî jơ dơ̆ sơ̆n. 46Sŏng gư̆n mơñ jơ dơ̆ sơ̆n, Yang Jesu hôi du-dẵư dơng, lah: “Êli, Êli, lama saƀaktani?” gơtha la “ơ Yang Tơm Trồ ăñ jê, ơ Yang Tơm Trồ ăñ jê, ngglơh Kơnràñ lơi căư ăñ?” 47Mơya ma-ngkơi jơ kơnău tîgư̆n, nhẵư hê cro ñă nơ̆m gư̆n tơs lah: “Gô hôi Êli.” 48Ƀăt jơ gư̆n, du hôi cro nơ̆m khà ƀòn gô, ma-ngkơi jơ cơplŏk swà gừn dưñ kơnsồp, iyrù bîng dà sràt ăn cŭngsî duƀĕ mư̆ng proh, sŏng dờp ma Kơnràñ ñô. 49Mơya tơmpôl cro hôm wăl tơs: “Lơi cĕ bră gô. Ƀòn mơ̆n lăng Êli tom trôh dŏng-klàs gô ơ̆.” 50Bơh gư̆n, ma-ngkơi jơ hôi wăl du-dẵư dơng, Yang Jesu tă nhim. 51Gư̆n lăng năy, kơmang nơ̆m hîh duh-khoai kŏng tơcrè tơhà bea đah bơh cŭngsî trôh nteàh, hôm ù kŏng ndrăm wăñ, gừn lô̆ tơliê dơng kŏng bơcah. 52Khăi mơ̆ntô ƀùc pẵư hwơng gừn khăi ƀùc cro sang-goh dê sŏng bĭc lơhà dî lơh jîng wăl. 53Gừn dơ̆ tơlôh makin bơh nơ̆m mơ̆ntô ma-ngkơi jơno jîng wăl Kơnràñ dê, ƀòn gô sŏng mơ̆t nơ̆m ƀòn dơng sang-goh î sơđah-să ma khăi cro. 54Jơ gư̆n, ma-ngkơi jơ tơmpơl ndrăm wăñ ù î lơ̆gay bră tơmtom, cro ăt-bồ du-rhieng lĭñ băl tơmpôl cro ăm jư Yang Jesu băl î ông sŏng kơ̆mbrit-kơ̆mbròt ngăn, tơs lah: “Iyŏ ngăn, cro dô la Kon Yang Tơm Trồ.” 55Hôm khăi cro-ua nơ̆m gư̆n, lăng nê̆ nê̆ bơh ma wĭc, la tơmpôl cro sŏng swà jăt Yang Jesu, duh bră Kơnràñ bơh Galile. 56Nơ̆m khà ƀòn gô tom Mari Madơlen, Mari mơi Jakơ î Jôsep, băl î mơi lơ̆gay kon klo Seƀeđe dê.

57Jơ gư̆n, tơm tô̆ sŏng trôh brê mhău ñô̆ng, du hôi cro kơnhơ̆p-mơ̆nda sŏng trôh bơh Arimathe, sơnăn la Jôsep, mà sătan ông kŭng kŏng lơh jîng cro bơtê Yang Jesu dê. 58Ma-ngkơi jơ trôh tơmtom Pilat, ông dăn ƀùc Yang Jesu. Dơ̆ gư̆n, Pilat e gơnoăr lơi pơđơ jao ƀùc ma ông. 59Dơ̆ sŏng dưñ ƀùc, Jôsep pùc wăl ƀùc rơ̆ nơ̆m bơtơi lơhiê niem, 60sŏng gư̆n prăp ăn ƀùc nơ̆m mơ̆ntô ƀùc mhăy sătan mơ̆n dê mà ông sŏng phà nhòng lô̆ tơliê. Tơm tô̆ tơmblă du-khŏk lô̆ dơng tơ̆l mpông mơ̆ntô ƀùc lờt, ông tơlôh swà. 61Jơ gư̆n, Mari Madơlen gư̆m du hôi Mari nde ăm nơ̆m gư̆n, nggui lăng mađàp mơ̆ntô.

62Sŏng gư̆n nge ma-ngkơi, rơ̆ la ma-ngkơi nge Rcăng Jơno, lơ̆gay cro gơnoăr bơlăm-găl ăn jơno duh-khoai dơng î tơmpôl cro Pharisi bơjư̆m wăl sơđàp Pilat, 63tơs lah: “Ơ cro kwăng, ƀòn hî sơdơ lah dơ̆ hôm jîng, cro blăc-pơlum năy sŏng tơs: ‘Păy nge ma-ngkơi, gừn ăñ rơp jîng wăl.’ 64Gư̆n-jîng, dăn ông e gơnoăr pơđơ lơi cro ăm jư mơ̆ntô ƀùc dî bơkhê trôh dî nge dơ̆ păy. Bulah ơ̆, lơ̆gay cro bơtê gô trôh lờt, digơlăn kơntô̆ng ƀùc gô, gừn tơs î lang bol: ‘Kơnràñ sŏng dî lơh jîng wăl bơh jơno sơ̆t,’ gừn jơno blăc-pơlum ma-ngkơi dô rơp mơsăk rlo jơno bơhsơm.” 65Gư̆n-jîng, Pilat tơs î ƀòn gô: “Ƀòn ông dî cro lĭñ ăm jư. Swà cĕ, păl jư mơ̆ntô ƀùc bơkhê gư̆ptî jơno ƀòn ông gư̆t” 66Gừn ma-ngkơi jơ swà, tăp ƀăng-kì nơ̆m lô̆ tơliê băl î tơmpôl lĭñ ăm jư, ƀòn gô kơñ mơ̆ntô ƀùc dî bơkhê.